1. Penampat kai si ialoken ajar-ajar paksa pulung, janah ngkai maka penampat e iperluken?

 LA NDEKAH kenca Jesus ipekeke, pulung ajar-ajarna guna siiah-iahen. Ieruk kalak enda pintu-pintu erkiteken mbiar nandangi musuh-musuhna. Tapi, pasti kalak enda lanai mbiar paksa reh Jesus ku tengah-tengahna janah ngataken, ”Alokenlah kesah si badia”! (Oge Johanes 20:19-22.) Piga-piga waktu kenca si e, pulung me ajar-ajar e, janah ibereken Jahwe kesah si badiaNa man kalak enda. Seh kal belinna gegeh si ialoken kalak enda guna dahin erberita si lit i lebe-lebena!​—Perb. 2:1-7.

2. (a) Uga Jahwe mereken gegeh man banta, janah ngkai maka siperluken e? (b) Engkai maka seh kal pentingna Kebaktin Jabu? (Nehen cataten i teruh ras kotak ” Kebaktin Jabu”, halamen 175.)

² Kita pe ngadapi tentangen si bali bagi si ihadapi turang seninanta i bas abad si pemena e. (1 Pet. 5:9) Maun-maun, lit i bas kita si mbiar man manusia. Janah, perlu kita gegeh bas Jahwe nari gelah banci megenggeng i bas pendahin erberita. (Ep. 6:10) Buen gegeh e isikapken Jahwe arah perpulungen-perpulungenta. Gundari, lit kesempatenta reh ku dua perpulungen tiap minggu si dem alu pengajaren eme Perpulungen Umum ras Pelajaren Sora Ermomo bage pe perpulungen pertengahen minggu si igelari Pelayanen ras Kegeluhen Kristen. a Janah sidahi ka empat perpulungen tiap tahun eme sada kebaktin regional, dua kebaktin wilayah, ras Peringet-ingeten kematen Kristus. Engkai maka seh kal pentingna reh ku kerina perpulungen e? Uga perkembangen perpulungen bas jaman modern? Janah, tindakenta nandangi perpulungen ncidahken kai kerna dirinta?

3, 4. Kai si ipindo Jahwe bas umatNa nari? Bereken contohna.

³ Mbarenda nari nggo ipindo Jahwe gelah umatNa ras-ras pulung guna eribadat. Misalna, tahun 1513 SM, ibereken Jahwe Hukum man bangsa Israel. Hukum enda termasuk Sabat tiap minggu gelah tep-tep keluarga banci eribadat man baNa janah iajari kerna Hukum e. (Ul. 5:12; 6:4-9) Paksa idalanken kalak Israel perentah e, keluarga-keluarga ipegegehi janah kerina bangsa e pe tetap bersih dingen paguh secara rohani. Tapi paksa gagal bangsa e ndalanken Hukum, lupa ia kewajipenna  guna ratur pulung eribadat man Jahwe, emaka kalak enda pe lanai ngena ate Dibata.​—Im. 10:11; 26:31-35; 2 Kro. 36:20, 21.

⁴ Perdiateken ka usihen si nggo itetapken Jesus. Lit kebiasanna lawes ku rumah pertoton kalak Jahudi tep-tep minggu i bas wari Sabat. (Luk. 4:16) Kenca kematen ras kinikeken Jesus, iterusken ajar-ajarna me kebiasan e guna ras-ras pulung alu ratur amin gia kalak enda lanai i bas hukum Sabat. (Perb. 1:6, 12-14; 2:1-4; Rom. 14:5; Kol. 2:13, 14) I bas perpulungen-perpulungen e, kalak Kristen abad si pemena labo ngenca ndatken pengajaren ras persinget si mpegegehi, tapi ipersembahkenna ka korban pujin man Dibata arah pertotonna, kata pergegeh, bage pe arah ende-enden.​—Kol. 3:16; Heb. 13:15.

5. Engkai maka kita reh ku perpulungen tiap minggu ras kebaktin tiap tahun? (Nehen ka kotak ” Perpulungen Tahunen si Mpersada Umat Dibata”, halamen 176.)

⁵ Bage ka pe, paksa reh ku perpulungen tiap minggu ras kebaktin tiap tahun, sicidahken maka sidukung Kinirajan Dibata, sialoken gegeh bas kesah si badiaNa nari, janah siiahken kalak si deban arah kerehenta si mbuktiken kinitekenta. Si pentingna, lit kesempatenta eribadat man Jahwe arah pertotonta, kata pergegeh, bage pe arah ende-endenta. Banci saja la seri pengaturen perpulungenta ras perpulungen si idahi kalak Israel ras kalak Kristen abad si pemena, tapi kerina seri nge pentingna. Uga perkembangen perpulungen i jaman modern?

