1, 2. Kai si terjadi i bas wari si seh kal luar biasana bas geluh Elia?

KIAM Elia bas tengah udan asum reh gelapna wari. Ndekah denga maka ia seh ku Jisreel, sedangken ia nggo metua. Tapi, kiam ia alu la erlatih-latih, sabap ”gegeh [Jahwe]” lit bas ia. Pasti lenga pernah igejapkenna gegeh si erdahin bas dagingna. Bayangken, e denga ilebeina gereta Raja Ahap si ibaba kuda-kuda pilihen!—Oge 1 Raja 18:46.

² Gundari, nggo ndauh Raja Ahap tading, janah dalan si melungun lit i lebe-lebe Elia. Bayangken lau udan e ngkenai ayo Elia asum ia kiam, janahna nginget mulihi wari si seh kal luar biasana e bas geluhna. La isangsiken, enda wari kemenangen si mbelin man Jahwe, Dibata si isembah Elia, bage pe man ibadat situhu-tuhu. Enggo ndauh i pudina Deleng Karmel si meganjang, lanai teridah erkiteken itutup embun si gelap. I je me Jahwe nggunaken Elia naluken penembahen Baal alu pertunjuken kuasaNa si luar biasa. Lit ratusen nabi Baal si terbukti palsu ras jahat si patut ibunuh. Kenca e, mindo Elia gelah ipengadi Jahwe masa kelegon si nggo terjadi i negeri e sedekah telu setengah tahun. Janah, reh me udan!—1 Raj. 18:18-45.

3, 4. (a) Engkai maka banci saja reh belinna arapen Elia asum ia kiam ku Jisreel? (b) Penungkunen kai si man bahasenta?

³ Asum kiam Elia mentasi udan bas perdalanen ku Jisreel si dauhna 30 kilometer, pasti reh belinna arapenna. Banci saja rukur Elia maka pasti lit perubahen perban nabi-nabi Baal nggo ibunuh. Ahap pe pasti berubah! Kenca idahna kerina si nggo terjadi, pasti lanai lit pilihen Ahap. Arus itadingkenna penembahen Baal, ipengadina kerina perbahanen Isebel, kemberahenna, ras mpengadi penindasen nandangi juak-juak Jahwe.

⁴ Payo, paksa kerina sura-suranta banci saja terjadi sue ras peratenta, biasana reh belinna arapenta. Banci saja sibayangken maka kegeluhenta pasti reh ulina, janah teratasi siakap dungna masalah si mberat. Wajar adi Elia pe bage perukurenna, sabap ia  ”manusia nge bali ras kita”. (Jak. 5:17) Tapi, situhuna masalah Elia lenga bo erkedungen. Piga-piga jam saja kenca e, seh kal ia mbiarna janah kote, nggo madin akapna mate saja. Kai si terjadi, janah uga Jahwe nampati nabiNa e gelah paguh mulihi kinitekenna janah lanai mbiar? Mari sinehen.

5. Kenca kejadin i Deleng Karmel, erlajar nge Ahap ngergai Jahwe, janah janari sieteh?

⁵ Enggo nge robah Ahap seh kenca ia bas istanana i Jisreel? Sioge, ”Ituriken Raja Ahap man ndeharana Isebel kerina si enggo ilakoken Elia, ras kuga ia enggo munuh kerina nabi-nabi Baal.” (1 Raj. 19:1) Perdiateken maka bas cerita kerna peristiwa bas wari e, la lit isinggung-singgung Ahap kerna Jahwe, Dibata Elia. Menurut kalak si bagi Ahap si la erkiniteken, mukjizat bas wari e sekedar perbahanen manusia saja, perbahanen ”si enggo ilakoken Elia”. Jelas me, si e kerina la erbahan Ahap ngergai Dibata Jahwe. Janah uga tanggapen ndeharana si erelem-elem e?

