Kata Penaruh
”Nggeluhlah kam ngusih kalak si enggo tek dingen saber, gelah ialokenndu kai si enggo ipadanken Dibata.”—HEBER 6:12.
1, 2. Uga perukuren sekalak pertua keliling nandangi tokoh-tokoh Pustaka si erkiniteken, janah ngkai maka meriah ukurndu erteman ras kalak e?
”ITURIKENNA kerna tokoh-tokoh bas Pustaka si Badia, tempa-tempa nggo ndekah kal ia erteman.” Enda me si ikataken sekalak turang seninanta si diberu kenca begina khotbah bas pertua keliling nari si nggo metua. Enda la man kemamangen, erkiteken nggo ipelajarina janah nggo iajarkenna Pustaka puluhen tahun dekahna, dungna dilaki ras diberu si erkiniteken si lit bas Pustaka nggo bali bagi temanna kitik-kitik nari.
2 La kin meriah ukurndu adi banci erteman ras tokoh-tokoh Pustaka e? Menurutndu tuhu-tuhu nge kalak e lit? Bayangken uga perasanndu paksa erdalan janah ercakap-cakap ras kalak enda, nandai terbagesen dilaki ras diberu bagi Nuah, Abraham, Rut, Elia, ras Ester. Ukuri pengaruh si banci ibereken kalak e man bandu, bayangken kata-katana si mpegegehi ras mpebelin pusuhndu!—Oge Kuan-kuanen 13:20.
3. (a) Uga carana gelah banci erguna man banta sanga mpelajari dilaki ras diberu si erkiniteken bas Pustaka? (b) Penungkunen kai saja si man bahasenta?
3 Tentu saja, paksa terjadi ”kekeken . . . kalak si bujur”, pertemanen si meherga e tuhu-tuhu banci sigejapken. (Perb. 24:15) Tapi, gundari pe, banci ka lit gunana man banta adi sipelajari kerna dilaki ras diberu si erkiniteken si lit i bas Pustaka. Uga carana? Ibereken rasul Paulus jabapen si tepat enda, ”Nggeluhlah kam ngusih kalak si enggo tek dingen saber, gelah ialokenndu kai si enggo ipadanken Dibata.” (Heb. 6:12) Ope denga sipelajari kerna dilaki ras diberu si erkiniteken e, mari siperdiateken piga-piga penungkunen si turah erkiteken kata-kata Paulus ndai: Kai kin kiniteken e, janah ngkai maka siperluken? Uga banci siusih kalak si erkiniteken bas Pustaka?
Kai kin Kiniteken e janah Ngkai Siperluken?
4. Biasana menurut kalak, kai kiniteken e, janah ngkai maka e salah?
4 Kiniteken sada sifat si mehuli, si iergai dilaki ras diberu si nandangi sipelajari bas buku enda. Gundari, kurang denga iangkai kalak kai kin kiniteken e, iakapna kiniteken e ertina tek nandangi sada hal amin gia la jelas buktina. Tapi, kalak enda salah. Kiniteken la seri ras sifat si asal tek saja man kai pe janah kiniteken labo terjeng perasan; kiniteken situhu-tuhu labo terjeng tek saja. Sifat si bage bahaya. Perasan banci berubah, janah la bias terjeng tek saja maka Dibata e lit, perban begu-begu pe tek, mbiar dingen nggir-gir ia.—Jak. 2:19.
5, 6. (a) Kinitekenta tertuju kempak dua hal si la banci siidah. Kai saja e? (b) Sibar uga paguhna palas kinitekenta? Bahan anding-andingenna.
5 Kiniteken situhu-tuhu lebih asa si e. Ingetlah uga Pustaka ngertikenca, ”Kiniteken eme pengarapen si pasti nandangi kai si niarapken, bukti si jelas nandangi kai si pasti terjadi ras si lit amin gia la teridah.” (Heb. 11:1, Terjemahan Dunia Baru) Ikataken Paulus maka kiniteken tertuju kempak dua hal si la banci siidah. Si pemena, kiniteken tertuju kempak kai si tuhu-tuhu lit si ”la teridah”. La banci siidah alu matanta kai si tuhu-tuhu lit i surga, misalna Dibata Jahwe, AnakNa, ntah pe Kinirajan si gundari merentah i surga. Si peduaken, kiniteken tertuju kempak ”kai si niarapken”, eme erbage peristiwa si lenga terjadi. Payo, gundari lenga banci siidah doni si mbaru si kentisik nari ijadiken Kinirajan Dibata. Tapi, payo kin enda ertina maka arapen ras kinitekenta nandangi kai si tuhu-tuhu lit si la banci siidah la lit buktina?
