1, 2. Kai si berubah i bas Zion’s Watch Tower Januari 1895, janah uga tanggapen turang senina?

 PAKSA ialoken John A. Bohnet, sekalak Ajar-Ajar Pustaka si Badia si ergiah-giah, majalah Zion’s Watch Tower Januari 1895, jengang ia ngidah sampul majalah e. Gambarna mercusuar si meganjang i tengah lawit si ergalumbang, nalsalken terang i langit si gelap. Momo i bas majalah e kerna sampulna si mbaru erjudul ”Baju Kami si Mbaru”.

² Perban jadi kal atena, itulis turang seninanta Bohnet surat man turang seninanta Russell. Nina, ”Meriah kal ukurku ngidah gambar MENARA si mejile kal i sampul e.” Itulis Ajar-Ajar Pustaka si Badia si setia si debanna, John H. Brown, kerna sampul e, ”Luar biasa. Seh kal paguhna palas menara e paksa iderpa galumbang ras angin si meter.” Sampul si mbaru e eme perubahen si pemena si niidah turang seninanta i bas tahun si e, tapi enda labo si pendungi. I bas bulan November, idapeti kalak e ka sada perubahen si mbelin, e pe kerna lawit si ergalumbang ka.

3, 4. Masalah kai si ibahas i bas Watch Tower 15 November 1895, janah perubahen kai si mbelin kal pengaruhna?

³ I bas Watch Tower 15 November 1895, lit sada artikel si gedang si nuriken sada masalah: Persoalen si bagi galumbang ras angin si meter ngganggu kedamen bage pe kiniraturen i bas persadan, ntah pe organisasi, Ajar-Ajar Pustaka si Badia. Reh buena turang seninanta terus ersoal jabap kerna ise si arusna jadi peminpin i runggun e. Guna nampati turang seninanta ngidah kai si iperluken i bas ngatasi semangat ersaing si erban perpecahen, ipeseri artikel e organisasi ras sada kapal. Kenca si e, alu terus terang iakuina maka kalak si ndalanken kepeminpinen e gagal nikapken organisasi si bagi kapal guna ngadapi angin si meter. Kai si arus ilakoken?

⁴ Ikataken artikel e maka perlu ipastiken kapten si erpengalamen gelah lit pelampung i bas kapal janah pegawe kapal nggo ersikap guna ngadapi keadan si mesera paksa angin si meter reh. Bage ka pe, perlu ipastiken kalak si minpin organisasi maka kerina runggun nggo ersikap ngadapi serangen angin si meter. Guna ngelakokenca, imomoken artikel e sada  perubahen si mbelin kal pengaruhna. Janah iiahkenna gelah minter, ”tep-tep runggun milih pertua-pertua” guna ”’njagai’ rarasen”.​—Perb. 20:28.

5. (a) Engkai maka pengaturen si mbaru kerna pertua jadi sada langkah guna maju i bas paksa si tepat? (b) Penungkunen kai saja si man bahasenta?

⁵ Pengaturen si mbaru kerna pertua e jadi sada langkah guna maju bas paksa si tepat i bas erbahan pengaturen runggun si tetap. Enda nampati turang seninanta ngelewati galumbang si mbelin akibat Perang Doni I. Puluhen tahun kenca si e, pengaturen organisasi si terus ipesikap nampati umat Dibata gelah lebih iperlengkapi i bas ngelayani Jahwe. Nubuat Pustaka si Badia si apai si ngeramalken perkembangen enda? Perubahen kai saja i bas pengaturen organisasi si nggo niidahndu? Kai gunana man bandu?

6, 7. (a) Kai erti nubuat Jesaya 60:17? (b) Kai si banci sieteh alu iturikenna kerna ”pengawas” ras ”si mereken tugas”?

