1. Turiken uga ceda ate Marta ras kai sabapna.

TERINGET denga Marta nandangi kuburen turangna, sada gua si itutupi alu batu si galang. Seh kal cedana atena. Lenga ia tek maka Lasarus si ikelengina nggo lanai lit. Ndekah kal iakap Marta si empat wari kenca Lasarus mate e, wari-wari si dem alu ate ceda janah nterem kalak reh guna mereken pengapul.

2, 3. (a) Uga tanggapen Marta kenca idahna Jesus? (b) Kata-kata penting si ibelasken Marta ncidahken kai kerna dirina?

² Janah gundari, tedis i lebe-lebe Marta sekalak dilaki si seh kal pentingna man Lasarus. Ngidah Jesus, reh kelekna ceda ate Marta, sabap situhuna Jesus me si ngasup nelamatken turangna. Aminna pe bage, terapuli kal ukur Marta paksa jumpa ia ras Jesus i teruh sada uruk i deher kota Betani. Kentisik denga pe jumpa ras Jesus, mis igejapkenna uga liasna Jesus e si teridah arah pengenen matana ras sifatna si ermediate si mpepalem pusuh. Jesus mereken piga-piga penungkunen si nampati Marta nginget mulihi kerna kiniteken ras arapenna nandangi kinikeken. Bas percakapen e, ibelasken Marta kata-kata si seh kal pentingna enda, ”Tek aku maka kam Anak Dibata, Si Engkelini si ipadanken Dibata enggo reh ku doni enda.”—Joh. 11:27.

³ Arah kata-kata enda teridah me maka Marta sekalak diberu si mbelin kal kinitekenna. Sitik ngenca cataten Pustaka si Badia kerna dirina, tapi sidatken melala pelajaren si banci mpegegehi kinitekenta. Emaka, mari siperdiateken cerita si pemena kerna Marta i bas Pustaka.

4. I bas kai keluarga Marta unik, janah uga hubungen keluarga e ras Jesus?

⁴ Piga-piga bulan sope si e, Lasarus nggeluh denga janah sehat. Jesus Kristus, tamu si seh kal pentingna nandangi reh ku rumahna i Betani. Lasarus, Marta, ras Maria sada keluarga si unik, telu kalak si nggo dewasa tading i bas sada rumah. Menurut  piga-piga peneliti, banci saja Marta anak sintua, sabap teridah tempa-tempa ia si mada rumah janah piga-piga kali gelarna leben isuratken. (Joh. 11:5) La sieteh kerna lit ntah lang i bas kalak enda teluna si pernah erjabu. Si pasti, kalak enda jadi teman Jesus. Sedekah Jesus ngelayani i Judea, i ja iadapina melala perlawanen ras permusuhen, Jesus tading i rumah kalak enda. Pasti iergai Jesus kal ingan singgah si tenang e.

5, 6. (a) Engkai maka sibuk kal Marta paksa Jesus reh? (b) Uga tanggapen Maria kerna kesempaten si lit sanga Jesus reh ku rumahna?

⁵ Tuhu-tuhu iusahaken Marta gelah meriah ukur tamuna tading i rumahna. Selaku diberu si mejingkat erdahin, ia lalap teridah sibuk ndahiken erbage hal. Bage pe i bas ngalo-ngalo kerehen Jesus sekali enda. Mis isikapkenna acara man-man si istimewa alu erbage-bage pangan man tamuna si penting e, janah banci saja man piga-piga temanna ka. Bas masa si e, sifat nggit ngalo-ngalo tamu seh kal pentingna. Paksa reh sekalak tamu, ialo-alo me ia alu iema, ibuka sepatuna, iburihi nahena, janah iminaki takalna alu minak si merim. (Oge Lukas 7:44-47.) Ingan medem ras panganna isikapken alu cara si mehulina.

⁶ Melala si arus idahiken Marta ras Maria guna ngalo-ngalo tamuna e. Maria, si biasana ianggap lebih ermediate ras serius, tentu nggo nampati Marta. Tapi, seh kenca Jesus, keadanna pe berubah. Idah Jesus maka kerehenna e sada kesempaten guna mereken pengajaren, janah e me si ilakokenna. La bagi peminpin agama paksa si e, iergai Jesus diberu-diberu janah meriah ukurna ngajari kalak e kerna Kinirajan Dibata si jadi tema pelayanenna. Maria, si meherga kal akapna kesempaten enda, kundul i deher nahe Jesus megiken pengajarenna.

7, 8. Engkai maka mulai nembeh ate Marta, janah dungna kai si ibelaskenna?

