1, 2. (a) Kai buktina maka kam sekalak warga Kinirajan Dibata? (b) Engkai maka maun-maun arus iperjuangken Saksi-Saksi Jahwe kebebasen eragama?

 WARGA Kinirajan Dibata nge kam? Selaku Saksi Jahwe, jabapenna ue! Janah, kai bukti kewarganegaranndu? Enda labo paspor, ntah pe dokumen si debanna. Sebalikna, enda teridah i bas carandu eribadat man Dibata Jahwe. Ibadat situhu-tuhu labo ngenca kerna kai si itekindu. Tapi, enda termasuk kai si idalankenndu ras kepatuhenndu man hukum Kinirajan Dibata. Man banta kerina, ibadatta mpengaruhi kerina bagin kegeluhenta, termasuk cara ngurus keluarga bage pe cara ngadapi piga-piga masalah kesehaten.

² Tapi, doni inganta tading enda maun-maun la ngergai kewarganegaran si seh kal mehergana e bage pe persaratenna. Lit pemerentah si atena mbatasi ibadatta janah ikernepkenna ka atena. Maun-maun, rayat Kristus arus erjuang ndatken kebebasen guna nggeluh sentudu ras hukum Raja Mesias. Perlu nge mamang ateta kerna si e? Lang. Bas jaman Pustaka, umat Dibata megati arus erjuang guna ndatken kebebasen eribadat.

3. Perjuangen kai si arus ilakoken umat Dibata i bas jaman Kemberahen Ester?

³ Misalna, i bas jaman Kemberahen Ester, umat Dibata arus erjuang gelah tetap nggeluh. Engkai? Erkiteken ikataken Perdana Menteri Haman si jahat man Ahasweros, raja Persia, gelah kerina kalak Jahudi si tading i bas kerajanna ibunuh perban ”adatna [hukum-hukumna] la bali ras bangsa-bangsa si deban”. (Est. 3:8, 9, 13) Iperdiateken Jahwe nge kerina umatNa? Ue, ipasu-pasuNa kai si ilakoken Ester ras Mordekai paksa kalak e naik banding ku raja Persia guna ngkawali umat Dibata.​—Est. 9:20-22.

4. Kai si man bahasenta i bas pasal enda?

⁴ Uga gundari? Bagi si nggo sipelajari bas pasal si nggo lewat, maun-maun penguasa-penguasa nentang Saksi Jahwe. I bas pasal enda, sibahas kari uga pemerentah si bage mbatasi ibadatta. Siperdiateken i bas telu bidang: (1) hakta selaku sada organisasi ras eribadat sentudu ras pilihenta, (2) kebebasen guna milih perawaten medis si sentudu ras prinsip Pustaka si Badia, janah (3) hak orang tua mpebelin  anak-anak sentudu ras patoken Jahwe. I bas tiap bidang, banci sinehen uga rayat Kinirajan Mesias si setia erjuang alu la mbiar guna ngelindungi kewarganegaranna si meherga ras uga upaya kalak e ipasu-pasu.

5. Kai gunana pengakun hukum man kalak Kristen situhu-tuhu?

⁵ Perlu kin kita pengakun hukum i bas pemerentahen manusia nari guna eribadat? Lang, tapi pengakun hukum erbahan menukah siakap ndalanken ibadat. Misalna, banci bebas pulung i Bale Kinirajan bage pe i Bale Kebaktin, ncetak ras ngimpor lektur Pustaka si Badia, janah erberita, alu la lit si ngambatisa. I bas mbue negeri, Saksi-Saksi Jahwe nggo resmi terdaftar janah bebas eribadat bali bagi agama si deban si iakui. Tapi, kai si terjadi adi la ibereken pemerentah pengakun hukum ntah pe ibatasina atena kebebasen asasinta?

