1, 2. (a) Kesuliten kai si ihadapi kalak Kristen i Judea? (b) Kai tindaken si perkeleng si igejapken kalak Kristen i Judea?

 PAKSA si e kira-kira tahun 46 M, terjadi kelihen i Judea. I je, murid-murid Kristus si kalak Jahudi la ngasup nukur gandum si nggo jarang janah merga kal. Kelihen kalak e, kai pe la lit. Tapi, kentisik nari igejapkenna me kepkepen Jahwe alu cara si lenga pernah igejapken ajar-ajar Kristus si debanna. Uga si e terjadi?

² Perban mekuah ate kalak Kristen Jahudi ras si labo Jahudi i Antiokia, Siria, nandangi kiniseran kalak Kristen Jahudi si i Jerusalem ras Judea, emaka ipepulungna dana guna teman sada kinitekenna e. Kenca si e, ipilihna dua turang senina si dilaki si ertanggung jabap eme Barnabas ras Saul, guna naruhken penampat kemanusian man pertua-pertua i Jerusalem. (Oge Perbahanen 11:27-30; 12:25.) Banci sibayangken, pasti meriah kal ukur turang senina i Judea si sangana kekurangen e ngidah kekelengen turang seninana i Antiokia nari!

3. (a) Uga umat Dibata si gundari tetap ngikuti usihen kalak Kristen i bas masa si pemena i Antiokia? Bereken contoh. (Nehen ka kotak ” Upaya si Pemena bas Mereken Penampat Kemanusian si Mbelinna i Jaman Modern”.) (b) Penungkunen kai saja si man bahasenta i bas pasal enda?

³ Enda me si tangtangna itulis kerna kalak Kristen si tading i bas sada bagin doni si ngirimken penampat kemanusian man kalak Kristen i bagin doni si debanna. Gundari, siikuti me usihen turang senina i Antiokia. Paksa sieteh temanta sada kiniteken i daerah si deban kena mara ntah pe percuban, sisampati ia. a Guna meteh hubungen antara upayanta i bas mereken penampat kemanusian ras kegiaten pelayanenta si debanna, mari sibahas telu penungkunen kerna pelayanen penampat kemanusian: Engkai maka enda siakap sada pelayanen? Kai tujunna? Uga maka banci sidatken kegunan bas pelayanen enda?

4. Kai si ikataken Paulus man kalak Korinti kerna pelayanen Kristen?

⁴ I bas suratna si peduaken man kalak Korinti, ijelasken Paulus maka lit dua bagin pelayanen kalak Kristen. Amin gia surat Paulus e itujuken man kalak Kristen si iminaki, gundari kata-katana e berlaku ka man biri-biri Kristus si deban. (Joh. 10:16) Sada bagin e ’dahin guna njadiken musuh Dibata  jadi temanNa’, eme pendahin erberita ras ngajar. (2 Kor. 5:18-20; 1 Tim. 2:3-6) Bagin si deban eme pelayanen guna temanta sada kiniteken. Nina Paulus, enda sada ”pelayanen si itujuken man kalak si badia”. (2 Kor. 8:4, Terjemahan Dunia Baru, [NW]) I bas kata-kata ’dahin guna njadiken musuh Dibata jadi temanNa’ ras ”pelayanen si itujuken man kalak si badia”, lit kata ”dahin” ras ”pelayanen” si duana iterjemahken i bas kata Junani nari eme di·a·ko·niʹa. Kai si icidahken kerna si e?

5. Engkai maka ikataken Paulus penampat kemanusian e sada pelayanen?

⁵ Alu nggunaken kata Junani si seri i bas duana kegiaten e, ipeseri Paulus upaya mereken penampat kemanusian ras bagin si deban pelayanenta bas runggun Kristen. Sope si e, ikatakenna, ”Erbage-bage dahin guna mereken penampat, tapi sada nge Tuan si mada dahin e. Erbage-bage dahin si man dahin, . . . Tapi kerina si enda, kesah si sada e nge ndahikenca kerinana.” (1 Kor. 12:4-6, 11) Janah, erbage pelayanen i runggun ihubungken Paulus ras penembahenta man Dibata bage pe dinasta si badia. b (Rom. 12:1, 6-8) Emaka, menurut Paulus arus iberena deba waktuna ”guna ngelayani kalak si badia”!​—Rom. 15:25, 26, NW.

6. (a) Bagi si ijelasken Paulus, ngkai maka penampat kemanusian e bagin i bas ibadatta? (b) Jelasken uga caranta mereken penampat kemanusian i sebelang doni gundari enda. (Nehen kotak ” Paksa Terjadi Mara!” halamen 214.)

