1, 2. (a) Engkai maka mamang ate ajar-ajar? (b) Peranin kai si imaksudken Jesus?

 KEMAMANGEN ajar-ajar erkiteken ikataken Jesus man kalak e, ”Nehenlah ku juma-juma; page enggo megersing i bas juma e guna iperani!” Itulihken kalak e ku juma si ituduhken Jesus, tapi juma si idah kalak e labo megersing, tapi meratah. Banci saja kalak enda tersungkun-sungkun, ’Peranin kai? Musim peranin me piga-piga bulan nari.’​—Joh. 4:35.

² Tapi si imaksudken Jesus labo peranin i bas erti situhuna. Igunakenna kesempaten enda guna mereken dua pelajaren penting man ajar-ajarna kerna peranin rohani eme mperani manusia. Kai saja e? Guna metehsa, mari siperdiateken kisahna.

3. (a) Kai kira-kira si erbahanca maka ikataken Jesus, ’Juma-juma enggo megersing guna iperani’? (Nehen cataten i teruh.) (b) Kai si ikataken Jesus guna njelasken kata-katana?

³ Percakapen Jesus ras ajar-ajarna terjadi i bas pendungi tahun 30 M, deher Sihar, kuta kalak Samaria. Paksa lawes ajar-ajarna ku kuta e, itimai Jesus bas sada sumur ija ibagikenna kebenaren rohani man sekalak diberu si mis ngangkai pentingna ajaren Jesus. Paksa mulih ajar-ajar e, minter lawes diberu ndai ku Sihar guna mpebetehken man tetanggana hal-hal si luar biasa si enggo ibegina. Laporenna erbahan melala tetanggana tertarik janah minter lawes ku sumur e guna njumpai Jesus. Banci jadi bas paksa si e me, itulihken Jesus ku juma-juma janah idahna ndauh-ndauh nari melala kalak Samaria reh ndahi ia, emaka nina Jesus, ”Nehenlah ku juma-juma; page enggo megersing i bas juma e guna iperani!” a Kenca si e, gelah reh jelasna maka maksud Jesus labo peranin situhuna, tapi peranin rohani, nina Jesus ka, ”Kalak si mperanisa . . . ipepulungna asilna guna kegeluhen si tuhu-tuhu si la erkeri-kerin.”​—Joh. 4:5-30, 36.

4. (a) Kai dua pelajaren si ibereken Jesus kerna peranin? (b) Penungkunen kai saja si man bahasenta?

⁴ Dua pelajaren penting kai kerna peranin rohani si ibereken Jesus? Si pemena, dahin e enggo ngasak. Kata-kata Jesus maka juma-juma enggo megersing guna iperani ngiahken ajar-ajar gelah erdahin. Guna njelasken man ajar-ajarna  uga ngasakna pendahin e, nina Jesus ka, ”Kalak si mperanisa ngaloken upah.” Jelas me, peranin enggo ibenaken, lanai lit waktu tertaren-taren! Si peduaken, kalak si erdahin ermeriah ukur. Ikataken Jesus maka kalak si nuan ras si rani ”ras-ras ermeriah ukur”. (Joh. 4:35b, 36) Bali bagi Jesus si ermeriah ukur ngenehen ’nterem kalak Samaria tek man ia’, ajar-ajarna pe pasti ermeriah ukur asum erdahin alu bulat ukur i bas peranin. (Joh. 4:39-42) Kisah i bas abad si pemena enda seh kal pentingna man banta erkiteken nggambarken kai si paksana terjadi gundari enda i bas peranin rohani si mbelinna kal i bas sejarah. Ndigan peranin jaman modern ibenaken? Ise si ikut i bas pendahin e? Kai hasilna?

5. Ise si ndalanken kepeminpinen i bas peranin sebelang doni, janah uga pengenehenen Johanes ncidahken maka dahin e nggo ngasak?