6. Kesuliten kai si ihadapi Saksi-Saksi Jahwe i Australia i bas pemena tahun 1940-en?

⁶ Australia. I bas pemena tahun 1940-en, ianggap gubernur jenderal Australia kinitekenta ”ngganggu” upaya guna erperang. Dungna ilarangna kita. Saksi-Saksi la banci bebas perpulungen ntah pe erberita, Betel itutup, janah Bale-Bale Kinirajan isita. La banci lit lektur Pustaka bas kita. Piga-piga tahun kenca kegiaten e ilakoken erbuni-buni, dungna salang sai iakap Saksi-Saksi i Australia. Bas tanggal 14 Juni 1943, itarik Mahkamah Agung Australia pelarangen e.

7, 8. Perjuangen kai si ilakoken turang seninanta i Rusia sedekah ertahun-tahun guna ndatken kebebasen eribadat?

⁷ Rusia. Puluhen tahun dekahna Saksi Jahwe ilarang Komunis, tapi dungna bas tahun 1991 kalak enda nggo terdaftar. Kenca pecah bekas Uni Soviet, sidat me pengakun hukum i Federasi Rusia bas tahun 1992. Tapi la ndekah kenca e, piga-piga kalak si nentang, khususna kalak si ergabung ras Gereja Ortodoks Rusia lanai tenang erkiteken meter kal pertambahenta. Bas tahun 1995 ras 1998, Saksi Jahwe ituduh ngelakoken lima tindaken kejahaten. Tapi, la lit sada pe iidah jaksa bukti maka kita ersalah. Dungna, i bas tahun 1998, kalak si nentang si mekeng e mpeseh tuntuten perdata. Tangtangna Saksi-Saksi menang, tapi itulak kalak si nentang e keputusen ndai janah Saksi-Saksi pe talu i bas sidang banding bas bulan Mei 2001. Bulan Oktober tahun si e, ibenaken mulihi proses persidangen si ngasilken keputusen i bas tahun 2004. Keputusenna eme badan hukum Saksi-Saksi i Moskwa ibubarken ntah pe ilarang.

⁸ Galumbang kiniseran pe reh. (Oge 2 Timotius 3:12.) Saksi-Saksi iserang janah ilecehken. Lektur agama isita; newa ras majekken rumah-rumah guna eribadat pe ibatasi. Cuba bayangken perasan turang seninanta si ngadapi kerina kesuliten e! Bas tahun 2001, Saksi-Saksi naik banding ku  Mahkamah Eropa guna Hak Asasi Manusia (ECHR), janah imasukkenna ka keterangen tambahen ku Mahkamah e bas tahun 2004. I bas tahun 2010, nggo dat ECHR keputusenna. Ieteh Mahkamah alu jelas maka Saksi-Saksi i Rusia ilarang erkiteken la lit toleransi agama. Janah Mahkamah erbahan keputusen maka la lit dasarna ndukung keputusen pengadilen-pengadilen rendah erkiteken la lit buktina Saksi-Saksi ersalah. Kenca e, ikataken Mahkamah maka pelarangen e ibahan guna nasapken hak Saksi-Saksi secara hukum. Keputusen Mahkamah e mbenarken hak Saksi-Saksi guna bebas eragama. Amin gia erbage pejabat i Rusia gagal ndalanken keputusen ECHR, umat Dibata nggo reh pangna erkiteken kemenangen-kemenangen ndai.

9-11. I Junani, uga nge perjuangen umat Jahwe i bas ndatken kebebasen guna radu ras eribadat, janah kai hasilna?

⁹ Junani. Bas tahun 1983, isewa Titos Manoussakis sada ruangen i Heraklion, Kreta, gelah banci terpuk si kitik Saksi Jahwe pulung i je guna eribadat. (Heb. 10:24, 25) Tapi, minter ipeseh sekalak pastor Ortodoks keberatenna man polisi, ikatakenna maka la ia senang ruangen e igunaken Saksi-Saksi. Engkai? Erkiteken la seri saja ngenca kiniteken Saksi ras kiniteken Gereja Ortodoks! Emaka, ibenaken kantor jaksa me proses pidana man Titos Manoussakis ras telu Saksi si debanna. Kalak enda idenda janah iukum dua bulan penjara. Selaku warga Kinirajan Dibata si setia, ianggap Saksi-Saksi keputusen pengadilen e ngganggu kebebasenna eribadat; emaka ibabana me kasus e ku pengadilen-pengadilen negeri janah dungna ku ECHR.

