CIREM kam janah megah akapndu ngenehen si erkhotbah i mimbar. Ia turang senina si nguda denga bas runggunndu nari janah enda khotbahna si pemena bas kebaktin. Asum ibegikenndu khotbahna, luar biasa kal akapndu pelatihen si ialoken umat Dibata. Ingetndu denga upaya turang seninanta enda ndai paksa tangtangna ia maju ku mimbar, janah gundari kemajunna luar biasa kenca ngikuti Sekolah Dinas Perintis. Mbaru-mbaru enda, ia ras ndeharana ikut bas Sekolah man Perberita Kinirajan. Paksa kam ertepuk tan erkiteken khotbahna si mejile, nehenndu ku sekelewetndu janah iukurindu pengajaren si idatken kerina umat Dibata.

Inubuatken Pustaka si Badia maka lit pagi masana kerina umat Dibata ’iajari Jahwe’. (Jes. 54:13) Gundari kita nggeluh bas masa si e. Pendidiken si nggo sialoken labo arah publikasinta saja, tapi pe arah perpulungen, kebaktin, bage pe erbage sekolah si ibahan guna nikapken kita ndalanken tugas-tugas tertentu i bas organisasi Jahwe. I bas bagin enda, sibahas kari uga kerina pendidiken enda mereken bukti si paguh maka Kinirajan Dibata paksana merentah gundari.