⁶ Bagi si nggo sibahas i bas Pasal 9, inubuatken Jesaya maka pasti ipasu-pasu Jahwe umatNa gelah terus reh buena. (Jes. 60:22) Tapi, Jahwe erjanji guna ngelakoken terbuen. I bas nubuat si seri, ikatakenNa, ”Kubaba man bandu emas gancih tembaga, kubereken man bandu pirak gancih besi, tembaga gancih kayu, janah besi gancih batu; janah kubere man bandu dame jadi pengawas ras kebenaren jadi si mereken tugas.” (Jes. 60:17, Terjemahan Dunia Baru [NW]) Kai erti nubuat e? Uga enda berlaku man banta gundari?

⁷ Ikataken nubuat Jesaya maka sada bahan nggantiken bahan si debanna. Tapi, perdiateken maka pergantin e sada perubahen, labo i bas si la mehuli nari ku si mehuli, tapi i bas si mehuli ku si terulin ka. Nggantiken tembaga alu emas eme sada peningkaten mutu, bage ka pe bahan si deban si ituriken i bas ayat ndai. Emaka, arah gambaren enda, inubuatken Jahwe maka alu manjar-anjar keadaan umatNa pasti reh ulina. Peningkaten si uga nge si imaksudken nubuat e? Alu ngataken ”pengawas” ras ”si mereken tugas”, icidahken Jahwe maka pasti lit peningkaten alu ertahap i bas cara ngurus ras ngaturken umatNa.

8. (a) Ise si erbahan perubahen si ituriken i bas nubuat Jesaya? (b) Kai gunana man banta? (Nehen ka kotak ” Ialokenna Persinget alu Meteruk Ukur”.)

⁸ Ise si erbahan kemajun i bas pengaturen organisasi enda? Nina Jahwe, ”Kubaba man bandu emas, . . . Kubereken man bandu pirak, . . . janah Kubere man bandu dame.” Jelas me, peningkaten i bas pengaturen runggun labo manusia erbahanca, tapi Jahwe. Janah kenca Jesus itangkuhken jadi Raja, Jahwe erbahan peningkaten enda arah AnakNa. Kai gunana man banta? Ikataken ayat ndai maka peningkaten enda ngasilken ”kedamen” ras ”kebenaren”. Asum sialoken bimbingen Dibata janah nggit nesuaiken diri, pasti lit kedamen bas kita janah kekelengen nandangi kebenaren ngiahken kita ngelayani Jahwe, si igambarken rasul Paulus selaku ”Dibata si mereken kemalemen ate”.​—Pil. 4:9.

9. Kai palas si tepat i bas kiniraturen ras persadan runggun, janah engkai?

 ⁹ Kerna Jahwe, itulis Paulus ka, ”Dibata labo Dibata kinilaraturen, tapi Dibata kedamen.” (1 Kor. 14:33, NW) Perdiateken maka la ibedaken Paulus kinilaraturen ras kiniraturen, tapi ras kedamen. Engkai? Pertimbangken enda: Kiniraturen labo lalap ngasilken kedamen. Contohna, sada terpuk tentera banci erbaris alu ratur nuju medan pertempuren, tapi geraken kalak enda si ratur ngasilken perang, labo kedamen. Emaka, selaku kalak Kristen perlu siinget lalap hal si penting enda: Tep-tep peraturen si ratur si la erpalasken kedamen, lampas lawenna pasti nge runtuh. Sebalikna, kedamen bas Dibata nari erbahan kiniraturen si ndekah ertahan. Emaka, ngata bujur kal kita erkiteken organisasinta ibimbing ras imurniken ”Dibata sumbul kemalemen ate”! (Rom. 15:33) Kedamen si ibereken Dibata, enda sada palas kiniraturen si erguna janah persadan situhu-tuhu si gundari sinanami ras siergai i bas runggun-runggun i sebelang doni.​—Msm. 29:11.

10. (a) Peningkaten kai saja si terjadi i bas tahun-tahun si pemena bas organisasinta? (Nehen kotak ” Kepengawasen si Reh Ulina”.) (b) Penungkunen kai saja si man bahasenta?

