1, 2. (a) Banci saja mesera mbayangken maka Pardis e tuhu-tuhu lit. Engkai? (b) Kai si banci nampati kita mpegegehi kinitekenta nandangi janji Dibata?

 SEKALAK turang seninanta seh i bas ingan perpulungen, latih akapna kenca ndalani wari si seh kal beratna. Lalap ia ituntut bosna, stres erkiteken mesera encari keperlun keluarga, janah aru atena perban ndeharana sakit. Asum musik pemena iputar, salang akapna, meriah ukurna lit i Bale Kinirajan ras turang senina. Endenna kerna arapen kegeluhen i Pardis, janah kata-kata enden e erbanca ibayangkenna dirina lit i pardis. Ngena tuhu atena enden e, janah asum rende ia ras keluargana, arapen e ngapuli pusuhna.

² Pernah nge gejapkenndu si bage? Buen kita pasti pernah. Tapi, arus siakui, nggeluh bas doni si nggo metua enda erbahan mesera siakap mbayangken Pardis si nandangi reh e sada hal si tuhu-tuhu lit. Enda me ’wari-wari si mbue kiniseran’, janah doni enda sitik pe la bagi pardis. (2 Tim. 3:1) Kai si banci nampati kita ngenehen maka arapenta e nyata? Uga banci tuhu-tuhu sieteh maka Kinirajan Dibata nandangi merentah kerina umat manusia? Mari siperdiateken piga-piga nubuat Jahwe si penggenepenna isaksiken umatNa bas masa si nai. Kenca e, sipelajari uga nubuat e ras nubuat-nubuat si deban si mirip nggo terjadi alu luar biasa gundari. Dungna, alu kiniteken si paguh, siidah me pagi uga e igenepi bas wari si pepagi.

3. Kai janji si ngapuli kalak Jahudi si lit bas pembuangen i Babilon?

³ Bayangken uga kegeluhen kalak Jahudi i bas pembuangen i Babilon bas abad si peenemken SM. Enterem kalak enda ipebelin i je, bagi orang tuana, janah mberat kegeluhenna. Kalak enda itokohi kalak Babilon erkiteken kinitekenna man Jahwe. (Msm. 137:1-3) Sedekah puluhen tahun, kalak Jahudi si setia terus erpengendes nandangi arapenna si luar biasa eme: Janji Jahwe guna mulihi mpepulung umatNa mulihken ku kuta kemulihenna. Ikataken Jahwe maka seh kal riahna tading i je. IpeseriNa ka taneh Juda si nggo ipekena e ras  peken Eden, sada pardis! (Oge Jesaya 51:3.) Janji enda tuhu-tuhu mpepalem pusuh umat Dibata, mpetetap ukur si monce-once. Alu cara uga? Mari siperdiateken.

4. Uga Jahwe erban kalak Jahudi tek kerna keamanen i kuta kemulihenna?

⁴ Keamanen. Kalak buangen e mulihken, labo ku pardis si tuhu-tuhu, tapi ku negeri si ndauh janah nggo 70 tahun la iiani, nterem kalak enda pe la pernah ngidahsa. Lit mbue singa i negeri-negeri Pustaka paksa si e, bage ka pe serigala, arimo tultul, ras rubia-rubia si merawa si deban. Banci saja tersungkun-sungkun sekalak dilaki si nggo erjabu, ’Uga nge banci kujaga keselamaten ndehara ras anak-anakku? Uga biri-biri ras asuh-asuhenku, banci nge kujagai?’ Wajar adi aru atena. Emaka, ukurilah janji Dibata si isuratken i Jesaya 11:6-9 janah uga enda tuhu-tuhu mereken pengapul. (Oge.) Alu kata-kata si cocok, Jahwe erbahan kalak buangen enda tek maka ia ras asuh-asuhenna pasti selamat. Singa nggagat nggala ertina lanai pan singa asuh-asuhen kalak Jahudi. Kalak si setia la perlu mbiar man rubia-rubia si merawa e. Erjanji Jahwe maka aman nge pagi umatNa i taneh Juda si nggo ipekena, bage ka pe i mbal-mbal ras i kerangen.​—Esek. 34:25.

