1, 2. (a) Kai jabapen turang seninanta Russell man sekalak rohaniwan si atena meteh uga kegiaten Ajar-Ajar Pustaka si Badia ibiayai? (b) Kai si man bahasenta i bas pasal enda?

 I BAS sada kesempaten, lit sekalak rohaniwan Gereja Reformasi si merhat meteh uga kegiaten Ajar-Ajar Pustaka si Badia ibiayai, emaka ideherina turang seninanta Charles T. Russell.

 ”La pernah pindo kami kolekte,” ijelasken turang seninanta Russell.

 ”Jadi, janari dat kena sen?” sungkun rohaniwan ndai.

 ”Adi kukataken man bandu uga situhuna, pasti la kam tek,” jabap Russell. ”Paksa lit kalak si nggit erlajar, la idudurken kantong kolekte ku lebe-lebena. Tapi, ieteh kalak enda maka kerina lit biayana. Ikatakenna bas pusuhna, ’Bale enda perlu biaya . . . Uga nge carana banci kubereken sitik sen?’”

 Itatap rohaniwan ndai turang seninanta Russell bagi si la tek.

 Iterusken Russell, ”Enggo kukataken situhuna man bandu. Isungkun kalak e aku, nina, ’Uga nge carana gelah banci kubere sitik sen?’ Paksa kalak enda dat pasu-pasu bage pe sen, igunakenna atena man Tuan. Adi la lit i bas ia, arus nge sipaksa?” a

² Payo, turang seninanta Russell ngataken ”situhuna”. Segedang sejarah, umat Dibata mereken sumbangen sukarela guna ndukung ibadat situhu-tuhu. I bas pasal enda, sibahas kari contoh Pustaka si Badia kerna si e bage pe sejarahta bas jaman modern. Asum sipelajari uga kegiaten Kinirajan ibiayai gundari, perlu sisungkun banta sekalak-sekalak, ’Uga carana banci kudukung Kinirajan?’

3, 4. (a) Kai si iteki Jahwe bas umatNa nari? (b) Uga kalak Israel ndukung pembangunen tabernakel?

³ Tek Jahwe man umatNa situhu-tuhu. IetehNa maka adi ibereNa kesempaten, alu ukur meriah banci icidahken kalak  e pembaktinna arah sumbangen sukarela. Perdiateken dua contoh i bas sejarah Israel.

⁴ Kenca minpin kalak Israel ndarat bas Mesir nari, isuruh Jahwe kalak e majekken kemah, ntah pe tabernakel, si banci ibongkar pasang, guna eribadat. Iperluken mbue biaya guna bahan ras perlengkapen. Iperentahken Jahwe gelah ibereken Musa kesempaten man umat e guna ndukung proyek enda, alu ngataken, ’Tep-tep kalak si atena nehken persembahen man Jahwe, ibabanalah persembahenna.’ (Kel. 35:5) Uga tanggapen umat e, si lenga ndekah ipaksa alu kejam guna erdahin jadi budak? (Kel. 1:14) Luar biasa kal dukungen kalak enda, nggit mereken emas, pirak, bage pe barang si meherga si debanna, si buen idatken kalak e i bas bekas tuanna nari, kalak Mesir. (Kel. 12:35, 36) Seh kal buena pemere kalak Israel, buen asangken si iperluken janah dungna ’isuruh gelah ulanai mereken sumbangenna’.​—Kel. 36:4-7.

5. Uga tanggapen kalak Israel paksa ibereken Daud kesempaten mereken sumbangen guna pembangunen rumah pertoton?

⁵ Sekitar 475 tahun kenca e, isumbangken Daud ’ertana’ guna mbiayai pembangunen rumah pertoton, pusat ibadat situhu-tuhu si pemena si tetap i doni. Kenca e, iberekenna kesempaten man kalak Israel gelah mere, alu nungkun, ”Genduari ise nari meriah ukurna mereken persembahen man [JAHWE]?” Itanggapi umat e alu ”mere man [JAHWE] alu ukur meriah dingen seh riahna iakapna mere e”. (1 Kro. 29:3-9) Iakui Daud janari situhuna rehna sumbangen e, alu ngerana i bas pertotonna man Jahwe, ”Kerina ialoken kami i bas Kam nari nge, janah kami ngulihkenca ngenca man baNdu kai si enggo iberekenNdu man kami.”​—1 Kro. 29:14.