¹⁰ Kotak ” Kepengawasen si Reh Ulina” mereken sitik gambaren kerna perubahen si erguna janah ratur si terjadi i bas organisasinta sedekah tahun-tahun si pemena. Tapi, perubahen kai ’i bas tembaga nari jadi emas’ si mbaru-mbaru enda ibahan Jahwe erkelangken Rajanta? Uga penyesuaien i bas kepengawasen mpepaguh kedamen ras persadan runggun-runggun i sebelang doni? Uga enda banci nampati kam sekalak-sekalak i bas ngelayani ”Dibata si mereken kemalemen ate”?

11. (a) Penelitin Pustaka si Badia ngasilken penyesuaien kai i bas pemahamen? (b) Kai tekad turang senina i bas badan pinpinen?

¹¹ Mulai tahun 1964 ngasa 1971, badan pinpinen ngawasi proyek penelitin Pustaka si Badia si lengkap termasuk mpelajari terbagesen cara runggun Kristen abad si pemena idalanken. a Kerna pengaturen organisasi, iangkai maka pengawasen runggun-runggun abad si pemena ilakoken badan pertua, labo sada pertua saja, ntah pe pengawas. (Oge Pilipi 1:1; 1 Timotius 4:14.) Paksa si e iangkai terbagesen, isedari badan pinpinen maka Raja kalak e, Jesus, paksana erbahan peningkaten i bas pengaturen organisasi umat Dibata, janah turang senina i bas badan pinpinen ertekad guna patuh kempak bimbingen Raja e. Minter ibahan kalak e penyesuaien gelah organisasi reh sentuduna ras pengaturen pertua si isuratken i bas Pustaka si Badia. Kai saja penyesuaien si ibahan i bas bena-bena tahun 1970-en?

12. (a) Penyesuaien kai si idalanken i bas badan pinpinen? (b) Uga Badan Pinpinen gundari iaturken? (Nehen kotak ” Badan Pinpinen Ngurus Kepentingen Kinirajan”, halamen 130.)

¹² Penyesuaien si pemena ilakoken i bas badan pinpinen e sendiri. Paksa si e, anggota dewan direksi Watch Tower Bible and Tract Society of Pennsylvania lit 7 kalak eme terpuk turang seninanta si iminaki. Tapi, i bas tahun 1971, anggota badan pinpinen itambahi jadi 11 kalak janah lanai igelari  dewan direksi. Kalak enda erpengakap tep-tep anggota seri kedudukenna janah jabaten ketua mulai iganti tep-tep tahun menurut abjad.

13. (a) Pengaturen kai si erdalan sedekah 40 tahun? (b) Kai si ilakoken Badan Pinpinen i bas tahun 1972?

¹³ Penyesuaien seterusna mpengaruhi tep-tep runggun. I bas bidang kai? Mulai tahun 1932 ngasa 1972 pengawasen runggun biasana ilakoken sekalak saja. Ngasa tahun 1936, turang seninanta si itangkuhken guna tugas e igelari direktur dinas. Bas pudi wari, penggelaren e iganti jadi hamba perpulungen, kenca e hamba runggun, janah dungna jadi pengawas runggun. Turang seninanta si itangkuhken e ergiah-giah ngurus keperlun rohani rarasen. Biasana pengawas runggun erbahan keputusen guna runggun la ipindona pendapat hamba si deban i bas runggun. Tapi sedekah tahun 1972, Badan Pinpinen erbahan peningkaten guna sada perubahen si ersejarah. Kai saja si termasuk i bas perubahen e?

14. (a) Pengaturen si mbaru kai si mulai erdalan i bas tanggal 1 Oktober 1972? (b) Uga koordinator badan pertua ndalanken pedah i bas Pilipi 2:3?

¹⁴ Asangken sada kalak saja si ngelayani jadi pengawas runggun i bas tep-tep runggun, gundari turang seninanta si deban si ncukupi sarat Pustaka si Badia itangkuhken ka secara teokratis guna ngelayani jadi pertua Kristen. Kalak enda jadi sada badan pertua si ngawasi runggun e. Pengaturen si mbaru e mulai erdalan tanggal 1 Oktober 1972. Gundari  koordinator badan pertua lanai nganggap dirina pentingen asangken pertua si deban, tapi anggapna ia ”si kitikna kal”. (Luk. 9:48) Tuhu-tuhu sada pasu-pasu man perkade-kadenta i sebelang doni ndatken turang senina si meteruk rukur e!​—Pil. 2:3.

