1, 2. (a) I bas abad si pemena, kai si erbahanca berita si meriah seh ku kerina Kerajan Romawi? (b) Kai buktina Jahwe ndukung kita gundari? (Nehen kotak ” Berita si Meriah i bas Lebih 670 Cakap”.)

 MAMANG ATE nterem jelma si reh ku Jerusalem megiken kalak Galilea beluh ngerana i bas cakap si deban. Berita e kena kal ku pusuh kalak si megikenca. Paksa si e Pentakosta 33 M, janah ajar-ajar ngaloken pemere Dibata eme kengasupen guna ngerana i bas erbage-bage cakap, enda bukti maka Dibata ndukung kalak e. (Oge Perbahanen 2:1-8, 12, 15-17.) Berita si meriah si iberitaken kalak ndai i bas wari e seh ku nterem jelma i bas erbage-bage latar belakang janah kenca si e seh ku kerina Kerajan Romawi.​—Kol. 1:23.

² Gundari, juak-juak Dibata lanai ngerana alu mukjizat i bas erbage-bage cakap. Amin gia bage, buen cakap si ipake kalak e asangken i bas abad si pemena guna nerjemahken berita Kinirajan ku lebih 670 cakap. (Perb. 2:9-11) Nggo iasilken umat Dibata lektur i bas jumlah si seh kal belinna janah i bas mbue cakap si erbahanca berita Kinirajan banci seh ku belang-belang doni. a Jelas me, enda jadi bukti maka Jahwe nggunaken Raja Jesus Kristus i bas minpin pendahin erberita. (Mat. 28:19, 20) I jenda sibahas kari piga-piga alat si ipake i bas ngelakoken pendahin e kidekah 100 tahun enda. Perdiateken uga Raja e mereken pelatihen banta alu ertahap gelah siperdiateken kalak si deban janah ngiahken kita jadi guru Kata Dibata.​—2 Tim. 2:2.

3. Engkai maka sigunaken erbage-bage alat i bas dahin erberita?

³ Iumpamaken Jesus ”berita kerna Kinirajan” bagi benih, janah pusuh manusia bagi taneh. (Mat. 13:18, 19) Bali bagi kalak si ku juma si make erbage-bage alat guna nikapken taneh gelah banci isuani, umat Jahwe pe nggunaken erbage-bage alat si banci nampati kalak e i bas nikapken pusuh jutan kalak guna ngaloken berita Kinirajan. Piga-piga alat e kentisik ngenca ipake. Si debanna, bagi buku ras majalah, terus igunaken. La bagi melala cara komunikasi si igunaken  nterem jelma bagi si nggo sibahas bas pasal sebelumna, kerina alat si ibahas i jenda nggo nampati perberita Kinirajan langsung njumpai kalak.​—Perb. 5:42; 17:2, 3.

4, 5. Uga rekamen fonograf igunaken, tapi kai kekurangenna?

⁴ Khotbah si irekam. I bas tahun 1930-en seh ku 1940-en, iputarken perberita khotbah Pustaka si Badia si irekam alu fonograf si banci ibaba-baba. Tiap rekamen la dem lima menit gedangna. Maun-maun judul khotbahna gendek, misalna ”Dibata Si Telu Sada”, ”Api Penyucian”, ras ”Kinirajan”. Uga rekamen e iputarken? Turang seninanta Clayton Woodworth, Jr., si iperidiken tahun 1930 i Amerika Serikat, ngataken, ”Kubaba fonograf si bentukna bagi koper si kitik, bas fonograf e lit alat pemutar si arus kutamaken pas iujung piringen hitam gelah jelas terbegi sorana. Kenca e, kudeheri sada rumah, kubuka koper e, kupasang peralatenna, janah kupecek bel. Paksa ibuka si mada jabu pintun rumahna, ningku, ’Kuputarken ateku berita penting man bandu.’” Uga tanggapenna? Nina turang seninanta Woodworth, ”Nterem kalak si ngalo-ngalo, tapi lit ka si mis itutupna pintunna. Maun-maun, lit ka si erpengakap aku erbinaga fonograf.”

⁵ I bas tahun 1940, lit lebih 90 rekamen khotbah janah lebih sada juta piringen hitam si ibahan. John E. Barr, si paksa si e jadi perintis i Inggris janah bas pudi wari ngelayani selaku anggota Badan Pinpinen, ngataken, ”Bas tahun 1936 seh ku 1945, fonograf jadi temanku si setia. Janah i bas paksa si e, lit kuakap si kurang adi la kubaba fonograf. Bagi ipegegehi kuakap aku paksa megiken sora turang seninanta Rutherford i lebe-lebe pintun; tempa-tempa lit kuakap ia i je. Payo, kesaksin alu fonograf lit denga kekurangenna  bas mereken pengajaren, eme ngkenai pusuh kalak si megi-megi.”