6. Engkai maka perlu sen guna ngelakoken pendahin Kinirajan gundari, janah kai penungkunen si lit kerna e?

⁶ La perlu ipaksa Musa bage pe Daud gelah umat Dibata mere sumbangen. Umat enda mere alu ukur meriah. Uga gundari enda? Tentu sisedari maka perlu sen i bas ngelakoken pendahin Kinirajan Dibata. Perlu mbue biaya guna ncetak ras mbagiken Pustaka si Badia bage pe ogen si deban, majekken ras ngerawat ingan perpulungen bage pe fasilitas cabang, dingen guna mereken penampat si meter man turang senina sada kiniteken paksa lit mara. Emaka, lit me penungkunen: Janari rehna kerina dana e? Perlu nge pengikut-pengikut Raja e isuruh-suruh guna mere?

7, 8. Engkai maka umat Jahwe la mindo-mindo ntah pe ngarapken sen bas manusia nari?

⁷ Turang seninanta Russell ras teman-temanna si deban la nggit ngusih cara mpepulung dana si seh kal umumna i bas gereja-gereja Susunen Kristen. I bas terbiten Watch Tower si peduaken, si erjudul ”Nggit nge Kam Ndatken  ’Zion’s Watch Tower’?” ikataken Russell, ”Tek kami maka lit JAHWE si ndukung ’Zion’s Watch Tower’, erkiteken majalah enda labo pernah mindo-mindo ntah pe ngarap gelah idukung manusia. Adi si ngataken, ’Kerina emas ras pirak i deleng-deleng Aku empunasa,’ lanai mereken dana si iperluken, angkai kami maka eme waktuna mpengadi penerbiten.” (Hag. 2:7-9) Lebih 130 tahun kenca e, The Watchtower ras organisasi si nerbitkenca sukses ngasa gundari!

⁸ Umat Jahwe la mindo-mindo sen. La idudurkenna piring kolekte ntah pe ngirim surat gelah mindo sumbangen. Kalak enda pe la erbahan lotre, lelang, bazar ntah pameran guna mpepulung dana. Tetap iikutken kalak enda kai si mbarenda ikataken Watch Tower, ”La pernah patut akap kami mindo sen guna Tuan, bagi kebiasan gereja-gereja . . . La akap kami sopan mpepulung sen alu mindo-mindo erkiteken gelar Tuan, enda la ngena atena, janah la ngerehken pasu-pasuna nandangi kalak si mere ntah pe pendahin si ilakoken.” b

9, 10. Kai salah sada alasenta mereken sumbangen alu ukur meriah?

⁹ Selaku rayat Kinirajan gundari enda, la kita perlu ipaksa gelah mere. Sebalikna, meriah ukurta nggunaken sen bage pe ertanta si debanna guna ndukung kegiaten Kinirajan. Engkai maka bage kal kita nggitna mere alu ukur meriah? Mari sibahas telu alasenna.

¹⁰ Si pemena, sibereken sumbangen sukarela erkiteken keleng ateta Jahwe janah nggit ngelakoken kai ”si ngena ateNa”. (1 Joh. 3:22) Meriah ukur Jahwe ngidah umatNa si nggit mere i bas pusuhna nari. Mari siperdiateken kata-kata rasul Paulus kerna uga kalak Kristen mere. (Oge 2 Korinti 9:7.) Kalak Kristen situhu-tuhu labo mberat akapna mere ntah pe terpaksa. Sebalikna, mere ia erkiteken nggo ”itetapkenna i bas ukurna” guna ngelakokenca. c Ertina, nggit ia mere adi nggo ipertimbangkenna sada keperlun ras uga cara ngelakokenca. Iergai Jahwe kal kalak si bage erkiteken ”Dibata engkelengi kalak si mere alu ukur meriah”.

