1, 2. (a) Kai si berhasil ilakoken peminpin agama si lit hubungenna ras dahin erberita, tapi uga tanggapen rasul-rasul? (b) Engkai maka la ipatuhi rasul-rasul larangen guna erberita?

 KEJADINNA la ndekah kenca Pentakosta 33 M. Piga-piga minggu denga runggun Kristen i Jerusalem lit. Jelas me, ieteh Setan maka enda waktu si tepat guna ertindak. Ikernepkenna atena runggun e sope paguh. Alu meter iatur Setan keadan gelah ilarang peminpin agama pendahin erberita kerna Kinirajan. Tapi, rasul-rasul terus erberita alu la mbiar, janah nterem ’dilaki bage pe diberu si tek man Tuan’.​—Perb. 4:18, 33; 5:14.

² Erkiteken rawana, mulihken penentang-penentang e nerang. Sekali enda ipenjarakenna kerina rasul. Tapi i bas berngi wari, italangi malekat Jahwe pintu-pintu penjara, janah i bas erpagi-pagi mulihken rasul-rasul erberita! Itangkap ka kalak e mulihi janah ibaba ku penguasa-penguasa, si nuduh rasul-rasul ngelanggar ketetapen guna lanai erberita. Alu la mbiar ijabap rasul-rasul e, ”Kami arus ngikutken Dibata, labo manusia.” Erkiteken seh kal rawana, ’ibunuh’ penguasa e atena rasul-rasul. Tapi, bas keadan si sulit e, ngerana Gamaliel, guru Undang-Undang si ihamati, mpersingeti penguasa-penguasa, nina, ”Ukurkenlah manjar-anjar . . . Ola ugapa pe ibahan ia. Pelepas sajalah.” Alu la isangka-sangka, ibegiken penguasa-penguasa e persinget ndai janah ipulahina rasul-rasul. Kai si ilakoken dilaki-dilaki si setia e? Alu la mbiar kalak enda terus ”ngajar dingen meritaken berita si meriah kerna Jesus Kristus”.​—Perb. 5:17-21, 27-42; Kua. 21:1, 30.

3, 4. (a) Cara kai si ipake Setan guna nerang umat Dibata? (b) Kai si man bahasenta bas pasal enda ras dua pasal seterusna?

³ Kasus pengadilen tahun 33 M e tentangen resmi si pemena i bas pemerentah nari ras peminpin agama nandangi runggun Kristen, tapi enda labo si pendungi. (Perb. 4:5-8; 16:20; 17:6, 7) I bas jamanta, terus ipengaruhi Setan penentang ibadat situhu-tuhu guna manas-manasi pemerentah si erkuasa gelah ilarangna pendahin erberita. Ibahan penentang-penentang e erbage tuduhen man umat Dibata. Misalna, ikatakenna kita ngganggu ketertipen jelma si nterem, si erbahan keributen. Ikatakenna ka kita pengajuk-ngajuk  janah si ndaya-ndayaken barang, penjaja barang. I bas waktu si tepat, ngadap turang seninanta ku pengadilen guna mbuktiken maka tuduhen e salah. Kai hasilna? Uga keputusen pengadilen puluhen tahun si lewat mpengaruhi kam secara pribadi gundari? Mari siselidiki piga-piga kasus pengadilen guna ngenehen uga si e ikut ”mbela janah mpeteguhi berita si meriah secara hukum”.​—Pil. 1:7, NW.

⁴ I bas pasal enda siidah uga kita mbela hakta gelah bebas erberita. I bas dua pasal seterusna siselidiki piga-piga perjuangenta i bas bidang hukum gelah tetap la jadi bagin i bas doni enda janah nggeluh sentudu ras patoken Kinirajan.

5. I bas pendungi tahun 1930-en, ngkai maka perberita Kinirajan itangkap, janah tindaken kai si ipertimbangken turang seninanta si ndalanken kepeminpinen?

