1, 2. Peristiwa kai si seh kal pentingna si terjadi i bas sejarah doni enda, janah ngkai maka la iidah manusia?

 PERNAH nge kam tersungkun-sungkun uga nanamna adi mulihken nggeluh i bas masa perubahen sejarah? Nterem kalak si tersungkun-sungkun bage. Tapi, cuba ukuri: Seumpama kam nggeluh i bas masa si penting si bage, isaksikenndu nge peristiwa-peristiwa si maba perubahen? Banci saja lang. Peristiwa-peristiwa si terjadi sope pemerentahen-pemerentahen si nai ndabuh janah itulis i bas buku-buku sejarah rusur kal la ieteh jelma si nterem. Alu kata si deban, mbue peristiwa si ersejarah terjadi i balik layar, misalna i ruang-ruang istana, ruang pejabat, ntah pe kantor pemerentahen. Amin gia bage, perubahen e mpengaruhi kegeluhen jutan kalak.

² Lit sada peristiwa si seh kal pentingna si terjadi i bas sejarah doni enda. Peristiwa enda erpengaruh kal man kegeluhen jutan kalak. Tapi, enda la banci iidah manusia. Tentu saja, si imaksudken kami eme pajekna Kinirajan Dibata i surga, pemerentahen Mesias si nggo ndekah ijanjiken si nandangi ndungi kerina sistem doni enda. (Oge Daniel 2:34, 35, 44, 45.) Erkiteken la isaksiken manusia pajekna Kinirajan si seh kal pentingna e, ibuniken Jahwe nge ateNa i bas manusia nari? Ntah sebalikna, ipersiapken Jahwe nge umatNa si setia guna peristiwa e? Mari sinehen.

3-5. (a) Ise kin ’persuruhen perpadanen’ si lit i bas Maleaki 3:1? (b) Kai si terjadi sope ’persuruhen perpadanen’ reh ku rumah rohani Dibata?

³ Mbarenda nari, ate Jahwe nikapken umatNa guna pajekna Kinirajan Mesias. Misalna, perdiateken nubuat i bas Maleaki 3:1, ”Kusuruh persuruhenKu nikapken dalan man bangKu. Kenca bage [JAHWE] si idaramindu e rempet reh ku rumahNa. PersuruhenKu si tedeh atendu ngidahsa e nandangi reh me, jenari imomokenna perpadanenKu.”

⁴ I bas penggenepen jaman modern, ndigan Jahwe, Dibata si benar, reh guna mereksa kalak si ngelayani i halamen rumah rohaniNa i doni? Nubuat enda njelasken maka Jahwe reh radu ras ’persuruhen perpadanen’. Ise kin ia? Ia me Raja Mesias, Jesus Kristus! (Luk. 1:68-73) Selaku Penguasa  si mbaru denga itangkuhken, ipereksa janah imurnikenna umat Dibata i doni.—1 Pet. 4:17.

⁵ Tapi, ise kin ”persuruhen” si deban si ituriken i bas bagin pemena Maleaki 3:1? Tokoh i bas nubuat e leben reh sope kerehen Raja Mesias. Puluhen tahun sope 1914, lit nge si ”nikapken dalan” guna Raja Mesias?

6. Ise kin ”persuruhen” si inubuatken si pertangtangna kal reh lako nikapken kalak si setia guna erbage peristiwa si nandangi terjadi?

⁶ Banci sidatken jabapenna i bas buku enda si nuriken sejarah si luar biasa kerna umat Jahwe i bas jaman modern. Sejarah enda ibenai i bas pengujung abad si pesepuluh siwahken. Paksa si e, lit sada terpuk kitik kalak si tutus si jadi golongen Kristen situhu-tuhu i tengah-tengah kepalsun. Dungna terpuk enda itandai selaku Ajar-Ajar Pustaka si Badia. Paksa si e, kalak si ndalanken kepeminpinen eme Charles T. Russell ras teman-temanna si ndeher ras ia si jadi ”persuruhen” si inubuatken e, eme si mereken bimbingen rohani man umat Dibata janah nikapken kalak e guna erbage peristiwa si nandangi terjadi. Mari siperdiateken empat cara ”persuruhen” e ngelakokenca.