11. Kai si ngiahken kita mereken si mehulina man Jahwe?

¹¹ Si peduaken, mereken sumbangen materi sada cara ngataken bujur man Jahwe nandangi kerina pasu-pasu si nggo sialoken. Perdiateken prinsip Undang-Undang Musa enda. (Oge Ulangen 16:16, 17.) Paksa reh ku telu perayan tahunen, tep-tep dilaki kalak Israel arus maba pemere ”sue ras pasu-pasu si enggo ibereken [Jahwe]” man bana. Emaka, sope reh ku perayan e, arus ikira dilaki e lebe pasu-pasu si nggo ialokenna janah ipereksana pusuhna, arus itimbang-timbangna  pemere si mehulina si banci ibabana. Bage ka pe kita, paksa siukuri bage buena pasu-pasu si nggo sialoken bas Jahwe nari, tersuruh kal pusuhta guna maba pemerenta si mehulina man baNa. Pemerenta si i bas pusuhta nari, si termasuk sumbangenta secara materi, ncidahken uga belinna pengerganta nandangi pasu-pasu Jahwe si simpar.​—2 Kor. 8:12-15.

12, 13. Engkai maka sumbangenta si alu ukur meriah ncidahken maka keleng ateta Raja e, janah asa kai buena si banci ibereken tep-tep kalak?

¹² Si peteluken, arah sumbangen sukarela, sicidahken maka keleng ateta Rajanta Jesus Kristus. Engkai maka bage? Perdiateken kai si ikataken Jesus man ajar-ajarna i bas berngi pendungi kegeluhenna i doni. (Oge Johanes 14:23.) Nina Jesus, ”Kalak si engkelengi aku, ikutkenna kap katangku.” ”Kata” Jesus termasuk perentahna guna mberitaken berita si meriah kerna Kinirajan i belang-belang doni. (Mat. 24:14; 28:19, 20) Sidalanken ”kata” e alu nggunaken kerina si lit i bas kita eme waktu, tenaga, bage pe materinta, guna  erbahan maju pendahin erberita. Alu bage, sicidahken maka keleng ateta Raja Mesias.

¹³ Jelas me, selaku rayat Kinirajan si setia, sidukung ateta Kinirajan alu bulat ukur alu mereken sumbangen sen. Uga banci silakoken? Enda keputusenndu sendiri. Sibereken ateta si mehulina sue ras kiningasupenta. Tapi, nterem turang seninanta si la lit i bas ia. (Mat. 19:23, 24; Jak. 2:5) Terapuli kal kalak enda erkiteken ietehna maka iergai Jahwe ras AnakNa sumbangen si kitikna kal pe si iberekenna alu ukur meriah.​—Mrk. 12:41-44.

14. Sedekah ertahun-tahun, kai si ilakoken Saksi-Saksi Jahwe paksa mbagiken lektur?

¹⁴ Ertahun-tahun dekahna, Saksi-Saksi Jahwe mbagiken ogen Pustaka si Badia alu ngataken jumlah sumbangen si sitikna kal. Alu bage, kalak si la ersen pe banci ngaloken ogen e. Tentu saja, adi lit si mada jabu merhat ndatken ogen e tapi la banci mereken sumbangen, tetap nge ibereken perberita Kinirajan e man bana. Sura-sura kalak enda i bas pusuhna nari eme mereken ogen man kalak si tutus si nggit ngoge ras ndatken gunana.

15, 16. (a) Penyesuaien kai si ibahan Badan Pinpinen i bas tahun 1990 kerna mbagiken lektur? (b) Uga sumbangen sukarela ibereken? (Nehen ka kotak ” Uga Sumbangenta Igunaken?”)