⁵ I bas pendungi tahun 1930-en, iarusken kota ras negara bagin i sebelang Amerika Serikat gelah lit surat ijin Saksi-Saksi Jahwe ngelakoken pelayanen. Tapi la iurus turang seninanta ijin e. Ijin banci saja ibatalken, janah tek kalak e maka la lit hak pemerentah si apai pe ngelarang perentah Jesus man kalak Kristen guna mberitaken berita Kinirajan. (Mrk. 13:10) Akibatna, ratusen perberita Kinirajan itangkap. Emaka ipertimbangken si ndalanken kepeminpinen i bas organisasi guna maba perkara e ku pengadilen. Icidahken kalak enda atena maka nggo itetapken Negara sada pembatasen si la sentudu ras hukum nandangi hak Saksi-Saksi guna bebas ndalanken ibadat. Janah, tahun 1938, lit kejadin si dungna jadi perkara si penting. Kai si terjadi?

6, 7. Kai si terjadi nandangi keluarga Cantwell?

⁶ I bas wari Selasa pagi-pagi tanggal 26 April 1938, lit lima perintis istimewa si berkat erberita sada warin ku kota New Haven, Connecticut, eme Newton Cantwell, si umurna 60 tahun; ndeharana, Esther; ras anak-anakna Henry, Russell, ras Jesse. Situhuna nggo iban kalak e persikapen guna lawes lebih sada wari. Engkai? Erkiteken kalak e pernah itangkap piga-piga kali janah ietehna banci ka itangkap mulihi. Tapi semangat keluarga Cantwell guna erberita la kote kerna si e. Kalak enda seh i New Haven alu dua motor. Newton maba motor si isina lektur Pustaka si Badia ras fonograf si banci ibaba-baba. Henry, 22 tahun, maba motor alu pengeras sora. Payo, bagi si nggo iperkiraken kalak e, i bas piga-piga jam saja kalak e ipengadi polisi.

⁷ Sitangtangna itangkap eme Russell, 18 tahun, kenca e Newton ras Esther. Dauh-dauh nari iidah Jesse, 16 tahun, orang tua ras abangna ibaba polisi. Erkiteken Henry paksana erberita i bagin si deban kota e, Jesse si nguda denga sisada erberita. Tapi, ibuatna fonografna janah terus erberita. Lit dua dilaki si eragama Katolik si ngijinken Jesse mutar  rekamen khotbah turang seninanta Rutherford si erjudul ”Enemies”. Tapi, paksa ibegina khotbah e, merawa kal ia janah ipekpekna atena Jesse. Alu tenang, lawes Jesse jenari, tapi la ndekah kenca si e, ipengadi sekalak polisi ia. Dungna Jesse pe itangkap. La ituduh polisi ndehara Cantwell, tapi ituduhna turang seninanta Cantwell ras anak-anakna. Tapi, i bas wari e ka kalak e ibebasken alu jaminen duit.

8. Engkai ikataken pengadilen maka Jesse Cantwell nggo ersalah selaku si erbahan keributen?

⁸ Piga-piga bulan kenca si e, bas bulan September 1938, ngadap keluarga Cantwell ku pengadilen i New Haven. Ije iputusken maka Newton, Russell, ras Jesse nggo ersalah erkiteken mindo-mindo sumbangen alu la lit ijinna. Amin gia Jesse naik banding ku Pengadilen Tinggi Connecticut, tetap denga ia ikataken ersalah erkiteken ngganggu kedamen, si erbahan keributen. Engkai? Erkiteken ibereken dua dilaki si Katolik ndai kesaksin i pengadilen maka rekamen khotbah si ibegiken kalak e nghina agamana janah erban kitik ukur kalak e. Turang seninanta si ertanggung jabap bas organisasi pe naik banding ku Mahkamah Agung AS, pengadilen tertinggi bas negeri e.

9, 10. (a) Kai keputusen Mahkamah Agung AS i bas kasus keluarga Cantwell? (b) Kai gunana man banta?

⁹ I bas tanggal 29 Maret 1940, Hakim Ketua Charles E. Hughes ras waluh hakim anggota megiken pendapat si  ipeseh turang seninanta Hayden Covington, pengacara Saksi-Saksi Jahwe. a Paksa ituriken jaksa negara bagin Connecticut pendapatna guna mbuktiken maka Saksi e si erbahan keributen, nungkun sekalak hakim, ”La kin Jesus pe maba berita si la ngena ate kalak bas jamanna?” Jabap jaksa e, ”Ue payo, janah adi la aku salah, itulis ka i bas Pustaka kai akibat si ialami Jesus erkiteken mberitaken berita si bage.” Tuhu-tuhu pernyatan si tangkas! Alu la isengaja, ipeseri jaksa e Saksi-Saksi ras Jesus janah negara ipeserina ras kalak si nuduh Jesus. I bas tanggal 20 Mei 1940, alu sada arih ibereken Mahkamah kemenangen man Saksi-Saksi.

