1-3. Kai si ilakoken Jesus paksa idahna rumah pertoton icemari?

 IERGAI Jesus kal rumah pertoton i Jerusalem erkiteken ietehna kai si igambarken rumah pertoton e. Rumah pertoton e nggo ndekah jadi pusat ibadat situhu-tuhu i doni. Tapi, ibadat e, ibadat man Dibata si badia eme Jahwe, arus bersih ras murni. Cuba bayangken uga perasan Jesus paksa reh ia ku rumah pertoton e tanggal 10 Nisan 33 M, janah iidahna rumah pertoton e nggo icemari. Kai si terjadi?​—Oge Matius 21:12, 13.

² I bas Kesain Kalak si Labo Jahudi, kalak si nukari duit ras perbinaga si rangap alu la adil muat keuntungen bas kalak si reh guna mereken persembahen man Jahwe. a ”Ipelawes [Jesus] kerina kalak si erbinaga ras si nukur i je. Itunggalingkenna meja-meja kalak si nukari duit.” (Bandingken Nehemia 13:7-9.) Irawai Jesus dilaki-dilaki si mentingken bana e erkiteken nggo ibahanna rumah Bapana jadi ”asar penamun”. Jelas me, icidahken Jesus pengerganna man rumah pertoton ras kai si igambarken rumah pertoton e. Ibadat man Bapana arus tetap bersih!

³ Erabad-abad kenca si e, kenca Jesus itangkuhken jadi Raja Mesias, sekali nari ibersihkenna rumah pertoton, eme kalak si gundari eribadat atena man Jahwe alu cara si ngena ateNa. Rumah pertoton kai si ibersihken i bas paksa si e?

4, 5. (a) Uga pengikut Jesus si iminaki imurniken ras ibersihken i bas tahun 1914 ngasa pemena 1919? (b) Payo nge enda ertina umat Dibata nggo dung imurniken ras ibersihken? Jelasken.

⁴ Bagi si nggo sibahas i bas Pasal 2 buku enda, kenca itangkuhken i bas tahun 1914, Jesus ras Bapana reh guna mereksa rumah pertoton rohani, eme sada pengaturen ibadat si murni. b Hasilna, ieteh Raja maka kalak Kristen si iminaki, ”imam-imam”, perlu imurniken ras ibersihken. (Mal. 3:1-3) I bas tahun 1914 ngasa pemena 1919, Jahwe selaku Pribadi si Murnikenca, ijinkenNa umatNa ngelewati erbage percuban ras kesusahen gelah kalak e murni dingen bersih. Untungna, kalak si iminaki ndarat i bas api ujin nari i bas keadan si nggo lebih bersih, ergiah-giah ndukung Raja Mesias e!

 ⁵ Payo nge enda ertina umat Dibata nggo dung imurniken ras ibersihken? Lang. I bas wari-wari pendungi, Jahwe erkelangken Raja Mesias terus nampati pengikutna tetap bersih gelah banci tetap lit i bas rumah pertoton rohani. I bas dua pasal seterusna, sibahas uga kalak e imurniken secara moral ras organisasi. Si pemena, mari sibahas kerna pembersihen rohani. Tuhu-tuhu ipegegehi kinitekenta banci mperdiateken kai si nggo ilakoken Jesus, subuk si teridah bage pe si la teridah, guna nampati pengikutna bersih secara rohani.

6. Erpalasken perentah Jahwe man kalak Jahudi buangen, kai saja si termasuk bersih secara rohani?

⁶ Kai pembersihen rohani e? Guna ndatken jabapenna, mari sipereksa kata-kata Jahwe man kalak Jahudi buangen paksa itadingken kalak e atena Babilon i bas abad si peenemken SM. (Oge Jesaya 52:11.) Kalak buangen e mulih ku Jerusalem khususna guna majekken mulihi rumah pertoton janah mpesikap ibadat situhu-tuhu. (Esa. 1:2-4) Ate Jahwe gelah iambekken umatNa kerina si lit hubungenna ras agama Babilon. Perdiateken maka iberekenNa man kalak e piga-piga perentah: ”Tadingkenlah”, ”ola jemak barang si pantang”, ”pebadiaken bandu”. Ibadat murni sekerajangen Jahwe la banci icemari ibadat si palsu. Adi bage, kai kesimpulenta? Bersih secara rohani termasuk ka njaga diri tetap bersih i bas ajaren ras perbahanen agama palsu nari.