6, 7. (a) Kai saja gunana kartu kesaksin, tapi kai kekurangenna? (b) I bas erti kai ’ibereken Jahwe perkatanNa ku biberta’?

⁶ Kartu kesaksin. Mulai tahun 1933, iiahken perberita gelah nggunaken kartu kesaksin i bas pelayanen arah rumah ku rumah. Ukuren kartu kesaksin e kira-kira 8 kali 13 sentimeter si risiken berita si gendek i bas Pustaka si Badia nari bage pe keterangen kerna lektur Pustaka si Badia si banci idatken si mada jabu. Ibereken perberita e saja kartu e man si mada jabu gelah iogena. ”Meriah kal kuakap nggunaken kartu kesaksin,” nina Lilian Kammerud, si i bas pudi wari jadi utusen injil i Puerto Riko ras Argentina. Engkai? Nina, ”La kerina kami banci mereken kesaksin alu mehuli. Emaka, menukah kuakap ndeheri kalak erkiteken kartu e.”

⁷ Turang seninanta David Reusch, si iperidiken bas tahun 1918, ngataken, ”Kartu kesaksin nampati turang senina erkiteken la mbue si beluh mereken kesaksin.” Tapi, lit ka kekurangenna. Nina turang seninanta Reusch, ”Maun-maun, akap kalak kami la banci ngerana. I bas erti tertentu, memang teremen kami la beluh ngerana. Tapi, isikapken Jahwe kami jadi pelayan-pelayanNa guna njumpai kalak. La ndekah kenca si e, iberekenNa perkatanNa ku biber kami alu ngajari kami uga carana nggunaken Pustaka si Badia. Enda banci terjadi erkiteken Sekolah Pelayanen Teokratis si ibenaken bas tahun 1940-en.”​—Oge Jeremia 1:6-9.

8. Uga carana ipediatndu Kristus mereken pelatihen man bandu?

⁸ Buku. Mulai tahun 1914, nggo ihasilken umat Jahwe lebih 100 macam buku si mbahas topik kerna Pustaka si Badia. Piga-piga buku e ibahan guna mereken pelatihen man perberita gelah jadi pelayan si reh beluhna. Anna Larsen, i Denmark, si jadi perberita lebih 70 tahun, ngataken, ”Isampati Jahwe kami gelah reh beluhna jadi perberita alu Sekolah Erberita si Meriah ras buku-buku si lit hubungenna ras sekolah e. Kuinget buku si pemena eme Theocratic Aid to Kingdom Publishers, si ipetandaken bas tahun 1945. Kenca si e, “Equipped for Every Good Work,” si iterbitken bas tahun 1946. Gundari, lit buku Mendapat Manfaat dari Pendidikan Sekolah Pelayanan Teokratis si iterbitken bas tahun 2001.” Jelas me, Sekolah Erberita si Meriah bage pe buku-bukuna nggo nampati asum Jahwe ”erbahanca kami ngasup jadi si erdahin”. (2 Kor. 3:5, 6) Enggo nge idaftarkenndu dirindu i bas Sekolah Erberita si Meriah? Ibabandu nge tiap minggu buku Sekolah Pelayanan ku perpulungen? Ikutindu nge paksa ibahas pengawas sekolah buku e? Adi ue, enda ertina ipediatndu Kristus mereken pelatihen man bandu gelah jadi guru si reh beluhna.​—2 Kor. 9:6; 2 Tim. 2:15.

9, 10. Uga bukunta ikut nampati i bas nuan ras niram benih kebenaren?

⁹ Isampati Jahwe ka kita alu ngaturken organisasiNa gelah nikapken buku-buku si nampati perberita guna njelasken  ajaren dasar Pustaka si Badia. Kebenaran yang Membimbing kepada Hidup yang Kekal eme buku si tuhu-tuhu erguna. Tangtangna buku enda iterbitken bas tahun 1968 janah mis teridah pengaruhna. Menurut Pelayanan Kerajaan November 1968, ”Melala kal si mindo buku Kebenaran. Emaka, bas bulan September, percetaken Lembaga i Brooklyn arus lembur.” Artikel enda pe njelasken, ”Bas bulan Agustus jumlah pemindon buku Kebenaran pernah ngelebihi persedian si lit, lebih sada setengah juta buku!” Bas tahun 1982, buku enda iterbitken lebih 100 juta i bas 116 cakap. Sedekah 14 tahun mulai tahun 1968 seh ku 1982, buku Kebenaran ikut nampati i bas ningkatken jumlah perberita Kinirajan lebih sada juta buena. b