6, 7. (a) Kai tujun perpulungenta? (b) Uga pengaturen perpulungen la seri i bas tiap terpuk?

⁶ Paksa mulai idarami turang seninanta Charles Taze Russell kebenaren bas Pustaka si Badia, ietehna maka seh kal pentingna pulung ras kalak si seri tujunna ras ia. I bas tahun  1879, itulis Russell, ”Aku, ras kalak si deban i Pittsburgh erbahan pengaturen bage pe kelas Pustaka si Badia guna nelidiki Pustaka, janah pulung kami tiap wari Minggu.” Tersuruh ukur kalak si ngoge Zion’s Watch Tower guna ras-ras pulung, janah i bas tahun 1881, ibahan me perpulungen-perpulungen i Pittsburgh, Pennsylvania, tiap wari Minggu ras Rabu. Ikataken Watch Tower November 1895 maka tujun perpulungen e eme guna mpegegehi ”perkade-kaden, kekelengen ras persadan Kristen” janah mereken kesempaten man si pulung guna siiah-iahen.​—Oge Heber 10:24, 25.

⁷ Ertahun-tahun dekahna, la seri cara perpulungen ras uga rusurna perpulungen e ibahan bas tiap terpuk Ajar-Ajar Pustaka si Badia. Misalna, lit surat i bas sada terpuk i Amerika Serikat si iterbitken tahun 1911 si ngataken, ”Silang-langna lima kali kami pulung tiap minggu.” Perpulungen kalak enda ibahan bas wari Senin, Rabu, Jumat, ras dua kali bas wari Minggu. Surat si debanna, i bas sada terpuk i Afrika, si iterbitken tahun 1914 ngataken, ”Kami pulung dua kali sebulan, mulai wari Jumat seh ku wari Minggu.” Tapi dungna, lit me bentuk perpulungen bagi si gundari enda. Perdiateken sejarah singkat kerna tep-tep perpulungen.

8. Kai topik khotbah umum si pemena?

⁸ Perpulungen Umum. I bas tahun 1880, setahun kenca iterbitken turang seninanta Russell majalah Zion’s Watch Tower, iikutkenna usihen si itetapken Jesus janah tur ia guna erberita. (Luk. 4:43) Kenca si e, itetapken turang seninanta Russell cara Perpulungen Umum si gundari sipake. Paksa imomokenna kerna perdalanen e, ikataken Watch Tower maka ”meriah kal ukur Russell mpeseh khotbah i perpulungen man jelma si nterem kerna ’Hal-hal si termasuk i bas kinirajan Dibata’”. I bas tahun 1911, kenca ibahan kelas ntah pe runggun i piga-piga negeri, isuruh me tiap kelas ngutus kalak si cocok guna erkhotbah ku daerah-daerah si lit i je gelah mpeseh enem khotbah, misalna topik kerna penghakimen ras tebusen. I bas pendungi tep-tep khotbah, imomoken me gelar si erkhotbah ras tema khotbah i bas minggu si reh.

9. Penyesuaien kai saja si lit i bas Perpulungen Umum, janah uga kam banci ikut ndukungsa?

⁹ I bas tahun 1945, imomoken The Watchtower me maka ibenaken kampanye Perpulungen Umum i belang-belang doni si termasuk waluh khotbah erpalasken Pustaka si Badia kerna ”masalah si penting bas masa si gundari”. Puluhen tahun dekahna, kalak si itugasken guna khotbah labo ngenca nggunaken topik-topik i bas juak-juak si tutus nari, tapi ipesehna ka khotbah si ikembangkenna sendiri. Tapi tahun 1981, ibereken me petunjuk man kalak si erkhotbah gelah khotbahna erpalasken rangka si ibereken ku runggun-runggun. b Ngasa tahun 1990, i bas piga-piga rangka khotbah umum lit ibahan pertunjuken janah si pulung pe ilibatken; tapi i bas tahun si e  petunjukna e iganti, janah mulai jenari khotbah umum ipeseh alu erkhotbah saja. I bas bulan Januari 2008, lit penyesuaien si terdauhen eme khotbah umum ikurangi waktuna i bas 45 menit nari jadi 30 menit. Amin gia lanai seri bentukna, khotbah-khotbah umum si isikapken alu mehuli terus mpegegehi kiniteken nandangi Kata Dibata ras ngajari kita kerna erbage bagin Kinirajan Dibata. (1 Tim. 4:13, 16) Tutus nge atendu ngundang kalak si idahindu mulihi ras kalak si deban si la Saksi guna megiken khotbah si erpalasken Pustaka si Badia si seh kal pentingna e?