5. Nubuat kai si erbanca kalak si mulih bas pembuangen nari tek maka Jahwe mereken keperlunna alu simpar?

⁵ Kemakmuren. Lit ka kearun ate si debanna. ’Ngasup nge aku mereken pangan man keluargangku i negeri e? Ija kari kami tading? Kai nge dahinku i je, janah ulin nge pagi pendahinku e asangken pendahin si mberat i pembuangen si imandori kalak si naluken kami?’ Arah nubuat Dibata, alu dem perkuah ate ijabap Jahwe ka penungkunen-penungkunen e. Erjanji Jahwe maka umatNa si patuh ndatken udan gelah taneh mereken ’melala ulihna si man peranin’ ntah pe pangan si simpar. (Jes. 30:23)Kerna rumah ras pendahin umatNa, erjanji Jahwe, ”Ipajekken bangsangKu pagi rumah janah ia nge ngiani rumah e, labo kalak si deban. Isuanna batang anggur janah ia nge si ngenanami ulihna.” (Jes. 65:21, 22) Jelas me, i bas mbue bidang, tuhu-tuhu seh kal riahna kegeluhen i je ibandingken kegeluhen i Babilon si kafir. Tapi, uga kerna masalah kalak enda si seh kal pentingna, si erban kalak e ibaba ku pembuangen?

6. Masalah kai si nggo ndekah ihadapi umat Dibata, janah jaminen kai si ibereken Jahwe man kalak buangen si mulihken e?

⁶ Kesehaten rohani. Ndekah sope kalak e ibuang, umat Dibata nggo sakit secara rohani. Erkelangken nabi Jesaya, ikataken Jahwe kerna umatNa, ”Takalndu enggo ugahen kerina, janah pusuh ras ukurndu enggo penakiten.” (Jes. 1:5) Secara rohani, kalak enda pentang janah pasek, erkiteken lanai nggit megiken pedah Jahwe, janah la ermediate nandangi penjelasen si tangkas si iberekenNa. (Jes. 6:10; Jer. 5:21; Esek. 12:2) Adi masalah si bage ngelangketi kalak buangen si mulihken e, jaminen kai si lit i bas ia? Banci kin kalak  enda lanai ngena ate Jahwe? Malem kal ukur megiken janji Jahwe enda, ”Adi enggo seh pagi si e, kalak pasek banci megi kata pustaka, janah kalak pentang si nggeluh i bas kegelapen, medak matana janah erpengidah.” (Jes. 29:18) Jelas me, secara rohani ipepalem Jahwe me umatNa si imurniken bage pe si ertobat. Sedekah kalak enda ermediate janah patuh, ibereken Jahwe me bimbingen bage pe penjelasen si tangkas si mereken kegeluhen.

7. Uga janji Dibata man umatNa igenepi, janah ngkai e mpegegehi kinitekenta?

⁷ Itepati Jahwe nge janjiNa? Cataten sejarah njabap penungkunen e. Kalak Jahudi si mulihken ku kuta kemulihenna ipasu-pasu alu keamanen, kemakmuren, ras kesehaten rohani. Misalna, ikawali Jahwe kalak enda bas bangsa i sekelewetna nari si ndauh gegehen janah ndauh teremen. Rubia-rubia si merawa la ngganggu asuh-asuhen kalak e. Payo, sitik ngenca si iidah kalak Jahudi enda penggenepen nubuat kerna pardis si itulis piga-piga dilaki bagi Jesaya, Jeremia, ras Esekiel. Tapi, penggenepen si niidah umat Dibata seh kal luar biasana janah e me si iperlukenna paksa si e. Asum siukuri alu mbages kai si ilakoken Jahwe nandangi umatNa paksa si e, kinitekenta reh paguhna. Adi penggenepen si pemena kerna nubuat e seh kal hebatna, uga nge penggenepen si terbelinen? Perdiateken kai si nggo ilakoken Jahwe man banta gundari enda.