¹⁰ Dungna, bas tahun 1996, tuhu-tuhu italuken ECHR kalak si nentang ibadat si murni. Ikataken Mahkamah maka ”Saksi-Saksi Jahwe salah sada ’agama si iakui’ bagi si itetapken i bas undang-undang Junani” janah keputusen pengadilen-pengadilen rendah e lit ”akibatna secara langsung nandangi kebebasen eragama kalak si ituntut”. Kenca si e, isimpulken Mahkamah maka la lit hak pemerentah Junani ”nentuken sah ntah lang kiniteken agama ntah pe alat si igunakenna i bas ndalanken kinitekenna e”. Ukumen nandangi Saksi-Saksi pe isasapken, janah kebebasenna eragama pe iergai kal!

¹¹ Dung nge persoalen i Junani erkiteken kemenangen e? Sayangna, lang. Bas tahun 2012 i Kassandreia, Junani, lit kasus si bali ras kasus ndai, si mbaru denga dung kenca menam 12 tahun perjuangen hukum. I bas kasus enda, tentangen e ipengaruhi sekalak uskup Ortodoks. Tapi, umat Dibata imenangken Dewan Negara, lembaga pengadilen tertinggi i Junani. Keputusen e erpalasken undang-undang Junani si njamin kebebasen eragama janah la ngakui tuntuten si terus lit si ngataken maka Saksi-Saksi Jahwe agama si  la iakui. Ikataken pengadilen e ka, ”Ajaren Saksi-Saksi Jahwe terbuka man jelma si nterem janah, erkiteken si e, agama kalak e agama si iakui.” Meriah ukur anggota runggun si kitik i Kassandreia erkiteken banci eribadat i Bale Kinirajanna.

12, 13. I Prancis, uga kalak si nentang ’erbahan undang-undang si la bujur lako nindes umat Dibata’, janah kai hasilna?

¹² Prancis. Piga-piga kalak si nentang ’erbahan undang-undang si la bujur lako nindes’ umat Dibata. (Oge Jesaya 10:1.) Misalna, pertengahen tahun 1990-en, mulai ipereksa pejabat-pejabat pajak i Prancis perduiten Association Les Témoins de Jéhovah (ATJ), salah sada badan hukum si igunaken Saksi-Saksi i Prancis. Ituriken menteri anggaren tujun pemereksan e, nina, ”Pemereksan banci erbahan pembubaren resmi ntah pe proses pidana . . . , si mbelin kemungkinenna banci ngganggu kegiaten perpulungen ntah pe perpulungen e terpaksa mpengadi kegiatenna i wilayahta.” Amin gia la teridah lit penyimpangen, pihak pajak netapken pajak si banci erbahan lumpuh kegiaten ATJ. Adi berhasil, taktik enda banci erbahan turang seninanta arus nutup kantor cabang janah ndayaken gedung-gedungna guna nggalari pajak si seh kal mergana, erkiteken la lit pilihen si deban. Enda erban umat Dibata tuhu-tuhu talu, tapi kalak e la nerah. Saksi-Saksi terus erjuang ngelawan perbahanen si la adil e, janah dungna ibabana kasus e ku ECHR tahun 2005.