¹⁰ I bas tahun 2005, ipetandaken me sada alat bantu si deban, Apa yang Sebenarnya Alkitab Ajarkan? Kira-kira 200 juta buku iterbitken i bas 256 cakap! Kai hasilna? I bas pitu tahun saja, mulai tahun 2005 seh ku tahun 2012, kira-kira 1,2 juta kalak si jadi perberita si meriah. I bas tahun-tahun si e pe, erbuena kalak erlajar Pustaka si Badia i bas 6 juta nari seh ku lebih 8,7 juta kalak. Jahwe me si masu-masu upayanta i bas nuan ras niram benih kebenaren Kinirajan.​—Oge 1 Korinti 3:6, 7.

11, 12. Sentudu ras ayat-ayat Pustaka, guna ise majalah-majalahta ibahan?

¹¹ Majalah. Tangtangna, Menara Pengawal (Sora Ermomo) khusus ibahan man ”rarasen si kitik”, kalak si nggo ”ipilih Dibata”. (Luk. 12:32; Heb. 3:1) Bas tanggal 1 Oktober 1919, ipetandaken organisasi Jahwe majalah si deban, si ibahan gelah jelma si nterem nggit ngogesa. Majalah enda tuhu-tuhu terberita i bas Ajar-Ajar Pustaka si Badia bage pe jelma si nterem. Janah, ertahun-tahun dekahna majalah e ndauh buen ibagiken asangken Menara Pengawal. Tangtangna judul majalah e The Golden Age. Bas tahun 1937, gelarna iganti jadi Consolation. Janah, bas tahun 1946, igelari Awake! ntah pe Sadarlah!

¹² Puluhen tahun dekahna, bentuk ras susunen isi Menara Pengawal bage pe Sadarlah! nggo berubah, tapi tujunna tetap seri eme mberitaken Kinirajan Dibata ras mpegegehi kiniteken nandangi Pustaka si Badia. Gundari, Menara Pengawal iterbitken i bas edisi pelajaren ras edisi man jelma si nterem. Edisi pelajaren ibahan guna ”juak-juak si deban”, eme ”rarasen si kitik” ras ’biri-biri si deban’. c (Mat. 24:45; Joh. 10:16) Edisi man jelma si nterem khusus ibahan man kalak si lenga nandai kebenaren, tapi ngergai Pustaka si Badia ras Dibata. (Perb. 13:16) Sadarlah! khusus man kalak si la mbue pemetehna kerna Pustaka si Badia ras Dibata si benar, Jahwe.​—Perb. 17:22, 23.

13. Menurutndu, kai si erbahanca majalahta jadi majalah si luar biasa? (Bahas bagan ” Publikasi si Jadi Rekor bas Doni”.)

 ¹³ I bas pemena tahun 2014, tiap bulan lebih 44 juta Sadarlah! ras kira-kira 46 juta Menara Pengawal iterbitken. Sadarlah! iterjemahken ku kira-kira 100 cakap, ras Menara Pengawal, lebih i bas 200 cakap, si erbahanca duana majalah enda jadi majalah si mbuena kal iterjemahken ras ibagiken i doni! La ateta mamang ngenehen hasil si luar biasa enda. Majalah-majalah enda risiken berita si ikataken Jesus iberitaken pagi man manusia i belang-belang doni enda.​—Mat. 24:14.

14. Kai si ibagiken umat Dibata janah siiahken kalak guna ngelakoken kai, ras engkai?

¹⁴ Pustaka si Badia. I bas tahun 1896, iubah turang seninanta Russell ras teman-temanna gelar badan hukum si igunaken kalak e bas nerbitken lektur gelah kata Pustaka si Badia (Alkitab) lit i bas gelar e; emaka badan hukum e igelari Lembaga Alkitab dan Risalah Menara Pengawal. Perubahen e cocok erkiteken Pustaka si Badia tetap asa gundari jadi alat utama guna mberitaken berita si meriah kerna Kinirajan. (Luk. 24:27) Sentudu ras gelar badan hukum e, alu ergiah-giah ibagiken juak-juak Dibata Pustaka si Badia janah iahkenna kalak guna ngogesa. Misalna, bas tahun 1926, sicetak sendiri The Emphatic Diaglott, terjemahen Kitap-Kitap Junani Kristen si ibahan Benjamin Wilson. Mulai tahun 1942, sicetak ras sibagiken kira-kira 700.000 Pustaka si Badia King James Version. Dua tahun kenca si e, mulai sicetak Pustaka si Badia American Standard Version, si nggunaken gelar Jahwe 6.823 kali. Bas tahun 1950, nggo sibagiken lebih 250.000 Pustaka si Badia.

