1, 2. (a) Prinsip kai nge si negu-negu pengikut Jesus seh asa gundari? (b) Uga musuh-musuh terus erupaya naluken kita, tapi kai hasilna?

 TEDIS Jesus i lebe-lebe Pilatus, hakim si mbelin kal kuasana nandangi bangsa Jahudi, janah iturikenna prinsip si negu-negu pengikutna si tutus seh ngasa gundari. Nina, ”Kinirajanku labo i bas doni enda nari asalna. Adi i bas doni enda nari kin Kinirajanku tentu enggo ngelawan suruh-suruhenku gelah ola aku iendesken man kalak Jahudi. Tapi Kinirajanku labo i bas doni enda nari!” (Joh. 18:36) Dungna Jesus iukum mate. Tapi kemenangen musuh-musuhna e la ndekah erkiteken Jesus ipekeke. Iusahaken kaisar Kerajan Romawi gelah ngkernepken pengikut-pengikut Kristus, tapi sia-sia. Paksa si e kalak Kristen mbarken berita Kinirajan ku belang-belang doni.​—Kol. 1:23.

² Kenca pajek Kinirajan tahun 1914, iupayaken piga-piga kekuaten militer si megegehna i bas sejarah ngkernepken umat Dibata. Tapi, la lit sada pe si berhasil. Melala pemerentahen ras golongen politik iusahakenna maksa kita gelah erpihak i bas masalah-masalahna. Tapi ia la berhasil mecah-mecah kita. Gundari, rayat Kinirajan lit i menam kerina negara i doni enda. Tapi, kita ipersada i bas perkade-kaden situhu-tuhu sebelang doni, tetap sipertahanken kenetralen si paguh kerna urusen politik i doni. Persadanta mereken bukti si banci iteki maka Kinirajan Dibata merentah janah Rajanta Jesus Kristus terus negu-negu rayatna, terus imurnikenna, janah terus ikawalina. Perdiateken uga Jesus ngelakokenca, janah perdiateken piga-piga kemenangen hukum si mpegegehi kinitekenta asum kita tetap ”la sikerajangen doni enda”.​—Joh. 17:14.

3, 4. (a) Kejadin kai saja si terjadi paksa Kinirajan pajek? (b) Rusur nge iangkai umat Dibata alu tangkas kerna kenetralen? Jelasken.

³ Kenca pajek Kinirajan, terjadi me perang i surga, kenca e isampetken me Setan ku doni. (Oge Ketangkasen 12:7-10, 12.) I doni pe terjadi perang, si nguji kesetian umat Dibata. Ertekad kalak e guna ngikuti usihen Jesus janah la  jadi bagin doni enda. Tapi, tangtangna labo iangkaina kal uga dauhna ia arus serap i bas kerina urusen politik.

⁴ Misalna, bagin Millennial Dawn Jilid VI a si iterbitken tahun 1904, ngiahken kalak Kristen gelah la erperang. Tapi, nina buku e adi lit sekalak Kristen iwajipken ikut militer, arus min iusahakenna gelah ndatken tugas si la ikut tempur. Adi la idatna tugas e janah ikirim ku medan perang, arus ipastikenna maka la ibunuhna musuh. Sanga ngomentari situasi paksa si e, Herbert Senior, si tading i Inggris janah iperidiken tahun 1905, ngataken, ”Lenga iangkai turang senina janah la lit pedah si jelas kerna banci ntah lang jadi tentera militer adi ngelakoken tugas-tugas si la ikut tempur saja.”

5. Uga The Watch Tower 1 September 1915 mulai erbahan murni pengertinta?

⁵ Tapi, mulai imurniken The Watch Tower 1 September 1915 pengertinta kerna masalah enda. Nina rujuken Studies in the Scriptures, ”Banci saja perbahanen si bage labo ertina kompromi.” Tapi, uga adi sekalak Kristen iancam maka ia itembak adi la nggit make seragam bage pe ikut dinas militer? Nina artikel i The Watch Tower e, ”La kin ulin mate itembak erkiteken setia man Raja Dame janah patuh man perentahna asangken mate itembak paksa ertugas guna raja-raja i doni ras ndukung kalak e janah, silang-langna teridah bagi kompromi nandangi ajaren Raja Surgawinta? Bas duana kematen e madin sipilih si pemena eme mate erkiteken setia kempak Raja Surgawinta.” Amin gia kata-kata e tegas, isimpulken artikel e, ”Labo ipaksaken kami pilihen enda. Enda saran saja.”

