1. Kai si erbanca keluarga Adam ras Hawa la banci masuk ku Peken Eden, janah kai si niarapken Abil?

ITATAP Abil rarasen biri-birina si paksana nggagat alu tenang i rebe-reben sada uruk. Kenca e, banci saja itatapna ku sada ingan si ndauh janah idahna sinalsal terang. Ietehna maka lit i je sada pedang api si merara si la erngadi-ngadi erputar guna njagai dalan ku Peken Eden. I je me mbarenda orang tuana tading, tapi gundari kalak e ras anak-anakna la banci masuk. Cuba bayangkenndu angin si rembus bas ben wari ngembusken buk Abil asum itatapna langit janah ngukuri Si Nepa ia. Banci denga nge ipekena hubungen manusia ras Dibata si nggo ceda? E me si niarapken Abil.

2-4. Uga Abil ngerana man banta gundari enda?

² Gundari, ngerana Abil man bandu. Banci nge ibegindu? Banci saja enda la mungkin. Anak Adam si nomor dua enda nggo ndekah mate. Kulana pe nggo masap, nggo ersada ras abu menam 60 abad dekahna. Kerna kalak mate, Pustaka si Badia ngajarken kita, ”Kalak si enggo mate kai pe lanai itehna.” (Peng. 9:5, 10) La lit sada pe kata-kata Abil isuratken bas Pustaka. Emaka uga ia banci ngerana man banta?

³ Isuruh Dibata me rasul Paulus ngataken enda kerna Abil, ”Erkiteken tek maka ngerana denga ia genduari aminna pe ia enggo mate.” (Oge Heber 11:4.) Ertina, Abil ngerana arah kinitekenna. Abil me manusia si pemena si mpebelin sifat si mulia e. Paguh kal kinitekenna emaka usihenna terus nggeluh, janah banci siusih gundari. Adi sipelajari janah siusahaken ngusih kinitekenna, kisah Abil banci ngerana man banta alu jelas janah erguna.

⁴ Tapi, kai si banci sipelajari bas Abil nari bage pe kinitekenna padahal sitik kal ngenca ituriken kerna ia i bas Pustaka? Mari siperdiateken.

5. Kai maksud kata-kata Jesus maka Abil nggeluh paksa ”mula-mula tembe doni”? (Nehen ka cataten i teruh.)

⁵ Abil tubuh i bas pemena sejarah umat manusia. Pudi wari, ikataken Jesus maka Abil nggeluh paksa ”mula-mula tembe doni”. (Oge Lukas 11:50, 51.) Doni si imaksudken Jesus eme kerina kalak si banci itebus bas dosa nari. Amin gia Abil manusia si peempatken si lit i doni, banci jadi ia me manusia si pemena si menurut Dibata banci itebus. * Jelas me, lingkungen Abil ipebelin labo lingkungen si mehuli.

6. Kalak si uga kin orang tua Abil e?

⁶ Amin pe manusia lenga ndekah nggeluh, arus iadapina keadan si dem kiniseran. Mbelin kemungkinenna, orang tua Abil, Adam ras Hawa, merupa dingen mbestang dagingna. Tapi, gagal kalak enda i bas kegeluhen janah ietehna nge e. Mbarenda kalak enda sempurna, arapen kegeluhen si rasa lalap lit i lebe-lebena. Tapi, mberontak kalak enda man Dibata Jahwe janah ipelawes bas rumahna nari, Pardis i Peken Eden. Erkiteken sura-surana jadi si pentingna i babo kerinana, bage pe i babo keperlun kesusurenna, kalak enda lanai sempurna janah la ndatken kegeluhen si rasa lalap.—Kej. 2:15–3:24.

7, 8. Kai si ikataken Hawa sanga Kain tubuh, janah kai si banci saja turah i bas ukurna?

⁷ Kenca ipelawes bas Peken Eden nari, kegeluhen Adam ras  Hawa mesera. Tapi, paksa anakna si pemena tubuh, igelarina Kain, ntah pe ”Kai si Idatken”, janah ikataken Hawa, ”Arah penampat [Jahwe] enggo dat aku sada anak dilaki.” Arah kata-katana enda, teridah maka banci saja iinget Hawa janji Jahwe i Peken Eden, eme nubuat kerna sekalak diberu si mereken ’kesusuren’, si bas sada masa pagi ngkernepken si jahat si erbahan Adam ras Hawa papak. (Kej. 3:15; 4:1) Mungkin rukur Hawa maka ia me diberu i bas nubuat e janah Kain me ’kesusuren’ si ijanjiken.