7. Kai saluren si ipake Jesus nampati pengikutna gelah bersih secara rohani?

⁷ La ndekah kenca Jesus itangkuhken jadi Raja, itetapkenna sada saluren si jelas teridah si nampati pengikutna gelah bersih secara rohani. Saluren e eme juak-juak si tutus dingen pentar, si itangkuhken Jesus bas tahun 1919. (Mat. 24:45) Bas tahun e, Ajar-Ajar Pustaka si Badia nggo mbersihken dirina i bas mbue ajaren agama palsu nari. Tapi, kalak enda perlu denga ibersihken. Arah juak-juak si tutus, alu ertahap ibereken Kristus penjelasen man pengikutna kerna erbage upacara ras perbahanen si perlu itadingken kalak e. (Kua. 4:18) Mari sibahas piga-piga kerna si e.

8. Kai si nggo ndekah ieteh Ajar-Ajar Pustaka si Badia kerna Natal, tapi kai si lenga iangkai kalak e?

⁸ Enggo ndekah ieteh Ajar-Ajar Pustaka si Badia maka Natal rehna i bas kekafiren nari janah Jesus labo tubuh i bas tanggal 25 Desember. Nina Zion’s Watch Tower Desember 1881, ”Jutan kekafiren nggo ibaba masuk ku bas gereja. Tapi buen si gelarna ngenca iubah erkiteken imam kafir jadi imam Kristen janah wari raya kafir dungna igelari alu gelar kristen, salah sadana eme Natal.” Bas tahun 1883 iteruh judul ”Ndigan Jesus Tubuh?” Watch Tower erban kesimpulen maka Jesus tubuh kira-kira i bas pemena bulan Oktober. c Tapi, paksa si e lenga jelassa iangkai Ajar-Ajar Pustaka si  Badia ngkai maka arus ngadi ngerayaken Natal. Natal terus irayaken janah anggota keluarga Betel Brooklyn pe ikut ngerayakenca. Tapi, kenca tahun 1926, mulai terjadi perubahen. Engkai?

9. Kai si dungna isedari Ajar-Ajar Pustaka si Badia kerna Natal?

⁹ Kenca persoalen enda ipereksa alu megermet dingen metenget, dungna isedari Ajar-Ajar Pustaka si Badia maka asal usul Natal ras kebiasan si lit hubungenna ras si e tuhu-tuhu la nghamati Dibata. Ikataken artikel ”Asal Usul Natal”, i bas The Golden Age 14 Desember 1927, maka Natal eme perayan kafir, fokusna eme guna kesenangen, janah termasuk penembahen berhala. Ijelasken artikel e maka la lit perentah Jesus guna ngerayaken Natal janah erban kesimpulen si tegas enda: ”Kenyatan maka doni enda, kerincuhen daging, janah meriah iakap Iblis adi si e tetap iinget ras irayaken . . . eme dasar si jelas dingen paguh man kalak si tuhu-tuhu mbaktiken dirina i bas ngelayani Jahwe gelah la ngerayakenca.” Emaka, keluarga Betel lanai ngerayaken Natal bas bulan Desember e bage pe seterusna!

10. (a) Kai penjelasen si tangkas kerna Natal si ipebetehken bas Desember 1928? (Nehen ka kotak ” Natal, Asal Usul ras Tujunna”.) (b) Uga umat Dibata ipersingeti kerna wari raya ras perayan si debanna si arus ipedauh? (Nehen kotak ” Mpebetehken Kebenaren kerna Wari Raya ras Perayan si Debanna”.)