¹⁰ Engkai maka keputusen Mahkamah e penting? Erkiteken perlindungen nandangi hak guna bebas eribadat nggo luas cakupenna, si erbahanca negara federal, negara bagin, ntah pe pemerentah daerah la banci mbatasi kemerdekan eragama. Selain si e, iidah Mahkamah maka perbahanen Jesse ”labo . . . ngancam kedamen ras ketertipen jelma si nterem”. Emaka, alu jelas itetapken keputusen e maka Saksi-Saksi Jahwe labo ngganggu ketertipen. Tuhu-tuhu sada kemenangen si mbelin man juak-juak Dibata! Kai gunana man banta? Nina sekalak pengacara si Saksi, ”Erkiteken lit hakta bebas eribadat alu la mbiar ibatasi secara la adil, gundari selaku Saksi banci sibagiken berita arapen i sekelewet inganta tading.”

11. Kai si ikampanyeken turang seninanta i Kanada, janah engkai?

¹¹ I bas tahun 1940-en, Saksi-Saksi Jahwe i Kanada ngadapi tentangen si mekelek. Emaka tahun 1946, ibahan me i je kampanye 16 wari mbagiken risalah si erjudul Quebec’s Burning Hate for God and Christ and Freedom Is the Shame of All Canada (Pernembeh Ate Quebec si Gara man Dibata ras Kristus bage pe Kebebasen Sada Kemelan i Belang-Belang Kanada). Tujunna gelah ieteh jelma si nterem maka la iperdiateken Negara hak guna bebas eribadat. Alu jelas, ituriken risalah empat halamen enda keributen si ibahan peminpin agama, perbahanen polisi si kejam, ras penganiayan masarakat nandangi turang seninanta i propinsi Quebec. Nina risalah e, ”Ate-atena saja nangkap saksi-saksi Jahwe. Janah lit kira-kira 800 tuduhen nandangi saksi-saksi Jahwe i Greater Montreal.”

12. (a) Uga tanggapen kalak si nentang nandangi kampanye risalah e? (b) Turang seninanta ituduh ngelakoken kejahaten kai? (Nehen ka cataten i teruh.)

¹² Perdana Menteri Quebec Maurice Duplessis, si radu erdahin ras Kardinal Katolik Roma Villeneuve, erban tindaken nandangi risalah e alu ngataken ”perang si la lit perkuah ate” nandangi Saksi-Saksi. Mis reh buena tuntuten perkara i bas 800 nari jadi 1.600. Nina sekalak perintis, ”Perban rusurna kami itangkap, lanai inget kami nggo piga kali kami itangkap polisi.” Saksi-Saksi si terdat mbagiken risalah e ituduh  ngelakoken kejahaten eme mbagiken ”oge-ogen si ngajuk-ngajuk”. b

13. Ise si pemenana kal ituduh selaku pengajuk-ngajuk, janah kai keputusen pengadilen?

¹³ I bas tahun 1947, kalak si pemenana kal ituduh eme turang seninanta Aimé Boucher ras anak-anakna Gisèle, 18 tahun, ras Lucille, 11 tahun. Ibagiken kalak e risalah ”Pernembeh Ate Quebec” i deher perjumanna i uruk-uruk sebelah selatan Quebec City. Tapi mesera kal mbayangken kalak e jadi kalak si erbahan keributen si ngelanggar hukum. Turang seninanta Boucher si sederhana dingen lemah lembut eme sekalak dilaki si dahinna ngurus jumana si sitik ngenca. Janah sekali-sekali lawes ia ku kota alu gereta kudana. Tapi keluargana iperlakoken alu kasar bagi si ituriken i bas risalah e. Itulak hakim pengadilen si segat atena Saksi bukti maka keluarga Boucher la ersalah. Sebalikna ialokenna pendapat jaksa maka risalah e erbahan perasan la senang janah erkiteken si e keluarga Boucher arus ikataken ersalah. Inti pendapat hakim e: Nuriken kebenaren, sada kejahaten! Aimé ras Gisèle pe ikataken ersalah erkiteken mbagiken oge-ogen si ngajuk-ngajuk. Lucille si kitik denga pe ipenjaraken dua wari. Turang seninanta naik banding ku Mahkamah Agung Kanada, pengadilen tertinggi i negeri e, si setuju mereksa kasus e.