⁸ Adi bage kin perukuren Hawa, ia tuhu-tuhu salah. Terlebih ka adi iajarken Adam ras Hawa man Kain maka ia me kesusuren e, kesombongen manusia si la sempurna reh belinna bas diri Kain. Kenca e, ipupus Hawa me anak si peduaken, tapi la lit ibelaskenna kata-kata pujin bagi si iberekenna man Kain. Igelari kalak enda ia Abil, si ertina ”Kelsehen”, ntah pe ”Kesia-sian”. (Kej. 4:2) Tuhu kin penggelaren e ncidahken maka Adam ras Hawa erpengakap pentingen Kain asangken Abil? Banci saja, tapi la sieteh pastina.

9. Kai si banci ipelajari orang tua si gundari arah orang tuanta si pemena nari?

⁹ Orang tua si gundari banci ndatken mbue pelajaren i bas orang tua si pemena e. Arah pengerana ras perbahanenndu, ajarindu nge anak-anakndu gelah sombong, meganjangsa sura-sura, janah mentingken bana? Ntah, iajarindu gelah ngkelengi Dibata Jahwe janah erbahan pertemanen ras Ia? Sayangna, orang tua si pemena e gagal ndalanken tanggung jabapna. Tapi, lit arapen man kesusurenna.

10, 11. Kai dahin Kain ras Abil, janah sifat kai si ipebelin Abil?

¹⁰ Asum reh belinna duana anak enda, banci saja iajari Adam kalak e erdahin gelah banci mereken keperlun keluargana. Kain ku juma, janah Abil jadi permakan.

¹¹ Tapi, Abil ngelakoken kai si ndauh pentingen. Ertahun-tahun dekahna, ipebelinna kinitekenna, sifat mehuli si bas pudi wari itulis Paulus. Cuba ukurindu! Paksa si e, la lit manusia si banci iusih Abil. Emaka, uga ia banci mpebelin kinitekenna man Dibata Jahwe? Ukuri telu palas si paguh si banci saja jadi dasar kinitekenna.

12, 13.Uga Abil mpebelin kiniteken alu mperdiateken tinepa Jahwe?

¹² Tinepa Jahwe. Payo, nggo isumpahi Jahwe taneh janah dungna turah me dukut-dukut erduri si erbanca mesera turah sinuan-sinuan. Tapi, tetap iasilken doni melala pangan, emaka Abil ras keluargana banci terus nggeluh. Janah, rubia-rubia la isumpahi termasuk perik-perik ras ikan; bage ka pe deleng, dano, lau anak,  ras lawit; ntah pe embun, langit, matawari, bulan, bage pe bintang. Ku japa pe itatap Abil, banci idahna bukti kekelengen, kepentaren, ras kiniulin si mbelin bas Dibata Jahwe nari, Dibata si nepa si nasa lit. (Oge Roma 1:20.) Pastilah, ngukuri kerina si e alu mbages ras dem pengergan, kiniteken Abil ipegegehi.

¹³ Pasti iban Abil waktuna guna ngukuri alu mbages kerna hal-hal rohani. Cuba bayangkenndu, paksana ia mpermakani rarasen biri-birina. Biasana, sekalak permakan arus mbue erdalan. Iarak-arakna rubia-rubia si melemuk e mentasi lingling, baluren, ngepari lau anak ntah pe ndarami dukut si meratah, ulu lau si malem, ras ingan cicio si amanna kal. I bas kerina tinepa Dibata si debanna, biri-biri me si melemukna, tempa-tempa itepa guna terus itegu-tegu janah ikawali manusia. Emaka, perlu nge iakap Abil ia itegu-tegu, ikawali, janah iperdiateken Dibata si ndauh pentaren ras gegehen asangken manusia? Pasti iturikenna si e kerina i bas pertotonna emaka kinitekenna terus reh belinna.

14, 15.Uga janji-janji Jahwe jadi hal si man ukuren Abil?

¹⁴ Janji-janji Jahwe. Pasti ituriken Adam ras Hawa man anak-anakna kerna peristiwa-peristiwa i Peken Eden si erbanca ia ipelawes je nari. Emaka, mbue kal si banci iukuri Abil.

