1, 2. (a) Kiniseran kai si nialami bangsa Elia? (b) Kai tentangen si niadapi Elia i Deleng Karmel?

ITATAP Elia jelma si nterem e asum kalak e nangkih ku Deleng Karmel alu mberat. Bas erpagi-pagi si gelap denga pe, jelas teridah keadan kalak enda si musil ras kelihen. Teridah kal bas kalak e akibat lego si terjadi telu setengah tahun dekahna.

² Ikut ka ras kalak e 450 nabi Baal si seh kal sombongna janah segat kal atena Elia, nabi Jahwe e. Enggo melala ibunuhi Ratu Isebel juak-juak Jahwe, tapi nabi enda erjuang denga ngelawan ibadat man Baal. Tapi, ngasa ndigan? Banci saja akap imam-imam e labo banci menang adi sekalak saja si ngelawan kalak e. (1 Raj. 18:4, 19, 20) Reh ka me Raja Ahap alu gereta kerajanna. Ia pe segat atena Elia.

3, 4. (a) Engkai maka banci saja Elia mbiar paksa wari si penting e ibenai? (b) Penungkunen kai saja si man bahasenta?

³ Sisada ngenca nabi e ngadapi kejadin si luar biasa i bas geluhna. Kentisik nari, iidah Elia me salah sada persaingen si seh kal luar biasana antara kiniulin ras kejahaten. Uga perasanna terang kenca wari? La ia kebal nandangi perasan mbiar, erkiteken ia pe ”manusia nge bali ras kita”. (Oge Jakup 5:17.) Silang-langna, sada hal si pasti: Isedari Elia maka tuhu-tuhu ia sisada i tengah-tengah umat si la erkiniteken, raja kalak e si murtad, ras imam-imam si kejam.—1 Raj. 18:22.

⁴ Tapi, uga maka banci Israel ngadapi masa si mberat e? Janah, kai hubungen kisah e ras kam gundari? Perdiatekenlah usihen kiniteken Elia ras uga belinna gunana man banta gundari.

5, 6. (a) Persaingen kai si iadapi kalak Israel? (b) Engkai maka ceda kal ukur Jahwe ibahan Raja Ahap?

⁵ Menam segedang geluh Elia, iidahna maka ibadat situhu-tuhu lanai iperdiateken janah la banci iubahna situasina. Bagenda turi-turinna, nggo ndekah bangsa Israel lit i bas persaingen antara  ibadat si murni ras ibadat si palsu, antara penembahen man Dibata Jahwe ras penembahen man dibata-dibata palsu bangsa i sekelewetna. Bas jaman Elia, persaingen enda nggo reh kelekna.

⁶ Seh kal cedana ukur Jahwe ibahan Raja Ahap. Iempoina Isebel, anak raja Sidon. Ipebelang Isebel atena ibadat man Baal i negeri Israel janah ikernepkenna atena ibadat man Jahwe. Ahap pe minter ikuasaina. Ipajekken Ahap sada rumah persembahen ras batar-batar man Baal janah ipinpinna rayat gelah nembah man dewa kafir e.—1 Raj. 16:30-33.

7. (a) Engkai maka ceda kal ukur Jahwe nandangi ibadat man Baal? (b) Engkai kita banci tek maka bas Pustaka la lit pertentangen jangka waktu kelegon bas jaman Elia? (Nehen ka kotak.)

⁷ Engkai maka ceda kal ukur Jahwe nandangi ibadat man Baal? Erkiteken ibadat e banci erban Israel nadingken Jahwe. Ciga kal ate Dibata ngidah agama si kejam e. Lit dilaki ras diberu si erlua-lua i rumah persembahen, pesta-pesta seks, janah ngkorbanken anak-anak. Ertindak Jahwe alu ngutus Elia man Ahap gelah imomokenna maka lit me musim perlego seh ngasa ikataken nabi Dibata maka e ngadi. (1 Raj. 17:1) Kenca piga-piga tahun, reh ka me Elia njumpai Ahap janah isuruhna mpepulung rayat ras nabi-nabi Baal i Deleng Karmel. *