7, 8. (a) I bas tahun 1800-en, ise si tangtangna mpebetehken guak kerna ajaren tendi si la banci mate? (b) Ajaren palsu kai saja si ipebetehken C. T. Russell ras teman-temanna si ndeher ras ia?

⁷ Ajar-Ajar Pustaka si Badia erlajar alu tutus; ersada arih kalak enda kerna kebenaren-kebenaren doktrin si jelas, ipepulungna, janah iterbitkenna. Erabad-abad dekahna, Susunen Kristen lit i bas kegelapen rohani; melala ajarenna erpalasken kekafiren. Contoh utamana ajaren kerna tendi si la banci mate. I bas tahun 1800-en, piga-piga ajar-ajar Pustaka si Badia si tutus mpelajari ajaren e janah idahna maka ajaren e la lit i bas Kata Dibata. Alu la mbiar Henry Grew, George Stetson, bage pe George Storrs nerbitken tulisen janah erkhotbah guna mpebetehken guak Setan e. a Kai si ilakoken kalak e mbelin kal pengaruhna man C. T. Russell ras teman-temanna si ndeher ras ia.

⁸ Terpuk si kitik Ajar-Ajar Pustaka si Badia enda meteh maka ajaren-ajaren si deban si lit hubungenna ras tendi si la banci mate pe salah janah erbahan bingung. Misalna, ajaren kerna kerina kalak si mehuli lawes ku surga ntah pe isiksa Dibata tendi kalak jahat si la banci mate seh rasa lalap i bas api neraka. Alu la mbiar Russell ras teman-remanna si ndeher ras ia mpebetehken guak e i bas piga-piga artikel, buku, pamflet, risalah, bage pe khotbah si iterbitken.

9. Uga Zion’s Watch Tower mpebetehken kepalsun ajaren kerna Dibata Si Telu Sada?

⁹ Ajar-Ajar Pustaka si Badia pe mpebetehken kepalsun ajaren kerna Dibata Si Telu Sada si isembah i belang-belang doni. I bas tahun 1887, Zion’s Watch Tower ngatakenca, ”Seh kal jelasna ituriken i bas Pustaka si Badia kerna perbedan Jahwe ras Tuanta Jesus janah uga situhuna hubungen kalak e.” Kenca e, nina artikel e seh kal anehna ”gagasen kerna  Dibata si telu sada, telu Dibata i bas sada, sekaligus, sada Dibata i bas telu, jadi terberita janah ialoken jelma si nterem. Tapi, fakta enda ncidahken maka gereja-gereja sangana tunduh asum musuh naban ia alu ajaren si lepak”.

10. Uga Watch Tower ncidahken maka 1914 tahun si penting?

¹⁰ Bagi si tersurat i bas judulna si lengkap, majalah Zion’s Watch Tower and Herald of Christ’s Presence merhat kal meteh nubuat-nubuat si lit hubungenna ras kerehen Kristus. Penulis-penulis majalah enda eme kalak si iminaki si setia. Kalak enda ngidah maka nubuat Daniel kerna ’pitu paksa’ lit hubungenna ras masa penggenepen peraten Dibata kerna Kinirajan Mesias. Mulai tahun 1870-en, kalak enda ncidahken maka pitu paksa e ngadi i bas tahun 1914. (Dan. 4:25; Luk. 21:24) Amin gia lenga iangkai turang seninanta e kerina arti penting tahun si ibereken tanda e, imomoken kalak enda ku japa pe kerna kai si ietehna janah pengaruhna ndekah ertahan.

11, 12. (a) Ise si ipuji turang seninanta Russell kerna kai si iajarkenna? (b) Sibar uga pentingna pendahin si ilakoken Russell ras teman-temanna puluhen tahun sope 1914?