¹³ Bas tanggal 30 Juni 2011, ipedarat Mahkamah keputusenna. Menurut Mahkamah, hak kebebasen eragama arusna min ngelarang Negara nentuken sah ntah lang sada kiniteken agama ntah pe cara ndalankenca, kecuali bas kasus si mberat. Nina Mahkamah e ka, ”Alu netapken pajak . . . perduiten perpulungen si seh kal pentingna reh kurangna janah dungna lanai banci bebas ndalanken erbage bentuk ibadat.” Alu bulat sora Mahkamah e mereken kemenangen man Saksi Jahwe! Meriah kal ukur umat Jahwe paksa ietehna maka dungna iulihken pemerentah Prancis pajak si itetapken man ATJ rikutken bungana. Janah, erkiteken perentah Mahkamah, isasapken me tunggaken pajak si itetapken nandangi properti cabang.

14. Uga carana kam banci ikut i bas mperjuangken kebebasen eribadat?

¹⁴ Bagi Ester ras Mordekai mbarenda, umat Jahwe si gundari pe erjuang gelah banci bebas eribadat sentudu ras cara si iperentahken Jahwe. (Est. 4:13-16) Banci nge kam ikut i je? Banci. Banci terus itotokenndu turang senina sada kinitekenta si ngadapi kinilaadilen secara hukum. Pertoton si bage banci tuhu-tuhu nampati turang seninanta si ngadapi kesuliten ras penganiayan. (Oge Jakup 5:16.) Ijabap Jahwe nge pertoton-pertoton si bage? Kemenangen-kemenangenta i pengadilen ncidahken maka tuhu-tuhu ijabapNa pertotonta!​—Heb. 13:18, 19.

15. Kai saja si perlu iinget umat Dibata kerna penggunan dareh?

¹⁵ Bagi si nggo sipelajari i Pasal 11, warga Kinirajan Dibata ndatken bimbingen Pustaka si jelas gelah ula nalahgunaken dareh, si biasa terjadi gundari. (Kej. 9:5, 6; Im. 17:11; oge Perbahanen 15:28, 29.) Amin gia la kita nggit transfusi dareh, ateta min gelah ndatken perawaten medis si mehulina man banta bage pe man kalak si nikelengi sedekah perawaten e la ertentangen ras hukum Dibata. Enggo iakui pengadilen-pengadilen tertinggi i mbue negeri maka lit hak kalak guna milih ntah pe nulak perawaten medis sentudu ras pusuh peraten bage pe agamana. Tapi, bas piga-piga negeri umat Dibata ngadapi kesuliten si erbanca kalak e mbiar. Perdiateken piga-piga contoh.

16, 17. Kai si ialami sekalak turang seninanta i Jepang si erbanca seh kal ia senggetna, janah uga pertotonna ijabap?

¹⁶ Jepang. Misae Takeda, sekalak pernanden i Jepang si umurna 63 tahun, perlu ioperasi besar. Selaku warga Kinirajan Dibata si setia, ijelaskenna man dokterna maka la ia nggit itambari adi make dareh. Tapi, erbulan-bulan kenca si e, sengget kal ia erkiteken ietehna maka kepeken ia itransfusi paksa ioperasi. Erkiteken itipu janah ilanggar akapna hakna, ituntutna dokter-dokter ras rumah sakit e bas bulan Juni 1993. Tuhu-tuhu paguh kiniteken turang seninanta si sederhana janah mehamat enda. Alu la mbiar ersaksi ia i lebe-lebe jelma si nterem i ruang pengadilen, sada jam dekahna ia cinder amin gia kote denga dagingna. Terakhir ia reh ku persidangen sada bulan sope ia mate. Kinipangen ras kinitekenna tuhu-tuhu luar biasa! Ikataken Takeda maka la ia erngadi-ngadi mindo pasu-pasu Jahwe nandangi perjuangenna. Tek ia maka kerina pertotonna pasti ijabap. Payo nge bage?