10-12. (a) Perubahen kai saja si lit i bas Pelajaren Sora Ermomo? (b) Penungkunen kai saja si perlu isungkunndu?

¹⁰ Pelajaren Sora Ermomo. I bas tahun 1922, turang seninanta si itandai selaku musafir eme rohaniwan si iutus Lembaga Menara Pengawal guna erkhotbah ku runggun-runggun janah minpin pendahin erberita, mere saran gelah ibahan perpulungen si ratur si khusus mpelajari Sora Ermomo. Idalanken me saran enda, janah tangtangna pelajaren Sora Ermomo ibahan bas pertengahen minggu ntah pe bas wari Minggu.

¹¹ Ibereken Watchtower 15 Juni 1932 petunjuk si terdauhen kerna uga carana erbahan perpulungen enda. Alu ngusih pelajaren si ibahan i Rumah Betel, ikataken artikel e maka sekalak turang seninanta si dilaki si minpin perpulungen e. Telu turang seninanta si dilaki kundul i lebe janah pegancih ngogeken paragraf-paragrafna. Paksa si e, lenga lit penungkunen si tercetak bas artikel-artikelna. Emaka, ipebetehken man si minpin pelajaren gelah ipindona kalak si pulung mereken penungkunen kerna kai si paksana ibahas. Kenca e, ipindona me kalak si pulung si deban njabap penungkunen e. Adi perlu penjelasen tambahen, banci ibereken si minpin pelajaren e keterangen si ”singkat ras si perlu saja”.

 ¹² Tangtangna, banci ipilih tep-tep runggun majalah si apai si man pelajaren. Tapi isaranken Watchtower 15 April 1933, gelah kerina runggun make terbiten si mbaruna. I bas tahun 1937, ibereken me petunjuk gelah pelajaren enda ibahan bas wari Minggu. Pemurnin si terdauhen si njadiken perpulungenta bagi si gundari iterbitken i bas Watchtower 1 Oktober 1942. Tangtangna, imomoken majalah e maka ibahan me penungkunen i teruh tiap halamen artikel pelajaren janah tiap penungkunen e perlu ipake. Janah ikataken majalah e maka mehuli adi perpulungen enda ibahan sedekah sada jam. Bage ka pe, kalak si mereken jabapen adi banci ”alu kata-katana sendiri”, labo terjeng ngogekenca bas paragraf nari. Pelajaren Sora Ermomo terus jadi perpulungen si penting si igunaken juak-juak si tutus guna mereken pangan rohani i bas paksana. (Mat. 24:45) Perlu sisungkun man banta kerina, ’Kubahan nge persikapen pelajaren Sora Ermomo tiap minggu? Janah, adi ngasup aku, kuusahaken nge mereken kata pergegeh?’

13, 14. Uga perkembangen Pelajaren Pustaka si Badia Runggun, janah kai si meriahna iakapndu bas perpulungen enda?

¹³ Pelajaren Pustaka si Badia Runggun. I bas pertengahen tahun 1890-en, kenca piga-piga jilid Millennial Dawn ipetandaken, turang seninanta H. N. Rahn, sekalak Ajar-Ajar Pustaka si Badia si tading i kota Baltimore, Maryland, AS, isarankenna gelah ibahan ”Dawn Circles” (Kelas-Kelas Fajar) guna erlajar Pustaka si Badia. Tangtangna, perpulungen enda, si megati ibahan i rumah-rumah pribadi, uji coba saja ngenca. Tapi, i bas bulan September 1895, sukses me Kelas Fajar si ibahan i mbue kota i Amerika Serikat. Emaka, isaranken Watch Tower bulan e gelah kerina ajar-ajar kebenaren erbahan perpulungen si bage. Lit petunjuk maka si minpin arus min beluh ngoge. Arus iogena sada kalimat, kenca e itimaina kalak si pulung mereken kata pergegeh. Kenca iogena tiap kalimat i bas paragraf janah ibahasna, arus ibukana ras iogena ayat-ayat si ikutip. I bas pendungi pasal, ipeseh tep-tep kalak si pulung me kesimpulen si gendek kerna kai si nggo ibahas.