8. ”Negeri” kai si inanami umat Dibata gundari?

⁸ Gundari, umat Jahwe la mbentuk sada bangsa janah la ngiani sada wilayah tertentu. Sebalikna kalak Kristen si iminaki mbentuk bangsa rohani, ”Israel Dibata”. (Gal. 6:16) Temanna ’biri-biri si deban’ ergabung ras kalak enda i ”negeri” rohani, sada ingan eribadat man Dibata Jahwe i bas persadan. Ibadat e sada dalan geluh kalak enda. (Joh. 10:16; Jes. 66:8, Terjemahan Dunia Baru, [NW]) Janah, ”negeri” si uga nge si ibereken Jahwe man banta? Pardis rohani. I jenda, janji Dibata kerna keadan bagi Eden igenepi secara rohani alu cara si luar biasa. Perdiateken piga-piga contohna.

9, 10. (a) Uga nubuat Jesaya 11:6-9 igenepi gundari? (b) Kai buktina lit kedamen i bas umat Dibata?

⁹ Keamanen. I bas nubuat i Jesaya 11:6-9, lit gambaren si mejile kerna kiniersadan ras kedamen, antara rubia-rubia bage pe manusia ras rubia-rubia. Igenepi nge gambaren enda secara rohani gundari? Ue! Bas ayat 9, sieteh ngkai mahluk-mahluk e la maba cilaka ntah pe ncedai erkiteken, ”Doni enda dem alu pemeteh kerna [JAHWE] bali ras lawit dem alu lau.” Payo kin ”pemeteh kerna [JAHWE]” mperobahi perbahanen rubia-rubia? Lang, manusia nge si robah erkiteken nandai Dibata Si Meganjangna janah terus erlajar ngusih dalan-dalanNa si dem kedamen. Enda me sabapna  i pardis rohani si gundari, banci siidah penggenepen nubuat e si mpepalem pusuh. I bas pemerentahen Kinirajan, kerina pengikut Kristus erlajar nadingken sifat menukah merawa bage pe sifat si bagi binatang janah nggeluh i bas dame dingen aman radu ras turang senina si sada kiniteken.

¹⁰ Misalna, i bas buku enda nggo sibahas kerna kenetralen Kristen, prinsip Pustaka kerna si e bage pe penganiayan si nihadapi umat Dibata erkiteken pendirin si netral. La kin seh kal luar biasana i doni si dem kekerasen enda, lit sada ”bangsa” si mbelin si rayatna la nggit ikut i bas kerina bentuk kekerasen amin gia iancam ukumen mate? Enda me sada bukti si luar biasa maka rayat Raja Mesias tuhu-tuhu ngenanami kedamen bagi si igambarken Jesaya! Ikataken Jesus maka kerina pengikutna itandai kalak erkiteken lit kekelengen sapih-sapih ia. (Joh. 13:34, 35) I bas runggun, alu sabar igunaken Kristus ”juak-juak si tutus dingen pentar” ngajari kerina kalak Kristen situhu-tuhu gelah jadi kalak si maba dame, perkeleng, dingen lemah lembut.​—Mat. 24:45-47.

11, 12. Kelihen kai si nialami doni gundari, tapi uga Jahwe mereken kemakmuren man umatNa?

¹¹ Kemakmuren. Doni enda kelihen secara rohani. Ipersingeti Pustaka, ”Paksana reh me maka negeri e kelihen mekelek  Kubahan. Melihe me kalak, tapi labo kempak nakan; muas ia, tapi la kempak lau. Muas melihe me ia megiken kata [JAHWE]. Aku [JAHWE] si Erdolat, enggo melasken katangKu.” (Amos 8:11) Ikut nge warga Kinirajan Dibata kelihen? Inubuatken Jahwe perbedan si mbelin antara umatNa ras musuh-musuhNa, ”Emaka Kukataken man bandu maka kalak si nembah ras erkemalangen ngikutken Aku, cukup pangan ras inemenna, tapi kam muas dingen melihe akapndu. Ia malem atena, tapi kam mela akapndu.” (Jes. 65:13) Enggo nge idahndu kata-kata enda igenepi?