¹¹ Russell bage pe teman-temanna si setia la nggit ngaloken pujin nandangi pengantusen kebenaren rohani si nggo  ipetangkas si seh kal pentingna e. Malahen Russell muji kalak si leben ndatken pengantusen e. I babo kerinana, ipujina Dibata Jahwe, erkiteken Jahwe me si ngajar umatNa kerna kai si perlu ieteh kalak e janah ndigan kalak e perlu metehsa. Tuhu-tuhu ipasu-pasu Jahwe upaya Russell ras teman-temanna guna nerapken kebenaren i bas guak nari. Asum tahun-tahun erdalan, kalak enda nggo ndauh kal bedana ras Susunen Kristen.

¹² Seh kal luar biasana pendahin si ilakoken dilaki-dilaki si setia e i bas mbela kebenaren doktrin puluhen tahun sope 1914! Nina The Watch Tower and Herald of Christ’s Presence 1 November 1917, ”Gundari enda jutan kalak nggejapken maka ia nggo bebas i bas baban si mberat, perasan mbiar erkiteken ajaren api neraka ras ajaren palsu si debanna . . . Galumbang Kebenaren, si ibenai lebih i bas empat puluh tahun si nggo lewat, reh belinna janah terus reh belinna ngasa seh ku belang-belang doni; janah kalak si nentangsa, si ncubaken gelah Kebenaren e la seh ku belang-belang doni, tempa-tempa ngelawan galumbang si seh kal belinna.”

13, 14. (a) Uga ”persuruhen” nikapken dalan guna Raja Mesias? (b) Kai si banci siusih i bas turang seninanta nari si nggeluh i bas lebih sada abad si nggo lewat?

¹³ Cuba ukuri enda: Enggo nge umat Dibata ersikap guna kehadiren Kristus adi kalak enda la banci mbedaken Jesus ras Bapana, Jahwe? Pasti lang! Kalak enda pe la banci ersikap adi erpengakap maka tendi si la banci mate nggo pasti banci idatken kerina kalak janah labo sada pemere si meherga si ibereken Dibata kempak piga-piga pengikut Kristus saja; kalak enda pe la banci ersikap adi erpengakap maka Dibata niksa kalak i bas api neraka si rasa lalap! Jelas me, ”persuruhen” e nikapken dalan guna Raja Mesias!

¹⁴ Uga kita gundari enda? Kai si banci siusih i bas turang seninanta nari si nggeluh i bas lebih sada abad si nggo lewat e? Bali bagi kalak e, merhat kal kita ngoge janah mpelajari Kata Dibata. (Joh. 17:3) Asum doni si ngayaki kinibayaken enda kote secara rohani, mbera kita terus merincuh man pangan rohani!—Oge 1 Timotius 4:15.

15. Kai si dungna isedari Ajar-Ajar Pustaka si Badia? (Nehen ka cataten i teruh.)

¹⁵ Ajar-Ajar Pustaka si Badia ngajarken maka kerina kalak perlu ndarat i bas gereja si ikuasai doni. I bas tahun 1879, Watch Tower mbahas kerna ”gereja Babilon”. Tuhu nge enda maksudna kepausan? Gereja Katolik Roma? Payo, menurut golongen agama Protestan erabad-abad dekahna, enda me gambaren nubuat kerna Babilon i bas Pustaka si Badia. Tapi, dungna isedari Ajar-Ajar Pustaka si Badia maka kerina gereja Susunen Kristen eme ”Babilon” jaman modern. Engkai? Erkiteken kerina kalak enda ngajarken ajaren palsu bagi si nggo ibahas ndai. b I bas pudi wari, publikasinta nuriken  alu lebih terus terang kerna kai si arus ilakoken anggota gereja Babilon si tutus.

16, 17. (a) Uga buku Millennial Dawn Jilid III bage pe majalah Watch Tower ngiahken kerina kalak gelah ngundurken diri i bas agama palsu nari? (b) Faktor kai si erbahanca maka persinget si tangtangna e kurang tegas? (Nehen cataten i teruh.)

¹⁶ Misalna, i bas tahun 1891, buku Millennial Dawn Jilid III mbahas kerna uga Dibata nulak Babilon jaman modern janah ngataken, ”Kerina sistem gereja Susunen Kristen itulak.” Kenca si e ikataken maka kerina kalak si ”la setuju nandangi doktrin ras kebiasanna si palsu gundari ilebuh gelah ndarat jenari”.