¹⁴ Gelar perpulungen e nggo piga-piga kali iganti. Misalna, Pelajaren Pustaka si Badia pernah igelari Kelas Berea, si ncidahken maka i bas abad pemena kalak Berea mpelajari terbagesen Kitap si Badia alu megermet. (Perb. 17:11) Kenca e, iganti me gelarna jadi Pelajaran Buku Sidang. Gundari, gelarna Pelajaren Pustaka si Badia Runggun, janah kerina runggun pulung i Bale Kinirajan lanai bas terpuk i rumah-rumah pribadi. Puluhen tahun dekahna, erbage buku, brosur, bage pe artikel Sora Ermomo ipake jadi bahan pelajarenna. Mulai tangtangna nari, kerina si pulung iiahken gelah ikut muat bagin bas perpulungen e. Perpulungen enda mpebagesi pemetehta  kerna Pustaka si Badia. Ratur nge kam erban persikapen guna perpulungen enda janah ikut muat bagin asa bancina?

15. Kai tujun Sekolah Pelayanen Teokratis?

¹⁵ Sekolah Pelayanen Teokratis. Niinget Carey Barber mulihi, si paksa si e ngelayani i kantor pusat i Brooklyn, New York, nina, ”I bas wari Senin berngi tanggal 16 Februari 1942, kerina anggota keluarga Betel Brooklyn si dilaki iundang gelah ndaftar ku sekolah si gundari igelari Sekolah Pelayanen Teokratis.” Turang seninanta Barber, si dungna jadi anggota Badan Pinpinen, ngataken maka sekolah enda ”salah sada perkembangen si jelas kal teridah i bas cara Jahwe erurusen ras umatNa bas jaman modern”. Sekolah enda tuhu-tuhu nampati turang seninanta guna ningkatken keterampilen i bas ngajar bage pe erberita. Janah dungna, i bas tahun 1943, buku si kitik Course in Theocratic Ministry (Kursus Pelayanen Teokratis) alu ertahap isikapken man runggun-runggun i belang-belang doni. Ikataken Watchtower 1 Juni 1943  maka Sekolah Pelayanen Teokratis ibahan gelah umat Dibata ”ilatih jadi saksi si reh ulina i bas mberitaken Kinirajan”.​—2 Tim. 2:15.

16, 17. Keterampilen kai saja si iajarken i bas Sekolah Pelayanen Teokratis?

¹⁶ Tangtangna, melala si tersiksa akapna erkiteken arus erkhotbah i lebe-lebe jelma si nterem. Contohna, Clayton Woodworth, Jr., si bapana pernah ipenjaraken alu la adil ras turang seninanta Rutherford ras si debanna i bas tahun 1918, iingetna mulihi kai si igejapkenna paksa tangtangna kal ikut i sekolah enda i bas tahun 1943. Nina turang seninanta Woodworth, ”Mesera kal kuakap mpeseh khotbah e. Reh gedangna kuakap dilahku, babahku pe kerah, janah sorangku pe terbegi bagi nergang ras bagi tempa icekak.” Tapi, asum ia reh beluhna, ialokenna hak istimewa guna mpeseh melala khotbah bas ingan jelma si nterem. Sekolah enda labo ngenca ngajari ia mbue keterampilen cara erkhotbah. Tapi iajari ka uga pentingna sifat meteruk rukur ras ernalem man Jahwe. Nina,  ”Dungna sedar aku maka labo penting ise si ngerana e. Tapi adi sibahan persikapen alu mehuli janah tuhu-tuhu ernalem man Jahwe, pasti meriah ukur si pulung megiken khotbah e janah ndatken pelajarenna.”

¹⁷ I bas tahun 1959, iundang me turang seninanta si diberu gelah ndaftar ku sekolah enda. Niinget turang seninanta Edna Bauer momo bas kebaktin si idahina. Nina, ”Kuinget uga riahna ukur senina-seninangku. Gundari, banci terbuen kesempaten idatkenna.” Ertahun-tahun dekahna melala turang seninanta si nggunaken kesempaten gelah iajar Jahwe janah ndaftar i Sekolah Pelayanen Teokratis. Gundari, terus sidatken pelatihen si bage i bas perpulungen pertengahen minggu.​—Oge Jesaya 54:13.

18, 19. (a) Uga banci sidatken petunjuk si erguna i bas pelayanen? (b) Engkai maka perlu rende i bas perpulungen? (Nehen kotak ” Ngendeken Kebenaren”.)