14. Uga turang seninanta i Quebec ngadapi penindasen?

¹⁴ Paksa si e pe, turang seninanta la mbiar erberita i Quebec amin gia ngadapi serangen si mekelek si la erngadi-ngadi, janah megati luar biasa hasilna. Empat tahun kenca ibenai kampanye risalah bas tahun 1946 e, jumlah Saksi i Quebec reh buena i bas 300 jadi 1.000 kalak! c

15, 16. (a) Kai keputusen Mahkamah Agung Kanada i bas kasus keluarga Boucher? (b) Kai pengaruh kemenangen enda nandangi turang seninanta bage pe si debanna?

¹⁵ I bas bulan Juni 1950, Mahkamah Agung Kanada, si lit siwah hakim ije, mereksa kasus Aimé Boucher. Enem bulan kenca e, tanggal 18 Desember 1950, iputuskenna maka kita menang. Engkai? Erkiteken bagi si ijelasken turang seninanta Glen How si jadi pengacara Saksi, setuju Mahkamah nandangi pendapat pembela si ngataken maka ”ngajuk-ngajuk” ertina erbahan kekerasen ntah pe mberontak man pemerentah. Sedangken risalah e ”labo risiken ajuk-ajuk si bage, emaka enda banci ianggap sada bentuk kebebasen ngerana si la ngelanggar hukum”. Itambahken turang seninanta How, ”Kuidah sendiri maka Jahwe me si mereken kemenangen e.” d

¹⁶ Payo, keputusen Mahkamah Agung e sada kemenangen si mbelin man Kinirajan Dibata. Si e nasapken dasar tuntuten 122 kasus si deban si nuduh Saksi-Saksi i Quebec alu tuduhen ngajuk-ngajuk. Janah enda ertina, gundari lit kebebasen warga negara Kanada ras Persemakmuran guna mereken pendapat nandangi tindaken pemerentah. Selain si e,  kemenangen enda mpengadi serangen Gereja ras Negara i Quebec nandangi kemerdekan Saksi-Saksi Jahwe. e

17. Uga piga-piga pemerentah iaturina atena pendahin pelayanenta?

¹⁷ Bagi kalak Kristen masa si pemena, juak-juak Jahwe si gundari pe ’labo njajaken Kata Dibata’. (Oge 2 Korinti 2:17.) Tapi, iaturi piga-piga pemerentah atena pelayanenta alu undang-undang perbinagan. Mari siperdiateken kasus si mpermasalahken kerna tuhu kin Saksi-Saksi Jahwe e penjaja ntah rohaniwan.

18, 19. Uga pemerentah si erkuasa i Denmark erupaya ngambati pendahin erberita?

¹⁸ Denmark. I bas tanggal 1 Oktober 1932, mulai me berlaku undang-undang si ngelarang erbinaga buku-buku adi la lit ijinna. Tapi, la iurus turang seninanta surat ijin e. Pepagina, lit lima perberita si erberita sada warin i Roskilde, kota si dauhna kira-kira 30 kilometer sebelah barat ibu kota Kopenhagen. Paksa ben wari, lanai teridah salah sada perberita eme August Lehmann. Ia nggo itangkap erkiteken erbinaga alu la lit ijinna.

¹⁹ I bas tanggal 19 Desember 1932, August Lehmann ngadap ku pengadilen. Ikatakenna maka ia ndahi kalak guna nawarken lektur Pustaka, tapi itulakna tuduhen maka ia njajaken barang. Pengadilen pe sependapat ras ia alu ngataken, ”Si tertuduh . . . ngasup mbiayai dirina sendiri, la ibuat[na] keuntungen ekonomi kai pe janah la lit sura-surana ngelakokenca, malahen kegiaten e erbahan ia rugi.” Pengadilen erpihak man Saksi alu ngataken maka kai si ilakoken Lehmann la banci ”igolongken erbinaga”. Tapi, ertekad musuh-musuh umat Dibata ngambati pendahin erberita i sebelang negeri e. (Msm. 94:20) Minter naik banding jaksa penuntut umum ku Mahkamah Agung. Uga tanggapen turang seninanta?