¹⁷ I bas bulan Januari 1900, Watch Tower mereken pedah man kalak si tetap mpertahanken gelarna i bas daftar anggota gereja ras kalak si ndarami alasen guna si e alu ngataken, ”Tek nge aku enda kebenaren, janah labo rusur kudahi kebaktin gereja si deban.” Isungkuni artikel e, ”Tapi, banci kin bage, setengah i darat setengah nari i bas Babilon? Enda kin kepatuhen si ipindo . . . si ngena ate Dibata janah si erbahan meriah ukurNa? Tentu saja lang. Kalak e [anggota gereja] erbahan perjanjin i lebe-lebe jelma si nterem ras sada golongen agama adi ia ergabung ku je, janah arus setia ndalanken kerina persaraten i bas perjanjin e ngasa ia . . . ndarat ntah pe mbatalken keanggotanna i lebe-lebe jelma si nterem.” Asum waktu erdalan, pedah enda reh tegasna. c Juak-juak Jahwe arus nadingken kai pe si lit hubungenna ras agama palsu.

18. Engkai maka kerina kalak perlu ndarat i bas Babilon si Mbelin nari?

¹⁸ Adi persinget guna ndarat i bas Babilon si Mbelin nari la terus imomoken, banci nge Kristus selaku Raja si mbaru denga itangkuhken mpuna golongen si nikapken diri, eme juak-juak si iminaki i doni? Tentu saja lang, erkiteken kalak Kristen si bebas i bas kuasa Babilon nari me si banci nembah Jahwe ”alu kesah si badia ras kebenaren”. (Joh. 4:24, Terjemahan Dunia Baru, [NW]) Gundari, ertekad nge kita guna tetap bebas i bas agama palsu nari? Mbera terus sipatuhi perentah Jahwe guna ndarat jenari!—Oge Ketangkasen 18:4.

19, 20. Uga Watch Tower ngiahken umat Dibata gelah pulung ras-ras guna nembah Jahwe?

¹⁹ Ajar-Ajar Pustaka si Badia ngajarken maka sapih-sapih teman sada kiniteken arus min pulung ras-ras guna nembah Dibata, adi banci. Kalak Kristen situhu-tuhu erpengakap maka ndarat i bas agama palsu nari la bias. Seh kal pentingna ka ngikutken ibadat situhu-tuhu. Mulai terbiten-terbiten si pemena, Watch Tower ngiahken kalak si ngoge gelah pulung ras-ras guna nembah Dibata. Misalna, i bas bulan Juli 1880, turang seninanta Russell mereken laporen kerna kunjungen khotbah si ilakokenna janah ikatakenna maka perpulungen si ibahan e mpegegehi sada ras si debanna. Janah iiahkenna kalak si ngoge gelah mereken laporen kerna perkembangen perpulungen kalak e alu ngirimken  kartu-kartu, si piga-piga ibahan i bas halamen-halamen majalah e. Kai tujunna? ”Mbera sisedari maka . . . dame kal ukurndu ibahan Tuan; paksa terus kam pulung ras kalak si erkiniteken.”

²⁰ I bas tahun 1882, sada artikel si erjudul ”Pulung Ras-Ras” lit i bas Watch Tower. Artikel e ngiahken kalak Kristen gelah ngaturken perpulungen-perpulungen ”guna sisampat-sampaten, siiah-iahen, janah mpegegehi sada ras si debanna”. Nina, ”La soal adi lit i bas kam si la lit sekolahna ntah pe talentana. Babandulah Pustaka si Badia, kertas, bage pe pensilndu, janah gunaken alu mehuli Konkordansi (kamus ntah pe indeks ayat-ayat). Pilihndu topikna; pindo penampat Kesah si badia gelah banci iantusindu; kenca e, oge, ukuri, bandingken ayat ras ayat janah kam pasti ibimbing ku kebenaren.”

