1, 2. Turiken perdalanen Maria, janah ngkai perdalanen e la menukah man bana?

IPEKENA Maria perkundulna si kurang iakapna sikapna. Enggo erjam-jam dekahna ia kundul i datas kelede. Arah lebe, Jusup terus erdalan, napaki dalan si nuju ku Betlehem si ndauh. Sekali nari igejapken Maria kemuit anak si lit i bas bertinna.

² Menurut Pustaka si Badia, Maria nandangi mupus. (Luk. 2:5, 6) Asum kalak enda erdalan mentasi juma-juma, banci jadi piga-piga kalak si erdahin i je kemamangen ngidah kalak e, ngkai maka lit diberu si paksana mehuli kulana nggit erdalan ndauh. Kai si erbanca Maria nggit nadingken rumahna i Nasaret?

3. Tugas kai si ialoken Maria, janah kai si banci sipelajari i bas ia nari?

³ Bena-benana kerina enda eme erbulan-bulan ope si e, paksa ialoken Maria sada tugas si luar biasa si lenga pernah terjadi i bas sejarah manusia. Arus ipupusna anak si pagi jadi Mesias, Anak Dibata! (Luk. 1:35) Paksa nandangi seh waktuna mupus, lit perentah guna lawes ku Betlehem. I bas perdalanen, iadapi Maria erbage tantangen si nguji kinitekenna. Mari sinen kai si nampati ia tetap paguh secara rohani.

4, 5. (a) Engkai Jusup ras Maria lawes ku Betlehem? (b) Ketetapen Kaisar nggenepi nubuat si apai?

⁴ Labo Jusup ras Maria ngenca si ngelakoken perdalanen si bage. Iban Kaisar Agustus sada ketetapen gelah kerina kalak i bas negeri e mulih ku kuta kemulihenna guna ndaftarken diri. Uga tanggapen Jusup? Nina Pustaka, ”Jusup pe berkat i kuta Nasaret i Galilea nari ku kuta Betlehem i daerah Judea, kuta ketubuhen Raja Daud; sabab Jusup kesusuren Daud kap.”—Luk. 2:1-4.

⁵ Ketetapen si iban Kaisar paksa si e labo terjadi bage saja. Nubuat si isuratken kira-kira 700 tahun ope si e ngataken maka Mesias tubuh i Betlehem. Kepeken lit sada kuta gelarna Betlehem  si dauhna 11 kilometer ngenca Nasaret nari. Tapi nina nubuat e, i bas ”Betlehem i Eprata” nari me pagi reh Mesias. (Oge Miha 5:2.) Gelah seh ku kuta si kitik e, kalak Nasaret biasana mentasi Samaria, dauhna kira-kira 130 kilometer. Ku Betlehem enda me Jusup arus lawes, erkiteken i je me kuta kemulihen nini bulang keluarga Raja Daud, nini bulang Jusup ras Maria.

6, 7. (a) Engkai perdalanen ku Betlehem jadi sada tantangen man Maria? (b) Alu jadi ndehara Jusup, kai pengaruhna man keputusen Maria? (Nehen ka cataten i teruh.)

⁶ Nggit nge Maria ndukung keputusen Jusup guna matuhi ketetapen e? Perdalanen enda la menukah man bana. Paksa si e, banci saja mbaru denga mulai musim gugur, emaka banci saja rusur terjadi udan rintik-rintik nandangi pendungi musim perlego. Selain si e, Betlehem lit i bas ingan si meganjang, lebih 760 meter ganjangna. Enda sada perdalanen si nangkeng-nangkeng si nambahi beratna perdalanen kalak e. Perdalanen enda mungkin dekahen asangken biasana, erkiteken keadan Maria, arus rusur kalak e ngadi. Paksa si bage, pasti sekalak diberu si nguda denga padin iakapna tading i rumah, ingan keluarga ras teman-teman si katawari pe banci nampati ia adi mulai igejapkenna mesui. Pastilah Maria arus pang guna ngelakoken perdalanen enda.