⁶ Isampati Paulus kalak Korinti gelah ngantusi ngkai maka penampat kemanusian e sada bagin i bas pelayanen ras ibadat kempak Jahwe. Perdiateken alasenna: Kalak Kristen mereken penampat erkiteken ’patuh nandangi berita si meriah kerna Kristus’. (2 Kor. 9:13) Emaka, kalak Kristen nampati teman sada kiniteken erkiteken tersuruh ukurna ndalanken ajaren Kristus. Ikataken Paulus maka perbahanen e eme bukti ”lias ate Dibata”. (2 Kor. 9:14; 1 Pet. 4:10) Emaka, kerna pelayanen man turang seninanta si kekurangen, si termasuk penampat kemanusian, alu tepat ikataken The Watchtower 1 Desember 1975, ”Ula min kita sangsi maka penting kal iakap Dibata Jahwe ras AnakNa Jesus Kristus dinas enda.” Payo, penampat kemanusian eme bentuk dinas si badia si meherga.​—Rom. 12:1, 7; 2 Kor. 8:7; Heb. 13:16.

7, 8. Kai tujun utama pelayanenta mereken penampat kemanusian? Jelasken.

⁷ Kai nge tujun pelayanen penampat kemanusianta? Penungkunen e ijabap Paulus i bas suratna si peduaken man kalak Korinti. (Oge 2 Korinti 9:11-15.) Bas ayat-ayat e, ituriken Paulus telu tujun utama si banci sidat alu ikut i bas ”dinas pelayanen man jelma si nterem” (NW), eme mereken penampat kemanusian. Mari siperdiateken sada per sada.

⁸ Si pemena, pelayanenta guna nampati maba kepujin man Jahwe. Perdiateken uga rusurna Paulus mpersingeti turang senina kempak Dibata Jahwe bas lima ayat ndai. Niingetken rasul Paulus kalak e nandangi ’pengataken bujur man Dibata’ bage pe ’sampur pengataken bujur man Dibata’. (Ayat 11, 12) Ikatakenna maka penampat kemanusian  erbahan kalak Kristen ”muji Dibata” ras muji ”lias ate Dibata si la tersipati”. (Ayat 13, 14) Janah, isimpulken Paulus pembahasenna kerna pelayanen e alu ngataken, ”Bujur ninta man Dibata.”​—Ayat 15; 1 Pet. 4:11.

9. Uga cara rukur kalak si deban banci mobah perban dahinta mereken penampat kemanusian? Bereken contohna.

⁹ Bagi Paulus, umat Dibata gundari enda erpengakap maka penampat kemanusian sada kesempaten guna muji Jahwe ras tama ulina man pengajarenNa. (1 Kor. 10:31; Tit. 2:10) Upaya penampat kemanusian pe rusur kal erguna i bas ngobah perukuren si la mehuli piga-piga kalak kerna Jahwe ras Saksi-SaksiNa. Contohna: Lit sekalak diberu si tading i daerah si kena angin kalisungsung, itempelna bas pintun rumahna ”La Ngaloken Saksi-Saksi Jahwe”. Bas sada wari, idahna kerina kalak si erdahin bas penampat kemanusian nari sangana mpesikap sada rumah i kepar rumahna. Iperdiatekenna sedekah piga-piga wari kerina si erdahin si mehuli e, dungna lawes ia nungkuni ise kin situhuna kalak e. Paksa ietehna maka kerina sukarelawan e Saksi-Saksi Jahwe, luar biasa kal akapna janah nina, ”Kepeken salah duga aku nandangi kena sedekah enda.” Kai hasilna? Aguina tulisen e.

10, 11. (a) Contoh kai saja si ncidahken maka silakoken tujun si peduaken i bas dahinta mereken penampat kemanusian? (b) Publikasi kai si nampati si erdahin i bas penampat kemanusian? (Nehen kotak ” Perlengkapen Tambahen man si Erdahin bas Penampat Kemanusian”.)