21. Contoh si mehuli kai si ibereken runggun Allegheny, Pennsylvania kerna perpulungen ras mpermakani?

²¹ Lit kantor pusat Ajar-Ajar Pustaka si Badia Allegheny, Pennsylvania, AS. Bas negara bagin enda, kalak enda mereken contoh si mehuli alu pulung ras-ras erkiteken patuh man  pedah Dibata i bas Heber 10:24, 25. (Oge.) I pudi wari, turang seninanta si nggo metua, Charles Capen nginget mulihi perpulungen-perpulungen si idahina paksa kitik denga. Itulisna, ”Kuingat denga ayat si ilukis i bas dingding bale perpulungen Lembaga. ’Sada ngenca Gurundu, janah kam kerina ersenina.’ Ndekah kal kuinget ayat e, la lit perbedan peminpin ras kalak biasa bas kalangen umat Jahwe.” (Mat. 23:8) Niinget turang seninanta Capen ka mulihi perpulungen-perpulungen si ngiahken janah si mpegegehi e, bage pe upaya turang seninanta Russell i bas mpermakani tep-tep anggota jemaat.

22. Uga tanggapen kalak si setia nandangi pedah guna reh ku perpulungen Kristen, janah pelajaren kai si banci sidatken bas kalak enda nari?

²² Kalak si setia iikutkenna contoh enda ras petunjuk si ibereken. Lit me runggun-runggun si mbaru i bas negara bagin si debanna, misalna Ohio ras Michigan, kenca e, i belang-belang Amerika Utara bage pe i negeri-negeri si deban. Cuba ukuri: Banci kin kalak si setia tuhu-tuhu nggo ersikap guna kehadiren Kristus adi kalak e la ilatih patuh man pedah Dibata gelah pulung ras-ras guna eribadat? Tentu lang! Uga kita gundari enda? Kita pe perlu erbahan tekad si seri guna ratur reh ku perpulungen, ngupayaken gelah terus eribadat ras-ras janah siiah-iahen secara rohani.

23. Uga Watch Tower njelasken maka kerina kalak si iminaki arus jadi perberita kebenaren?

²³ Ajar-Ajar Pustaka si Badia ngajarken maka kerina kalak si iminaki arus jadi perberita kebenaren. I bas tahun 1885, Watch Tower ngataken, ”Ula lupa maka tiap  anggota golongen si iminaki itangkuhken guna erberita (Jes. 61:1), ilebuh guna pelayanen.” Terbiten 1888 risiken persinget enda, ”Tugasta jelas . . . Adi la siperdiateken janah la sidalanken, kita budak si melet, la kita metunggung ngaloken keduduken si meganjang guna iminaki.”

24, 25. (a) Kai ka si ilakoken Russell ras teman-temanna si ndeher ras ia selain ngiahken kalak guna erberita? (b) Kai si ituriken sekalak kolportir kerna pendahinna paksa jarang denga kal lit motor?

²⁴ Turang seninanta Russell ras teman-temanna si ndeher ras ia labo terjeng ngiahken kalak gelah erberita. Kalak enda pe ncetak risalah si erjudul Bible Students’ Tracts, si i bas pudi wari igelari ka Old Theology Quarterly. Kalak si ngoge Watch Tower ngaloken risalah-risalah enda guna ibagiken man jelma si nterem alu la nggalar.

²⁵ Kalak si nggunaken geluhna i bas pelayanen sepenuh waktu igelari kolportir. Salah sadana eme Charles Capen, si ituriken ndai. Niingetna mulihi, ”Guna ndahiken daerah Pennsylvania, kugunaken peta i bas Lembaga Survei Geologis Amerika Serikat nari. I bas peta enda teridah kerina dalan si erbahanca banci kudahi kuta-kuta si mesuni alu erdalan nahe. Maun-maun kenca telu wari erdalan ku kuta-kuta guna nawarken man kalak nggit ntah lang ia mesan buku-buku i bas seri Studies in the Scriptures, reh ka aku mulihken guna naruhken pesanen e alu newa kuda ras geretana. Meriah kuakap ngadi janah erberngi i rumah kalak si perjuma. Paksa si e jarang denga kal lit motor.”

26. (a) Engkai maka umat Dibata perlu sibuk i bas dahin erberita gelah banci nikapken diri guna pemerentahen Kristus? (b) Kai si perlu sisungkuni man banta?