6. Kai si banci ipelajarindu i bas pengalamen turang seninanta Herbert Senior?

⁶ Piga-piga turang senina iangkaina masalah e alu jelas janah nggit nanggung akibatna. Nina Herbert Senior, si ituriken ndai, ”Menurutku, secara prinsip la lit bedana penusur bahan peledak i bas kapal nari [sada tugas si la ikut tempur] ras masukken peluru ku senjata guna itembakken.” (Luk. 16:10) Perban la ikut dinas militer erkiteken pusuh peratenna terganggu, turang seninanta Senior ipenjaraken. Ia ras 4 turang seninanta si deban ikut i bas terpuk 16 kalak si nulak dinas militer erkiteken pusuh peraten si terganggu. Termasuk ka dilaki-dilaki i bas agama si deban, si ipenjaraken i penjara Richmond i Inggris piga-piga waktu janah dungna itandai Richmond 16. Herbert ras si debanna pernah erbuni-buni ikirim alu kapal ku medan pertempuren i Prancis. I je, kalak e iputusken gelah itembak. Enda erbahan ia ras piga-piga kalak si deban erbaris ngalaken regu tembak, tapi kalak e la ibunuh. Sebalikna, ukumen kalak e ikurangi jadi sepuluh tahun penjara.

7. Kenca Perang Doni II imulai, kai si dungna iangkai umat Dibata?

 ⁷ Paksa Perang Doni II terjadi, dungna alu jelas iangkai umat Jahwe selaku sada terpuk kai ertina netral bage pe kai si ipindo adi kalak enda ngusih Jesus. (Mat. 26:51-53; Joh. 17:14-16; 1 Pet. 2:21) Misalna, i bas The Watchtower 1 November 1939 lit artikel si seh kal pentingna si erjudul, ”Netralitas”. Nina artikel e, ”Gundari, hukum si arus negu-negu umat perjanjin Jahwe eme kenetralen situhu-tuhu i bas bangsa-bangsa paksa perang.” Kerna artikel e, Simon Kraker, si pudi wari ngelayani i kantor pusat, i Brooklyn, New York, ngataken, ”Dungna kuangkai maka umat Dibata arus erdame ras kerina jelma, amin gia i bas ancamen perang.” Pangan rohani e isediaken bas paksana janah ikut nikapken umat Dibata i bas ngadapi serangen si la lit tadingenna nandangi kesetianna kempak Kinirajan.

8, 9. Uga nubuat rasul Johanes igenepi?

⁸ Inubuatken rasul Johanes maka kenca Kinirajan pajek tahun 1914, iusahaken naga, eme Setan si Iblis ngkernepken kalak si ndukung Kinirajan Dibata alu nemburken lau mbelin gambaren bas babahna nari. b (Oge Ketangkasen 12:9, 15.) Uga nubuat Johanes e igenepi? Mulai  tahun 1920-en ras seterusna, umat Dibata ngadapi galumbang penindasen. Paksa perang doni si peduaken, bali bagi turang seninanta si deban si tading i Amerika Utara, turang seninanta Kraker pe ipenjaraken erkiteken setia man Kinirajan Dibata. Malahen, sedekah perang e, lebih dua per telu narapidana si ipenjaraken i bas penjara-penjara federal i Amerika Serikat erkiteken alasen agama eme Saksi Jahwe.

⁹ Ate Iblis ras anak buahna ngeruntuhken kesetian rayat Kinirajan ijapa pe kalak e ringan. I sebelang Afrika, Amerika Serikat bage pe Eropa, kalak e ibaba ku pengadilen ras dewan pembebasen ersarat. Erkiteken tekad kalak e paguh guna tetap netral, kalak enda ipenjaraken janah ipekpeki ngasa cacat. I Jerman, umat Dibata ngadapi tekanen si mekelek erkiteken la nggit melasken ”heil Hitler” ntah pe ikut ndukung perang. Bas jaman Nazi lit kira-kira 6.000 si ipenjaraken bas kamp-kamp penjara, janah lebih 1.600 Saksi eme kalak Jerman ras si labo kalak Jerman mate erkiteken isiksa. Amin gia bage, Iblis la ngasup erbahan umat Dibata cilaka si rasa lalap.​—Mrk. 8:34, 35.