¹⁵ I bas tahun 1990, mulai isesuaiken Badan Pinpinen caranta mbagiken lektur. Tangtangna i bas tahun e i Amerika Serikat, kerina lektur mulai ibagiken tuhu-tuhu alu sumbangen sukarela. Ijelasken sada surat si ibereken man kerina runggun i negeri e, ”Majalah ras lektur isikapken man perberita-perberita bage pe man jelma si nterem si nggit ngogesa alu la ipindo ntah pe ibahan saratna alu ngataken sumbangen si khusus guna ndatken sada lektur. . . . Ise pe si nggit banci mereken sumbangen guna mbiayai dahin pendidikenta, tapi banci idatna lektur alu mereken sumbangen ntah pe lang.” Pengaturen enda mpetangkas sifat pendahinta si rohani ras sukarela bage pe mpetangkas maka kita ’labo si njajaken kata Dibata’. (2 Kor. 2:17) Dungna, pengaturen sumbangen sukarela mulai ipake i cabang-cabang sebelang doni.

¹⁶ Uga sumbangen sukarela enda ibereken? I Bale Kinirajan Saksi-Saksi Jahwe, lit kotak sumbangen i bas ingan si la teridahsa kal. Tep-tep kalak banci mereken sumbangen ku je ntah pe langsung ngirim sumbangen ku salah sada badan hukum si igunaken Saksi-Saksi Jahwe. Tep-tep tahun, sada artikel i bas Sora Ermomo njelasken uga carana mereken sumbangen sukarela si bage.

17-19. Jelasken uga carana dana sumbangen ipake guna (a) pendahin sebelang doni, (b) pembangunen Bale Kinirajan sebelang doni, ras (c) pengeluaren runggun.

¹⁷ Pendahin sebelang doni. Dana ipake guna nutupi biaya pendahin erberita sebelang doni. Enda termasuk biaya  guna nerbitken lektur si ibagiken i belang-belang doni, majekken ras ngerawat kantor cabang bage pe rumah Betel, janah erbahan erbage-bage sekolah teokratis. Selain e, dana e pe ipake guna utusen-utusen injil, pertua keliling, bage pe perintis istimewa. Sumbangenta pe ipake guna nikapken penampat si meter man turang seninanta paksa lit mara. d

¹⁸ Pembangunen Bale Kinirajan sebelang doni. Dana ipake guna runggun-runggun si perlu majekken ntah pe mpesikap Bale Kinirajan. Asum sumbangen e ialoken, lit denga dana si tersedia guna nampati runggun-runggun si deban. e

¹⁹ Pengeluaren runggun. Dana ipake guna mbiayai pemaken ras perawaten Bale Kinirajan. Banci iusulken pertua gelah dana e ikirimken deba ku kantor cabang guna ipake i bas erbahan maju pendahin sebelang doni. Guna si e, ipeseh pertua hasil keputusen man runggun. Adi isetujui, ikirimken me dana e. Tep-tep bulan, turang seninanta si ngurus perduiten runggun nikapken laporen perduiten guna iogeken kempak runggun.

20. Uga banci ihamatindu Jahwe alu ’ulih jumandu si mehulina kal’?

²⁰ Adi siukuri kerina si lit hubungenna ras mberitaken berita Kinirajan bage pe pendahin erbahan ajar-ajar i belang-belang doni, teriahken ukurta guna ’nghamati Jahwe alu mpersembahken ulih jumanta si mehulina kal man baNa’. (Kua. 3:9, 10) Ulih jumanta si mehulina kal termasuk tenaganta, perukuren, bage pe kerohaninta. Pasti kita nggit nggunaken si e kerina i bas pendahin Kinirajan. Tapi, ingetlah ulih jumanta si mehulina kal termasuk ka erta-ertanta. Mbera ertekad kita mereken kai si tuhu-tuhu banci sibereken. Sumbangenta si alu ukur meriah ngerehken kinihamaten man Jahwe janah ndukung Kinirajan Mesias.