²⁶ Upaya guna erberita i bas masa-masa si pemena si bagenda perlu semangat janah la perbiar. Banci kin kalak Kristen situhu-tuhu nikapken diri guna pemerentahen Kristus adi la iajari kerna pentingna dahin erberita? Pasti lang! Terlebih ka pendahin e arus jadi tanda si utama i bas kerehen Kristus. (Mat. 24:14) Umat Dibata arus isikapken gelah njadiken pendahin enda dahin si penting kal i bas kegeluhenna. I bas jaman gundari enda arus min kita nungkun, ’Kubahan nge dahin erberita jadi bagin si penting i bas geluhku? Nggit nge aku erkorban gelah tuhu-tuhu ikut i bas kegiaten e?’

27, 28. Kai si isaksiken rasul Johanes i bas pengenehenen, janah uga tanggapen Setan ras begu-beguna kerna pajekna Kinirajan?

²⁷ Dungna, seh me tahun si seh kal pentingna e, tahun 1914. Bagi si ikataken i bas bena-bena pasal enda, la lit sada pe manusia si naksiken peristiwa si mulia e si terjadi i surga. Tapi, rasul Johanes ndatken pengenehenen si nggambarken peristiwa-peristiwa e i bas istilah lambang. Cuba bayangken enda: Johanes naksiken ”tanda si mbelin” i surga. ”Diberu” Dibata eme organisasiNa, mahluk-mahluk roh i surga, sangana mehuli kulana janah mupus sekalak anak dilaki. Ikataken, anak gambaren enda ”mpermakani kerina bangsa alu ciken besi” pagin. Tapi, kenca tubuh, anak e ”ibaba ku Dibata  dingen ku kursi kinirajanNa”. Sada sora si megang surga nari ngataken, ”Genduari me paksana Dibata ngkelini bangsaNa! Genduari enggo icidahken Dibata kuasaNa selaku Raja! Genduari Mesias si ipadanken Dibata e pe ncidahken kuasaNa!”—Ket. 12:1, 5, 10.

²⁸ Jelas me, Johanes naksiken pajekna Kinirajan Mesias i bas pengenehenen. Pasti seh kal muliana peristiwa e, tapi la kerina senang. Setan ras begu-beguna erperang ngelawan malekat-malekat si setia si ipinpin Mikael, ntah pe Kristus. Kai hasilna? Sioge, ”Naga si galang e isampetken ndarat! Enda me nipe si nuria si igelari Iblis ntah Setan, si nipu i belang-belang doni enda. Isampetken ia ku doni ras kerina malekat-malekatna.”—Ket. 12:7, 9.

29, 30. Kenca Kinirajan Mesias pajek, kai si terjadi (a) i doni? (b) i surga?

²⁹ Ndauh sope tahun 1914, Ajar-Ajar Pustaka si Badia nggo ngataken maka masa kiniseran ibenai i bas tahun si nggo ibere tanda e. Sitik pe la terbayangken kalak enda maka seh kal tepatna perkiran e. Bagi si icidahken pengenehenen Johanes, Setan pe mulai erbahan serangen si terbelinen ka man masarakat manusia: ”Cilaka me doni enda ras lawit, sabap Iblis enggo nusur ku kam, janah merawa ia sabap ietehna maka kentisik nari ngenca kesempaten lit i bas ia.” (Ket. 12:12) I bas tahun 1914, terjadi me perang doni si pemena janah tanda kerehen Kristus i bas kuasa kinirajan mulai igenepi i sebelang doni. ”Wari-wari pendungi” sistem enda pe ibenai.—2 Tim. 3:1.

³⁰ Tapi, lit keriahen i surga. Setan ras begu-beguna ipelawes rasa lalap. Nina cataten Johanes, ”E maka ersuraklah o Surga, bage pe kerina kam si ringan i bas!” (Ket. 12:12) Kenca surga ibersihken janah Jesus itangkuhken jadi Raja, gundari Kinirajan Mesias nggo banci erbahan tindaken guna umat Dibata i doni. Kai si ilakokenna? Bagi si nggo sibahas i bena-bena pasal enda, si pemena kal si ilakoken Kristus selaku ’persuruhen perpadanen’ eme imurnikenna juak-juak Dibata i doni enda. Kai ertina e?