10. Kai si igambarken ”doni”, janah uga ”doni” nampati umat Dibata?

¹⁰ Nubuat si itulis rasul Johanes nuriken maka nandangi itelen ”doni” me ”lau mbelin” penindasen, alu bage umat Dibata tersampati. ”Doni” eme piga-piga kalak ntah pe terpuk si erkuasa i doni si lebih masuk akal. Uga bagin nubuat enda igenepi? Puluhen tahun kenca Perang Doni II, megati ”doni” ikut campur guna kepentingen kalak si setia ndukung Kinirajan Mesias. (Oge Ketangkasen 12:16.) Misalna, hak Saksi Jahwe guna la ikut bas dinas militer bage pe la muat bagin bas upacara nasional nggo ilindungi erbage pengadilen si erpengaruh. Si pemena, perdiateken piga-piga kemenangen si penting si ibereken Jahwe man umatNa kerna ndalanken dinas militer.​—Msm. 68:21.

11, 12. Masalah kai si ihadapi turang seninanta Sicurella ras Thlimmenos, janah kai hasilna?

¹¹ Amerika Serikat. Anthony Sicurella salah sada bas enem anak si ipebelin orang tua Saksi. Ia iperidiken sanga umurna 15 tahun. Paksa umurna 21 tahun, ilaporkenna man panitia pendaftaren wajip militer maka ia sekalak rohaniwan. Dua tahun kenca si e, tahun 1950, ibahanna pemindon gelah la ikut dinas militer erkiteken pusuh peraten si terganggu. Amin gia la lit keberaten i bas laporen Biro Investigasi Federal (FBI), tapi la ialoken Kejaksan AS pemindonna e. Kenca piga-piga kali proses pengadilen, ipereksa Mahkamah Agung AS kasus turang seninanta Sicurella janah ibatalkenna keputusen pengadilen tingkat rendah alu  imenangkenna turang seninanta Sicurella. Keputusen enda jadi palas man warga Amerika Serikat si deban si la nggit ikut dinas militer erkiteken pusuh peraten si terganggu.

¹² Junani. I bas tahun 1983, Iakovos Thlimmenos ituduh selaku pemberontak erkiteken la nggit make seragam militer janah ipenjaraken. Kenca bebas, ngelamar ia jadi akuntan, tapi la ialoken erkiteken lit cataten kriminalna. Ibabana persoalen e ku pengadilen tapi kenca talu i pengadilen Junani, naik banding ia ku Mahkamah Eropa guna Hak Asasi Manusia (ECHR). Bas tahun 2000, Dewan Agung ECHR, panitia si lit i je 17 hakim, erbahan keputusen si erban Thlimmenos menang, enda jadi palas guna ngelawan diskriminasi. Sope keputusen enda, lebih 3.500 turang seninanta si dilaki i Junani lit cataten kriminalna perban pernah ipenjaraken erkiteken tetap netral. Kenca keputusen e, ipedarat Junani undang-undang guna mbersihken turang seninanta e i bas tuduhen kriminal kai pe. Janah paksa undang-undang dasar Junani ipesikap, ipeteguh me undang-undang si piga-piga tahun si lewat nggo mereken hak guna ndalanken dinas sipil si deban man kerina warga Junani.

13, 14. Menurutndu, pelajaren kai saja si banci sidat i bas kasus Ivailo Stefanov ras Vahan Bayatyan?

¹³ Bulgaria. Bas tahun 1994, Ivailo Stefanov, itarik jadi tentera paksa umurna 19 tahun. Tapi la ia nggit jadi tentera ntah pe ngelakoken tugas si la ikut tempur i bas pengaturen militer. Emaka ia iukum 18 bulan penjara. Tapi naik banding ia erpalasken hakna selaku kalak si la nggit ikut dinas militer erkiteken pusuh peraten si terganggu. Dungna kasus enda ibaba ku ECHR. Bas tahun 2001, sope kasusna ipereksa, ibahan me perdamen ras turang seninanta Stefanov. Pembebasen enda ibereken pemerentah Bulgaria labo ngenca man turang seninanta Stefanov, tapi pe man kerina warga Bulgaria si atena ndalanken tugas sipil si deban. c