⁷ Banci siukuri maka nggo mulai nembeh ate Marta. Nginget kerina pangan si arus isikapkenna janah erbage hal si arus idahiken guna tamu-tamuna, reh gulutna ukurna janah perhatinna pe terbagi. Marta pe kuskas ku jah-ku je janah itatapna Maria si kundul-kundul saja la nampati ia. Icidahkenna nge kelasenangenna, mungkin alu gedang erkumesah ntah berjut banna ayona? La ateta mamang adi berjut ia. Ja nge banci idahikenna e sisada!

⁸ Dungna, lanai Marta tahan. Ipotongna kata-kata Jesus ras icidahkenna maka la ia senang, ”O Tuan, la iperdiatekenndu ipeturut seninangku aku sisada ndahiken kerina dahin e? Suruh min ia nampati aku!” (Luk. 10:40) Kata-kata enda cukup keras.  Menurut piga-piga terjemahen, bagenda me penungkunen Marta, ”O Tuan, la kin kutera pe ukurndu . . . ?” Kenca e ipindona Jesus mpersingeti Maria, ras nuruh ia erdahin mulihi.

9, 10. (a) Uga jabapen Jesus man Marta? (b) Uga banci sieteh maka labo sepele iakap Jesus kerja keras Marta?

⁹ Jabapen Jesus banci saja erban Marta sengget, bage pe nterem kalak si ngoge Pustaka. Alu lembut ijabap Jesus, ”O Marta, Marta! Suhsah dingen gulut ukurndu sabap melala atendu ibahanndu, tapi sada ngenca si la banci lang. Enggo ipilih si Maria si mehuli e janah lanai banci ibuat i bas ia nari.” (Luk. 10:41, 42) Kai maksud Jesus? Iakapna nge maka pentingen bas Marta hal-hal materi asangken Dibata? Sepele nge Jesus nandangi kerja keras Marta nikapken erbage pangan si ntabeh?

¹⁰ Lang. Iangkai Jesus maka bujur kal ukur Marta ras perkeleng kal ia. Selain si e, labo mis iakapna maka salah naring acara man-man e. Piga-piga waktu sope si e, Jesus reh ku ”kerja man-man si mbelin” si isikapken Matius man bana. (Luk. 5:29) Persoalenna i jenda labo acara man-man si isikapken Marta, tapi kerna kai si pentingna iakap Marta. Erkiteken nikapken melala pangan saja ngenca si lit i bas ukurna, dungna lanai ingetna kai si pentingna. Kai kin e?

11, 12. Uga Jesus mpersingeti Marta alu lembut?

¹¹ Jesus, Anak Dibata Jahwe si tonggal, reh ku rumah Marta guna ngajarken kebenaren. La lit si pentingen asangken si e, termasuk pangan si ntabeh ras kerina persikapenna. Pasti ceda kal ukur Jesus erkiteken Marta la daten kesempaten si jarang enda guna mpegegehi kinitekenna, tapi e pilihen Marta janah la ipersoalken Jesus. * Tapi, la banci ipindoken Marta gelah Jesus maksa Maria, si erbanca Maria pe la daten kesempaten e.

¹² Emaka, ipersingeti Jesus me Marta alu lembut. Ipetenangna Marta alu ngelebuh gelarna dua kali, janah banna iangkai Marta maka la perlu ’susah dingen gulut ukurna’ kerna melala hal. Sada ntah dua erbage pangan saja pe nggo bias, terlebih mbue ka nge pangan  rohani i je. Emaka, ja nge mungkin ibuat Jesus ”si mehuli” si nggo ipilih Maria eme erlajar i bas Jesus nari!

13. Kai pelajaren si banci sidat i bas kata-kata Jesus man Marta?

¹³ Kejadin bas rumah Marta enda mereken melala pelajaren man pengikut Kristus gundari. Ula sipediat kai pe pentingen asangken ”keperlun rohani” bas geluhta. (Mat. 5:3, Terjemahan Dunia Baru) Payo, merhat kita ngusih Marta si melumbar dingen mejingkat, tapi la kita nggit ’susah dingen gulut ukurta’ nandangi hal-hal si la pentingsa i bas ngalo-ngalo tamu, si erbanca kita lanai daten kai si pentingna. I bas pergaulen ras teman-teman sada kiniteken, si pentingna labo pangan ntah inemen, tapi radu mpegegehi kiniteken ras mbagiken pemere  rohani. (Oge Roma 1:11, 12.) Acara si bagenda banci ilakoken aminna pe idangenna sederhana.