31. Kai si inubuatken Maleaki kerna masa pemurnin, janah uga nubuat enda igenepi? (Nehen ka cataten i teruh.)

³¹ Inubuatken Maleaki maka proses pemurnin e la menukah. Ituliskenna, ”Ise ngasup nggengkenca wari kerehen e? Ise banci tahan tupung ia teridah pagi? Sabap bali kap ia ras sabun cuci si keras, bali ras api si ipake tukang ngelebur besi.” (Mal. 3:2) Payo kal kata-kata enda! Mulai tahun 1914, umat Dibata i doni ngadapi melala kal ujin ras kiniseran. Asum pecahna Perang Doni I, melala Ajar-Ajar Pustaka si Badia itindas ras ipenjaraken alu kejam. d

32. Tentangen kai si ihadapi umat Dibata kenca tahun 1916?

³² I bas organisasi nari pe lit tentangen. I bas tahun 1916, turang seninanta Russell mate paksa umurna 64 tahun, erbahan  melala umat Dibata sengget. Kenca kematenna, tereteh maka lit si mpermuliaken Russell si jadi usihen. Amin gia turang seninanta Russell la nggit ipehaga, tapi melala si mpehagaken ia. Kalak enda erpengakap maka penjelasen kebenaren si ertangkasna e ngadi kenca kematenna, janah lit si alu keras nulak erbahan kemajun. Perbahanen si bagenda erbahanca lit kemurtaden emaka lit perpecahen i bas organisasi.

33. Uga arapen si la terjadi nguji umat Dibata?

³³ Ujin si debanna eme kai si itimai Ajar-Ajar Pustaka si Badia la terjadi. Amin gia Watch Tower ngataken alu tepat maka tahun 1914 eme tahun dungna Jaman Kalak Kafir, tapi la iangkai turang senina enda kai si nandangi terjadi i bas tahun e. (Luk. 21:24) Kalak enda erpengakap maka i bas tahun 1914, ibaba Kristus golongen pengantenna si iminaki ku surga guna merentah ras ia. Arapen enda la terjadi. I bas pendungi 1917, imomoken Watch Tower maka 40 tahun masa rani dung i bas musim semi tahun 1918. Tapi, dahin erberita lenga dung janah terus erbuena. Ikataken majalah e maka banci saja dahin mpepulung sisa terus erdalan amin gia musim rani nggo dung. Tapi, melala si ngadi ngelayani Jahwe erkiteken kecewa.

34. Kai ujin si mberat si terjadi i bas tahun 1918, janah ngkai Susunen Kristen erpengakap maka umat Dibata nggo ”mate”?

³⁴ Ujin si mberat terjadi i bas tahun 1918. J. F. Rutherford, si nggantiken C. T. Russell guna ndalanken kepeminpinen i bas umat Dibata, itangkap radu ras pitu kalak si ertanggung jabap si deban. Alu la adil kalak enda ndatken ukumen penjara i bas waktu si ndekah i penjara federal i Atlanta, Georgia, AS. I bas sada waktu, pendahin umat Dibata tempa-tempa lumpuh. Meriah ukur melala peminpin Susunen Kristen. Iakap kalak enda adi ”peminpinna” ipenjaraken, kantor pusat i Brooklyn banci itutup, janah alu nerang dahin erberita i Amerika ras Eropa, Ajar-Ajar Pustaka si Badia si iakap kalak e maba ”pinakit sampar” banci ”mate” ntah pe lanai jadi ancamen. (Ket. 11:3, 7-10) Tapi kalak enda tuhu-tuhu salah!