¹⁵ Ikataken Jahwe maka isumpahi me taneh. Enda tuhu-tuhu terjadi paksa iidah Abil dukut-dukut erduri turah. Inubuatken Jahwe ka maka mesui akap Hawa sanga mehuli kulana bage pe sanga mupus. Paksa agi-agi Abil tubuh, pasti idahna maka kata-kata e pe igenepi. Inubuatken Jahwe ka maka metedeh kal ate Hawa nandangi kekelengen perbulangenna janah Adam pe ngkuasai ia. Kerina si terjadi e si erban ukur ceda iidah Abil sendiri. I bas kerina bagin, iidah Abil maka kata-kata Jahwe tuhu-tuhu banci iteki. Emaka lit alasen Abil si paguh guna tek nandangi janji Dibata kerna sada ’kesusuren’, si banci mpehuli kerina kesalahen si tangtangna lit i Peken Eden.—Kej. 3:15-19.

16, 17.Kai si banci saja ipelajari Abil bas kerubim-kerubim nari?

 ¹⁶ Juak-juak Jahwe. La lit iidah Abil usihen si mehuli i bas manusia nari, tapi labo manusia saja mahluk si pentar i doni paksa si e. Sanga Adam ras Hawa ipelawes bas Peken Eden nari, ipastiken Jahwe gelah kalak e ras kesusurenna la banci masuk ku Pardis e. Isuruh Jahwe me kerubim-kerubim eme malekat si seh kal ganjangna kedudukenna guna njaga pintun ku peken e, janah ibanNa i je pedang si merara si la erngadi-ngadi erputar.—Oge Kejadin 3:24.

¹⁷ Bayangken uga perasan Abil si kitik denga paksa ngidah kerubim-kerubim e. I bas bentuk jasmani, mbestang dagingna ncidahken gegeh si luar biasa. Janah megah akapna ngidah ”pedang” e, merara janah la erngadi-ngadi erputar. Asum Abil reh belinna, pernah nge idahna kerubim-kerubim e bosan nandangi dahinna janah itadingkenna ingan si arus ijagaina? Lang. Tande warina, tande tahunna, janah puluhen tahun dekahna, mahluk si pentar dingen megegeh e terus bas inganna erdahin. Emaka, iangkai Abil maka lit juak-juak Jahwe si setia dingen paguh. Arah kerubim e, banci idah Abil jenis kesetian ras kepatuhen man Jahwe si la iidahna bas keluargana sendiri. Usihen malekat-malekat e pasti mpegegehi kinitekenna.

18. Kai palas si paguh guna mbangun kinitekenta gundari?

¹⁸ Kenca ngukuri alu mbages kai si icidahken Jahwe kerna diriNa bas tinepaNa nari, janji-janjiNa, ras usihen malekat-malekatNa, pastilah kiniteken Abil reh paguhna. Usihen Abil tuhu-tuhu ngerana man banta. Khususna kaum muda, banci reh tekna ia maka banci ipebelinna kinitekenna bas pusuhna nari kempak  Dibata Jahwe amin gia keluargana la ndukung ia. Alu lit tinepa si seh kal luar biasana i sekelewetta ras Pustaka si lengkap, bage pe nterem usihen kiniteken, paguh palasta guna mbangun kiniteken gundari enda.

19. Bas pudi wari, kebenaren si mbages kai si iangkai Abil?

¹⁹ Asum reh belinna kiniteken Abil man Jahwe, merhat ia meteh uga carana ncidahken kiniteken e arah perbahanen. Tapi, kai si banci ibereken sekalak manusia man Si Nepa alam semesta? Tentu saja, Dibata la perlu pemere ntah pe penampat bas manusia nari. Bas pudi wari, iangkai Abil kebenaren si mbages enda: Adi iberena si mehulina man Jahwe alu tujun si benar, pasti meriah ukur Bapana si perkeleng e.

20, 21.Kai saja persembahen si ibereken Kain ras Abil, janah kai jabapen Jahwe?

²⁰ Ersikap Abil guna mpersembahken piga-piga biri-biri asuhenna. Ipilihna biri-biri si mehulina eme si pemenana tubuh, bage pe bagin-bagin si mehulina. Bage ka pe Kain, datna atena pasu-pasu ras ngena ate Dibata alu nikapken persembahen bas ulih jumana nari. Tapi, tujun Kain ras Abil la seri. Enda jelas teridah paksa kalak enda mpersembahken korban.