6. Kai berita si ikirim Isebel man Elia, janah kai maksudna?

⁶ Merawa kal Isebel! Paksa ia merawa, ikirimna berita man Elia, ”I bas paksa si genduari e ka pagi, adi la kam mate kubunuh bagi pemunuhndu nabi-nabi e, ibunuh dibata gia aku.” (1 Raj. 19:2) Enda sada ancamen kematen si seh kal ngerina. Banci ikataken, ersumpah Isebel maka arus ia mate adi la berhasil munuh Elia bas sada wari guna mbalasken dendam nabi-nabi Baalna. Bayangken, bas berngi si meter angin e, iingeti me Elia bas inganna tunduh nari si sederhana i Jisreel janah ibegina berita si ngeri e bas utusen ratu e nari. Uga perasanna?

7. Kai pengaruh ancamen Isebel man Elia, janah kai si ilakoken Elia?

⁷ Adi sempat ibayangken Elia maka perang ngelawan penembahen Baal e menam ngadi, bene me arapenna paksa si e. Isebel tetap mekeng. Enggo seh kal buena teman Elia si ibunuh bekas perentahna nari, janah banci saja gundari giliren Elia. Kai pengaruh ancamen Isebel e nandangi Elia? Nina Pustaka si Badia, ”Mbiar Elia.” Ibayangken Elia nge cara Isebel si kejam guna munuh ia? Adi terus iukurina e, la ateta mamang adi bene kinipangenna. Si pasti, lawes Elia guna ”ngkelini kesahna”, kiam me ia jenari.—1 Raj. 18:4; 19:3.

8. (a) Engkai maka masalah Petrus bali ras masalah Elia? (b) Pelajaren kai si banci sidat bas Elia ras Petrus nari?

⁸ Labo Elia ngenca kalak si erkiniteken si pernah ngadapi  perasan mbiar. Ndekah kenca e, rasul Petrus pe ngadapi si bage. Misalna, sekali waktu ibahan Jesus me ia ras Petrus erdalan bas lau. Tapi, mulai ”igejap [Petrus] meter angin” dungna bene me kinipangenna janah mulai me ia gedap. (Oge Matius 14:30.) Emaka, contoh Petrus ras Elia mere pelajaren si meherga banta. Adi sipertahanken ateta kinipangenta, ula sipediat perukurenta terus ngukuri bahaya-bahaya si banci erban kita mbiar. Penting gelah perukurenta tertuju kempak Ulu arapen ras gegehta.

9. Turiken uga perdalanen Elia janah uga perasanna sanga ia kiam.

⁹ Mbiar Elia janah kiam ia ku arah selatan kira-kira 150 kilometer dauhna ku Berseba, kota deherken perbatasen selatan Juda. Itadingkenna i je suruh-suruhenna janah berkat me ia sisada ku padang gurun. Ikataken kisah e maka lawes ia ”sada wari perdalanen dauhna”, emaka banci sibayangken berkat ia paksa mbincar matawari, banci saja la maba perbekalen. Paksa picet keadanna janah mbiar ia, erjuang ia mentasi dalan si mesera e asum iparpari las matawari. Janah, paksa matawari lawes ku sundutna, keri me gegeh Elia. Perban latihna akapna, kundul ia i teruh sada batang kayu, e kal ngenca si banci jadi inganna cicio bas taneh si kerah e.—1 Raj. 19:4.

10, 11. (a) Kai erti pertoton si ipeseh Elia man Jahwe? (b) Alu nggunaken ayat-ayat si lit i jenda, turiken perasan kalak setia si debanna si kitik ukurna.

¹⁰ Paksa ndele kal ate Elia, ertoto ia, ipindona gelah mate saja. Nina, ”La ulin aku asang niningku!” (Padan si Ndekah si Nipegendek, J.H. Neumann) Ietehna maka nini-ninina nggo jadi abu ras tulan i kuburen, la banci ise pe isampatina. (Peng. 9:10) La erguna akap Elia bana. Emaka wajar ikatakenna, ”Enggo me.” Man kai nari nggeluh?

¹¹ Perlu nge mamang ateta adi lit sekalak dilaki si paguh kal kinitekenna banci kote? Tentu lang. Bas Pustaka lit itulis kerna piga-piga dilaki ras diberu si setia si pernah erndele ate, misalna Ribka, Jakup, Musa, bage pe Jop.—Kej. 25:22; 37:35; Bil. 11:13-15; Jop 14:13.