6 Labo bage! Ijelasken Paulus maka kiniteken situhu-tuhu paguh palasna. Paksa ikatakenna kiniteken e ”pengarapen si pasti”, ipakena istilah si banci ka iterjemahken jadi ”surat hak milik”. Bayangken, lit sekalak jelma si mereken rumah man bandu. Banci jadi iberekenna surat hak milik rumah e man bandu janah nina, ”Enda rumahndu si mbaru.” Tentu saja, labo maksudna gelah kam tading bas kertas e, tapi surat si sah e jadi bukti si paguh secara hukum janah banci ikataken maka surat e eme rumah ndai. Bage ka pe, bukti kinitekenta banci terteki, seh kal paguhna, banci ipeseri ras kiniteken e sendiri.
7. Kai saja si termasuk kiniteken situhu-tuhu?
7 Emaka, kiniteken situhu-tuhu eme kiniteken si erpalasken bukti janah tuhu-tuhu tek man Dibata Jahwe. Kiniteken erbanca kita ngidah Dibata selaku Bapanta si perkeleng janah tek maka kerina janjiNa pasti terjadi. Tapi labo e saja. Bali bagi mahluk si nggeluh, kiniteken arus ibere man gelah terus nggeluh. Janah kiniteken arus icidahken alu perbahanen, adi lang, kiniteken e mate.—Jak. 2:26.
8. Engkai maka seh kal pentingna kiniteken e?
8 Engkai maka seh kal pentingna kiniteken e? Ibereken Paulus jabapen si jelas. (Oge Heber 11:6.) Adi la lit kiniteken, la kita banci ndeher ras Jahwe ntah pe erban meriah ukurNa. Emaka, seh kal perluna kiniteken e adi simuliaken ateta Jahwe janah rembak ateta ras Ia selaku Bapanta si ni surga. Enda me tujun si mulia kerina manusia.
9. Uga Jahwe ncidahken maka ietehNa perlu kita kiniteken?
9 Ieteh Jahwe maka perlu kal kita kiniteken, emaka isikapkenNa melala usihen man banta guna ngajari kita carana mbangun ras ncidahken kiniteken. Ipasu-pasuNa runggun Kristen alu mereken dilaki-dilaki si ndalanken kepeminpinen si banci jadi usihen. Nina Pustaka, ”Usihlah kinitekenna.” (Heb. 13:7) Janah, labo e saja si iberekenNa. Itulis Paulus kerna ’nterem saksi si ngkeleweti kita’, dilaki ras diberu bas jaman si nuria si nadingken usihen kiniteken si seh kal ulina. (Heb. 12:1) Cataten Paulus kerna kalak si erkiniteken, si isuratken bas Heber bindu 11, lenga bo kerinana. I bas halamen-halamen Pustaka, seh kal buena ituriken pengalamen kerna dilaki ras diberu, si metua ras si nguda, si rehna i bas erbage latar belakang nari. Enggo icidahken kalak enda kinitekenna janah mbue kal si banci iajarkenna man banta si nggeluh i tengah-tengah doni si la erkiniteken enda.
Cara Ngusih Kiniteken Kalak si Deban
10. Uga pelajaren pribadi nampati kita ngusih dilaki ras diberu si erkiniteken si lit bas Pustaka?
10 La banci tuhu-tuhu iusihndu sekalak jelma adi la kam rembak ras ia. Paksa iogendu buku enda, banci idahndu maka melala riset nggo ilakoken guna nampati kam gelah reh rembakna ras dilaki bage pe diberu si erkiniteken e. Uga adi banndu ka riset tambahen? Paksa kam erlajar pribadi, pereksandulah terbagesen Pustaka alu erbage alat risetndu. Paksa iukurindu alu mbages kai si ipelajarindu, cuba bayangkenndu ingan ras latar belakang kejadin e. Cuba nehenndu pemandangenna, begindu sorana, anggeh bauna, tempa-tempa lit kam i je. Si pentingna ka, cuba gejapkenndu perasan kalak si lit i je. Alu meteh kai si igejapken dilaki ras diberu si erkiniteken e, reh tangkasna janah reh rembakna kalak enda ras kam, piga-piga banci saja bagi nggo kitik-kitik nari kena erteman.