¹⁷ Telu tahun kenca turang seninanta Takeda mate, ipedarat Mahkamah Agung Jepang keputusen si erban ia menang. Setuju Mahkamah Agung maka mereken transfusi dareh sada pelanggaren erkiteken la sentudu ras peraten Takeda. Ikataken keputusen bas tanggal 29 Februari 2000 maka ”hak guna erban keputusen” i bas kasus si bage ”arus iergai selaku hak pribadi”. Erkiteken semangat turang seninanta Takeda i bas mperjuangken kebebasen milih perawaten medis si sentudu ras pusuh peratenna si ilatih Pustaka, Saksi-Saksi i Jepang pe gundari banci ndatken perawaten medis alu la perlu mbiar ipaksa transfusi dareh.

18-20. (a) Uga pengadilen banding i Argentina ndukung hak sekalak jelma i bas nulak transfusi dareh arah kartu keterangen medis? (b) Kerna penalahgunan dareh, uga sicidahken kepatuhenta man kepeminpinen Kristus?

¹⁸ Argentina. Uga warga Kinirajan banci ersikap seumpama perlu erban keputusen medis paksa la sedar? Banci lalap sibaba dokumen hukum si ngerana guna kita bagi si ilakoken Pablo Albarracini. Bas bulan Mei 2012, irampok janah  itembak ia piga-piga kali. La ia sedar janah ibaba ku rumah sakit. Emaka la banci ijelaskenna kinitekenna kerna transfusi dareh. Tapi, ibabana kartu keterangen medis si sah si nggo iteken lebih empat tahun si lewat. Amin gia keadanna parah janah iselamatken piga-piga dokter atena ia alu transfusi dareh, tapi iergai petugas medis ka atena pemindon Pablo. Tapi, ipindo bapa Pablo, si la Saksi Jahwe, gelah ibatalken pengadilen pemindon anakna e.

¹⁹ Minter naik banding pengacara si jadi wakil ndehara Pablo. I bas piga-piga jam saja, ibatalken pengadilen banding perentah pengadilen rendah janah ibahanna keputusen maka pemindon pasien, si itulisken i bas kartu medis e, arus iergai. Naik banding bapa Pablo ku Mahkamah Agung Argentina. Tapi, la banci dat Mahkamah Agung alasen ”guna sangsi maka [keputusen la ngaloken transfusi dareh si ituriken i bas kartu medis Pablo] ibahan erpalasken pemetehna, pemindonna sendiri, janah la lit paksan”. Nina Mahkamah Agung, ”Lit hak kalak si sehat ras dewasa guna leben mereken petunjuk kerna kesehaten[-na], janah banci ngaloken ntah pe nulak perawaten medis tertentu . . . Petunjuk enda arus idalanken dokter si ertugas.”

²⁰ Turang seninanta Albarracini nggo malem. Salang kal pusuhna ras ndeharana erkiteken nggo ilengkapina kartu medisna. Arah perbahanen si sederhana tapi penting e, ibuktikenna maka ia patuh kempak pemerentahen Kristus i bas Kinirajan Dibata. Adi kam ras keluargandu uga? Enggo nge isindu kartu e?

21-24. (a) Uga maka dungna ibahan Mahkamah Agung Kanada keputusen si luar biasa kerna anak-anak si umurna lenga seh 16 tahun bage pe kerna penggunan dareh? (b) Uga kasus enda banci mpegegehi umat Jahwe si nguda denga?

²¹ Kanada. Biasana, iakui pengadilen-pengadilen hak orang tua guna milih perawaten medis si mehulina man anak-anakna. Maun-maun, ipedarat pengadilen ka keputusen maka anak-anak si umurna lenga seh 16 tahun si ikataken dewasa arus min iergai hakna i bas erbahan keputusen medis. Eme si nialami April Cadoreth. Paksa umurna 14 tahun, iopname ia erkiteken pendarahen dalam si mekelek. Piga-piga bulan si nggo lewat, nggo ilengkapina Kartu Keterangen Medis si risiken keterangen tertulis maka la banci ia itransfusi dareh amin gia mekelek keadanna. La iperdiateken dokter pemindon April si ituriken alu jelas janah iusahakenna ndatken perentah pengadilen guna mereken dareh. Ipaksana April itransfusi telu kantong sel dareh merah. Dungna ipeseri April pengalamen e ras pemerkosan.