15. (a) Kai saja kegunan pengaturen badan pertua nandangi runggun-runggun? (b) Kai buktina maka Rajanta ertindak alu dem kepentaren?

¹⁵ Pembagin tanggung jabap runggun i bas anggota badan pertua terbukti jadi sada peningkaten mutu. Pertimbangken telu kegunanna: Si pemena ras terutama, pengaturen e nampati kerina pertua, la soal uga beratna tanggung jabap kalak e i bas runggun tuhu-tuhu isedarina maka Jesus me kepala runggun. (Ep. 5:23) Si peduaken, bagi si ikataken i bas Kuan-kuanen 11:14, ”Reh teremna kalak si beluh mereken ukur, dame [ntah pe, ”berhasil”] me negeri.” Asum ibahas pertua kai saja si banci nampati keperlun rohani runggun janah mpertimbangken tep-tep pendapat, kalak e isampati guna erbahan keputusen si sentudu ras prinsip Pustaka si Badia. (Kua. 27:17) Ipasu-pasu Jahwe keputusen si bage, janah kalak enda pe berhasil. Si peteluken, alu reh buena turang senina si ncukupi sarat guna ngelayani jadi pertua, banci ibereken organisasi keperlun si terus reh tambahna kerna pengawasen bage pe mpermakani i bas runggun-runggun.  (Jes. 60:3-5) Cuba bayangken, i sebelang doni jumlah runggun terus reh buena, i bas lebih 27.000 bas tahun 1971 nggo jadi lebih 113.000 bas tahun 2013! Jelas me, Rajanta si dem alu kepentaren mereken permakan-permakan man pengikut-pengikutna i bas paksa si tepat.​—Mi. 5:5.

16. (a) Kai tanggung jabap pertua-pertua? (b) Uga tanggapen Ajar-Ajar Pustaka si Badia kerna pedah Jesus guna ’mpermakani biri-biri’?

¹⁶ I bas masa si pemena Ajar-Ajar Pustaka si Badia, nggo iangkai pertua-pertua maka kalak e ertanggung jabap guna nampati teman sada kiniteken gelah megenggeng i bas ngelayani Dibata. (Oge Galati 6:10.) I bas tahun 1908, ibahas Watch Tower i bas sada artikel kerna pedah Jesus, ”Permakanilah biri-biringku.” (Joh. 21:15-17) Ipebetehken artikel e man pertua-pertua maka, ”Seh kal pentingna erbahan pedah Tuan kerna rarasen si utamana i bas pusuhta, janah arus siergai selaku sada hak istimewa si mbelin guna mereken pangan janah njaga pengikut-pengikut Tuanta.” I bas tahun 1925, ijelasken The Watch Tower mulihi kerna pentingna ngelayani selaku permakan-permakan. Ipersingetina pertua-pertua, ”Gereja Dibata sekerajangenNa kap, . . . janah ipindoNa me pertanggungjabapen nandangi hak istimewa kalak e i bas ngelayani turang senina.”

17. Uga pengawas-pengawas isampati gelah jadi permakan si beluh?

¹⁷ Uga organisasi Jahwe nampati pertua-pertua mpesikap kinibeluhenna guna mpermakani i bas ’besi nari jadi pirak’? Alu erbahan pelatihen. I bas tahun 1959 ibahan me Sekolah Pelayanen Kinirajan si pemenana kal man pengawas-pengawas. Salah sada bagin kelas mbahas topik ”Mperdiateken Kalak si Deban”. Turang senina si ertanggung jabap e iiahken gelah ”erbahan jadwal guna ndahi perberita-perberita i rumahna”. I bas bagin e icidahken cara-cara kai saja si banci  erbahan kunjungen permakan e banci ngiahken turang seninanta. Bas tahun 1966 ibenaken ka Sekolah Pelayanen Kinirajan si nggo ipelimbarui. Bas sekolah e ibahas topik ”Uga Pentingna Dahin Mpermakani”. Kai topik utama si ibahas i bas kelas e? Kalak si ndalanken kepeminpinen e ”arus min mperdiateken rarasen biri-biri Dibata alu perkeleng, tapi ula sempat la mperdiateken rumah tanggana ras dahin erberita”. I bas tahun-tahun terakhir enda, lit ka ibahan terbuen sekolah-sekolah man pertua-pertua. Kai hasil pelatihen si la erngadi-ngadi enda si isediaken organisasi Jahwe? Gundari, nggo lit ribun turang seninanta si beluh si ngelayani selaku permakan rohani i bas runggun-runggun Kristen.