20. Kai keputusen Mahkamah Agung Denmark, janah uga tanggapen turang seninanta?

²⁰ Seminggu nandangi pemereksan Mahkamah Agung, itingkatken Saksi-Saksi i sebelang Denmark dahin erberita. Wari Selasa 3 Oktober 1933, imomoken Mahkamah Agung keputusenna. Sependapat Mahkamah e ras pengadilen tingkat rendah maka August Lehmann la ngelanggar undang-undang. Enda ertina Saksi-Saksi banci terus bebas erberita. Ngata bujur turang seninanta erkiteken ibere Jahwe kemenangen hukum e alu lebih ningkatken pendahin erberita. Kenca lit keputusen Mahkamah e, banci ilakoken turang seninanta i Denmark pelayanenna alu la icampuri pemerentah.

21, 22. Kai keputusen Mahkamah Agung AS i bas kasus turang seninanta Murdock?

²¹ Amerika Serikat. Bas wari Minggu 25 Februari 1940, itangkap me perintis Robert Murdock, Jr., ras pitu Saksi si deban paksa erberita i Jeannette, kota deher Pittsburgh, negara bagin Pennsylvania. Kalak enda ituduh la nukur surat  ijin guna mbagiken lektur. Paksa tingkat banding, Mahkamah Agung AS setuju mereksa kasus enda.

²² I bas tanggal 3 Mei 1943, imomoken Mahkamah Agung keputusenna si mbela Saksi-Saksi. Mahkamah la setuju adi lit peraturen maka sekalak jelma iwajipken mindo ijin erkiteken e ”serangen nandangi hak si ibereken Undang-Undang Federal”. Emaka ibatalken Mahkamah peraturen kota e alu ngataken peraturen e ”ngambati kemerdekan pers ras mbatasi kebebasen eribadat”. Paksa mpeseh pendapat teremen hakim i bas Mahkamah, ikataken Hakim William O. Douglas maka kegiaten Saksi-Saksi Jahwe ”lebihen asa erberita; lebihen asa mbagiken lektur agama. Tapi enda gabungen si e duana”. Nina ka, ”Bentuk kegiaten agama enda sada dahin si mulia . . . si bali bagi eribadat bas gereja ras erkhotbah i mimbar.”

23. Engkai maka kemenangen hukum tahun 1943 penting man banta gundari?

²³ Keputusen Mahkamah Agung enda sada kemenangen hukum si penting man umat Dibata. Enda mbuktiken ise situhuna kita eme rohaniwan Kristen, labo kalak si ndaya-ndayaken barang. Bas wari si la terlupaken e, tahun 1943, imenangken Saksi-Saksi Jahwe 12 kasus i bas 13 kasusna  i Mahkamah Agung, termasuk kasus Murdock. Keputusen-keputusen enda jadi palas si paguh man kasus-kasus si reh, sabap kalak si nentang kita terus itentangna hakta guna erberita man jelma si nterem bage pe rumah ku rumah.

24. Uga tanggapenta adi ilarang pemerentah kita erberita?

²⁴ Selaku umat Jahwe, siergai kal adi ibereken pemerentah hak si sah guna bebas erberita. Tapi, adi ilarang ka sisesuaiken caranta erberita, janah terus silakoken alu erbage cara. Bagi rasul-rasul, ’arus siikutken Dibata, labo manusia’. (Perb. 5:29; Mat. 28:19, 20) Janah sipeseh ka perkaranta ku pengadilen gelah pelarangen nandangi kegiatenta ibatalken. Perdiateken dua contoh enda.

25, 26. Uga maka banci ibereken tuntuten ku Mahkamah Agung Nikaragua, janah kai hasilna?

²⁵ Nikaragua. I bas tanggal 19 November 1952, utusen injil ras hamba cabang Donovan Munsterman ngadap ku Kantor Imigrasi i ibu kota Managua. Isuruh ia njumpai Kapten Arnoldo García, kepala kantor e. Ipebetehken kapten e man Donovan maka kerina Saksi-Saksi Jahwe ”ilarang terus mberitaken ajarenna ras ningkatken kegiaten agamana”. Paksa isungkun kai alasenna, ijelasken Kapten García maka la lit ijin Saksi-Saksi bas menteri negara nari guna ngelakoken pelayanenna janah kalak e ituduh komunis. Ise si nuduh kita? Peminpin-peminpin agama Katolik Roma.