8. Kai ertina kisah kerna penembahen Baal man banta?

⁸ Tapi, kai ertina kisah kerna penembahen Baal man banta? Lit si erpengakap kisah enda lanai penting gundari, erkiteken rumah persembahen ras batar-batar Baal lanai lit i sekelewetta. Tapi, kisah enda labo sibar sejarah saja. (Rom. 15:4) Kata ”Baal” ertina ”si mada” ntah pe ”tuan”. Isuruh Jahwe me umatNa gelah milih Ia jadi ”baal”na, ntah pe si mada ras perbulangenna. (Jes. 54:5) La kin kam setuju maka nterem kalak gundari ngelayani erbage tuan, labo Dibata Si Mada Kuasa? Payo, kai pe si iayaki kalak i bas geluhna, ntah e sen, pendahin, rekreasi, kesenangen seksual, ntah pe seh kal buena dibata si deban si isembahna selain Jahwe, enda me situhuna tuanna. (Mat. 6:24; oge Roma 6:16.) Banci ikataken maka bagin utama ibadat Baal melala denga gundari. Ngukuri alu mbages pertandingen Jahwe ras Baal bas jaman si mbarenda, nampati kita guna erbahan pilihen si bijaksana kerna ise ateta silayani.

9. (a) Engkai Deleng Karmel sada ingan si cocok guna ncidahken maka penembahen Baal e palsu? (Nehen ka cataten i teruh.) (b) Kai si ikataken Elia man bangsa e?

⁹ Bas tampuk Deleng Karmel nari, teridah menam kerina wilayah i sekelewetna, mulai Lau Kison, Lawit Tengah i deherna, seh ku Pegunungen Libanon si ndauh i utara. * Tapi, kenca pultak matawari bas wari si nggo itentuken e, teridah pemandangen si seh kal ngerina. Negeri si mbarenda mehumur si ibereken Jahwe man kalak Israel, gundari nggo jadi taneh tenggiring si kerah. Taneh e kena las si la tanggung nderngitna, ceda erkiteken kebodohen umat Dibata! Kenca pulung jelma si nterem e, ideheri Elia me  kalak e, janah nina, ”Asa kai nari dekahna maka banci ipetetapndu ukurndu? Adi [Jahwe] kin Dibata, sembahlah Ia; tapi adi Baal kin Dibata, sembahlah ia!”—1 Raj. 18:21.

10. Kai ertina kata-kata ”asa kai nari dekahna maka banci ipetetapndu ukurndu”, janah kebenaren kai si ilupaken bangsa e?

¹⁰ Kai maksud Elia kerna kata-kata ”asa kai nari dekahna maka banci ipetetapndu ukurndu”? Kepeken la isedari bangsa e maka arus ibahanna pilihen, ibadat man Jahwe ntah ibadat man Baal. Akap kalak enda banci idalankenna duana, erban ngena ate Baal alu upacara si meluat janah i je ka ipindona ngena ate Dibata Jahwe. Banci saja akap kalak enda banci ipasu-pasu Baal sinuan-sinuanna ras asuh-asuhenna, sedangken Jahwe ”Dibata bala tentera Israel” ngkawali ia bas pertempuren. (1 Sam. 17:45) Ilupaken kalak enda kebenaren si la iangkai jelma si nterem gundari eme la ate Jahwe erbagi ibadat man ise pe. IpindoNa gelah Ia saja si isembah janah bage me arusna. La banci ialokenNa, janah ceda kal ukurNa adi icampur ibadat man baNa ras bentuk ibadat si deban!—Oge Keluaren 20:5.

11. Menurutndu, ngkai maka kata-kata Elia i Deleng Karmel banci nampati kita mereksa mulihi kai si pentingna i bas geluhta bage pe ibadatta?

¹¹ Emaka, la ipetetap kalak Israel ukurna bagi kalak si ncubaken erdalan bas dua dalan sekaligus. Gundari, nterem kalak erbahan kesalahen si bage, ipediatna ”baal-baal” si deban masuk ku kegeluhenna janah ibadat man Dibata dungna tading! Alu ndalanken penginget Elia si terus terang gelah mpetetap ukur, banci kita isampati guna mereksa mulihi kai si pentingna bas geluhta bage pe ibadatta.

12, 13. (a) Ujian kai si ibahan Elia? (b) Uga kita banci ncidahken kinitekenta bagi Elia?

¹² Iterusken Elia alu erban ujian si sederhana kal. Arus ipajekken imam-imam Baal sada batar-batar janah itamana korban i babona; kenca e, arus kalak enda ertoto man dibatana guna mpegara api. Elia pe kari ngelakoken si bage ka. Nina, ”Apai kari si ngaloi pertoton e alu pesusur api, Ia kap Dibata.” Tuhu-tuhu ieteh Elia ise Dibata si benar e. Seh kal paguhna kinitekenna emaka la ia sangsi mereken kerina si erban kalak e runtung. Iberekenna kesempaten si pemena man nabi-nabi Baal e. Emaka, ipilih kalak enda lembu guna ikorbanken ras ertoto man Baal. *—1 Raj. 18:24, 25.