18. (a) Kai tanggung jabap si mberat si ipercayaken kempak pertua-pertua? (b) Engkai maka keleng ate Jahwe ras Jesus pertua-pertua si erbintuas?

¹⁸ Pertua-pertua Kristen itetapken Jahwe arah Rajanta, Jesus, guna ndalanken tugas si mberat. Tugas kai? Minpin biri-biri Dibata ngelewati masa si seh kal serana i bas sejarah manusia. (Ep. 4:11, 12; 2 Tim. 3:1) Keleng kal ate Jahwe ras Jesus pertua-pertua si erbintuas enda erkiteken ipatuhina perentah Pustaka si Badia, ’Permakani rarasen biri-biri si enggo ibereken Dibata man bandu alu ukur meriah, erkiteken ukurndu ersuruh, jadi usihen biri-biri e.’ (1 Pet. 5:2, 3) Mari sibahas dua i bas mbue cara permakan Kristen banci jadi usihen rarasen ras si ikut i bas erbahan perdamen bage pe keriahen ukur bas runggun.

19. Kai si banci sigejapken paksa erberita ras pertua-pertua?

¹⁹ Si pemena, pertua-pertua radu ras erdahin ras anggota runggun. Ikataken penulis Injil Lukas kerna Jesus, ”Isiari Jesus kota-kota ras kuta-kuta, iberitakenna berita si meriah  kerna Kinirajan Dibata. Ajar-ajar si sepuluh dua kalak ikut ras ia.” (Luk. 8:1) Bali bagi Jesus si erberita radu ras rasul-rasulna, pertua-pertua si jadi usihen gundari enda pe ikut radu ras erdahin ras teman sada kinitekenna i bas erberita. Isedari kalak enda maka alu ngelakoken si e, banci mereken semangat si sehat i bas runggun. Uga perasan anggota runggun nandangi pertua si bage? Jeannine, sekalak turang seninanta si umurna menam 90 tahun, ngataken, ”Alu erberita ras pertua erbahan kami banci cakap-cakap janah banci lebih kutandai ia.” Steven, turang seninanta si umurna 30-en, ngataken, ”Paksa aku erberita ras pertua, kueteh maka isampatina atena aku. Penampat si bage erbahan aku ermeriah ukur.”

20, 21. Uga pertua-pertua banci ngusih permakan i bas perumpaman Jesus? Kai contohna? (Nehen ka kotak ” Ndahi Tiap Minggu Mereken Hasil”.)

²⁰ Si peduaken, ilatih organisasi Jahwe pertua-pertua gelah ermediate nandangi kalak si bene i bas runggun nari. (Heb. 12:12) Engkai maka arus isampati pertua-pertua kalak si kote kinitekenna, janah uga arusna kalak e ngelakokenca? Jabapenna lit i bas perumpaman Jesus kerna permakan ras biri-biri si bene. (Oge Lukas 15:4-7.) I bas perumpaman e, paksa ieteh permakan maka lit biri-birina si bene, minter idaramina tempa-tempa si sada e ngenca biri-birina. Uga pertua-pertua Kristen si gundari ngusih permakan e? Bali bagi permakan si meherga iakapna biri-biri si bene, pertua-pertua pe meherga iakapna kalak si bene i bas umat Dibata nari. Janah, kalak si kote kinitekenna ianggapna ka bagi biri-biri si bene, labo si la tersampati nari. Emaka, iputusken permakan e ’lawes ndarami biri-biri si bene e seh dat’, bage ka pe iusahaken pertua-pertua ndatken mulihi janah nampati kalak si kote kinitekenna.