⁵ I bas pengenehenen si ibereken man rasul Johanes, ipebetehken Jahwe maka itugaskenNa Jesus minpin dahin guna mperani manusia i sebelang doni. (Oge Ketangkasen 14:14-16.) I bas pengenehenen enda, igambarken maka Jesus make mahkota janah njemak sabi-sabi. ’Mahkota emas i bas takal [Jesus]’ ncidahken kedudukenna selaku Raja. ”I bas tanna lit sada sabi-sabi si ntelap”, enda ncidahken tugasna selaku Si Mperani. Alu ngataken arah sekalak malekat maka ”doni enggo seh paksana iperani”, ipetangkas Jahwe maka dahin e nggo ngasak. Jelas me, ”enggo seh paksa peranin”, lanai lit waktu tertaren-taren! Janah tanggapen Jesus kerna perentah Dibata, ”sabikenlah sabi-sabindu”, isabiken Jesus sabi-sabina, janah iperani me doni eme manusia si lit bas doni. Pengenehenen si luar biasa enda sekali nari ngingetken kita maka juma-juma enggo megersing guna iperani. Banci nge pengenehenen enda nampati kita meteh ndigan peranin sebelang doni enda ibenaken? Banci!

6. (a) Ndigan ”paksa peranin” ibenaken? (b) Ndigan dahin mperani doni si tuhu-tuhu ibenaken? Jelasken.

⁶ Erkiteken pengenehenen Johanes i bas Ketangkasen bindu 14 ncidahken maka Jesus, selaku Si Mperani, make mahkota (ayat 14), emaka penangkuhenna jadi Raja bas tahun 1914 nggo terjadi. (Dan. 7:13, 14) Piga-piga waktu kenca si e, iperentahken me Jesus guna mbenaken peranin (ayat 15). Uruten peristiwa si seri teridah bas perumpaman Jesus kerna peranin page; nina, ”Paksa peranin, e me kedungen doni enda.” Emaka, paksa peranin ras kedungen doni enda ibenaken i bas waktu si seri eme tahun 1914. Kenca e ”i bas paksa peranin”, peranin si tuhu-tuhu pe ibenaken. (Mat. 13:30, 39) Alu mperdiateken sejarah, banci sieteh maka peranin e ibenaken piga-piga tahun kenca Jesus mulai merentah jadi Raja. Si pemena, i bas tahun 1914 ngasa pemena tahun 1919, imurniken Jesus pengikutna si iminaki kesah si badia. (Mal. 3:1-3; 1 Pet. 4:17) Kenca si e, bas tahun 1919, ibenaken me mperani  doni. Alu la tertaren-taren, igunaken Jesus juak-juak si tutus si mbaru itangkuhken guna nampati turang senina si deban gelah meteh uga ngasakna dahin erberita e. Perdiateken kai si terjadi.

7. (a) Kai si nampati turang seninanta ngangkai maka dahin erberita nggo ngasak? (b) Kai pengaruhna man turang seninanta?

⁷ I bas bulan Juli 1920, nina The Watch Tower, ”Kenca Pustaka si Badia ipelajari terbagesen, jelas me maka ibereken hak istimewa si mbelin man gereja guna mpeseh berita kinirajan.” Misalna, kata-kata nubuat Jesaya nampati turang senina ngangkai maka berita Kinirajan e arus iberitaken ku sebelang doni. (Jes. 49:6; 52:7; 61:1-3) La ieteh kalak e uga ndungi dahin e, tapi tek ia maka pasti ituduhken Jahwe dalan man bana. (Oge Jesaya 59:1.) Erkiteken reh tangkasna pengertin kerna dahin erberita, tersuruh ukur turang seninanta guna ningkatken pendahinna. Kai si ilakoken kalak e?

8. Bas tahun 1921, dua hal kai kerna dahin erberita si iangkai turang seninanta?

⁸ Bas bulan Desember 1921, imomoken The Watch Tower, ”Tahun enda tahun si mehulina; janah buen kalak si megiken berita kebenaren bas tahun 1921 asangken tahun-tahun si lewat.” Nina majalah e ka, ”Tapi mbue denga si arus ilakoken. . . . Mari silakoken alu pusuh si dem keriahen.” Perdiateken uga turang seninanta ngangkai dua hal si seri pentingna kerna dahin erberita si ipetangkas Jesus man rasul-rasulna: Dahin e nggo ngasak, ras kalak si erdahin ermeriah ukur.