²² Ibaba April ras orang tuana kasus enda ku pengadilen. Kenca dua tahun, ibaba ka me kasus enda ku Mahkamah Agung Kanada. Amin gia April talu, igalari Mahkamah biaya perkarana janah ipedaratna keputusen si erbahan April  menang bage pe anak-anak si deban si erupaya ndalanken hakna guna erbahan keputusen medis man dirina. Nina Mahkamah, ”Kerna perawaten medis, anak si nguda denga si umurna lenga seh 16 tahun arusna min iijinken nuriken pendapatna kerna keputusen medis tertentu si ncidahken tingkat kedewasan si cocok i bas carana rukur ras kematangenna.”

²³ Seh kal pentingna kasus enda erkiteken iakui Mahkamah Agung hak si erpalasken undang-undang man anak-anak si ikataken nggo dewasa. Mbarenda, lit hak pengadilen Kanada nentuken perawaten medis nandangi sekalak anak si umurna lenga seh 16 tahun adi ianggap pengadilen perawaten e guna kiniulin si anak. Tapi, kenca keputusen e, la lit hak pengadilen nentuken perawaten kai pe si la sentudu ras pemindon anak e, adi la leben iberekenna kesempaten guna mbuktiken maka kalak enda cukup dewasa i bas erbahan keputusenna sendiri.

 ²⁴ Sia-sia nge perjuangen si sedekah telu tahun enda? Menurut April, ”Lang!” Gundari, perintis biasa si nggo reh sehatna enda ngataken, ”Meriah kal ukurku meteh maka lit sitik penampatku i bas mpebadiaken gelar Dibata ras mbuktiken maka Setan perguak.” Pengalamen April enda ncidahken maka anak-anakta si nguda denga banci pang nentuken tindakenna, mbuktiken dirina selaku warga Kinirajan Dibata situhu-tuhu.​—Mat. 21:16.

25, 26. Maun-maun situasi kai si banci saja lit adi terjadi simulihen?

²⁵ Enggo ipercayaken Jahwe man orang tua tanggung jabap mpebelin anak-anak sentudu ras patokenNa. (Ul. 6:6-8; Ep. 6:4) Tugas enda mberat, tapi ndauh beraten adi orang tuana simulihen. Cara kalak enda mpebelin anak la seri. Misalna, ate orang tua si Saksi mpebelin anakna sentudu ras patoken Kristen, tapi banci saja si la Saksi la setuju. Tentu saja, perlu isedari orang tua si Saksi maka amin gia simulihen erbahan iketen perjabun peltep, tapi hubungen orang tua ras anak labo berubah.

²⁶ Banci saja ipindo orang tua si la Saksi ku pengadilen hak asuh anak gelah banci ipilihna cara mpebelin anakna sentudu ras agamana sendiri. Lit si erpengakap bahaya adi mpebelin anak jadi Saksi Jahwe. Ikatakenna maka anak-anak la banci ngerayaken ulang tahun, wari-wari raya, janah paksa terjadi keadan darurat medis, anak e la banci itransfusi dareh si ”nelamatken kegeluhenna”. Tapi bujur kal ninta erkiteken pentingen iakap melala pengadilen kegeluhen anak e asangken bahaya ntah lang agama orang tuana. Mari siperdiateken piga-piga contoh.

27, 28. Uga pendapat Pengadilen Tinggi Ohio nandangi tuduhen maka bahaya mpebelin anak jadi Saksi Jahwe?