 ⁷ Aminna pe bage, isuratken Lukas maka Jusup lawes ”guna ndaftarken diri ras Maria”. Isuratkenna ka maka Maria ”nggo jadi ndehara [Jusup]”. (Luk. 2:4, 5, Terjemahan Dunia Baru) Alu jadi ndehara Jusup lanai banci Maria erbahan keputusen sisada. I bas hal-hal rohani, Jusup lalap ibanna si muat keputusen, ialokenna tanggung jabap si ibereken Dibata selaku si nampati perbulangenna alu ndukung keputusen Jusup. * Emaka, iadapina tantangen kiniteken enda alu dem kepatuhen.

8. (a) Kai deba nari si mungkin erbanca Maria nggit lawes ras Jusup ku Betlehem? (b) I bas kai Maria jadi usihen kerina kalak si setia?

⁸ Kai deba nari si erbanca Maria patuh? Ietehna nge nubuat kerna Betlehem si pagi jadi ingan Mesias tubuh? La ituriken Pustaka. Tapi, la banci sikataken maka la ieteh Maria, erkiteken peminpin agama ras jelma si nterem meteh kerna si e. (Mat. 2:1-7; Joh. 7:40-42) Mbages kal pemeteh Maria kerna Kata Dibata. (Luk. 1:46-55) Kai pe alasenna maka iputusken Maria ikut, ntah e erkiteken matuhi perbulangenna, erkiteken ketetapen pemerentah, nubuat Jahwe, ntah erkiteken gabungen kerina alasen e  ndai, ia jadi usihen si seh kal ulina. Iergai Jahwe kal dilaki ras diberu si patuh ras meteruk ukur. Gundari, kepatuhen sada sifat si megati isepeleken kalak, tapi Maria jadi usihen kerina kalak si setia.

9, 10. (a) Kai si banci saja iinget Maria ras Jusup asum reh deherna ku Betlehem? (b) Engkai maka sempat Jusup ras Maria erberngi i karang asuh-asuhen?

⁹ Pasti meriah ukur Maria sanga mulai idahna Betlehem dauh nari. Asum kalak e erdalan nangkeng, mentasi peken seton eme sinuan-sinuan si perpudina iperani, banci saja iinget Maria ras Jusup sejarah kuta si kitik enda. Kuta enda me si kitikna i bas kerina kuta-kuta Juda, bali bagi si ikataken nabi Miha; tapi i je me Boas, Naomi, ras Daud tubuh, kerinana lebih seribu tahun ope si e.

¹⁰ Idapeti Maria ras Jusup kuta e nggo seh kal picetna. Kalak si atena ndaftarken diri nggo seh leben, alu bage lanai lit ingan kalak e erberngi. * Lanai lit pilihen man kalak e selain erberngi i bas karang asuh-asuhen. Banci sibayangken uga mekuahna ate Jusup ngidah ndeharana si menam lanai ngasup nahanken suina. I bas ingan si bage me, igejapkenna suina si lanai teralang.

11. (a) Engkai maka banci iangkai kerina diberu kai si igejapken Maria? (b) I bas kai saja Jesus ’anak sintua’?

¹¹ Banci iangkai kerina diberu kai si igejapken Maria. Kira-kira 4.000 tahun ope si e, nggo inubuatken Jahwe maka akibat dosa warisen eme mesui iakap diberu mupus. (Kej. 3:16) Mbelin kemungkinenna, Maria pe ngenanamisa. Alu bijaksana la ituriken Lukas kerna si e, tapi nina, ”Ipupusna me anakna sintua dilaki.” (Luk. 2:7) Ue, ”anakna sintua” nggo tubuh, sintua arah kerina anak Maria, silang-langna lit pitu kalak. (Mrk. 6:3) Tapi, si enda beda. Anak enda labo saja anak Maria sintua, tapi sintua arah kerina si nasa lit si nggo itepa Jahwe, ia Anak Dibata si tonggal!—Kol. 1:15.

12. I ja Maria mpepedem anakna, janah uga keadan situhuna la seri ras si lit bas drama, lukisen, bage pe latar adegan Natal?

¹² Paksa si e me itambahken cataten e keterangen si terberita enda, ”Ibalutina alu ampan janah ipepedemna i bas pelangkah.” (Luk. 2:7) Drama, lukisen, ras latar adegan Natal i belang-belang doni mereken gambaren si la masuk akal kerna keadan  enda. Tapi, perdiateken uga situhuna. Pelangkah eme ingan asuh-asuhen man. Keluarga enda erberngi i bas karang, ingan si la bersih ntah pe la sehat. Situhuna, la lit orang tua si ersura-sura gelah anakna tubuh i bas ingan si bage kecuali adi la lit pilihen. Biasana, orang tua mereken si mehulina atena man anakna. Terlebih ka Maria ras Jusup, atena mereken si mehulina man Anak Dibata!

