1, 2. Pendahin si mbelin kai si inubuatken Jesus, janah penungkunen penting kai si turah?

 PEMINPIN POLITIK megati erbahan janji ngenca. Si lit sura-surana si mehuli pe banci saja la ngasup nepati janjina. Tapi, meriah kal siakap perbahan Raja Mesias, Jesus Kristus, lalap nepati kata-katana.

² Kenca jadi Raja i bas tahun 1914, Jesus nggo sikap guna nggenepi nubuat si ibelaskenna kira-kira 1.900 tahun sope si e. La ndekah sope ia mate, inubuatken Jesus, ”Berita si Meriah kerna Kinirajan e iberitaken [pagi] man manusia i belang-belang doni enda.” (Mat. 24:14) Penggenepen kata-kata enda jadi bagin i bas tanda kehadirenna bas kuasa Kinirajan. Tapi, turah penungkunen si penting: Uga Raja e banci erbahan pasuken guna erberita si ngerelaken diri bas wari-wari pendungi, i bas jaman si risiken kalak si mentingken bana, la perkeleng, janah la tek man Dibata? (Mat. 24:12; 2 Tim. 3:1-5) Perlu sieteh jabapenna erkiteken lit hubungenna ras kalak Kristen situhu-tuhu.

3. Jesus tek nandangi kai, janah ngkai maka ia tek?

³ Perdiateken ka nubuat Jesus. Payo nge kata-kata ”iberitaken [pagi]” ncidahken maka Jesus tek? Ue! Tek Jesus maka i bas wari-wari pendungi, lit kalak si ngerelaken diri guna ndukung ia. Engkai maka ia tek? Ia erlajar i bas Bapana nari. (Joh. 12:45; 14:9) Sope jadi manusia, iperdiateken Jesus maka Jahwe tek nandangi kerelan juak-juakNa. Mari sinehen uga Jahwe ncidahken maka Ia tek man umatNa.

4. Pendahin kai si ipindo Jahwe gelah idukung kalak Israel, janah uga tanggapen kalak e?

⁴ Ingetlah kai si terjadi paksa Jahwe nuruh Musa majekken tabernakel, ntah pe kemah, si jadi pusat ibadat bangsa Israel. Erkelangken Musa, iundang Jahwe kerina kalak guna ndukung pendahin e. Nina Musa, ”Tep-tep kalak si atena nehken persembahen, ibabana lah persembahenna.” Kai hasilna? Bangsa Israel ”maba persembahenna . . .  tep-tep erpagi-pagi”. Melala kal si ibaba kalak e, janah dungna iperentahken gelah ulanai maba sumbangen. (Kel. 35:5; 36:3, 6) Kerelan kalak Israel jadi bukti maka kepercayan si ibereken Jahwe man kalak e la salah.

5, 6. Erpalasken Masmur 110:1-3, semangat kai si iteki Jahwe ras Jesus lit i bas juak-juakna situhu-tuhu i bas wari-wari pendungi?

⁵ I bas wari-wari pendungi enda, tek nge Jahwe maka juak-juakNa pe nggit ngerelaken diri? Tek! Lebih 1.000 tahun sope Jesus tubuh i doni, Jahwe nuruh Daud guna nuratken ndigan Mesias mulai merentah. (Oge Masmur 110:1-3.) Lit musuh si nentang Jesus, Raja si mbaru itangkuhken e. Tapi, lit ka pasuken si ndukung ia. Kalak e la perlu ipaksa guna ngelayani Raja. Janah, singuda-nguda anak perana si nampati alu ukur meriah pe reh buena, emaka cocok iandingken bagi namur erpagi-pagi. a

⁶ Ieteh Jesus maka nubuat si isuratken i bas Masmur 110 igenepi i bas dirina. (Mat. 22:42-45) Emaka, lit alasen Jesus tek maka lit kalak si setia ndukung ia alu ukur meriah guna mberitaken berita si meriah i sebelang doni. Kai si icidahken fakta sejarah? Payo nge lit pasuken guna erberita si rela ndukung Raja i bas wari-wari pendungi enda?

7. Kenca itangkuhken jadi Raja, tindaken kai saja si ibahan Jesus guna nikapken si ndukung ia i bas pendahin si nandangi ibenaken?