12. Paksa kitik ukurndu, kai si arus ilakokenndu guna ngusih Elia?

¹² Gundari, kita nggeluh bas masa si ”mbue reh kiniseran”, emaka labo mamang ateta adi nterem kalak, termasuk umat  Dibata si setia pe, maun-maun kitik ukurna. (2 Tim. 3:1) Adi paksana kam ngadapi masalah si seh kal beratna, usihlah Elia: Turiken kerina isi pusuhndu man Dibata. Ingetlah, Jahwe eme ”Dibata sumbul kerina pengapul”. (Oge 2 Korinti 1:3, 4.) IapuliNa nge Elia?

13, 14. (a) Erkelangken sada malekat, uga Jahwe mperdiateken ras ngkelengi nabiNa si sangana erndele ate? (b) Engkai maka terapuli kita erkiteken ieteh Jahwe kerina kerna kita, termasuk keterbatasenta?

¹³ Menurutndu, uga perasan Jahwe paksa tatapNa surga nari janah idahNa nabi si keleng ateNa e ampar i teruh sada batang kayu i padang gurun janah mindo gelah ia mate saja? La perlu siterka jabapna. Kenca terpedem Elia, iutus Jahwe sada malekat ndahi ia. Alu manjar-anjar ikuitna Elia janah iingetina nina, ”Kekeken Elia, manken!” Medak me Elia janah man ia, sabap nggo isikapken malekat e alu mehuli pangan si sederhana man Elia eme roti si melas denga ras inemenna. Ngata bujur nge ia man malekat e? Si ituriken kisah e maka man me nabi e, minem, janah tunduh ka mulihken. Ndele kal nge atena maka la ia nggit ngerana? Si jelas, iingeti malekat e ia pedua kaliken, banci saja nandangi terang wari. Sekali nari, iiahkenna Elia, ”Kekeken Elia, manken!” janah itambahina ka kata-kata si mpepalem pusuh, ”adi lang, la kari kam ngasup erdalan ndauh.”—1 Raj. 19:5-7.

¹⁴ Erkiteken pemeteh si ibereken Dibata, ieteh malekat e ku ja Elia lawes. Ietehna ka maka seh kal beratna perdalanen e adi nggunaken gegeh Elia saja. Terapuli kal kita erkiteken ngelayani Dibata si meteh erbage rencana ras keterbatasenta asangken dirinta jine! (Oge Masmur 103:13, 14.) Kai gunana man Elia pangan e?

15, 16. (a) Kai si banci ilakoken Elia kenca ndatken pangan bas Jahwe nari? (b) Engkai maka arus siergai cara Jahwe i bas ncukupi keperlun rohani juak-juakNa gundari?

¹⁵ Sioge, ”Keke Elia, emaka man ras minem ia. Pangan e mereken gegeh cukup man bana lako erdalan empat puluh wari empat puluh berngi ku Deleng Sinai, deleng si badia e.” (1 Raj. 19:8) Erpuasa Elia 40 wari 40 berngi bali bagi Musa si nggeluh kira-kira enem abad sope Elia bage pe Jesus si nggeluh menam sepuluh abad kenca ia. (Kel. 34:28; Luk. 4:1, 2) Pangan si ipanna e labo erban masalahna bene, tapi si e mpegegehi ia secara mukjizat. Bayangken tande wari tande mingguna, dilaki si nggo metua e erdalan mentasi taneh mesawang si la lit dalinna, menam sada setengah bulan dekahna!

 ¹⁶ Gundari pe ipegegehi Jahwe umatNa, labo alu pangan si mpegegehi secara mukjizat tapi alu cara si ndauh lebih penting. IsikapkenNa keperlun rohani man kalak e. (Mat. 4:4) Banci kita paguh secara rohani alu erlajar kerna Dibata bas Pustaka nari ras ogen si itulis alu megermet si erpalasken Pustaka. Banci saja pangan rohani la ndungi kerina perbebenta, tapi isampatina kita gelah megenggeng amin gia lanai siakap kita ngasup. Enda pe banci negu-negu kita ku ”kegeluhen si tuhu-tuhu si la erkeri-kerin”.—Joh. 17:3.