¹⁴ Armenia. I bas tahun 2001, Vahan Bayatyan iwajipken ikut militer. d Erkiteken pusuh peraten si terganggu, la ia nggit ikut, tapi gagal ia paksa naik banding i pengadilen-pengadilen negeri. Bas bulan September 2002, mulai idalanina ukumen dua setengah tahun i penjara, tapi ibebasken kenca sepuluh setengah bulan. Paksa si e, naik banding ia ku ECHR, si mereksa kasusna. Tapi, tanggal 27 Oktober 2009 iputusken Mahkamah e ka maka ia talu. Keputusen enda tempa-tempa erbahan turang seninanta i Armenia si ngadapi persoalen e tuhu-tuhu talu. Tapi, iselidiki Dewan Agung ECHR ka mulihi keputusen e. I bas tanggal 7 Juli 2011, Mahkamah erbahan keputusen si erban Vahan Bayatyan menang. Enda me si tangtangna kal iakui  ECHR maka la ikut dinas militer erkiteken pusuh peraten si terganggu si erpalasken agama arus ilindungi erpalasken hak bebas mereken pendapat, ndalanken kai si ikataken pusuh peraten, bage pe eragama. Keputusen e ngelindungi hak Saksi Jahwe, bage pe hak ratusen juta penduduk i negeri-negeri si jadi anggota Dewan Eropa. e

15. Engkai maka umat Jahwe la nggit ikut i bas upacara nasional?

¹⁵ Umat Jahwe tetap setia man Kinirajan Mesias labo alu la ikut dinas militer saja, tapi pe alu mehamat la ikut upacara nasional. Khususna kenca Perang Doni II terjadi, galumbang semangat nasional nerang kerina doni. I bas mbue negeri warga iwajipken ersumpah mbela negarana, ngendeken lagu kebangsan, ntah pe ngangkat tan guna hormat man bendera nasional. Tapi, tetap sibereken penembahen si la ertupang man Jahwe. (Kel. 20:4, 5) Akibatna, reh me banjir penindasen. Amin gia bage, sekali  nari igunaken Jahwe ”doni” guna nelen piga-piga tentangen enda. Perdiateken piga-piga kemenangen si luar biasa si ibereken Jahwe arah Jesus man banta kerna masalah enda.​—Msm. 3:9.

16, 17. Masalah kai si ihadapi Lillian ras William Gobitas, janah kai si banci ipelajarindu i bas kasus kalak enda nari?

¹⁶ Amerika Serikat. I bas tahun 1940, ipedarat Mahkamah Agung AS keputusen 8 banding 1 guna ngelawan Saksi-Saksi Jahwe i bas kasus si itandai kasus Minersville School District v. Gobitis. Lillian Gobitas, f si umurna 12 tahun ras agina William, 10 tahun, la nggit mbelasken sumpah setia ntah pe ngangkat tan guna hormat man bendera erkiteken tetap setia atena man Jahwe. Akibatna, kalak e ipedarat bas sekolah nari. Kasus kalak e ipeseh ku Mahkamah Agung, janah iputusken Mahkamah maka perbahanen sekolah sentudu ras undang-undang erkiteken kalak e bagin ”persadan nasional”. Keputusen enda ngerehken api penindasen. Reh buena anak Saksi ipedarat bas sekolah nari, Saksi si dewasa kebenen pendahin, janah piga-piga Saksi ianiaya masarakat alu kejam. Ikataken buku The Lustre of Our Country maka ”penganiayan nandangi Saksi mulai tahun 1941 ngasa 1943, enda sada situasi si mekelek si tuhu-tuhu la mperdiateken agama bas abad si pedua puluhken i Amerika”.

¹⁷ Kemenangen musuh-musuh Dibata e kentisik ngenca. Tahun 1943, ipertimbangken Mahkamah Agung kasus si deban si menam bagi kasus Gobitis. Kasus enda igelari West Virginia State Board of Education v. Barnette. Sekali enda, ibereken Mahkamah Agung kemenangen man Saksi Jahwe. Enda me si pemenana kal i bas sejarah AS Mahkamah Agung nasapken keputusenna sendiri bas waktu si la ndekah. Kenca keputusen e, minter reh kurangna penindasen si terang-terangen nandangi umat Jahwe i Amerika Serikat. Janah, hak kerina warga Amerika Serikat ipepaguh.

18, 19. Menurut Pablo Barros, kai si nampati ia tetap paguh, janah uga umat Jahwe si debanna banci ngusih ia?

