IDAHNDU ngandung ate si erlajar Pustaka si Badiandu erkiteken meriah ukurna paksa iangkaina ayat si mbaru denga iogena. Gelah reh tekna ia, isungkunna, ”Jadi, menurut Pustaka si Badia banci kita nggeluh si rasa lalap i Pardis? I doni enda?” Cirem temanndu erberita janah nina, ”Kai si iogendu i bas Pustaka si Badia?” Sengget ia janah jabapna, ”Ih, e denga kal kueteh si e lah!” Teringet kam maka bage ka nina piga-piga minggu si lewat paksa tangtangna ietehna gelar Dibata eme Jahwe.

Lit nge pengalamenndu si bage? Melala umat Dibata pernah nggejapken pengalamen si bage. Menam la lit si bali bagi hadiah si meherga enda, eme pemeteh kerna kebenaren! Cuba ukuri kentisik: Uga maka banci datndu hadiah e? I bas bagin enda, banci sibahas penungkunen e. Cara umat Dibata si alu manjar-anjar ndatken pemeteh kerna kebenaren si reh tangkasna mbuktiken maka Kinirajan Dibata e tuhu-tuhu lit. Sedekah sada abad enda, ipastiken Raja Kinirajan e, Jesus Kristus, gelah umat Dibata iajari kebenaren.