²⁷ Amerika Serikat. Bas tahun 1992, ipereksa Pengadilen Tinggi i Ohio kasus sekalak bapa si la Saksi si ngataken bahaya adi anakna ipebelin jadi Saksi Jahwe. Enggo isetujui pengadilen rendah kerna si e janah iberekenna hak asuh man si bapa. Tapi man nandena, Jennifer Pater, ibere hak guna ndahi anakna, alu sarat la banci ”ngajarken ntah pe mpetandaken kiniteken Saksi-Saksi Jahwe man anakna i bas bentuk kai pe”. Perentah pengadilen rendah enda mbue pengertinna, banci ngertiken maka turang seninanta Pater pe la banci ngerana-ngerana ras anakna, Bobby, kerna Pustaka si Badia ntah pe patoken moralna! Banci nge bayangkenndu uga perasan Jennifer? Ceda kal ukurna, tapi ikatakenna maka ia erlajar sabar janah nimai Jahwe ertindak. Ingetna mulihi, ”Terus aku itegu-tegu Jahwe.” Isampati organisasi Jahwe pengacarana naik banding ku Pengadilen Tinggi Ohio.

 ²⁸ La setuju pengadilen e nandangi keputusen pengadilen rendah, alu ngataken maka ”lit hak dasar orang tua ndidik anak-anakna, termasuk hak ncakapken aturen-aturen moral bage pe agamana”. Ikataken pengadilen maka la lit hak pengadilen mbatasi hak asuh orang tua erpalasken agama, kecuali adi aturen agama si niajarken Saksi Jahwe e mbahayaken fisik ras mental si anak. La lit dat pengadilen bukti maka kiniteken agama Saksi-Saksi banci mereken pengaruh si ncedai kesehaten mental ras fisik si anak.

29-31. Engkai maka sekalak turang seninanta i Denmark la ndatken hak asuh nandangi anakna, janah kai keputusen Mahkamah Agung Denmark i bas persoalen enda?

²⁹ Denmark. Anita Hansen pe ngadapi masalah si seri paksa bekas perbulangenna mindo ku pengadilen hak asuh nandangi Amanda si umurna pitu tahun. Amin gia ibereken pengadilen distrik hak asuh man turang seninanta Hansen bas tahun 2000, naik banding bapa Amanda ku pengadilen tinggi, si nasapken keputusen pengadilen distrik janah mereken hak asuh man bana. Ikataken pengadilen tinggi maka erkiteken la seri pendapat duana orang tua enda kerna prinsip nggeluh si erpalasken kiniteken agamana, si bapa me si lebih patut ndatken hak asuh. Emaka, intina, turang seninanta Hansen la ndatken hak asuh nandangi Amanda erkiteken ia Saksi Jahwe!

 ³⁰ Paksa ngadapi keadan si sulit enda, maun-maun tersiksa kal iakap turang seninanta Hansen janah dungna lanai ietehna kai si arus itotokenna. ”Tapi,” nina, ”kai si ikataken Roma 8:26 ras 27 tuhu-tuhu ngapuli aku. Lalap kugejapken maka iangkai Jahwe nge kai maksudku. Terus nge iperdiatekenNa aku janah itegu-teguNa.”​—Oge Masmur 32:8; Jesaya 41:10.

³¹ Naik banding turang seninanta Hansen ku Mahkamah Agung Denmark. I bas keputusenna, ikataken Mahkamah, ”Penungkunen kerna hak asuh iputusken erpalasken pertimbangen si jelas kerna kai si mehulina man si anak.” Kenca si e, ikataken Mahkamah maka keputusen kerna hak asuh tergantung uga cara orang tuana ndungi masalah, labo erpalasken ”ajaren ras prinsip” Saksi-Saksi Jahwe. Salang kal pusuh turang seninanta Hansen erkiteken iakui Mahkamah maka ia si cocok ngasuh Amanda janah hak e pe mulihken man bana.