²⁶ Turang seninanta Munsterman minter naik banding ku Kementerian Negara ras Agama bage pe ku Presiden Anastasio Somoza García, tapi la berhasil. Emaka, isesuaiken turang seninanta carana eribadat. Lanai gunakenna Bale Kinirajan, erbahan perpulungen i terpuk-terpuk si kitik, janah la  mereken kesaksin i dalan, tapi terus ia erberita. Ibereken kalak enda ka tuntuten ku Mahkamah Agung i Nikaragua gelah ibatalken Mahkamah pelarangen e. Ilaporken koran-koran ka kerna pelarangen ras isi tuntuten e, janah Mahkamah Agung pe setuju guna mereksa kasus e. Kai hasilna? Bas tanggal 19 Juni 1953, ipedarat Mahkamah Agung keputusen bulat si mereken kemenangen man Saksi-Saksi. Ieteh Mahkamah maka pelarangen e ngelanggar undang-undang si njamin kebebasen guna mereken pendapat, ndalanken kiniteken, ras kai si ikataken pusuh peraten. Iperentahken Mahkamah ka gelah hubungen pemerentah Nikaragua ras Saksi-Saksi ipehuli bagi si ndube.

27. Engkai maka penduduk Nikaragua sengget nandangi keputusen Mahkamah, janah kai si iteki kalak enda kerna kemenangen e?

²⁷ Sengget penduduk Nikaragua erkiteken Mahkamah Agung erpihak man Saksi. Mbarenda, mbelin kal pengaruh peminpin agama si erbanca Mahkamah biasana la nggit erban masalah ras kalak e. Selain e, kekuasan pejabat pemerentah pe seh kal belinna si erbanca jarang itulak Mahkamah keputusen kalak e. Tek turang seninanta maka kalak e ndatken kemenangen erkiteken terus ia erberita janah ikawali Rajana.​—Perb. 1:8.

28, 29. I bas pertengahen tahun 1980-en, perubahen kai si terjadi i Zaire?

²⁸ Zaire. I bas pertengahen tahun 1980-en lit kira-kira 35.000 Saksi i Zaire, gundari Republik Demokratik Kongo. Gelah banci ngikuti kegiaten Kinirajan si terus reh majuna, ibangun kantor cabang me fasilitas si mbaru. Bas bulan Desember 1985, iban sada kebaktin internasional i ibu kota, Kinshasa, janah lit 32.000 utusen i bas erbage bagin doni nari si ndemi stadion kota e. Tapi kenca si e, keadan juak-juak Jahwe mulai berubah. Kai si terjadi?

²⁹ Turang seninanta Marcel Filteau, utusen injil i bas Quebec nari, Kanada, si pernah itindas paksa rejim Duplessis, ngelayani i Zaire paksa si e. Iturikenna kai si terjadi, nina, ”Bas tanggal 12 Maret 1986, ialoken turang seninanta si ertanggung jabap sada surat si ngataken maka perpulungen Saksi-Saksi Jahwe Zaire ilarang.” Pelarangen enda itandatangani presiden negeri e, Mobutu Sese Seko.

30. Keputusen si mberat kai si perlu iban Panitia Cabang, janah kai keputusenna?

³⁰ Pepagina, imomoken radio nasional, ”Lanai pagi pernah sibegi kerna Saksi-Saksi Jahwe i [Zaire].” Emaka reh me penganiayan. Bale-Bale Kinirajan iruntuhken janah turang seninanta irampok, itangkap, ipenjaraken, janah ipekpeki. Anak-anak Saksi pe ipenjaraken. Bas tanggal 12 Oktober 1988, ibuat pemerentah aset organisasinta, janah Garda Sipil ntah pe sada unit tentera, ngkuasai properti cabang. Naik banding turang seninanta si ertanggung jabap man Presiden Mobutu, tapi la lit jabapen. Paksa si e arus ibahan Panitia Cabang keputusen si mberat, ”Naik banding ku Mahkamah  Agung, ntah nimai?” Timothy Holmes, sekalak utusen injil bage pe koordinator Panitia Cabang paksa si e, nginget mulihi, ”Ernalem kami man Jahwe mindo kepentaren ras kepkepenNa.” Kenca ipertimbangkenna alu megermet, isedari panitia maka lenga waktuna ndungi perkara e secara hukum. Sebalikna, ipebulat kalak e ukurna guna ngurus turang senina ras ndarami cara gelah banci terus erberita.

