PAKSA kam erberita rumah ku rumah, ibegindu sora sirene. Reh dekahna reh gangna sorana. Asum imulaindu ngerana, idah temanndu erberita motor polisi si nandangi ngadi. Ndarat sekalak petugas ndeheri kam, nina, ”Kena nge si ncakapken Pustaka si Badia rumah ku rumah? Lit dat kami laporen!” Ijabapndu alu mehamat janah petandakenndu dirindu selaku Saksi-Saksi Jahwe. Kai si terjadi kenca e?

Sejarah me si nentukenca. Uga biasana Saksi-Saksi Jahwe iperlakoken pemerentah i negerindu? Ibatasina nge kebebasen eragama i je? Si enda lit hubungenna ras usaha turang seninanta si nggo puluhen tahun ”mbela janah mpeteguhi berita si meriah secara hukum”. (Pil. 1:7, Terjemahan Dunia Baru [NW]) Ijapa pe kam tading pasti ipegegehi kinitekenndu adi iselidikindu sejarah kemenangen hukum Saksi-Saksi Jahwe. I bas bagin enda kari, sipereksa sejarah hukum si luar biasa. Kemenangen-kemenangen si nggo sidat mereken bukti si luar biasa maka Kinirajan e tuhu-tuhu lit, erkiteken la banci sidat e alu gegehta!