32. Uga Mahkamah Eropa guna Hak Asasi Manusia ngelindungi orang tua Saksi i bas diskriminasi nari?

³² Erbage negeri i Eropa. I bas piga-piga kasus, masalah hukum kerna hak asuh anak-anak seh ku pengadilen-pengadilen tertinggi nasional. Ipertimbangken Mahkamah Eropa guna Hak Asasi Manusia (ECHR) persoalen enda alu mehuli. I bas dua kasus, iakui ECHR maka la seri perbahanen pengadilen-pengadilen rendah tingkat nasional man orang tua Saksi ras si la Saksi erkiteken agama saja. Alu ngataken perbahanen e sada diskriminasi, ibahan ECHR keputusen maka ”la banci isetujui perbahanen si mbeda-mbedaken kalak erkiteken agama saja”. Ituriken sekalak pernanden Saksi keriahen ukurna kerna keputusen ECHR, nina, ”Seh kal suina kuakap ituduh mbahayaken anak-anakku, padahal nggo kubereken kai si mehulina, mpebelin ia sentudu ras cara Kristen.”

33. Uga orang tua Saksi banci ndalanken prinsip i bas Pilipi 4:5?

³³ Tentu saja, orang tua Saksi si ngadapi kesuliten hukum kerna hakna i bas nuanken patoken Pustaka ku pusuh anak-anakna arus iusahakenna gelah masuk akal dingen mehuli. (Oge Pilipi 4:5.) Bagi kalak enda ngergai hakna i bas ndidik anak-anak sentudu ras dalan Dibata, arus ka iakuina maka nande ntah pe bapa si la Saksi, adi ia nggit, ia pe ikut ertanggung jabap selaku orang tua. Uga nge seriusna tanggung jabap orang tua Saksi i bas ndidik sekalak anak?

34. Uga orang tua Kristen si gundari banci ndatken kegunan i bas usihen kalak Jahudi paksa jaman Nehemia?

³⁴ Contoh i bas jaman Nehemia erguna kal man banta. Kalak Jahudi erjuang mpesikap janah majekken mulihi tembok Jerusalem. Ietehna maka alu ngelakokenca, kalak enda ras keluargana banci ikawali i bas musuh-musuh i sekelewetna. Emaka, iiahken Nehemia kalak enda, ”Erjuanglah guna  senina-seninanta sada bangsa, guna anak-anakndu, ndeharandu ras rumahndu.” (Neh. 4:14) Bali bagi kalak Jahudi, perjuangen e la sia-sia. Gundari pe orang tua Saksi erjuang mpebelin anak-anakna bas dalan kebenaren. Ieteh kalak e maka anak-anak terus ipengaruh si la mehuli i sekolah bage pe i sekelewetna. Banci saja pengaruh e pe masuk ku rumah arah erbage media. Kam orang tua, ula pernah kam lupa maka kerina perjuangenndu la sia-sia i bas nikapken lingkungen si aman si banci erbahan anak-anakndu maju secara rohani.

35, 36. Kegunan kai saja si dungna idatken Saksi-Saksi Jahwe erkiteken mperjuangken hak-hak hukum, janah kai tekadndu?

³⁵ Pasti ipasu-pasu Jahwe upaya organisasiNa i bas jaman si modern bas mperjuangken hak bebas eribadat. Paksa mperjuangkenca, megati kal umat Dibata mereken kesaksin si erguna i pengadilen bage pe man jelma si nterem. (Rom. 1:8) Kegunan si deban i bas mbue kemenangen hukum umat Dibata eme hak-hak sipil nterem jelma si la Saksi pe nggo ipeteguh. Tapi, selaku umat Dibata, labo kita kalak si erbahan perubahen sosial; janah la kita nggit mbenarken dirinta. Si pentingna, Saksi-Saksi Jahwe mperjuangken hak hukumna i pengadilen guna mpeteguhi ibadat situhu-tuhu janah erbanca maju.​—Oge Pilipi 1:7.

³⁶ Mbera la pernah sisepeleken pelajaren kerna kiniteken si banci sidatken i bas kalak si nggo erjuang guna ndatken kebebasen eribadat man Jahwe! Mbera kita pe tetap setia, janah tek maka pendahinta terus idukung Jahwe bage pe terus iberekenNa gegeh guna ngelakoken peratenNa.​—Jes. 54:17.