⁷ La ndekah kenca itangkuhken jadi Raja, Jesus erbahan piga-piga tindaken guna nikapken pengikutna i bas ngelakoken pendahin si seh kal belinna. Bagi si nggo sipelajari i bas Pasal 2, ilakokenna pemereksan ras pembersihen i bas tahun 1914 seh ku bena-bena tahun 1919. (Mal. 3:1-4) Kenca si e, bas tahun 1919, itangkuhkenna juak-juak si tutus guna ndalanken kepeminpinen nandangi pengikutna.  (Mat. 24:45) Jenari, mulai ibagiken juak-juak e pangan rohani alu khotbah bas kebaktin ras publikasi si icetak si rusur nuriken kerna pentingna tanggung jabap kerina kalak Kristen guna erberita.

8-10. Uga kebaktin ngiahken pendahin erberita? Bereken sada contoh. (Nehen ka kotak ” Kebaktin Masa si Pemena Ngiahken Pendahin Erberita”.)

⁸ Khotbah bas kebaktin. Erkiteken merhat ngaloken bimbingen, i bas tanggal 1-8 September 1919, Ajar-Ajar Pustaka si Badia pulung i Cedar Point, Ohio, Amerika Serikat, guna ngikuti kebaktin si pemena kenca Perang Doni I. Bas wari peduaken, ipeseh turang seninanta Rutherford khotbah si risiken penjelasen si tegas. Nina, ”Tujun kalak Kristen i doni . . . eme mbarken berita kerna kinirajan Tuan.”

⁹ Puncak kebaktinna eme telu wari kenca si e, paksa turang seninanta Rutherford mpeseh khotbah si erjudul ”Pemindon man Sapih-Sapih si Erdahin”, si terbit i bas The Watch Tower i teruh judul ”Mberitaken Kinirajan”. Nina, ”I bas waktu-waktu tertentu, kalak Kristen biasana ngukuri alu mbages, Kai nge tugasku i doni enda? Jabapenna arusna: Tuan alu mehuli erbahan aku jadi wakilna guna maba berita i bas Dibata nari man manusia kerna perdamen mulihi ras Dibata, janah hak istimewa dingen tugasku eme mberitaken berita e.”

¹⁰ Bas khotbah si ersejarah e, imomoken turang seninanta Rutherford maka nandangi iterbitken majalah si mbaru, The Golden Age (gundari Awake! ntah pe Sadarlah!), guna negu-negu kalak ku Kinirajan Dibata, arapen umat manusia. Kenca si e, isungkunna asa kai buena kalak si pulung si nggit ikut mbagiken majalah e. Sada laporen i bas kebaktin e njelasken, ”Luar biasa kal tanggapenna. Mis tedis enem ribu kalak.” b Jelas me, lit si ndukung Raja alu rela janah ergiah-giah mberitaken Kinirajanna!

11, 12. I bas tahun 1920, kai si ikataken The Watch Tower kerna ndigan pendahin si inubuatken Jesus ilakoken?

¹¹ Publikasi si icetak. I bas halamen-halamen The Watch Tower, pentingna pendahin si inubuatken Jesus eme mberitaken berita si meriah kerna Kinirajan, nggo reh tangkasna. Perdiateken piga-piga contoh mulai bena-bena tahun 1920-en.

¹² Berita kai si nandangi imomoken si nggenepi Matius 24:14? Ndigan pendahin e ilakoken? The Watch Tower 1 Juli 1920, i bas artikel si erjudul ”Berita si Meriah kerna Kinirajan”, njelasken maka, ”Berita si meriah enda eme kerna kedungen jaman enda janah kerna pajekna kinirajan Mesias.” Alu jelas artikel e ncidahken kerna ndigan berita e imbarken, ”Berita enda arus ipeseh mulai i bas masa perang si mbelin sebelang doni [Perang Doni I] seh ku masa  ’kiniseran si mbelin’.” Emaka, nina artikel e, ”Gundari me waktuna . . . berita si meriah enda imomoken i japa pe i bas Susunen Kristen.”