15, 16. (a) Kai si iergaindu i bas Pustaka si Badia Terjemahan Dunia Baru? (Bahas kotak ” Erbahan Penerjemahen Pustaka si Badia Reh Terna”.) (b) Uga carana ipediatndu Jahwe nalangi pusuhndu?

¹⁵ Bas tahun 1950 ipetandaken me New World Translation of the Christian Greek Scriptures. Janah, i bas tahun 1961 ipetandaken ka Pustaka si Badia New World Translation of the Holy Scriptures i bas sada jilid. Terjemahen enda nghamati Jahwe alu namaken mulihi gelarNa tiap lit kenca i bas naskah aslina bas cakap Heber. Gelar Dibata pe lit 237 kali itulis i bas teks utama Kitap-Kitap Junani Kristen. Gelah lebih jelas dingen tepat janah menukah ngangkaisa, Pustaka si Badia Terjemahan Dunia Baru enda nggo irevisi piga-piga kali, janah si mbaruna eme bas tahun 2013. Ngasa tahun 2013, lebih 201 juta Terjemahan Dunia Baru nggo iterbitken alu lengkap ntah pe sebagin i bas 121 cakap.

¹⁶ Uga tanggapen kalak si ngoge Terjemahan Dunia Baru i bas cakapna? Nina sekalak dilaki i Nepal, ”Nterem kalak ngataken maka mesera ngangkai terjemahen cakap Nepal si ndekah erkiteken nggunaken cakap si nai. Gundari, nggo nukahen ngangkai Pustaka si Badia erkiteken nggunaken cakap si biasa ipake tiap wari.” Paksa mulai ioge sekalak diberu i Republik Afrika Tengah terjemahen i bas cakap Sango, nina janahna teriluh, ”Enda me cakap si kena kal ku pusuhku.”  Bali bagi diberu e, banci sipediat Jahwe nalangi pusuhta sekalak-sekalak alu ngoge KataNa tep-tep wari.​—Msm. 1:2; Mat. 22:36, 37.

17. Uga carandu ngergai erbage alat ras pelatihen si ialokenndu, janah adi igunakenndu kai hasilna?

¹⁷ Iergaindu nge pelatihen si terus reh majuna bage pe peralaten si ibereken Raja Jesus Kristus man banta? Ibanndu nge waktundu guna ngoge lektur i bas organisasi Dibata, janah ipakendu nge guna nampati kalak si deban? Adi ue, pasti setuju kam nandangi kai si ikataken turang seninanta Opal Betler, si iperidiken bas tanggal 4 Oktober 1914. Nina Opal, ”Ertahun-tahun dekahna, aku ras perbulangenku [Edward] nggunaken fonograf ras kartu kesaksin. Bereken kami kesaksin arah rumah ku rumah alu buku, buku si kitik, ras majalah. Kampanye kami janah erbaris guna mbagiken berita si nggo icetak. Bas pudi wari, kami iajari guna ndahi mulihi ras erbahan pelajaren Pustaka si Badia i rumah kalak si nggit erlajar. Tuhu-tuhu sibuk kal kami janah ermeriah ukur.” Erjanji Jesus maka rayatna pagi sibuk guna nuan, mperani, janah radu ermeriah ukur. Jutan kalak bagi Opal nggo nggejapken sendiri maka janji e tuhu-tuhu payo.​—Oge Johanes 4:35, 36.

18. Kai hak istimewanta?

¹⁸ Banci saja nterem kalak si lenga jadi juak-juak Raja e erpengakap maka umat Dibata ”rakyat biasa si la erpendidiken”. (Perb. 4:13) Tapi, cuba ukuri! Raja e nggo erbahan rayatna si sederhana jadi sada organisasi penerbit si la banci ianggap sepele, ngasilken publikasi si mbuena kal ibagiken i bas sejarah! Janah si pentingna kal, nggo iajarina janah iiahkenna kita nggunaken alat-alat e i bas mberitaken berita si meriah man kerina kalak bas kerina bangsa. Tuhu-tuhu sada hak istimewa man banta banci radu erdahin ras Kristus i bas nuan benih kebenaren bage pe mperanisa!