¹² Persedian rohani terus maler bagi lau anak si reh belangna dingen reh bagesna. Publikasinta si erpalasken Pustaka, bage pe rekamen audio ras video, perpulungen ras kebaktinta, janah bahan si lit i situs Web jw.org, bagi paleren persedian rohani si meter i doni si kelihen secara rohani enda. (Esek. 47:1-12; Joel 3:18) La kin meriah akapndu banci ngenanami penggenepen janji Jahwe kerna kemakmuren? Terus nge kam man i meja Jahwe?

13. Uga janji Jahwe terjadi kerna kalak pentang erpengidah mulihi ras kalak pasek erpemegi?

¹³ Kesehaten rohani. Pentang ras pasek secara rohani reh buena gundari. (2 Kor. 4:4) Tapi, paksana ipepalem Kristus cacat ras penakit i belang-belang doni. Pernah nge idahndu kalak si pentang erpengidah mulihi janah kalak si pasek erpemegi? Adi pernah idahndu kalak si ndatken pemeteh situhu-tuhu kerna kebenaren Kata Dibata janah nadingken ajaren agama palsu si erbahan kalak enda pentang dingen pasek nandangi kebenaren, nggo idahndu janji enda igenepi, ”Adi enggo seh pagi si e, kalak pasek banci megi kata pustaka, janah kalak pentang si nggeluh i bas kegelapen, medak matana janah erpengidah.” (Jes. 29:18) I belang-belang doni, tiap tahun lit ratusen ribu kalak ipepalem secara rohani. Kerina kalak si nadingken Babilon si Mbelin janah ergabung ras kita guna eribadat bas pardis rohani sada bukti jelas maka janji Jahwe tuhu-tuhu igenepi!

14. Kai saja si banci siukuri guna mpegegehi kinitekenta?

¹⁴ Tep-tep pasal buku enda risiken bukti si tangkas maka nggo ibaba Kristus kerina pengikutna ku pardis rohani situhu-tuhu bas wari-wari pendungi enda. Mari terus siukuri alu mbages uga buena pasu-pasu si nggo sialoken bas pardis e. Alu bage, kinitekenta nandangi janji Jahwe kerna wari si pepagi reh paguhna.

15. Engkai maka banci kita tek doni jadi pardis pagi?

¹⁵ Tangtangna nari ate Jahwe erbahan doni enda jadi pardis. IbahanNa me Adam ras Hawa tading i peken pardis, janah iperentahkenNa gelah ndemi doni alu kesusurenna janah ngurus kerina mahluk si lit i je. (Kej. 1:28) Adam ras  Hawa la patuh, malahen iikutkenna Setan i bas pemberontakenna janah erbahan kerina kesusurenna lanai sempurna, erdosa, janah dungna mate. Tapi peraten Dibata la pernah berubah. Sekali ibelaskenNa, pasti terjadi. (Oge Jesaya 55:10, 11.) Emaka, banci kita tek maka kesusuren Adam ras Hawa ndemi doni enda pagi janah naluken isina, alu kekelengen iurusna tinepa Jahwe i pardis sebelang doni. Paksa si e, nubuat si pemena si ibereken man kalak Jahudi buangen kerna nggeluh i bas keadan si bagi pardis tuhu-tuhu terjadi! Perdiateken contoh-contoh enda.

16. Uga Pustaka si Badia nggambarken keamanen si inanami i Pardis?

¹⁶ Keamanen. Dungna, gambaren si mpepalem pusuh i Jesaya 11:6-9 tuhu-tuhu igenepi i bas erti situhuna. Dilaki, diberu, ras anak-anak aman dingen terlindung ku japa pe ia lawes i doni enda. La lit mahluk, manusia, ntah pe rubia-rubia si jadi ancamen. Bayangken paksa kerina planet enda jadi rumahndu, inganndu banci erlangi i lau anak, dano, bage pe lawitna; inangkihindu deleng-delengna; ialurindu mbalmbalna si meratah alu aman. Janah, paksa wari ndabuh ku gelapna lanai aru atendu. Kata-kata i Esekiel 34:25 tuhu-tuhu terjadi, umat Dibata pe banci ”ringan alu teneng i bas mbalmbal, janah medem i bas kerangen”.