14. Engkai banci kita tek maka Marta mereken usihen si mehuli i bas ngaloken persinget?

¹⁴ Nggit nge Marta ngaloken persinget Jesus ras erban perubahen? La perlu tersungkun-sungkun ukurta. Ibenaken rasul Johanes catatenna kerna turang Marta alu nuratken, ”Si Marta, Maria ras Lasarus keleng kal ate Jesus.” (Joh. 11:5) Piga-piga bulan nggo lepas kenca Jesus reh ku Betani bagi si nggo ituriken ndai. Jelas me, la kitik ukur Marta nandangi persinget Jesus si perkeleng. Tuhu-tuhu kal iukurina persinget e. I bas si e pe, Marta mereken usihen kiniteken si mehuli man banta, sabap mawen-mawen kita kerina perlu persinget si lembut.

15, 16. (a) Kai si ilakoken Marta paksa turangna sakit? (b) Engkai maka bene arapen Marta ras Maria?

¹⁵ Paksa turangna sakit, sibuk kal Marta ngurus ia. Kai pe ilakokenna gelah tenang ras lampas malem turangna e. Amin gia bage, penakit Lasarus reh kelekna. Sedekah ia sakit, dua turangna enda la sitik pe nadingken ia guna ngerawatsa. Tentu rusur itatap Marta turangna si nggo mbulan dingen kote enda, janahna nginget masa senang ras susah si nggo idalanina teluna.

¹⁶ Paksa iakap kalak e Lasarus lanai tertambari, Marta ras Maria ngirimken berita man Jesus. Jesus sangana erberita i bas kuta si dauhna dua wari perdalanen. Enda ngenca beritana, ”O Tuan temanndu si ikelengindu paksana sakit.” (Joh. 11:1, 3) Ieteh kalak e maka keleng ate Jesus turangna, janah tek ia maka ilakoken Jesus nge asa gegehna guna nampati temanna. Iarapken kalak e nge Jesus meter reh, sope terlambat? Adi bage, bene me arapen kalak e. Lasarus mate.

17. Kai si erbanca mamang ate Marta, janah uga tanggapenna paksa Jesus nandangi seh i kuta Betani?

¹⁷ Marta ras Maria erceda ate, isikapkenna penguburen turangna janah nterem si reh Betani nari bage pe kuta sekelewetna. Lalap lenga lit berita bas Jesus nari. Reh dekahna reh mamangna ate Marta. Dungna, empat wari kenca Lasarus mate, ibegi Marta maka Jesus nandangi seh i kuta Betani. Selaku diberu si ermediate ras mejingkat, amin gia rate ceda, mis berkat Marta njumpai Jesus alu la ipebetehkenna man Maria.—Oge Johanes 11:18-20.

18, 19. Arapen kai si ituriken Marta, janah ngkai kinitekenna luar biasa?

 ¹⁸ Sanga jumpa ras Tuanna, ituriken Marta kai si lit i bas ukurna bage pe Maria piga-piga wari enda, ”O Tuan, bicara i jenda min ndai kam, labo mate turangku e!” Tapi, lit denga kiniteken ras pengarapen Marta. Nina ka ngaloi, ”Tapi amin bage gia, tek nge aku maka kai pe ipindondu genduari man Dibata iberekenNa nge.” Mis ikataken Jesus kai si mpegegehi kinitekenna, ”Nggeluh nge turangndu mulihken.”—Joh. 11:21-23.

¹⁹ Marta erpengakap maka Jesus ngerana kerna kinikeken i bas wari si pepagi, emaka ngaloi Marta, ”Kueteh nge maka i bas wari pendungi pagi keke nge ia i bas si mate nari.” (Joh. 11:24) Kiniteken Marta nandangi kinikeken luar biasa kal. Piga-piga peminpin agama Jahudi, si igelari kalak Saduki, la tek kinikeken e lit, amin gia kerna si e iajarken alu jelas i bas Pustaka. (Dan. 12:13; Mrk. 12:18) Tapi, ieteh Marta maka iajarken Jesus arapen  kinikeken, janah terlebih ka nggo ipekekena piga-piga kalak, amin gia la lit i bas kalak e si nggo mate piga-piga wari bagi Lasarus. La ietehna kai si nandangi terjadi.

20. Jelasken erti kata-kata Jesus si la terlupaken si icatat i bas Johanes 11:25-27 ras erti jabapen Marta.

²⁰ Kenca si e, ibelasken Jesus kata-kata si la terlupaken enda, ”Aku kap si mereken kegeluhen ras mpekeke kalak mate.” Payo, Dibata Jahwe nggo mereken kuasa man AnakNa guna mpekeke kalak si nggo mate i sebelang doni bas wari si pepagi. Jesus nungkun man Marta, ”Tek kam katangku e?” Ijabap Marta me alu kata-kata si ituriken i bas pemena pasal enda. Tek ia maka Jesus me Kristus, ntah pe Mesias, Anak Dibata Jahwe, janah kerna kerehenna ku doni enda nggo inubuatken nabi-nabi.—Joh. 5:28, 29; oge Johanes 11:25-27.