¹⁰ Sada tahun kenca si e, ialoken Ajar-Ajar Pustaka si Badia penjelasen si lebih tangkas kerna Natal. Bas tanggal 12 Desember 1928, turang seninanta Richard H. Barber, anggota staf kantor pusat, mpeseh ceramah radio si mpebetehken asal usul si meluat i bas wari raya e nari. Uga tanggapen umat Dibata nandangi petunjuk si jelas bas kantor pusat  nari? Paksa nginget mulihi sanga turang seninanta Charles Brandlein ras keluargana lanai ngerayaken Natal, ikatakenna, ”Mberat nge iakap kami nadingken hal-hal kafir e? Sitik pe lang! . . . Enda bagi nangtangi baju si melket janah ngambekkenca.” Alu semangat si seri, turang seninanta Henry A. Cantwell, si i bas pudi wari ngelayani jadi pertua keliling, nginget mulihi kai si terjadi, nina, ”Meriah akap kami erkiteken banci nadingken sada hal guna mbuktiken kekelengen kami man Jahwe.” Pengikut Kristus si setia, rela erbahan perubahen si iperluken janah la muat bagin i bas perayan si rehna i bas ibadat si meluat nari. d—Joh. 15:19; 17:14.

11. Uga carana banci sicidahken dukungenta man Raja Mesias?

¹¹ Ajar-Ajar Pustaka si Badia si setia e jadi usihen si mehuli man banta! Asum siukuri usihen si itadingken kalak e, perlu sisungkuni dirinta, ’Uga nge tanggapenku nandangi petunjuk si ibereken kantor pusat man banta kerina? Kualoken janah kudalanken nge e alu dem pengataken bujur?’ Adi patuh kita alu rela enda bukti dukungenta man Raja Mesias, si nggunaken juak-juak si tutus lako mereken pangan rohani i bas paksana.​—Perb. 16:4, 5.

12. Uga pengakap Ajar-Ajar Pustaka si Badia kerna salib sedekah ertahun-tahun?

¹² Sedekah ertahun-tahun, Ajar-Ajar Pustaka si Badia erpengakap maka salib simbol Kekristenen si banci igunaken. Kalak enda tentu la erpengakap maka salib arus isembah erkiteken iangkaina maka penembahen berhala e salah.  (1 Kor. 10:14; 1 Joh. 5:21) Mulai tahun 1883, Watch Tower alu terus terang ngataken maka ”ciga ate Dibata kerina penembahen berhala”. Tapi, tangtangna, iakap Ajar-Ajar Pustaka si Badia labo salah nggunaken salib alu cara si patut. Misalna, megah iakap kalak e make lencana salib-mahkota jadi tanda pengenal. Menurut kalak e, si e ncidahken maka adi ia setia ngasa mate, ialokenna me pagi mahkota kegeluhen. Mulai tahun 1891, simbol salib-mahkota lit i bas halamen arah lebe Watch Tower.

13. Penjelasen kai si ialoken pengikut Kristus kerna penggunan salib? (Nehen ka kotak ” Penjelasen kerna Penggunan Salib”.)

¹³ Tuhu-tuhu iergai Ajar-Ajar Pustaka si Badia lencana salib-mahkota. Tapi, mulai i bas pendungi 1920-en, pengikut Kristus alu manjar-anjar ngaloken penjelasen kerna penggunan salib. Paksa nginget mulihi kebaktin bas 1928 i Detroit, Michigan, AS, turang seninanta Grant Suiter, si i bas pudi wari ngelayani i bas Badan Pinpinen, ngataken, ”Bas kebaktin e tereteh me maka lencana salib-mahkota labo ngenca la iperluken, tapi pe erbahan ciga ate.” Bas tahun-tahun seterusna, reh buena ibereken penjelasen. Jelas me, la lit ingan salib i bas ibadat si murni ras bersih secara rohani.

14. Uga tanggapen umat Dibata nandangi penjelasen si ialoken kalak e alu manjar-anjar kerna salib?

¹⁴ Uga tanggapen umat Dibata nandangi penjelasen si ialoken kalak e alu manjar-anjar kerna salib? Tetap nge ipake kalak e lencana salib-mahkota, si jadi kal atena e? Lela Roberts, sekalak juak-juak Jahwe si nggo ndekah ngelayani ngataken, ”Paksa ieteh kami kai si ilambangkenna, mis itangtangi kami lencana e.” Turang senina si setia si debanna, Ursula Serenco, ngewakili perasan nterem turang senina paksa ikatakenna, ”Dungna sisedari maka kai si mbarenda tuhu-tuhu kal siergai si jadi simbol ntah pe lambang kematen Tuan bage pe pembaktin Kristen kepeken simbol kafir. Sentudu ras Kuan-kuanen 4:18, ngata bujur kita kerna dalan si reh terangna.” Pengikut Kristus si setia la nggit muat bagin i bas kebiasan agama palsu si meluat!

