Turang Senina Perberita Kinirajan si ikelengi kami,

BAYANGKEN kam sekalak anggota keluarga Betel Brooklyn i bas wari Jumat erpagi-pagi tanggal 2 Oktober 1914. Bagi biasana, kundul kam i kursindu guna sarapen, janahndu nimai turang senina C. T RusselI. Rempet talang pintun ruang man janah teridah me turang senina Russell. Ngadi ia kentisik, bagi biasana, janah alu meriah ukur iperkuankenna keluarga Betel, ”Mejuah-juah kerina.” Tapi kenca e, la ia minter kundul i kepala meja, ertepuk tan ia janah ipesehna momo si erbahan kalak jengang, ”Jaman Kalak Kafir nggo ngadi; dung me masa pemerentahen raja-raja kalak e!” Meriah kal ukurndu erkiteken nggo ndekah itimaindu! Radu ras kerina keluarga Betel, ialokenndu berita si meriah e alu ergiah-giah janah ndekah ertepuk tan.

 Enggo puluhen tahun dekahna kenca turang seninanta Russell erbahan pernyatan si meriah ukur e. Kai si ilakoken Kinirajan e jenari? Seh kal buena! Alu pengaturen Kinirajan, manjar-anjar imurniken janah ibereken Jahwe pelatihen man umatNa, si teremna ribun kalak ngenca bas tahun 1914 ngasa gundari lebih pitu setengah juta. Manfaat kai saja si idatkenndu i bas pelatihen e?

Gundari, rusur kal sibegi turang seninanta ngataken, ”Gereta surgawi Jahwe paksana erdalan!” janah e payo tuhu. Tapi, kenyatanna mulai tahun 1914, gereta surgawi e, si nggambarken bagin organisasi Jahwe si la teridah, seh kal meterna erdalan, bagi si idahndu kari adi iogendu buku enda alu megermet. Gelah berita si meriah banci seh ku belang-belang doni, perberita Kinirajan nggunaken erbage cara si mbaru. Misalna: koran, kesaksin alu plangkat, pertunjuken gambar, kartu kesaksin, fonograf, radio, bage pe Internet.

Erkiteken ipasu-pasu Jahwe pendahin enda, gundari banci siterbitken lektur Pustaka si Badia si menarik lebih i bas 670 cakap janah sibagiken man ise pe alu la mindo penggalaren. Kalak si nggit erkorban nampati pembangunen Bale Kinirajan, Bale Kebaktin, ras fasillitas cabang, i negeri si makmur bage pe negeri si terbatas sumber dayana. Janah, paksa lit mara, turang seninanta si perkeleng meter nampati kalak si lit bas daerah e. Enda mbuktiken maka kalak e tuhu-tuhu ”ikut i bas nggejapken kiniseran”.​—Kua. 17:17.

Maun-maun, peminpin agama ras kalak si nentang si deban ’pepinter-pinterna si la bujur’ guna erbahan kesusahen. Tapi kinitekenta ipegegehi alu mulih-ulih ngenehen maka upaya jahat kalak e malahen ”erbahanca reh mbarna berita si meriah e”.​—Msm. 94:20; Pil. 1:12.

Erdahin radu ras kam selaku ”juak-juak” enda sada kinihamaten. Keleng kal ate kami kam kerina. Mbera buku enda banci nampati kam gelah reh bagesna pengerganndu nandangi warisen rohani si idatkenndu.​—Mat. 24:45.

Salam kekelengen i bas kami nari,

Turang seninandu,

Badan Pinpinen Saksi-Saksi Jahwe