13. (a) Alu cara kai Jusup ras Maria mereken si mehulina man anakna? (b) Uga orang tua si bijaksana gundari mpelebe hal rohani bagi Jusup ras Maria?

¹³ Tapi, situasi enda la erban kitik ukur kalak e; iusahakenna asa ngasupna mereken si mehulina. Contohna, perdiateken maka iurus Maria anakna e, ibalutina alu ampan, kenca si e alu manjar-anjar ipepedemna i bas pelangkah, ipastikenna ia aman janah la bergehen. Aminna pe aru atena ngidah keadanna paksa si e, tetap iusahakenna mereken si mehulina man anakna. Ietehna ka ras Jusup maka ncukupi keperlun rohani anak enda sada hal si pentingna si banci ilakokenna. (Oge Ulangen 6:6-8.) Gundari, orang tua si bijaksana pe mpelebe hal rohani asum mpebelin anakna i bas doni si la ermediate nandangi hal rohani.

14, 15. (a) Engkai maka mis permakan-permakan reh ndahi bayi e? (b) Kai si ilakoken permakan kenca reh ku karang asuh-asuhen e?

¹⁴ Rempet lit si ngganggu ketenangen i bas keluarga e. Permakan-permakan mis masuk ku karang, merhat kal ngidah keluarga e, khususna anak bayi e. Alu ergiah-giah nuri-nuri kalak enda, teridah kal keriahen ukur i bas ayona. Ia reh i bas mbalmbal nari, inganna ngiani asuh-asuhenna. * Ituriken kalak e kerna pengalamenna si luar biasa si mbaru denga ialamina man Jusup ras Maria si paksana kemamangen. I bas tengah berngi i mbalmbal, rempet reh sada malekat ndahi kalak enda. Ersinalsal kemulian Jahwe i sekelewet kalak e, janah ipebetehken malekat e maka Kristus, ntah pe Mesias, mbaru denga tubuh i Betlehem. Idapeti kalak e kari anak e medem i bas pelangkah, ibaluti alu ampan. Kenca si e, terjadi sada hal si seh kal luar biasana eme teridah ribun malekat ngendeken enden kemulian man Jahwe!—Luk. 2:8-14.

 ¹⁵ La ateta mamang maka dilaki-dilaki si meteruk rukur enda mis reh ku Betlehem! Pasti jengang ia ngidah bayi si mbaru denga tubuh e medem i je pas bagi si ituriken malekat. La i bas ia ngenca ngadi berita si meriah enda. ”Iturikenna man Jusup ras Maria kai si enggo ikataken . . . Jenari iturikenna pe man kalak si deban, janah kemamangen kerina kalak si megi berita si ikataken permakan e.” (Luk. 2:17, 18) Paksa si e, megombang kal peminpin agama man permakan. Amin pe bage, iergai Jahwe kal dilaki-dilaki si meteruk rukur ras si erkiniteken enda. Tapi, kai pengaruh kerehen kalak enda man Maria?

16. Uga Maria ncidahken maka pasti iukurina kerina si ibegina, janah kai kunci utama kinitekenna?

¹⁶ Pasti mbue keri tenaga Maria sanga mupus anak e. Tapi ibegikenna kerina ranan e alu megermet. Labo e saja, ”rukur Maria kerna erti kata e janah ibunikenna i bas ukurna”. (Luk. 2:19) Pasti iukuri diberu si nguda denga enda kerina si ibegina. Ietehna maka penting kal kai si ikataken malekat enda. Dibatana, Jahwe, ersura-sura gelah ietehna janah iangkaina ise kin situhuna anakna e. Emaka, ia labo terjeng megi saja. Ibunikenna ranan e i bas pusuhna gelah banci iukurina ka kari i bas wari-wari si reh. Enda me kunci utama kiniteken si icidahken Maria segedang geluhna.—Oge Heber 11:1.