9. (a) I bas tahun 1954, kai kesimpulen The Watchtower kerna dahin peranin, janah ngkai? (b) Kai si terjadi sedekah 50 tahun enda kerna jumlah perberita i sebelang doni? (Nehen grafik ” Pertambahen i Belang-Belang Doni”.)

⁹ Bas tahun 1930-en, kenca iangkai turang seninanta maka rarasen si nterem biri-biri si deban pasti ngaloken berita Kinirajan, dahin erberita lebih itingkatken. (Jes. 55:5; Joh. 10:16; Ket. 7:9) Kai hasilna? Reh buena jumlah kalak si mberitaken berita Kinirajan, i bas 41.000 nari bas tahun 1934 jadi 500.000 bas tahun 1953! Alu tepat isimpulken The Watchtower 1 Desember 1954, ”Peranin i sebelang doni enda banci ilakoken erkiteken kesah Jahwe ras kuasa KataNa.” b—Sak. 4:6.

10, 11. Bagin kai kerna perturahna benih e si ibahas bas perumpaman kerna sengkebuah benih sawi?

¹⁰ I bas perumpaman Jesus kerna Kinirajan, inubuatkenna kerna hasil dahin peranin alu kata-kata si sederhana. Mari siperdiateken perumpaman kerna sengkebuah benih sawi ras ragi. Khususna siperdiateken kari uga si e igenepi bas pendungi jaman.

¹¹ Perumpaman kerna sengkebuah benih sawi. Isuan sekalak dilaki sada benih sawi. Dungna turah me benih e jadi batang kayu ingan cinep perik-perik. (Oge Matius 13:31, 32.) Bagin kai saja kerna perturahna benih e si ibahas bas perumpaman e? (1) Tingkat perturahna luar biasa. ”Benih si kitikna” jadi batang kayu si mbelin kal ”dahan-dahanna”. (Mrk. 4:31, 32) (2) Perturahna pasti. ”Kenca isuan [benih e] turah me ia.” Labo ikataken Jesus, ”Banci saja ia turah.” Lang, nina Jesus, ”Turah me ia.” Perturahna la banci ipengadi. (3) Batang kayu si reh belinna e jadi tatapen dingen ingan cilinggem. ”Perik-perik pe banci rasar i teruh bulungna si mbur.” Uga telu bagin enda berlaku man peranin rohani bas jaman modern?

12. Uga perumpaman kerna sengkebuah benih sawi berlaku bas peranin gundari enda? (Nehen ka bagan ” Jumlah Pelajaren Pustaka si Badia si Terus Erbuena”.)

¹² (1) Tingkat perturahna: Perumpaman e njelasken uga perturahna berita Kinirajan ras runggun Kristen. Mulai tahun 1919, kalak si rani alu ergiah-giah ipepulung bas runggun Kristen si nggo ipesikap. Paksa si e, sitik ngenca jumlah si erdahin, tapi meter kal pertambahenna. Janah, luar biasa kal pertambahenna mulai pemena tahun 1900-en seh ngasa gundari. (Jes. 60:22) (2) Kepastinna: Perturah runggun Kristen la banci ipengadi. La soal kai tentangen si ibereken musuh-musuh Dibata si bagi batu-batu si nindihi benih si kitik e, terus ia turah ngadapi kerina tentangen. (Jes. 54:17) (3) Ingan cilinggem: ”Perik-perik” si njadiken batang kayu e inganna cilinggem nggambarken jutan kalak si tutus i bas kira-kira 240 negeri si ngaloken berita Kinirajan alu jadi bagin runggun Kristen. (Esek. 17:23) I je, ialoken kalak e pangan rohani, kemalemen ate, ras perlindungen.​—Jes. 32:1, 2; 54:13.

13. Bagin kai saja kerna perturah berita Kinirajan si ibahas i bas perumpaman kerna ragi?

¹³ Perumpaman kerna ragi. Kenca itamaken sekalak diberu ragi ku tepung, niar me ragi e si erbahan tepung jadi kembang. (Oge Matius 13:33.) Bagin kai saja kerna perturahna berita Kinirajan si ibahas i bas perumpaman e? Perdiateken dua hal enda. (1) Perturahna erbahan perubahen. Niar ragi e ’seh tepung jadi kembang’. (2)  Perturahna e seh ku kerinana. Ragi erban kembang ”telu tumba tepung”, kerina tepung e. Uga dua bagin enda terjadi i bas peranin rohani jaman modern?