²¹ Banci saja duana anak Adam enda nggunaken batar-batar ras api guna persembahenna, janah mungkin iidah kerubim-kerubim si jadi wakil Jahwe i doni paksa si e. Ijabap Jahwe kalak e! Sioge, ”Ngenan ate [Jahwe] man Abil ras persembahenna.” (Kej. 4:4) La ituriken bas Pustaka uga cara Dibata ncidahken ngena ateNa e.

22, 23.Engkai maka ngena ate Jahwe persembahen Abil?

²² Engkai maka ngena ate Dibata persembahen Abil? Erkiteken korbanna e nge? Payo, Abil mpersembahken rubia-rubia, icurcurkenna darehna si seh kal mehergana. Ieteh Abil nge uga mehergana korban e pagi? Erabad-abad kenca jaman Abil, igunaken Dibata korban anak biri-biri si la lit cacatna guna nggambarken korban AnakNa sendiri si serta, ”Anak Biri-biri Dibata”, si darehna pe icurcurken me. (Joh. 1:29; Kel. 12:5-7) Tapi, pasti la melala si ieteh Abil kerna si e.

²³ Si pasti sieteh eme: Ipersembahken Abil kai si mehulina si lit bas ia. Janah, si ngena ate Jahwe labo persembahenna saja tapi jelmana pe. Abil ngelakoken e erkiteken kekelengen ras kinitekenna man Jahwe.

24. (a) Engkai maka persembahen Kain e labo salah? (b) I bas bidang kai Kain bali bagi jelma si gundari?

 ²⁴ La seri ras Abil, ”Kain ras persembahenna la ialoken [Jahwe]”. (Kej. 4:5) Situhuna persembahen Kain e labo salah, sabap bas pudi wari, Hukum Dibata ngijinken mpersembahken asil juma. (Im. 6:14, 15) Tapi, ikataken Pustaka maka ”kai si ibahan Kain salah”. (Oge 1 Johanes 3:12.) Bali bagi nterem jelma gundari enda, bias iakap Kain terjeng ncidahken kepatuhen man Dibata. Kinitekenna si la paguh ras kekelengen si la mbages man Jahwe minter teridah arah perbahanenna.

25, 26.Persinget kai si ibereken Jahwe man Kain, tapi kai si ilakoken Kain?

²⁵ Paksa ieteh Kain maka ia la ngena ate Jahwe, nggit nge ia erlajar i bas usihen Abil nari? Lang. Sebalikna, nembeh kal atena seninana e janah merawa kal ia. Si e iidah Jahwe bas pusuh Kain janah alu sabar isampatiNa ia gelah rukur. Ipersingeti Jahwe me Kain maka perbahanenna e banci dungna erbahan ia ngelakoken dosa si mekelek, janah ikatakenNa maka Kain banci ”ipeganjang” adi nggit ia mperobahi lagu langkahna.—Kej. 4:6, 7, Terjemahan Dunia Baru.

²⁶ La iperdiateken Kain persinget Dibata e. Iahkenna agina si polos e erdalan-dalan ku juma. I je, ipekpekna Abil janah ibunuhna. (Kej. 4:8) Banci ikataken maka Abil me korban penganiayan si pemena erkiteken agama, martir si pemena. Amin gia nggo mate, labo ia ilupaken Jahwe.

27. (a) Engkai maka banci kita tek Abil ipekeke pagi? (b) Uga carana gelah banci kita jumpa ras Abil bas sada masa pagi?

²⁷ Tempa-tempa dareh Abil serko man Dibata Jahwe mindo pembalasen ntah pe keadilen. Emaka, idalanken Dibata keadilen alu ngukum Kain erkiteken kejahatenna. (Kej. 4:9-12) Si pentingna, cataten kiniteken Abil ngerana man banta gundari. Masa kegeluhenna si kira-kira sada abad, termasuk gendek paksa si e, tapi tuhu-tuhu igunakenna alu mehuli. Amin gia ia mate, tapi ietehna maka keleng janah ngena ate Jahwe ia, Bapana si ni surga. (Heb. 11:4) Emaka, banci kita tek maka Abil nggo aman bas ingeten Jahwe si la lit batasna, nimai kinikeken guna nggeluh i doni pardis. (Joh. 5:28, 29) Nggit nge kam jumpa ras ia pagi? Banci kam jumpa adi iusahakenndu megiken Abil ngerana janah ngusih kinitekenna si luar biasa.