21, 22. (a) Uga Jesus ncidahken perasanna kempak kalak si rate ceda? (b) Turiken alu tangkas kerna kinikeken Lasarus.

²¹ Meherga nge iakap Dibata Jahwe ras AnakNa, Jesus Kristus, kiniteken si bali bagi kiniteken Marta? Jabapenna jelas arah kejadin-kejadin si idah Marta seterusna. Mis idahina Maria. Kenca si e, idah Marta maka megogo kal ate Jesus sanga ngerana ras Maria bage pe man kerina kalak si reh. Idahna ka Jesus tangis erkiteken seh kal cedana atena kerna kematen. Ibegina maka iperentahken Jesus gelah batu si nutupi kuburen Lasarus igulingken.—Joh. 11:28-39.

²² Perban la iakap Marta masuk akal, keberaten ia, sabap mayat e nggo mbau, nggo empat wari. Ipersingeti Jesus ka Marta, ”Ma enggo ndai kukataken man bandu maka adi tek kam idahndu nge kuasa Dibata?” Tek Marta, janah tuhu-tuhu idahna kuasa Dibata Jahwe. Mis paksa si e, i lebe-lebe kuburen e, ibere Jahwe kuasa man AnakNa guna mpekeke Lasarus! Ukuri kejadin-kejadin si pasti lalap lit bas ingeten Marta segedang geluhna: Sora Jesus ngelebuh turangna, ”O Lasarus, mari ndaratken!”; terbegi Lasarus keke ras erdalan alu manjar-anjar ku babah gua, alu dagingna si ibaluti uis mbentar denga; janah perentah Jesus, ”Tangtangi balutna e, jenari pelepas ia lawes”; ras tentuna ka, paksa Marta ras Maria kiam ndakep turangna e alu ermeriah ukur. (Oge Johanes 11:40-44.) Malem me dungna pusuh Marta si getem ndai!

23. Jahwe ras Jesus ersura-sura mereken kai man bandu, janah kai si perlu ilakokenndu?

²³ Kisah enda ncidahken maka kinikeken kalak mate labo terjeng turi-turin saja, tapi sada ajaren Pustaka si mpebelin  pusuhta, si tuhu-tuhu pernah terjadi. (Jop 14:14, 15) Meriah ukur Jahwe ras AnakNa mereken pasu-pasu man kalak si tek, bagi si nggo ialoken Marta, Maria, ras Lasarus. Man bandu pe, Jahwe ras Jesus ersura-sura mereken pasu-pasu si bage adi ipegegehindu kinitekenndu.

24. Kai si terakhir ituriken Pustaka kerna Marta?

²⁴ Sekali nari ngenca Pustaka nuriken kerna Marta, eme i bas pemena minggu pendungi kegeluhen Jesus i doni. Perban ietehna kiniseran si nandangi ialamina, ipilih Jesus sekali nari rumah Marta si tenang i Betani guna inganna tading. I je nari, telu kilometer ngenca dauhna erdalan ku Jerusalem. Jesus ras Lasarus sangana iundang man i rumah Simon si pernah gadamen, janah paksa e me terakhir ituriken kerna Marta, ’kuskas Marta ngelai’.—Joh. 12:2.

25. Engkai runggun Kristen gundari ipasu-pasu erkiteken lit i je diberu-diberu si bagi Marta?

²⁵ Tuhu-tuhu ia diberu si mejingkat! Tangtangna ituriken i bas Pustaka, ia sangana erdahin; janah sanga terakhir ituriken, ia pe sangana erdahin, asa bancina isikapkenna keperlun nterem kalak i sekelewetna. Gundari enda, runggun Kristen ipasu-pasu erkiteken lit i je diberu-diberu si bagi Marta, si megenggeng ras melumbar. Kalak enda terus ncidahken kinitekenna alu ergiah-giah erdahin guna Jahwe ras nampati kalak si deban. Terus nge ilakoken Marta kerina enda? Mbelin kemungkinenna bage. Emaka, reh ngasupna me ia ngadapi tantangen si nandangi reh.

26. Kiniteken Marta nampati ia ngelakoken kai?

²⁶ Piga-piga wari kenca si e, arus iadapi Marta kematen Jesus, Majiken si ikelengina, si ibunuh alu kejam. Janah pe, pemunuh munafik si kejam enda, ertekad ka munuh Lasarus, erkiteken kinikekenna erban reh teremna kalak tek man Jesus. (Oge Johanes 12:9-11.) Payo, kematen dungna nirangken Marta ras dua turang seninana si ikelengina. La sieteh uga ras ndigan e terjadi, tapi si pasti: Kiniteken Marta si paguh nggo nampati ia megenggeng seh ku kedungenna. E me sabapna kalak Kristen si gundari pe perlu ngusih kiniteken Marta.