14. Uga perumpaman kerna ragi terjadi bas peranin gundari enda?

¹⁴ (1) Perubahen: Ragi ngertiken berita Kinirajan, janah tepung nggambarken umat manusia. Kenca ragi ras tepung  iaduk, ragi erbahan perubahen i bas tepung, bage ka pe berita Kinirajan erbahan perubahen bas pusuh kalak kenca ialokenna berita e. (Rom. 12:2) (2) Seh ku kerinana: Penyebaren ragi ngertiken penyebaren berita Kinirajan. Masuk ragi ku bas tepung janah niar ku kerina tepung e. Bage ka pe, berita Kinirajan niar ”seh ku belang-belang doni enda”. (Perb. 1:8) Bagin e i bas perumpaman ndai pe ncidahken maka i bas negeri-negeri si ngelarang dahinta pe, berita Kinirajan tersiar amin gia dahin erberita i bagin doni e banci saja la iperdiateken kalak.

15. Uga kata-kata bas Jesaya 60:5, 22 igenepi? (Nehen ka kotak ” I bas Jahwe Kai Pe Banci Jadi”, halamen 93, ras ” ’Si Kitik’ Jadi ’Bangsa si Mbelin’”, halamen 96-97.)

¹⁵ Kira-kira 800 tahun sope ituriken Jesus kerna dua perumpaman e, erkelangken Jesaya, inubuatken Jahwe alu kata-kata si sederhana uga riahna peranin rohani bas jaman modern ras uga belangna pendahin e. c Ikataken Jahwe maka kalak ”si ndauh nari” erduyun-duyun ku organisasiNa. Nina Jahwe man Jerusalem [ntah pe, ”diberu”] si gundari  nggambarken terpuk si iminaki i doni, ”Ngidah si e, ayondu siang perban riahna ukurndu, pusuhndu debet-debet, perban gedangna atendu. Kebayaken bangsa-bangsa itaruhken man bandu, rehen i kepar lawit nari maler man bandu.” (Jes. 60:1, 4, 5, 9) Payo kal kata-kata e! Gundari, tuhu-tuhu siang ayo juak-juak Jahwe si nggo ndekah ngelayani erkiteken meriah ukurna paksa ngidah jumlah perberita Kinirajan i negerina reh buena. Mbarenda piga-piga kalak ngenca tapi gundari nggo lit ribun kalak.

16, 17. Engkai maka ”si merdang ras si rani ras-ras ermeriah ukur”? (Nehen ka kotak ” Dua Risalah Ngkenai Dua Pusuh i Amazon”.)

¹⁶ Banci saja iingetndu kai si ikataken Jesus man rasul-rasulna, ”Kalak si mperanisa . . . ipepulungna asilna guna kegeluhen si tuhu-tuhu si la erkeri-kerin, gelah si merdang ras si rani ras-ras ermeriah ukur.” (Joh. 4:36) Kai saja si erbahanca kita banci ”ras-ras ermeriah ukur” i bas peranin sebelang doni? Mari siperdiateken telu alasenna.

¹⁷ Si pemena, meriah ukurta ngidah penampat Jahwe i bas pendahin enda. Paksa meritaken berita Kinirajan, siamburken benih. (Mat. 13:18, 19) Paksa sisampati sekalak jelma ngasa ia jadi ajar-ajar Kristus, siperani asilna. Janah, tuhu-tuhu meriah kal siakap paksa siidah uga Jahwe erbahan benih Kinirajan e ’ersuli janah turah’. (Mrk. 4:27, 28) Piga-piga benih si nggo siamburken ndekah maka ertunas janah temanta si deban si mperanisa. Banci saja pernah igejapkenndu kai si ialami Joan, turang seninanta i Inggris si iperidiken 60 tahun si nggo lewat. Nina, ”Jumpa aku ras kalak si ngataken maka aku me si nuan benih bas pusuhna paksa erberita man bana ertahun-tahun si nggo lewat. Alu la kueteh, kepeken Saksi-Saksi si deban erlajar ras kalak e janah nampati ia jadi juak-juak Jahwe. Meriah kal kuakap erkiteken benih si kusuan turah janah iperani.”​—Oge 1 Korinti 3:6, 7.