17. Engkai maka banci kita tek ibereken Jahwe keperlunta alu simpar paksa Kinirajan merentah doni?

¹⁷ Kemakmuren. Bayangken paksa lanai lit kemusilen, kekurangen gizi, kelihen, ntah pe keperlun guna ndatken tunjangen sosial. Kemakmuren rohani si inanami umat Dibata gundari sada jaminen maka Raja Mesias banci mereken kerina keperlun rayatna. Paksa Jesus i doni, icidahkenna maka banci igenepina janji e, erkiteken iberena ribun kalak si melihe man alu piga-piga roti ras ikan saja. (Mat. 14:17, 18; 15:34-36; Mrk 8:19, 20) Paksa Kinirajan Dibata merentah i belang-belang doni, nubuat enda tuhu-tuhu igenepi, ”Adi merdang kam, ipesusur [JAHWE] udan peturahsa, janah melala ulihna si man peraninndu, janah mbelang mbalmbal man ingan lembundu nggagat.”​—Jes. 30:23.

18, 19. (a) Kai si inanamindu pagi paksa nubuat Jesaya 65:20-22 igenepi? (b) Kai ertina umurta ”bali ras batang kayu”?

¹⁸ Gundari, nterem kalak mesera akapna mbayangken lit rumahna si aman ras pendahin si mereken kepuasen. Bas doni si nggo ceda enda, nterem kalak nggo erbintuas akapna ia erdahin tep-tep wari, tapi sitik ngenca si datna bage pe keluargana, malahen kalak bayak ras si merangap si ndatken kerinana. Bayangken uga nanamna paksa nubuat enda tuhu-tuhu terjadi i belang-belang doni, ”Ipajekken bangsangKu pagi rumah janah ia nge ngiani rumah e, labo kalak si deban. Isuanna batang anggur janah ia nge si ngenanami ulihna, nggedang pagi umur bangsangKu, bali ras batang kayu i kerangen. Kasa kai ulihna latih, tuhu-tuhu kal inanamina.”​—Jes. 65:20-22.

 ¹⁹ Kai ertina umurta ”bali ras batang kayu”? Paksa cinder kam i teruh batang kayu si galang, la kin luar biasa akapndu ngukuri uga dekahna batang kayu e nggo lit i je, banci saja ndekah sope nini bulangndu tubuh? Payo, banci saja akapndu i bas keadanndu si la sempurna gundari, mbelin kemungkinenna gedangen umur batang kayu e asangken umurndu, banci gedang kal umurna, i bas dame janah la lit ganggun, terus ngasa lanai pe kam lit. Seh kal ulina Dibata Jahwe erkiteken tek kita ibahanNa maka i bas Pardis pagi, gedang geluhta janah dem alu dame! (Msm. 37:11, 29) Seh me paksana batang kayu si gedang umurna ndai pe teridah tempa bagi dukut-dukut si meter masap, turah kenca e mate, tapi kita nggeluh si rasa lalap pagi!

20. Uga rayat Kinirajan si setia ngenanami kesehaten si sempurna pagi?

²⁰ Kesehaten si sempurna. Gundari, kerina kalak i doni lit i bas kiniseran erkiteken penakit ras kematen. Situhuna, kerina kita sakit, ilangketi penakit si erban kita mate eme dosa. Sada ngenca tambarna eme korban tebusen Kristus. (Rom. 3:23; 6:23) Sedekah Pemerentahen Seribu Tahun, Jesus ras teman-temanna merentah tuhu-tuhu nggunaken korban e, alu ertahap isasapkenna kerina dosa manusia si setia. Nubuat Jesaya tuhu-tuhu terjadi pagi, ”Lanai pagi lit si sakit ringan i bas negerinta, janah kerina dosa enggo ialemi.” (Jes. 33:24) Bayangkenndu paksa lanai lit si pentang, pasek, ntah pe cacat. (Oge Jesaya 35:5, 6.) La lit penakit si la banci ipepalem Jesus, subuk secara fisik, mental, ntah pe emosi. Rayat Kinirajan si setia ngenanami kesehaten si sempurna pagi!

