PAKSANA kam mutikken buah apel si seh kal tabehna. Sope masukkenndu ku keranjang, ianggehndu bauna si merim. Enggo ndube nari kam erdahin, tapi lenga kapndu latih janah kam pe semangat denga. Nandendu lit i deher batang apel la ndauh bas kam nari, paksana ia erdahin alu meriah ukur janah ngerana-ngerana ras keluarga bage pe teman-teman si deban si ikut nampati muat apel. Nguda kal ia teridah, bagi ertahun-tahun si nggo lewat paksa kam kitik denga. Bagi si la kam tek pernah idahndu ia metua mbarenda. Paksa si e, reh kotena ia erkiteken penakit, ijemakndu tanna paksa ia nandangi mate, janah tangis kam i kuburenna. Gundari, ia i jenda, radu ras nterem kalak si debanna, si nggeluh mulihi janah lanai sakit!

Masa si e nandangi reh janah tek kita kerna si e. Tek kita erkiteken janji Dibata lalap terjadi. I bas bagin enda, sibahas kari uga piga-piga janji Kinirajan lanai ndekah terjadi, ngasa reh perang Harmagedon. Janah sibahas ka piga-piga janji Kinirajan si luar biasa si igenepi kenca si e. Seh kal riahna ukurta pagi paksa ngidah Kinirajan Dibata merentah doni enda, erbahan kerinana jadi mbaru!