15, 16. Uga banci sicidahken maka kita ertekad guna terus njaga kesain rumah pertoton rohani Jahwe i doni tetap bersih?

¹⁵ Tekadta pe seri gundari enda. Sisedari maka igunaken Kristus saluren si jelas teridah eme juak-juak si tutus dingen pentar, guna nampati rayatna tetap bersih secara rohani. Emaka, adi pangan rohani si ibereken man banta mpersingeti kita kerna upacara, perbahanen, ntah pe kebiasan si icemari agama palsu, alu patuh mis sidalanken persinget e. Bali bagi turang seninanta si nggeluh i bas bena-bena kehadiren Kristus, ertekad kita njaga kesain rumah pertoton rohani Jahwe, si lit i doni gelah tetap bersih.

¹⁶ I bas wari-wari pendungi enda, Kristus pe terus ngelakoken pendahin si la teridah guna ngkawali runggun umat Jahwe i bas kalak si banci erbahan pencemaren rohani. Uga carana ia ngelakokenca? Mari sibahas.

17, 18. I bas perumpaman kerna jala, kai ertina (a) ngamburken jala, (b) ”erbage-bage nurung ku bas jala e”, (c) mpepulung nurung si mehuli ku bas tong, ras (d) ngambekken nurung-nurung si la mehuli?

¹⁷ Terus iawasi Rajanta Jesus Kristus runggun umat Dibata i belang-belang doni. Alu cara si la banci siangkai alu jelas, terus ilakoken Kristus ras malekat-malekat dahin guna nerapken. Ijelasken Jesus pendahin e i bas perumpamanna kerna jala. (Oge Matius 13:47-50.) Kai erti perumpaman e?

¹⁸ ”Jala si iamburken ku lawit.” Enda nggambarken dahin mberitaken Kinirajan man kerina umat manusia. ”Erbage-bage nurung ku bas jala e.” Berita si meriah banci narik kerina kalak, eme kalak si erbahan tindaken guna jadi kalak Kristen situhu-tuhu, bage pe nterem kalak si deban si tangtangna ncidahken minat, tapi la bulat ukurna i bas erban keputusen guna ibadat si murni. e Mpepulung nurung ’si mehuli ku bas tong’. Kalak si tutus ipepulung ku bas runggun-runggun si bali bagi tong, ingan kalak e ndalanken ibadat si bersih man Jahwe. Ngambekken nurung-nurung ”si la mehuli”. I bas wari-wari pendungi, iserapken Kristus ras malekat-malekat ”kalak jahat i bas kalak si ngelakoken si ngena ate Dibata”. f Asilna, kalak si kurang tutus ukurna, si banci saja la rela nadingken kiniteken ntah pe kebiasan si salah, la ipediat ncemari runggun. g

19. Uga perasanndu nandangi kai si nggo ilakoken Kristus guna njaga umat Dibata tetap bersih ras ibadat situhu-tuhu tetap murni?

¹⁹ La kin tenang siakap meteh maka Rajanta, Jesus Kristus, ngkawali kalak si ikelengina? Janah, la kin terapul pusuhta meteh maka semangat Jesus guna ibadat situhu-tuhu bage pe man umat situhu-tuhu gundari, seri denga ras semangatna i bas abad si pemena Masehi paksa ibersihkenna rumah pertoton? Tuhu-tuhu ngata bujur kal kita erkiteken Kristus terus erdahin gelah umat Dibata tetap bersih secara rohani janah ibadat situhu-tuhu tetap murni! Banci sicidahken dukungenta man Raja e ras Kinirajanna alu terus mpedauh dirinta i bas agama palsu nari.