18. Erpalasken 1 Korinti 3:8, kai alasenta ermeriah ukur?

¹⁸ Si peduaken, adi lalap siinget kata-kata Paulus, ”Sekalak-sekalak ibereken Dibata me upahna rikutken pendahinna sekalak-sekalak”, kita terus jadi si erdahin si dem keriahen ukur. (1 Kor. 3:8) Upah ibereken erkiteken pendahinna, labo erkiteken asilna. Jaminen enda mpebelin pusuh kalak si erberita bas daerah si jelmana kurang ermediate man berita e! I lebe-lebe Dibata, kerina Saksi si alu bulat ukur ikut i bas pendahin guna nuan ngasilken ’melala buah’ si erbahanca lit alasenna ermeriah ukur.​—Joh. 15:8; Mat. 13:23.

19. (a) Erpalasken nubuat Jesus i bas Matius 24:14, ngkai maka lalap kita banci ermeriah ukur? (b) Kai si perlu siinget adi la kita berhasil erbahan ajar-ajar?

¹⁹ Si peteluken, meriah ukurta erkiteken pendahinta nggenepi nubuat. Perdiateken jabapen Jesus paksa nungkun ajar-ajarna, ”Kai nge pagi tanda-tanda kerehenndu dingen kai nge pagi tanda-tanda kedungen jaman enda?” Ipebetehkenna man kalak e maka sada bagin i bas tanda e eme dahin  erberita i belang-belang doni. Payo nge enda maksudna dahin guna erbahan ajar-ajar? Lang. Nina, ”Berita si meriah kerna Kinirajan e iberitaken man manusia i belang-belang doni enda, jadi saksi man kerina bangsa.” (Mat. 24:3, 14) Jelas me, mberitaken Kinirajan ntah pe ngambur benih, eme salah sada bagin i bas tanda e. Emaka, asum siberitaken berita si meriah kerna Kinirajan, lalap siinget maka amin gia la kita berhasil erbahan ajar-ajar, tetap kita berhasil i bas mereken ’kesaksin’. d Payo, la soal tanggapen kalak si deban, kita ikut nggenepi nubuat Jesus janah ndatken kinihamaten guna ngelayani jadi ”sada aron” ras Dibata. (1 Kor. 3:9) Enda tuhu-tuhu alasen ermeriah ukur!

20, 21. (a) Uga kata-kata i bas Masmur 113:3 igenepi? (b) Kai tekadndu i bas dahin mperani, janah ngkai?

²⁰ I bas abad si pemena, isampati Jesus rasul-rasulna ngangkai maka dahin mperani nggo ngasak. Mulai tahun 1919 ras seterusna, isampati Jesus ajar-ajarna i bas jaman modern guna ngangkai kebenaren si seri. Hasilna, itingkatken umat Dibata kegiatenna. Situhuna, dahin mperani la banci ipengadi. Bagi si ikataken Masmur 113:3, dahin erberita gundari enda ilakoken ”i bas kepultaken nari seh ku kesunduten”. Payo, i bas kepultaken nari seh ku kesunduten, eme timur nari ku barat, i japa pe i doni enda, kalak si nuan ras kalak si rani radu ras erdahin ras ermeriah ukur. Janah, i bas kepultaken nari seh ku kesunduten, pagi-pagi nari seh ku karaben ntah pe segedang wari, kita erdahin alu ergiah-giah.

²¹ Asum siinget mulihi masa kira-kira 100 tahun si nggo lewat janah ngidah uga terpuk si kitik juak-juak Dibata dungna jadi ”bangsa si mbelin dingen erkuasa”, ’erdebet-debet’ pusuhta janah dem alu keriahen ukur. (Jes. 60:5, 22) Mbera keriahen ukur e ras kekelengenta man Jahwe, ”Si Mada peranin”, ngiahken kita kerina guna terus ngelakoken baginta i bas ndungi peranin si mbelinna kal segedang sejarah!​—Luk. 10:2.