¹⁰ Si peduaken, ’sicukupi kekurangen’ temanta sada kiniteken. (2 Kor. 9:12a) Merhat kal kita ncukupi keperlun turang seninanta si ngasak ras mpenahangi kiniseranna. Engkai? Erkiteken anggota runggun Kristen jadi ’sada kula’ janah ”adi sada ringring suin, kerina ringring si deban pe ikut nggejapkenca”. (1 Kor. 12:20, 26) Emaka, erkiteken kekelengen ras perkuah atena man turang senina, gundari nterem turang seninanta si minter nesuaiken jadwalna, ibuatna erbage peralaten, janah lawes ku daerah si kena mara guna nampati teman sada kinitekenna. (Jak. 2:15, 16) Contohna, kenca terjadi tsunami i Jepang tahun 2011, ikirim kantor cabang Amerika Serikat surat ku Panitia Pembangunen Regional i Amerika Serikat, guna nungkun lit nge ndia ”piga-piga turang senina si dilaki si beluh” si nggit nampati mbangun mulihi Bale-Bale Kinirajan i je. Kai tanggapenna? I bas piga-piga minggu, menam 600 sukarelawan si ndaftar guna nampati ras nggit berkat ku Jepang alu biaya sendiri! Nina cabang Amerika Serikat, ”Talu kami ngalo-ngalosa perban melala kal si ndaftar.” Paksa isungkuni turang senina i Jepang sekalak sukarelawan luar negeri nari ngkai maka ia nggit reh nampati, ngaloi ia nina, ”Turang senina kami si lit i Jepang e bagin i bas ’kula kami’. Igejapken kami kiniseran ras ate mesui kalak e.” Erkiteken kekelengen si nggit erkorban, kalak si erdahin bas penampat kemanusian maun-maun nggit ngasamken kegeluhenna guna nampati teman sada kiniteken. c—1 Joh. 3:16.

¹¹ Kalak si la Saksi pe iergaina kal upayanta guna mereken penampat kemanusian. Contohna, kenca negara bagin  Arkansas, AS, kena angin kalisungsung tahun 2013, ilaporken sada koran kerna penampat si meter si ibereken sukarelawan Saksi-Saksi Jahwe, nina, ”Enggo iaturken Saksi-Saksi Jahwe kerina sukarelawanna alu mehuli kal gelah banci nampati paksa lit mara alu tepat dingen terampil.” Jelas me, bagi si ikataken Paulus, ’sicukupi’ keperlun turang seninanta.

12-14. (a) Engkai maka penting ngelakoken tujun si peteluken i bas dahinta mereken penampat kemanusian? (b) Pendapat kai saja si ncidahken maka penting terus ngelakoken kegiaten rohani?

¹² Si peteluken, sisampati kalak si jadi korban e gelah mulihi ratur kegiaten rohanina. Engkai enda penting? Ikataken Paulus banci tersuruh ukur kalak si ngaloken penampat kemanusian erban ’sampur pengataken bujurna man Dibata’. (2 Kor. 9:12b) La kin cara si mehulina ngataken bujur man Jahwe alu minter ndalanken kegiaten rohani mulihi? (Pil. 1:10) Bas tahun 1945, ikataken The Watchtower, ”Isetujui Paulus . . . mpepulung sumbangen perban enda tuhu-tuhu nampati . . . turang senina si kekurangen. Alu bage, banci salang ukurna erkiteken ndatken penampat secara jasmani janah reh bebasna bage pe reh semangatna mereken kesaksin kerna Jahwe.” Tujunta gundari pe seri. Alu mulihken erberita, turang seninanta labo ngenca mpegegehi kalak si deban si sangana kesusahen tapi pe ikut mpegegehi dirina.​—Oge 2 Korinti 1:3, 4.

¹³ Perdiateken kata-kata kalak si ndatken penampat kemanusian, si mulihken erberita, janah ipegegehi perban ngelakokenca. Nina sekalak turang seninanta, ”Lawes erberita sada pasu-pasu man keluarga kami. Lanai aru kal ate kami nandangi keadan kami perban iusahaken kami ngapuli kalak si deban.” Sekalak turang seninanta si diberu ngataken, ”Alu terus ngukuri kegiaten rohani erbanca lanai kuukuri kal keadan si sontar i sekelewetku. Enda erbanca aku tenang.” Turang senina si deban ngataken, ”Melala hal si la banci sikendaliken, tapi erberita mereken bimbingen man keluargangku. Ncakapken man kalak si deban kerna arapen doni si mbaru mpegegehi kinitekenku maka kerinana pagi jadi mbaru.”

¹⁴ Kegiaten rohani si debanna si perlu minter ilakoken temanta si jadi korban eme reh ku perpulungen. Perdiateken kai si terjadi nandangi turang seninanta Kiyoko si umurna menam 60 tahun paksa si e. Kenca tsunami, bene kerina ertana, baju ras selop si ipakena ngenca si tading, emaka lanai ietehna uga gelah banci ia tetap nggeluh. Kenca si e, ikataken sekalak pertua man bana maka ibahanna atena perpulungen bas motor pertua e. Nina Kiyoko, ”Si kundul bas motor e eme pertua e, ndeharana, aku, ras sekalak turang senina si diberu si deban. Sederhana nge perpulungen e tapi, tempa bagi mukjizat, ingeten kerna tsunami e mis bene. Tenang kal kuakap. Perpulungen e ncidahken kuasa persadan Kristen.” Turang senina si debanna nuriken kerna perpulungen si idahina kenca  mara, ”Perpulungen-perpulungen e nggo nampati aku gelah megenggeng!”​—Rom. 1:11, 12; 12:12.