²¹ I bas perumpaman e, kai si ilakoken permakan paksa nggo idatna biri-birina? Iangkatna alu manjar-anjar, ”itamakenna biri-biri e ku datas barana”, jenari ibabana mulihi ku rarasen. Bage ka pe, pertua si alu tutus mperdiateken kalak si kote kinitekenna banci iangkatna janah isampatina alu manjar-anjar gelah mulihken ku runggun. Enda me si igejapken Victor, sekalak turang seninanta i Afrika si lanai ergabung ras runggun. Iturikenna, ”Terus isampati pertua-pertua aku sedekah waluh tahun aku la aktif. Tapi, si kena kal ku pusuhku, paksa sekalak pertua, John, temanku mbarenda si sada Sekolah Dinas Perintis ras aku, ndahi aku janah icidahkenna piga-piga foto kami paksa ikut i bas sekolah e. Teringet aku melala kenangen manis si erbanca tedeh ateku keriahen ukur si mbarenda kugejapken paksa ngelayani Jahwe.” La ndekah kenca idahi John, mulihken Victor gabung ku runggun. Gundari, nggo ka ia jadi perintis. Jelas me, tersampati kal kita ndatken keriahen ukur adi lit pertua-pertua Kristen si ermediate i bas runggun.​—2 Kor. 1:24. b

22. Uga kebenaren ras kedamen mpepaguh persadan runggun Kristen? (Nehen ka kotak ” Meriah kal Ukur Kami”.)

²² Bagi si nggo ituriken, inubuatken Jahwe maka kebenaren ras kedamen pasti terus ertambah i bas umat Dibata. (Jes. 60:17) Duana sifat enda njaga persadan runggun. Uga carana? Kerna kebenaren, ”[JAHWE] si sada e kap ngenca Dibatanta”. (Ul. 6:4) Patoken kebenarenNa i bas tep-tep runggun seri i bas kerina negeri. Jelas me, patokenNa kerna kai si benar ras kai si salah sada ngenca, janah seri man ”kerina perpulungen-perpulungen si enggo ikhususken jadi sikerajangen Dibata”. (1 Kor. 14:33) Emaka, sada runggun banci terus reh ulina adi ndalanken patoken Dibata. Janah kerna kedamen, ate Rajanta gelah kita labo saja nggejapken kedamen i bas runggun, tapi pe jadi kalak si ”erbahan perdamen”. (Mat. 5:9) Eme sabapna, ”sidaramilah kai si erbahanca maka kalak tetap nggeluh alu dame”. Perlu siupayaken guna ndungi perjengilen si banci saja terjadi. (Rom. 14:19) Alu bage, kita ikut erbahan kedamen ras persadan i bas runggunta.​—Jes. 60:18.

23. Selaku juak-juak Jahwe, kai si nggo sinanami gundari enda?

²³ I bas bulan November 1895, sanga imomoken Watch Tower maka lit pengaturen si mbaru kerna pertua, ituriken turang seninanta si ertanggung jabap maka lit sura-surana. Kai sura-surana e? Iarapken kalak e janah itotokenna gelah pengaturen organisasi si mbaru enda banci nampati umat Dibata ”pedas ersada i bas kiniteken”. Sedekah puluhen tahun enda, nggo siidah uga pengawasen si ibereken Jahwe erkelangken Rajanta. Emaka, ngata bujur kita erkiteken pengawasen e tuhu-tuhu nggo njagai persadanta i bas nembah Dibata. (Msm. 99:4) Asilna, gundari umat Jahwe i sebelang doni ermeriah ukur asum erdalan i bas perukuren ras perbahanen si seri, janah ngelayani ”Dibata si mereken kemalemen ate” alu ’ersada ukur’.​—2 Kor. 12:18; oge Pilipi 1:27.