35. Engkai maka ipediat Jesus pengikutna ngenanami kiniseran, janah kai si ilakokenna guna nampati kalak e?

³⁵ La ieteh musuh kebenaren maka ipediat Jesus umat Dibata ngenanami kiniseran erkiteken Jahwe sangana kundul ”bali ras sekalak tukang ngelebur pirak lako mbersihkenca”. (Mal. 3:3) Jahwe ras AnakNa tek maka kalak si setia banci teridah kenca ngadapi ujin si bagi api, imurniken, janah reh paguhna ukurna guna ngelayani Raja. Mulai tahun 1919, kesah Dibata ngelakoken kai si la mungkin iakap musuh. Kalak si setia ibebasken! (Ket. 11:11) I bas paksa si e, alu jelas igenepi Kristus ciri utama tanda wari-wari pendungi. Itangkuhkenna ”juak-juak si tutus dingen pentar”, terpuk  si kitik dilaki-dilaki si iminaki si ndalanken kepeminpinen i bas umat Dibata alu mereken pangan rohani i bas paksana.—Mat. 24:45-47.

36. Kai saja si ncidahken maka umat Dibata ergiah-giah mulihi secara rohani?

³⁶ Turang seninanta Rutherford ras teman-temanna ibebasken i bas penjara nari tanggal 26 Maret 1919. Minter iaturken sada kebaktin i bas bulan September. Ibahan rencana guna nerbitken majalah si peduaken, si igelari The Golden Age. Teman majalah The Watch Tower enda irancang guna ipake i bas erberita si meriah. e I bas tahun si e ndarat ka me terbiten si pemena Bulletin, gundari agenda perpulungen Pelayanen ras Kegeluhen Kristen. Tangtangna nari, enda lalap ipake guna ngiahken i bas dahin erberita si meriah. Mulai tahun 1919 seh gundari, erberita secara pribadi bage pe erberita arah rumah ku rumah lebih iutamaken.

37. Uga piga-piga kalak terbukti la setia kenca tahun 1919?

³⁷ Juak-juak Kristus terus imurniken alu dahin erberita, erkiteken kalak si meganjang rukur la nggit ngelakoken pendahin si sederhana enda. Kalak si la nggit ikut i bas pendahin enda nerapken bana i bas kalak si setia ndai. Kenca tahun  1919, piga-piga kalak si setia dungna kitik ukurna janah ifitnahna dingen igombang-gombangina umat Dibata, lit ka si erpihak man kalak si nganiaya juak-juak Jahwe si setia.

38. Keberhasilen ras kemenangen si idatken pengikut Kristus i doni erbahanca kita tek nandangi kai?

³⁸ Amin gia ngadapi serangan si bage, pengikut Kristus i doni terus erbuena janah makmur secara rohani. Keberhasilen ras kemenangen kalak enda, sada bukti man banta si erbahanca kita tek maka Kinirajan Dibata nggo merentah! Alu dukungen ras penampat Dibata, erkelangken AnakNa ras Kinirajan Mesias, dungna terpuk si kitik manusia biasa si la serta banci ndatken melala kemenangen i bas ngelawan Setan ras sistemna si jahat enda!—Oge Jesaya 54:17.

39, 40. (a) Kai saja si banci sipelajari i bas buku enda nari? (b) Uga carana kam banci ndatken kegunan bas buku enda nari?

³⁹ I bas pasal-pasal seterusna, banci sipelajari kai si nggo ilakoken Kinirajan Dibata i doni sada abad kenca pajek i surga. Tiap bagin bas buku enda khusus mbahas pendahin Kinirajan i doni. I bas tiap pasal, lit kotak pembahasen si nampati kita sekalak-sekalak guna mastiken sibar uga Kinirajan e nyata man banta. I bas pasal-pasal pendungi, banci sibahas kai si nandangi terjadi paksa Kinirajan e reh guna ngkernepken kalak jahat janah njadiken doni enda jadi pardis. Uga carana kam banci ndatken kegunan bas buku enda nari?

⁴⁰ Ate Setan erbahan kote kinitekenndu nandangi Kinirajan Dibata. Tapi, ate Jahwe mpegegehi kinitekenndu gelah kam ikawali ras tetap paguh. (Ep. 6:16) Emaka, iahken kami kam gelah mpelajari buku enda alu tutus. Cuba sungkuni dirindu, ’Nyata nge Kinirajan e man bangku?’ Reh nyatana Kinirajan e man bandu gundari, reh ersikapna ka kam ndukungsa alu setia seh ngasa reh waktuna paksa kerina kalak banci ngidah maka Kinirajan e nyata janah sangana merentah!