15, 16. (a) Kai gunana man kalak Kristen i Korinti bage pe i bas ingan si deban adi idukungna upaya mereken penampat kemanusian? (b) Uga carana gelah kita pe banci ndatken kegunan i bas dahin mereken penampat kemanusian gundari?

¹⁵ Paksa nuriken kerna pelayanen mereken penampat kemanusian, ijelasken Paulus ka man kalak Korinti kai gunana ikut bas pelayanen enda man kalak e ras kalak Kristen si debanna. Nina, ”Itotokenna [kalak Kristen Jahudi i Jerusalem si ngaloken penampat] pe kam alu dem keleng ate, nginget lias ate Dibata si la tersipati si seh man bandu.” (2 Kor. 9:14) Jelas me, biak kalak Korinti si melumbar-mere ngiahken kalak Kristen Jahudi guna notoken turang senina i Korinti, termasuk si labo Jahudi, janah reh kelengna atena nandangi kalak e.

¹⁶ Ikataken The Watchtower 1 Desember 1945 kai gunana mere penampat kemanusian i bas jamanta, nina, ”Paksa sada bagin umat Dibata si ikhususken mere sumbangen man bagin si debanna si kekurangen, ukurilah pengaruhna si banci mpersadaken!” Enda me si igejapken kerina si erdahin i bas mereken penampat kemanusian gundari. Nina sekalak pertua si nampati korban banjir, ”Ikut i bas dahin enda erbanca reh deherna aku ras turang seninangku.” Sekalak turang senina si diberu ngataken bujur kal perban ndatken penampat kemanusian, nina, ”Perkade-kadenta enda tuhu-tuhu seri kal ras keadan Pardis i doni.”​—Oge Kuan-kuanen 17:17.

17. (a) Uga kata-kata i bas Jesaya 41:13 berlaku i bas dahin mereken penampat kemanusian? (b) Turiken piga-piga contoh uga dahin mereken penampat kemanusian maba kepujin man Jahwe janah mpepaguh persadanta. (Nehen ka kotak ” Sukarelawan i Sebelang Doni Mpenahang Ukur”.)

 ¹⁷ Paksa seh sukarelawan i daerah mara, igejapken turang seninanta si jadi korban maka tuhu kal janji Dibata, ”Aku kap [JAHWE] Dibatandu, si ncikep tanndu si kemuhun. Janah Kukataken man bandu, ’Ola kam mbiar, Aku nampati kam.’” (Jes. 41:13) Sekalak turang seninanta si diberu si selamat bas sada mara ngataken, ”Lanai kuakap aku ngasup natap kecedan e, tapi idudurken Jahwe tanNa. Penampat si kudatken arah turang senina lanai terturiken alu kata-kata.” Itulis dua pertua kerna runggun-runggun si ilayanina kenca sada mara ncedai daerah kalak e, nina, ”Megogo kal ate kami perban linur e, tapi gejapken kami penampat Jahwe arah turang senina. Pernah oge kami kerna penampat kemanusian, tapi gundari langsung idah kami.”

18. Kai nge si perlu ilakokenndu adi ikut atendu i bas dahin mereken penampat kemanusian? (Nehen ka kotak ” Si e Nentuken Dalan Geluhna”.)

¹⁸ Nggit nge kam ngenanami keriahen ukur i bas mereken penampat kemanusian? Ingetlah maka sukarelawan si biasana ipilih eme turang senina si erdahin bas proyek pembangunen Bale Kinirajan. Emaka, pebetehken man pertuandu maka merhat kam ngisi formulir permohonen. Sekalak pertua si nggo erpengalamen i bas dahin e mpersingeti, ”Berkatlah ku daerah mara kenca ialokenndu undangen resmi i bas Panitia Penanggulangen Bencana nari.” Alu bage, upayanta mereken penampat kemanusian banci erdalan alu ratur.

19. Uga si erdahin mereken penampat kemanusian ikut ncidahken maka kita tuhu-tuhu ajar-ajar Kristus?

¹⁹ Payo, mereken penampat kemanusian sada cara si luar biasa i bas matuhi perentah Kristus guna ”sikeleng-kelengen”. Alu ncidahken kekelengen si bage rupana, sicidahken maka kita tuhu-tuhu ajar-ajar Kristus. (Joh. 13:34, 35) Mbelin kal pasu-pasu si banci sidat gundari enda perban seh buena sukarelawan si maba kepujin man Jahwe asum iberekenna penampat kemanusian man kalak si setia ndukung Kinirajan Dibata!