¹⁸ Argentina. I bas tahun 1976, Pablo ras Hugo Barros, si umurna waluh ras pitu tahun, ipedarat bas sekolah nari erkiteken la nggit ikut upacara bendera. Pernah ipekpek ibu kepala sekolah takal Pablo janah itugutkenna ia. Itahanna duana kalak e sedekah sada jam kenca dung sekolah, ipaksana atena gelah ikut upacara nasional. Paksa iinget Pablo mulihi pengalamen si pagit e, ikatakenna, ”Adi la aku isampati Jahwe, la kungasup nahanken tekanen si banci ngeruntuhken kesetianku.”

¹⁹ Paksa kasus enda seh ku pengadilen, idukung hakim keputusen sekolah guna mpedarat Pablo ras Hugo. Tapi, naik banding kalak e ku Mahkamah Agung Argentina. Tahun 1979, ibatalken Mahkamah keputusen pengadilen tingkat rendah, alu ngataken, ”Ukumen si [ipedarat] e  nggo ertentangen ras hak si erpalasken undang-undang guna erlajar (Nomor 14) ras tugas Negara guna njamin pendidiken dasar (Nomor 5).” Kemenangen e erguna kal man kira-kira 1.000 anak Saksi. Lit si la surung ipedarat bas sekolah nari janah si debanna, bagi Pablo ras Hugo, ialoken mulihi i sekolah negeri.

20, 21. Uga kasus Roel ras Emily Embralinag mpepaguh kinitekenndu?

²⁰ Filipina. I bas tahun 1990, Roel Embralinag, g si umurna 9 tahun, ras kakana Emily, 10 tahun, bage pe kira-kira 66 murid Saksi si debanna, ipedarat bas sekolah nari erkiteken la nggit ngangkat tan guna hormat bendera. Icubaken Leonardo, bapa Roel ras Emily, ngerana ras pihak sekolah tapi la berhasil. Paksa persoalen e reh kelekna, ipeseh Leonardo tuntuten ku Mahkamah Agung. Tapi la lit sen ras pengacara Leonardo guna mbela ia. Ertoto me keluarga enda alu tutus man Jahwe mindo bimbingenNa. Asum si e, anak-anakna itokohi janah ihina. Lanai lit iakap  Leonardo arapen guna menang bas kasus enda erkiteken la mbue ietehna kerna hukum.

²¹ Alu la isangka-sangka, lit si mbela keluarga enda eme Felino Ganal, sekalak pengacara si pernah erdahin bas perusahan hukum si terberita i negeri e. Paksa kasus e terjadi, turang seninanta Ganal nggo ndarat bas perusahan e nari janah jadi Saksi Jahwe. Dungna, paksa kasus enda ipeseh ku Mahkamah Agung, alu bulat sora imenangken Mahkamah e Saksi janah ibatalkenna perentah guna mpedarat anak-anak bas sekolah nari. Sekali nari, kerina kalak si atena ngeruntuhken kesetian umat Dibata gagal.

22, 23. (a) Engkai maka umat Jahwe ndatken melala kal kemenangen hukum si penting? (b) Kai si ibuktiken perkade-kadenta sebelang doni si dem alu kedamen?

²² Engkai maka banci umat Jahwe ndatken bage buena kemenangen hukum si penting? La lit pengaruhta secara politik. Tapi, i tiap negeri ras pengadilen, hakim-hakim si adil nggo ngelindungi kita bas serangen si la erngadi-ngadi arah kalak si nentang kita alu kejam. Dungna, enda jadi patoken hukum i sada negara. Pasti nggo idukung Kristus usahanta guna ndatken kemenangen-kemenangen e. (Oge Ketangkasen 6:2.) Engkai maka kita ikut bas perjuangen hukum si bage? Tujunta labo mpesikap sistem hukum. Tapi, mastiken gelah banci terus silayani Rajanta, Jesus Kristus, alu la lit si ngambatisa.​—Perb. 4:29.

²³ I tengah-tengah doni si terbagi erkiteken permasalahen politik ras si dem alu segat ate, Rajanta si merentah, Jesus Kristus, nggo masu-masu erbage upaya pengikutna i belang-belang doni guna mpertahanken kenetralen. Setan nggo gagal i bas upayana guna mecah-mecah ras naluken kita. Kinirajan nggo mpepulung jutan kalak si la nggit ”ersikap-sikap ertempur”. Perkade-kadenta sebelang doni si dem kedamen tuhu-tuhu sada mukjizat. Enda sada bukti si la banci itogan maka Kinirajan Dibata nggo merentah!​—Jes. 2:4.