17. Ku ja Elia lawes, janah ngkai maka enda ingan si penting?

¹⁷ Erdalan Elia menam 320 kilometer dauhna janah dungna seh i Deleng Sinai, ingan Dibata Jahwe mbarenda ncidahken baNa man Musa arah sada malekat bas rambah duri si gara. Enda pe ingan si bas pudi wari Jahwe erbahan perjanjin Hukum ras Israel. I je, cebuni Elia bas sada gua.

18, 19. (a) Kai penungkunen malekat Jahwe, janah uga Elia ngaloisa? (b) Kai telu alasen si ikataken Elia si erban kitik ukurna?

¹⁸ Reh me ”kata” Jahwe i Sinai si banci saja ipesehNa man Elia arah sada malekat nina, ”Erkai kam i jenda, Elia?” Mbelin kemungkinenna penungkunen e ipeseh alu medate janah dungna teriahken Elia nuriken isi pusuhna. Nina, ”[Jahwe] Dibata si Mada Kuasa, man baNdu, man baNdu saja ngenca aku tetap ersembah. Tapi bangsa Israel enggo ngelanggar perpadanenna ras Kam; iruntuhkenna batar-batarNdu. Aku nari ngenca tading, janah aku pe ibunuhna atena.” (1 Raj. 19:9, 10) Bas kata-kata Elia enda, teridah me silang-langna telu alasen ngkai maka kitik ukurna.

¹⁹ Si pemena, sia-sia iakap Elia pendahinna sedekah enda. Amin gia nggo ertahun-tahun ’man Jahwe saja ngenca ia ersembah’, janah ngutamaken gelar Dibata si badia ras ibadat man baNa asangken kerinana, tapi keadan bangsa e terus reh kelekna. Tetap kalak e la erkiniteken ras mberontak, janah ibadat palsu terus erbuena. Si peduaken, sisada akap Elia ia. Ikatakenna, ”Aku nari ngenca tading,” tempa-tempa ia nari ngenca si ngelayani Jahwe bas bangsa e. Si peteluken, mbiar Elia. Enterem temanna selaku nabi nggo ibunuh, janah tek ia maka ia ka me sekalenda. Banci saja la menukah akap Elia ngakui perasanna e, tapi la ipediatna harga diri ntah pe perasan mela ngambati ia nuriken perasanna. Alu mbuka pusuhna man Dibatana bas pertoton, ia jadi usihen man kerina kalak si setia.—Msm. 62:9.

20, 21. (a) Turiken kai si isaksiken Elia bas babah gua i Deleng Sinai. (b) Kenca naksiken kinigegehen Jahwe, kai si ipelajari Elia?

 ²⁰ Uga tanggapen Jahwe kerna perasan mbiar ras aru ate Elia? Isuruh malekat e me Elia tedis bas babah gua. Tedis me ia amin la ietehna kai si nandangi terjadi. Rempet me rembus angin kaba-kaba! Bage terna seh maka erbelah ibahanna deleng ras uruk-uruk janah sorana erban cuping erdeping. Bayangken iusahaken Elia nutupi matana janah ijemakna jubahna si ermbulu si mberat dingen sederhana gelah la ikabangken angin. Arus ka ia erjuang gelah la ndabuh, erkiteken taneh bas daerah e mulai mugur-ugur perban linur si mbelin! Sope sempat itenangkenna dirina, gurlah me api, terpaksa ia mundur ku bas gua gelah la kena las api e.—1 Raj. 19:11, 12.

²¹ Kisah e ngingetken kita maka labo lit Jahwe i bas erbage peristiwa alam si luar biasa e. Ieteh Elia maka Jahwe la seri ras dewa alam bagi Baal, si isembah kalak si sesat selaku ”si ngaturken awan”, ntah pe si maba udan. Jahwe me Ulu bas kerina gegeh si luar biasa si lit bas alam, janah ndauh Ia hebaten asangken kerina si itepaNa. Doni ras langit pe kitiksa man inganNa! (1 Raj. 8:27) Uga kerina enda banci nampati Elia? Ingetlah maka mbiar ia. Erkiteken lit Dibata bagi Jahwe arah ia, Dibata si luar biasa kinigegehenNa, la perlu Elia mbiar man Ahap ras Isebel!—Oge Masmur 118:6.