31, 32. Keputusen si luar biasa kai si ibahan Mahkamah Agung Zaire, janah kai pengaruhna nandangi turang seninanta?

³¹ Kenca piga-piga tahun, tekanen nandangi Saksi nggo reh kurangna janah lebih iergai hak asasi manusia i negeri e. Isimpulken Panitia Cabang maka enda me waktuna nggugat pelarangen e alu naik banding ku Mahkamah Agung Zaire. Tapi si luar biasana, isetujui Mahkamah Agung mereksa kasus enda. Dungna, tanggal 8 Januari 1993, menam pitu tahun kenca iperentahken presiden lit pelarangen, iputusken Mahkamah maka tindaken pemerentah nandangi Saksi-Saksi nggo nalahi hukum, janah pelarangen e pe ibatalken. Bayangken akibatna! Alu ngasamken geluhna, ibatalken hakim me keputusen presiden negeri e! Nina turang seninanta Holmes, ”Sedekah proses persidangen, idah kami uga Jahwe banci ngubah kai pe.” (Dan. 2:21) Kemenangen enda mpepaguh kiniteken turang seninanta. Igejapken kalak e maka Jesus, Raja e, negu-negu rayatna guna meteh ndigan ras uga carana ertindak.

³² Alu mbatalken pelarangen e, kantor cabang ndatken ijin guna ngerehken utusen-utusen injil, mbangun fasilitas cabang si mbaru ras ngimpor lektur Pustaka si Badia. f Seh  kal riahna ukur juak-juak Jahwe i belang-belang doni paksa ngidah uga Jahwe ngelindungi keperlun rohani umatNa!​—Jes. 52:10.

33. Kai si banci sipelajari i bas pembahasen singkat kerna kasus-kasus pengadilen enda?

³³ Pembahasenta kerna piga-piga perjuangen hukum enda mbuktiken maka itepati Jesus janjina, ”Aku pagi mereken man bandu jabapenna, ras kepentaren gelah la lit sekalak pe imbang-imbangndu ngasup ngelawan ntah nimbak kai si ikatakenndu e.” (Oge Lukas 21:12-15.) Maun-maun, igunaken Jahwe kalak si bagi Gamaliel ngkawali umatNa ntah pe nggunaken hakim-hakim ras pengacara lako ndalanken keadilen. Nggo mentul iban Jahwe senjata kalak si nentang kita. (Oge Jesaya 54:17.) Tentangen kai pe la banci mpengadi dahin Dibata.

34. Engkai maka kemenangenta secara hukum seh kal luar biasana, janah kai si icidahken jenari? (Nehen ka kotak ” Kemenangen si Penting i Pengadilen Tertinggi si Erbahan Maju Pemberitan Kinirajan”.)

³⁴ Engkai maka kemenangen-kemenangenta secara hukum luar biasa? Cuba ukuri enda: Saksi-Saksi Jahwe labo kalak si terkemuka ntah pe erpengaruh. La kita ikut pemilu, la sidukung kampanye politik, janah la sipengaruhi politikus-politikus. Biasana turang seninanta si ngadap ku pengadilen pe ianggap ”rakyat biasa si la erpendidiken”. (Perb. 4:13) Emaka, menurut manusia, la mungkin nggit pengadilen ngelawan penentang-penentangta si mbelin pengaruhna bas agama bage pe politik janah erban kita menang. Malahen rusur ibahan pengadilen keputusen si mereken keuntungen banta! Kemenangen-kemenangenta secara hukum ncidahken maka kita erdalan ’i adep-adepen Dibata, ras Kristus’. (2 Kor. 2:17) Emaka radu rasul Paulus, sikataken, ”[Jahwe] kap si nampati aku. Emaka labo aku mbiar.”​—Heb. 13:6.