 ¹³ Gundari kita la nggeluh i bas masa si lit mukjizatna. Tapi, Jahwe lenga berubah. Kinitekenta man baNa pe banci seri ras Elia. Misalna, paksa lit si la setuju nandangi kai si niajarken Pustaka, la kita perlu mbiar mpelebe ia ngerana. Bali bagi Elia, banci kita ernalem man Dibata si benar guna ndungi masalah e. Enda silakoken alu ernalem, labo man dirinta sendiri, tapi man Pustaka si rehna i bas Dibata nari, si ibahan guna ”pekena si salah”.—2 Tim. 3:16.

14. Uga Elia nguru-nguru ntah pe ngejek nabi-nabi Baal, janah ngkai?

¹⁴ Kenca e, isikapken nabi-nabi Baal me korbanna janah ilebuhna dibatana. Mulih-ulih ilebuhna alu megang, ”Aloi kami, o Baal!” Terus ilebuh kalak e asum waktu erdalan. ”Tapi sora kai pe la lit terbegi,” nina Pustaka. I bas pantek ciger, mulai me iejek Elia kalak e, alu isaling-salingina maka sibuksa Baal emaka la ijabapna, sangana ia ku duru, ntah pe tunduh maka perlu iingeti. Ikataken Elia man penebu-nebu e, ”Tergangen ban sorandu!” Jelas me, ieteh Elia maka kalak si nembah Baal labo nembah Dibata situhu-tuhu dingen nggeluh, janah ate Elia gelah kalak Israel sedar kerna si e.—1 Raj. 18:26, 27.

15. Kai pelajaren si banci sidat i bas peristiwa imam-imam Baal?

¹⁵ Dungna, reh ngamukna imam Baal, ”reh gangna ibahan kalak ndai sorana, janah igarisina dagingna alu rawit bagi acara agamana, seh maleren darehna”. Tapi, si e kerina sia-sia! ”La lit si ngaloi, la lit sora kai pe terbegi.” (1 Raj. 18:28, 29) Jelas me, Baal e tuhu-tuhu la lit. Ia bahan-bahanen Setan saja gelah mpedauh kalak bas Jahwe nari. Si pasti, adi milih tuan si apai pe selain Jahwe pasti dungna kecewa ras mela.—Oge Masmur 25:3; 115:4-8.

16. (a) Kai si banci saja iinget kalak sanga Elia mpekena batar-batar Jahwe i Deleng Karmel? (b) Uga ka Elia ncidahken kinitekenna man Dibatana?

¹⁶ Ben kenca wari, seh me waktuna Elia mpersembahken korban. Ipesikapna batar-batar Jahwe si nggo iruntuhken musuh-musuh ibadat si murni. Ipakena 12 batu, banci saja guna ngingetken nterem kalak Israel si 10 suku maka kalak enda arus patuh man Undang-Undang Musa si ibereken man kerina bangsa Israel.  Kenca e, icibalkenna korban si nggo isikapkenna janah icurcurina alu lau, si banci saja ibuatna bas Lawit Tengah si ndeher jenari. Ikurukna ka parik i sekelewet batar-batar, janah iisina alu lau. Enggo ibereken Elia man nabi Baal kerina si banci mereken keuntungen tapi iberena man Jahwe kerina si banci ngerugiken, enda ncidahken uga belinna kinitekenna man Dibatana.—1 Raj. 18:30-35.

17. Uga pertoton Elia ncidahken kai si pentingna iakapna, janah uga banci siusih ia bas pertotonta?

¹⁷ Kenca kerina nggo sikap, ertoto me Elia. Kena kal ku pusuh pertotonna e perban seh kal sederhanana janah enda ncidahken kai si pentingna iakap Elia. Si pemena ras si pentingna, icidahkenna atena maka ”Dibata Israel” eme Jahwe, labo Baal. Si peduaken, atena gelah ieteh kalak maka ia juak-juak Jahwe ngenca, emaka kerina kemulian ras pujin arus ibereken man Dibata. Dungna, icidahkenna maka iperdiatekenna denga bangsana, sabap merhat kal ia ngidah Jahwe ”mabai bangsa enda mulihken”. (1 Raj. 18:36, 37) Amin gia kalak enda si erban kerina kiniseran perban la erkiniteken, keleng denga ate Elia ia. I bas pertotonta, banci nge sicidahken kepedulin si bage nandangi gelar Dibata, bage pe sifat meteruk rukur ras perkuah ate man kerina kalak si perlu penampat?