11, 12. (a) Uga carana gelah banci reh deherna akapndu ras Abram bage pe ras Sarai? (b) Alu cara uga usihen Hanna, Elia, ntah pe Samuel erguna man bandu?
11 Adi tuhu-tuhu itandaindu kalak e, turah me ukurndu ngusih ia. Misalna, bayangken sangana ipertimbangkenndu sada tugas si mbaru. Iundang organisasi Jahwe kam ningkatken pelayanen alu cara tertentu. Banci saja ipindokenna kam gelah pindah ku sada daerah si seh kal perluna perberita, ntah pe iundang kam guna ncubaken sada cara erberita si lenga pernah ilakokenndu ntah pe la cocok iakapndu. Paksa iukurindu tugas e janah itotokenndu, pasti tersampati kam alu ngukuri usihen Abram. Nggit ia ras Sarai nadingken ketenangen i Ur, janah ulihna, ipasu-pasu ia alu simpar. Alu ngusih kalak e, pasti igejapkenndu maka nggo reh bagesna itandaindu ia.
12 Bage ka pe, uga adi iperlakoken temanndu kam alu la mehuli si erbanca kitik ukurndu, janah lanai atendu reh ku perpulungen? Adi ukurindu alu mbages usihen Hanna ras carana ia ngadapi Penina si rate segat man bana, enda banci nampati kam erban keputusen si tepat janah banci ka erban reh rembakna siakap ras Hanna. Bage ka pe, adi kitik ukurndu erkiteken la meherga akapndu bandu, banci reh deherna akapndu ras Elia alu mpelajari kiniseranna ras cara Jahwe ngapuli ia. Janah, anak muda si ngadapi tekanen teman-teman si la mehuli i sekolahna banci reh deherna akapna ras Samuel kenca mpelajari uga ia ngadapi pengaruh si la mehuli bas anak-anak Eli nari i tabernakel.
13. Kurang meherga nge kinitekenta adi siusih kiniteken tokoh i bas Pustaka? Jelasken.
13 Kurang meherga nge iakap Jahwe kinitekenndu adi usihndu kiniteken tokoh-tokoh i bas Pustaka? Lang, labo bage! Ingetlah, Pustaka ngiahken kita guna ngusih kalak si erkiniteken. (1 Kor. 4:16; 11:1; 2 Tes. 3:7, 9) Terlebih ka, piga-piga kalak si man bahasenta kari i buku enda, ngusih kalak si erkiniteken si nggeluh sope ia. Misalna, bas Pasal 17 buku enda siidah i bas ranan Maria nari, maka banci saja ikutipna kata-kata Hanna. Enda ncidahken maka Hanna jadi usihen man Maria. Tuhu kin enda erbahan kiniteken Maria la bali paguhna ras kiniteken Hanna? Lang! Malahen, usihen Hanna nampati Maria mpegegehi kinitekenna gelah ngena ate Dibata Jahwe.
14, 15. Kai saja si istimewa i bas buku enda, janah uga carana gelah banci sidat gunana?
14 Buku enda ibahan guna nampati kam mpegegehi kinitekenndu. Pasal-pasal seterusna eme gabungen artikel-artikel i bas bagin ”Tirulah Iman Mereka” si iterbitken i Menara Pengawal antara tahun 2008 ras 2013. Tapi, piga-piga keterangen si mbaru nggo itambahken. Lit i je penungkunen-penungkunen guna nampati kita mbahas ras makeken pelajaren e. Melala gambar ras warna si jelas bas buku enda, janah gambar-gambar si nggo lit ipegalangi ras ipejile. Bagin-bagin si erguna si debanna, bagi garis waktu ras peta, nggo lit i je. Buku Usihlah Kiniteken Kalak Enda eme alat si ibahan guna pelajaren pribadi, keluarga, ras runggun. Keluarga-keluarga banci ka mpelajari buku enda ras-ras alu ersora ngogesa.
15 Mbera buku enda nampati kam ngusih kiniteken juak-juak Jahwe si setia bas masa si nuria. Janah, mbera enda erban reh paguhna kinitekenndu bage pe erban reh rembakna kam ras Bapanta si ni surga, Jahwe!