13. I bas tahun 1921, uga The Watch Tower ngiahken kalak kristen si iminaki gelah rela ndalanken nubuat Jesus?

¹³ Tuhu nge umat Dibata ipaksa ngelakoken pendahin si inubuatken Jesus enda? Lang. Artikel ”Pegegehilah Pusuhndu”, i bas The Watch Tower 15 Maret 1921, ngiahken kalak Kristen si iminaki gelah ndalankenca alu ukur meriah. Tep-tep kalak iiahken guna ngukuri alu mbages, ”La kin hak istimewa si mbelinna dingen tugasku, guna ikut i bas pendahin enda asa ngasupku?” Nina artikel enda ka, ”Tek kami maka adi ibahanndu [ikut i bas pendahin enda jadi sada hak istimewa] kam banci bagi Jeremia. Kata-kata Tuan ’desken api si gurlah i bas pusuh[na], ngutkut i bas tulan[na]’, ngiahken ia gelah la nahan dirina guna ngerana.” (Jer. 20:9) Nasehat enda ncidahken maka Jahwe ras Jesus tek nandangi kalak si ndukung Kinirajan alu setia.

14, 15. I bas tahun 1922, The Watch Tower ngiahken kalak si iminaki guna ngelakoken kai?

¹⁴ Uga kalak Kristen situhu-tuhu mpeseh berita Kinirajan kempak kalak si deban? Artikel si gendek tapi erguna si erjudul ”Seh Kal Pentingna Erberita”, i bas The Watch Tower 15 Agustus 1922, ngiahken kalak Kristen si iminaki gelah ”ergiah-giah maba berita si icetak kempak nterem kalak janah ngerana ras kalak e i lebe-lebe pintu, mereken kesaksin maka kinirajan surga nggo ndeher”.

¹⁵ Jelas me, mulai tahun 1919 ras seterusna, igunaken Kristus juak-juak si tutus dingen pentar lako terus mastiken maka hak istimewa ras tugas kalak Kristen i doni eme mberitaken berita Kinirajan. Emaka, uga tanggapen Ajar-Ajar Pustaka si Badia i bas masa si pemena kerna pedah guna mberitaken Kinirajan?

16. Uga tanggapen piga-piga pertua nandangi pendapat maka kerina arus ikut i bas pelayanen?

¹⁶ I bas tahun 1920-en ras 1930-en, lit si nulak pendapat maka kerina kalak Kristen si iminaki arus ikut i bas pelayanen. Watch Tower 1 November 1927 njelasken kai si terjadi, ”Gundari lit kalak i bas gereja [runggun] si ertanggung jabap selaku pertua . . . si la nggit ngiahken turang seninana guna erberita, janah ia pe la nggit erberita. . . . Megombang ia nandangi pedah guna lawes ku rumah-rumah maba berita kerna Dibata, Raja, ras kinirajanNa, man jelma si nterem.” Alu tegas artikel enda ngataken, ”Enda me waktuna maka kalak si setia arus mere tanda man pertua-pertua si bage ras la ndeheri ia, janah mpebetehken man bana maka lanai kita tek man pertua-pertua si bage rupa.” c

17, 18. Uga tanggapen teremen turang senina i runggun nandangi nasehat i bas kantor pusat nari, ras uga tanggapen jutan turang senina sedekah 100 tahun enda?

¹⁷ Bujur sikataken erkiteken nterem turang senina i runggun ngaloken alu tutus pedah i bas kantor pusat  nari. Menurut kalak e mberitaken Kinirajan sada hak istimewa. The Watch Tower 15 Maret 1926 ngataken, ”Kalak si setia erdahin pagi alu ukur meriah . . . guna mpeseh berita enda kempak nterem jelma.” Kalak si setia e nggeluh sentudu ras kata-kata nubuat i bas Masmur 110:3 janah terbukti jadi kalak si rela ndukung Raja Mesias.

¹⁸ Sedekah 100 tahun enda, jutan kalak alu ukur meriah ikut i bas dahin mberitaken Kinirajan. I bas pasal-pasal seterusna, sibahas kari uga kalak enda erberita, cara ras alat si igunakenna, bage pe kai hasilna. Tapi, si pemena, mari sibahas engkai maka jutan kalak ikut i bas pendahin sukarela i bas mberitaken Kinirajan e, amin gia nggeluh i doni si mentingken bana. Asum ngukuri alasenna, mehuli adi sipereksa dirinta, ’Engkai maka kuberitaken berita si meriah man kalak si deban?’