¹⁸ Perpulungen Dinas. Mulai tahun 1919, ibahan me perpulungen guna ngaturken dahin erberita si meriah. Paksa si e, la kerina turang senina i bas runggun reh ku perpulungen e. Tapi kalak si langsung ikut mbagiken lektur saja. Menam segedang tahun 1923, Perpulungen Dinas ibahan sekali sebulan, janah kerina i kelas ntah pe runggun, banci reh. I bas tahun 1928, iiahken me runggun-runggun gelah erbahan Perpulungen Dinas tiap minggu. Janah i bas tahun 1935, iiahken The Watchtower kerina runggun gelah erbahan Perpulungen Dinas erpalasken keterangen si iterbitken i bas Director (dungna igelari Informant janah kenca e, Pelayanenta man Kinirajan Dibata). Perpulungen enda minter jadi sada bagin si tetap bas tep-tep runggun.

¹⁹ Gundari sidatken petunjuk si erguna i bas perpulungen pertengahen minggu si banci igunaken i bas pelayanen. (Mat. 10:5-13) Adi nggo kam ncukupi sarat guna ndatken agenda perpulungen, ipelajarindu janah idalankenndu nge saran-saran si lit ije paksa kam erberita?

20-22. (a) Engkai maka siperingeti kematen Jesus? (b) Kai gunana man bandu reh ku Peringet-ingeten tiap tahun?

²⁰ Isuruh Jesus pengikutna mperingeti kematenna ngasa ia reh. Bali bagi perayan Paskah, Peringet-ingeten kematen Kristus pe acara tahunen. (1 Kor. 11:23-26) Jutan kalak reh ku perpulungen enda. Enda ngingetken terpuk si iminaki nandangi hak istimewana eme ikut jadi ahli waris Kinirajan. (Rom. 8:17) Janah man biri-biri si deban, enda mpebelin pengergan bage pe kesetianna kempak Raja Kinirajan Dibata.​—Joh. 10:16.

²¹ Isedari turang seninanta Russell bage pe teman-temanna maka seh kal pentingna mperingeti Perjamun Berngi Tuan janah ietehna maka e arus ilakoken sekali setahun saja. Nina Watch Tower April 1880, ”Enterem i bas kami si tading i Pittsburgh nggo biasa i bas piga-piga tahun enda  . . . mperingeti Paskah [Peringet-ingeten] janah man ras nginem  lambang-lambang kula ras dareh Tuanta.” Minter ibahan kebaktin-kebaktin radu ras Peringet-ingeten. Cataten si pemena kerna acara si bage eme cataten tahun 1889, paksa 225 kalak reh janah 22 kalak iperidiken.

²² Gundari, Peringet-ingeten lanai ibahan radu ras kebaktin, tapi sitenahken kerina kalak i daerahta gelah ikut ras kita i Bale Kinirajan ntah pe bas ingan si isewa. Bas tahun 2013, lebih 19 juta kalak mperingeti kematen Jesus. Mbelin kal hak istimewanta banci reh ku Peringet-ingeten, bage ka pe paksa nenahken kalak si deban ikut ras kita i bas berngi si seh kal badiana enda! Tutus nge atendu nenahken terbuen jelma ku Peringet-ingeten tep-tep tahun?

23. Uga pengakapndu kerna perpulungenta?

²³ Labo mberat iakap umat Jahwe si setia petunjuk guna ras-ras pulung. (Heb. 10:24, 25; 1 Joh. 5:3) Misalna, meriah kal ukur Raja Daud reh ku rumah pertoton Jahwe guna eribadat. (Msm. 27:4) Khususna meriah akapna eribadat radu ras kalak si deban si ngkelengi Dibata. (Msm. 35:18) Janah, cuba ukuri usihen Jesus. Paksa ia nguda denga pe, meriah kal iakapna reh ku rumah pertoton.​—Luk. 2:41-49.

24. Paksa perpulungen, kesempaten kai si lit bas kita?

²⁴ Paksa reh ku perpulungen, sicidahken kekelengenta man Jahwe bage pe sura-suranta guna mpegegehi teman sada kinitekenta. Sicidahken ka sura-suranta guna erlajar carana nggeluh selaku rayat Kinirajan Dibata erkiteken bas perpulungen ras i kebaktin me banci sidatken pelatihen e. Selain si e, bas perpulungen pe banci sidatken keterampilen ras gegeh si banci nampati kita gelah megenggeng i bas salah sada kegiaten si seh kal pentingna si ilakoken Kinirajan Dibata gundari, eme erbahan ajar-ajar Rajanta Jesus Kristus janah mereken pelatihen man kalak e. (Oge Matius 28:19, 20.) Sura-suranta guna ras-ras pulung ncidahken uga nyatana Kinirajan Dibata e man banta sekalak-sekalak. Mbera terus siergai perpulungenta!