21. Kai si terjadi nandangi kematen, janah ngkai maka janji e banci ngapuli?

²¹ Emaka, uga kerna kematen si biasa terjadi perban penakit, akibat dosa si la terelakken? Enda ”musuh si perpudina kal”, musuh si la banci pernah ilawan manusia si la sempurna. (1 Kor. 15:26) Tapi, tuhu nge kematen e musuh si man kebiaren Jahwe? Perdiateken kai si inubuatken Jesaya, ”Kematen imasapken [JAHWE] si Erdolat seh rasa lalap. IapusiNa iluh i bas mata kerina jelma nari.” (Jes. 25:8) Banci nge ibayangkenndu si e? Lanai pagi lit acara penguburen, tangis ceda ate, bage pe kuburen! Sebalikna, si lit i je eme tangis keriahen ukur asum itepati Jahwe janjiNa si luar biasa guna mpekeke kalak si nggo mate! (Oge Jesaya 26:19.) Dungna, ipepalem me kerina ceda ate erkiteken kematen.

22. Kai si terjadi paksa Kinirajan Mesias nggo dung ngelakoken peraten Dibata i doni?

²² I bas pendungi Seribu Tahun, dung me Kinirajan ngelakoken peraten Dibata i doni, janah ibereken Kristus me pemerentahen e man Bapana. (1 Kor. 15:25-28) Umat manusia, si dungna sempurna, nggo ersikap guna ngadapi ujin pendungi paksa Setan ipulahi i bas ”embang”, keadanna si lanai banci erkai pe. Kenca e, dungna ikernepken Kristus me  nipe si jahat e ras kerina si ndukung ia. (Kej. 3:15; Ket. 20:3, 7-10) Tapi, kerina kalak si setia ngkelengi Jahwe ndatken arapen si luar biasa. Mungkin la lit kata-kata si banci nurikenca si ulin asangken kata-kata i bas Pustaka. Enda sada janji maka kerina kalak si setia ”merdeka janah ngenanami kebebasen dingen kemulian ras kerina anak-anak Dibata”.​—Rom. 8:21.

23, 24. (a) Engkai maka janji Dibata e pasti? (b) Kai tekadndu?

²³ Janji enda labo terjeng arapen, sura-sura, ntah pe nipi saja. Penggenepen janji Jahwe pasti! Engkai? Ingetlah kata-kata Jesus i bas pasal si pemena buku enda. Iajarina kerina pengikutna guna ertoto man Jahwe, ”Reh min KinirajanNdu; sehlah min peratenNdu, i bas doni enda bagi ni surga.” (Mat. 6:9, 10) Kinirajan Dibata labo hasil hayalen sekalak jelma. Enda tuhu-tuhu lit! Janah, gundari paksana merentah i surga nari. Sedekah seratus tahun enda, Kinirajan nggo nepati janji Jahwe; si banci niidah alu tangkas i bas runggun Kristen. Emaka, banci kita tek maka kerina janji Jahwe igenepi paksa Kinirajan Dibata reh janah tuhu-tuhu erkuasa nandangi doni!

²⁴ Sieteh maka Kinirajan Dibata nandangi reh. Sieteh maka kerina janji Jahwe nandangi terjadi. Engkai? Erkiteken KINIRAJAN DIBATA NGGO MERENTAH! Penungkunenna, ’Merentah nge Kinirajan e nandangi aku?’ Gundari, mari siusahaken asa bancina nggeluh selaku rayat Kinirajan si setia, gelah banci sinanami kegunan pemerentahenna si serta dingen adil seh rasa lalap!