22. (a) Uga ”sora medate bagi sora erkusik” erban Elia tek maka seh kal mehergana ia? (b) Banci jadi, janari rehna ”sora medate bagi sora erkusik” e? (Nehen cataten i teruh.)

²² Kenca nimpet api e, tenang me keadanna janah ibegi Elia ”sora medate bagi sora erkusik”. Teriahken mulihi Elia, janah iturikenna isi pusuhna si pedua kaliken. * Banci saja enda erbahan reh salangna pusuhna. Si pasti, lebih terapuli kal Elia alu kai si ikataken ”sora medate bagi sora erkusik” e. Ibahan Jahwe gelah tek Elia maka seh kal ia mehergana. Uga carana? Ituriken Dibata peratenNa bas masa si reh kerna perang ngelawan penembahen Baal i Israel.  Jelas me, pendahin Elia sedekah enda la sia-sia, sabap peraten Dibata terus terjadi alu la lit si banci mpengadisa. Selain e, tetap denga Elia ikut i bas erbahan peraten Jahwe e terjadi, sabap iutusNa ia mulihi ngelakoken piga-piga perentah si jelas.—1 Raj. 19:12-17.

23. Kai dua cara Jahwe nampati Elia si kelungunen?

²³ Uga kerna perasan Elia si kelungunen? Lit dua hal si ilakoken Jahwe i je. Si pemena, iperentahkenNa Elia gelah itangkuhkenna Elisa jadi nabi si nggantiken ia pagi. Dilaki si ngudan asa ia enda me kari si nemani ras nampati Elia sedekah piga-piga tahun. Enda tuhu-tuhu ngapuli ia! Si peduaken, ituriken Jahwe berita si mehuli enda, ”Kuserapken pagi pitu ribu kalak Israel si la ibunuh, e me kerina kalak si langa nembah erjimpuh man Baal ntah pe man gana-ganana.” (1 Raj. 19:18) Tuhu-tuhu Elia labo sisada. Pastilah terapuli ia megi maka lit ribun kalak si setia si la nembah Baal. Kalak enda perlu pelayanen Elia si setia ras usihen kesetianna si paguh kempak Jahwe bas masa si mberat e. Pasti kena kal ku pusuh Elia kata-kata arah utusen Jahwe e, ”sora medate bagi sora erkusik” bas Dibatana nari.

24, 25. (a) Gundari, uga carana banci sibegi ”sora medate bagi sora erkusik” bas Jahwe nari? (b) Engkai maka banci kita tek maka ialoken Elia pengapul si ibereken Jahwe?

²⁴ Bali bagi Elia, banci saja megah siakap nandangi gegeh alam si luar biasa si teridah bas asil tinepa, janah bage kin arusna. Tinepa e jelas-jelas ncidahken kuasa Si Nepa. (Rom. 1:20) Ngasa gundari, meriah akap Jahwe nggunaken kinigegehenNa si la tersibar nampati umatNa si setia. (2 Kro. 16:9) Tapi, ngerana Dibata man banta terutama arah Pustaka si Badia. (Oge Jesaya 30:21.) Banci ikataken, Pustaka banci bagi ”sora medate bagi sora erkusik” e, adi nggit kita itegu-teguna gundari. Bas halamen-halamenna si meherga, ipereksa Jahwe kita, iapuliNa pusuhta, janah tek kita ibahanNa nandangi kekelengenNa.

²⁵ Terapuli nge Elia nandangi kejadin i Deleng Sinai e? Pasti! Minter ergiah-giah mulihi nabi si setia dingen la perbiar e guna ngelayani Dibata janah ngelawan ibadat palsu si jahat. Adi siukuri ”pergegeh si ibereken Pustaka si Badia”, eme Kata si rehna bas Dibata nari, banci ka siusih kiniteken Elia.—Rom. 15:4.