18, 19. (a) Uga Jahwe njabap pertoton Elia? (b) Kai si iperentahken Elia man bangsa e, janah ngkai maka imam-imam Baal la metunggung dat perkuah ate?

¹⁸ Sope Elia ertoto, banci saja nterem kalak i je tersungkun-sungkun ntah kin Jahwe e pe labo tuhu-tuhu lit, bali bagi Baal. Tapi, dung kenca pertoton e lanai kalak e sangsi. Menurut cataten, ”Emaka ipesusur [Jahwe] api; meseng ibahanna persembahen, ras ranting ndai, bage pe kerina batu ras taneh, janah lau si lit i bas parik ndai pe kerah.” (1 Raj. 18:38) Tuhu-tuhu jabapen si luar biasa! Janah, uga tanggapen bangsa e?

¹⁹ Serko ia kerina nina, ”[Jahwe] kap Dibata; [Jahwe] ngenca Dibata si man sembahen!” (1 Raj. 18:39) Dungna, idah kalak enda me kebenaren. Tapi, lenga bo kalak enda ncidahken kiniteken. Situhuna, terjeng ngaku maka Jahwe me Dibata si benar kenca ngidah api nusur langit nari si jadi jabapen pertoton, la banci ikataken bukti kiniteken situhu-tuhu. Emaka, ate Elia gelah icidahken  kalak enda kinitekenna alu cara si deban. Ipindona gelah ilakoken kalak e kai si arusna ilakoken ertahun-tahun si nggo lewat eme patuh man Hukum Jahwe. Menurut Hukum Dibata, nabi-nabi palsu ras kalak si nembah berhala arus ibunuh. (Ul. 13:5-9) Imusuhi imam-imam Baal kal Dibata Jahwe, janah sengaja ia ngelawan peraten Dibata. Cocok nge kalak e ndatken perkuah ate? Cuba inget, i ja perkuah ate kalak enda paksa anak-anak si la ersalah itutung nggeluh-nggeluh guna ikorbanken man Baal? (Oge Kuan-kuanen 21:13; Jer. 19:5) Kalak enda la metunggung ndatken perkuah ate! Emaka, iperentahken Elia gelah kalak enda ibunuh, janah ibunuh me kalak e.—1 Raj. 18:40.

20. Engkai maka keberaten nandangi ukumen Elia man imam-imam Baal la lit dasarna?

²⁰ I bas jaman si gundari, banci saja lit si la setuju nandangi hasil akhir ujian i Deleng Karmel. Banci saja lit si mbiar maka enda alasen kalak si fanatik banci ngelakoken kekerasen man agama si deban. Sayangna, seh kal teremna jelma gundari si ngelakoken kekerasen erkiteken fanatik nandangi agama. Tapi, Elia labo kalak si fanatik. Ilakokenna pemunuhen si adil guna gelar Jahwe. Selain e, ieteh kalak Kristen situhu-tuhu maka la banci ngukum kalak si jahat alu pedang bagi si ilakoken Elia. Kenca Mesias reh, patoken man kerina ajar-ajar Jesus lit i bas kata-kata Kristus kempak Petrus, nina, ”Sembungken pedangndu e, sabap kalak si make pedang mate pagi ibahan pedang.” (Mat. 26:52) Jahwe ngenca si banci erbahan keadilen bas wari pepagi janah isuruhNa me AnakNa ngelakokenca.

21. Engkai maka seh kal cocokna usihen Elia man kalak Kristen situhu-tuhu gundari enda?

²¹ Tanggung jabap kalak Kristen situhu-tuhu eme ncidahken kiniteken bas ndalani kegeluhenna. (Joh. 3:16) Salah sada carana eme ngusih kalak si erkiniteken, bagi Elia. Jahwe ngenca si isembahna janah iiahkenna kalak si deban ngelakoken si bage. Alu la mbiar icidahkenna guak agama si ipake Setan gelah mpedauh kalak bas Jahwe nari. Janah, i bas ngadapi erbage masalah, ernalem ia man Jahwe labo man kengasupen ras sura-surana jine. Jelas me, ibela Elia ibadat si murni. Mbera kerina kita ngusih kinitekenna!