17. Uga kita banci ngusih Maria kerna kebenaren rohani?

¹⁷ Nggit nge kam ngusih Maria? Enggo itama Jahwe kebenaren rohani si seh kal pentingna i bas Pustaka. Tapi, adi erguna ateta e man banta, si pemena arus sibere ukurta man kebenaren e. Enda silakoken alu ngoge Pustaka tep-tep wari, labo terjeng sada karya sastra tapi Kata i bas Dibata nari. (2 Tim. 3:16) Kenca si e, bagi Maria, perlu sibuniken Kata Dibata i bas pusuhta, siukuri alu mbages. Adi siukuri kai si nggo sioge i bas Pustaka janah terus siukuri uga carana makeken pedah Jahwe, kinitekenta banci reh paguhna.

18. (a) Uga Maria ras Jusup matuhi Undang-Undang Musa sanga Jesus bayi denga? (b) Kai si teridah kerna keadan ekonomi Jusup ras Maria arah persembahen si iberekenna i bas rumah pertoton?

¹⁸ I bas wari pewaluhken, isunat Maria ras Jusup bayina e  sentudu ras Undang-Undang Musa, janah ibanna gelarna Jesus bagi si iperentahken. (Luk. 1:31) Kenca si e, i bas wari si peempatpuluhken, ibabana ia Betlehem nari ku rumah pertoton i Jerusalem, si dauhna kira-kira 10 kilometer, janah ipersembahkenna korban pembersihen bagi si itentuken Undang-Undang man kalak musil eme dua ndukur ntah pe dua nderapati. Bicara mela pe iakap Jusup ras Maria erkiteken la ia ngasup mpersembahken biri-biri ras sada ndukur bagi orang tua si debanna, iusahakenna ngelawan perasan si bage. Si pentingna, ipegegehi kal kalak e alu reh ku je.—Luk. 2:21-24.

19. (a) Kai saja kata-kata Simeon si ibuniken Maria i bas pusuhna? (b) Uga tanggapen Hanna kenca idahna Jesus?

¹⁹ Sekalak dilaki si nggo metua si gelarna Simeon ndeheri kalak e, janah ipesehna terbuen kata-kata guna ibuniken Maria i bas pusuhna. Idat dilaki enda sada janji maka ope denga ia mate, idahna pagi Mesias, janah kesah si badia si ngataken man bana maka anak e me Juru Selamat si inubuatken. Ikataken Simeon ka maka i bas sada paksa pagi pasti Maria erceda ate, tempa-tempa itebakken pedang ku pusuhna. (Luk. 2:25-35) Aminna pe lit iturikenna kerna kai si la mehuli, kata-katana e banci jadi nggo nampati Maria megenggeng paksa terjadi keadan e, telu puluh tahun kenca si e. Kenca Simeon, sekalak nabi si  diberu si gelarna Hanna, ngidah Jesus si kitik denga janah mulai icakapkenna kerna ia man kerina kalak si nggo ndekah nimai pembebasen Jerusalem.—Oge Lukas 2:36-38.

20. Engkai keputusen Jusup ras Maria maba Jesus ku rumah pertoton terbukti sada keputusen si mehuli?

²⁰ Tuhu-tuhu mehuli kal keputusen Jusup ras Maria erkiteken ibabana anakna ku rumah pertoton Jahwe i Jerusalem! Alu bage, ipetandakenna man anakna e sada kebiasan si arus terus ilakoken eme alu setia reh ku rumah pertoton. I je, iberekenna si mehulina man Jahwe sue ras kiningasupenna janah ialokenna petunjuk ras penampat secara rohani. Pasti itadingken Maria rumah pertoton alu kiniteken si reh paguhna, pusuh si dem alu kebenaren rohani guna iukuri ras ituriken man kalak si deban.

21. Bagi Maria, uga banci sipastiken gelah kinitekenta reh paguhna?

²¹ Meriah kal ukurta ngidah orang tua si gundari ngusih kalak enda. I bas Saksi-Saksi Jahwe, orang tua alu setia maba anakna ku perpulungen. Iusahaken orang tua e asa ngasupna i bas eribadat, mere kata-kata pergegeh man turang senina. Janah, mulih kalak e alu tekad si reh paguhna, pusuh si reh riahna, janah reh buena hal si mehuli guna ituriken man kalak si deban. Meriah kal banci pulung ras kalak e! Asum silakoken e, kinitekenta banci reh paguhna, bagi kiniteken Maria.