19. Engkai maka sidalanken pedah Jesus guna terus ’ndarami lebe Kinirajan’?

¹⁹ Inasehati Jesus pengikutna gelah terus ’ndarami lebe Kinirajan’. (Mat. 6:33) Engkai maka sidalanken pedah e? Erkiteken nggo siakui maka Kinirajan e seh kal pentingna i bas tujun Dibata. Bagi si nggo sipelajari i bas pasal si nggo lewat, kesah si badia alu manjar-anjar nuriken kebenaren si luar biasa kerna Kinirajan. Paksa kebenaren Kinirajan si meherga e kena ku pusuhta, tersuruh ukurta guna ndarami lebe Kinirajan.

20. Uga perumpaman Jesus kerna erta si terbuni ncidahken cara pengikutna ngaloken pedah guna ndarami lebe Kinirajan?

²⁰ Ieteh Jesus uga tanggapen pengikutna kerna pedah guna terus ndarami lebe Kinirajan. Perdiateken perumpamanna kerna erta si terbuni. (Oge Matius 13:44.) Paksa erdahin, sekalak si erdahin i juma i bas perumpaman e ndatken erta si terbuni janah mis ietehna ergana. Kai si ilakokenna? ”Meriah kal ukurna, emaka lawes ia, idayakenna kerina erta-ertana, jenari itukurna juma e.” Kai pelajarenna? Paksa sidat kebenaren Kinirajan janah sieteh uga ergana, meriah ukurta mereken kai pe si iperluken gelah kepentingen Kinirajan tetap jadi si pentingna i bas geluhta. d

21, 22. Uga kalak si ndukung Kinirajan alu setia ncidahken maka Kinirajan jadi nomor sada i bas geluhna? Bereken sada contoh.

²¹ Kalak si ndukung Kinirajan alu setia ncidahken maka terus iutamakenna Kinirajan alu perbahanen, labo terjeng ranan saja. Igunaken kalak enda geluhna, kengasupenna, ras ertana guna dahin mberitaken Kinirajan. Enterem si nggo erbahan melala pengorbanen guna ikut i bas dinas sepenuh waktu. Kerina perberita si rela e nggo idahna sendiri maka Jahwe masu-masu kalak si mentingken Kinirajan i bas geluhna. Perdiateken sada contoh i bas masa si pemena.

 ²² Mulai pendungi tahun 1920-en, Avery ras Lovenia Bristow ras-ras ngelayani selaku kolportir (perintis) i Amerika Serikat bagin selatan. Ertahun-tahun kenca si e, mulihi iinget Lovenia, ”Mulai jenari, meriah kal ukurku ras Avery ras-ras merintis sedekah ertahun-tahun. Megati, la ieteh kami janari rehna sen guna nukur bensin ntah pe pangan. Tapi alu erbage cara, terus isikapken Jahwe keperlun kami. Terus kami merintis. Lalap lit kai pe si iperluken kami.” Niinget Lovenia paksa ngelayani i Pensacola, Florida, sitik nari ngenca sen ras pangan kalak e. Mulih ia ku rumah-motorna janah idapetina pangan i bas dua bungkus si galang ras surat si isina, ”Alu dem kekelengen i bas Runggun Pensacola nari.” Paksa ingetna mulihi masa puluhen tahun ia bas dinas sepenuh waktu, ikataken Lovenia, ”La pernah itadingken Jahwe kami. La pernah ihianatiNa kiniteken kami man baNa.”

23. Uga perasanndu kerna kebenaren Kinirajan si nggo idatndu, ras kai tekadndu?

²³ La banci seri kiningasupenta kerina i bas erberita. Keadanta la seri. Tapi, mpeseh berita si meriah alu tutus, sada hak istimewa man banta. (Kol. 3:23) Perban siergai kal kebenaren Kinirajan si nggo sidat, ergiah-giah dingen meriah ukurta erbahan pengorbanen guna ngelayani asa ngasupta. Bage nge tekadndu?

24. Kai salah sada hasil si mbelin i bas Kinirajan e bas wari-wari pendungi?

²⁴ I bas sada abad enda, tuhu-tuhu nggo igenepi Raja e nubuaten si isuratken i Matius 24:14. Janah la ipaksana kalak ngelakokenca. Kenca ndarat bas doni si mentingken bana enda, pengikut-pengikutna ngerelaken diri guna erberita. Mberitaken berita si meriah i sebelang doni si ilakoken kalak e eme bagin i bas tanda kehadiren Jesus bas kuasa Kinirajan, janah enda salah sada hasil si mbelinna i bas wari-wari pendungi.