1, 2.Proyek kai si ilakoken Nuah ras keluargana, janah kai saja tantangenna?

NGENAT Nuah. Cuba bayangkenndu paksana ia kundul i babo sada balok kayu, ngadi ia bas dahinna nari janah itatapna rangka bahtera si seh kal galangna. Teranggeh ka bau ter si melas; sora alat-alat pertukangen pe terus terbegi. Bas ingan kundulna nari, banci idah Nuah anak-anakna si erdahin i erbage bagin rangka kayu si seh kal galangna e. Anak-anakna, permainna, ras ndeharana pe radu erdahin ras ia bas proyek enda sedekah piga-piga puluh tahun. Melala si nggo idahiken kalak e, tapi melala denga dahin si arus idungina!

² Motu iakap kalak keluarga Nuah. Paksa reh jelasna bentuk bahtera e, itawaina ka persinget Nuah kerna banjir si mbelin si nandangi reh e. Tempa ndekah denga kal reh mara si terus iberitaken Nuah e, tuhu-tuhu la mungkin! La akapna masuk akal lit kalak si nggit mereken kegeluhenna ras kegeluhen keluargana guna proyek si motu e. Tapi perukuren Dibata Nuah, Jahwe, sitik pe la bage.

3. Kai maksudna Nuah erdalan ras Dibata?

³ Nina Pustaka si Badia, ”Nuah erdalan ras Dibata si benar.” (Kej. 6:9, Terjemahan Dunia Baru) Kai ertina e? Labo ertina Dibata erdalan i doni, ntah pe labo ka Nuah ku surga. Tapi, erkiteken keleng ate Nuah nandangi Jahwe janah patuh alu bulat ukur, banci ikataken tempa radu erdalan Jahwe ras Nuah bagi teman. Ribun tahun kenca e, ikataken Pustaka kerna Nuah, ”Erkiteken [kinitekenna] doni isalahken.” (Heb. 11:7) Kai maksudna? Kai si banci sipelajari bas kinitekenna nari?

4, 5.Engkai maka reh parahna keadan doni bas jaman Nuah?

⁴ Nuah mbelin bas masarakat si meter berubah, si nggo ceda reh cedana ka. Keadan doni nggo mekelek mulai jaman nini bulangna nari, eme Enoh, kalak bujur si deban si erdalan ras Dibata.  Enggo inubuatken Enoh maka nandangi reh me wari penghakimen nandangi kalak si la mehuli i doni. Gundari, bas jaman Nuah, kejahaten nggo reh parahna. Menurut Jahwe pe, doni nggo rontang erkiteken dem kekerasen. (Kej. 5:22; 6:11; Jud. 14, 15) Kai si erbanca keadan e reh parahna?

⁵ Terjadi me peristiwa si seh kal ngerina bas anak-anak Dibata, eme malekat-malekat. Salah sada malekat e mberontak nandangi Jahwe alu jadi Setan Si Iblis janah ifitnahna Dibata bage pe itebu-tebuna Adam ras Hawa guna ngelakoken dosa. Bas jaman Nuah, malekat-malekat si deban pe mulai ikut mberontak nandangi pemerentahen Jahwe si adil. Itadingkenna surga, ingan si ibereken Dibata, janah nusur ku doni ngempoi diberu-diberu si mejile. Malekat-malekat si sombong ras mentingken bana e maba pengaruh si la mehuli man manusia.—Kej. 6:1, 2; Jud. 6, 7.

6. Kai pengaruh Nefilim-Nefilim nandangi semangat doni, janah kai keputusen Jahwe?

⁶ Terlebih ka, hubungen si la wajar antara manusia ras malekat si salih jadi manusia ngasilken anak-anak si seh kal belinna janah megegeh. Bas cakap Heber kalak e igelari Nefilim, si ertina ”Si Mbulakken”, kalak e erban kalak si deban ndabuh. Selaku penganiaya si kejam, iperparahna semangat kekerasen i doni si jahat e. Emaka la man kemamangen adi i lebe-lebe Si Nepa, seh kal ’jahatna manusia i doni janah macik perukurenna katawari pe’. Iputusken Jahwe maka 120 tahun nari ikernepkenNa me kesusuren si jahat e.—Oge Kejadin 6:3-5.

7. Tantangen kai si iadapi Nuah ras ndeharana i bas ngkawali anak-anakna bas pengaruh si la mehuli nari paksa si e?

 ⁷ Bayangken uga serana mpebelin anak-anak bas doni si bage! Tapi, e me si ilakoken Nuah. Kenca umurna 500 tahun, ndeharana si mehuli mupus telu anak eme Sem, Ham, ras Japet. * Nuah ras ndeharana arus ras-ras ngkawali anak-anakna arah pengaruh si la mehuli i sekelewetna. Biasana, meriah janah megah akap anak dilaki ngidah ”kalak si terberita mbisa”, bage me Nefilim-Nefilim e. Seh kal serana iakap Nuah ras ndeharana mpedauh anak-anakna arah cerita-cerita kerna perbahanen raksasa-raksasa e. Tapi, banci iajarken kalak e kebenaren kerna Dibata Jahwe, si segat ateNa kejahaten. Arus isampatina ka anak-anakna gelah ngangkai maka ceda ukur Jahwe ngidah kekerasen ras pemberontaken i doni paksa si e.—Kej. 6:6.

8. Gundari, uga orang tua si bijaksana banci ngusih Nuah ras ndeharana?

⁸ Banci iangkai orang tua si gundari uga perasan Nuah ras ndeharana. Gundari pe doni enda dem kekerasen ras pemberontaken. Megati, kota-kota ikuasai geng-geng anak muda si mesera iatur. Bage ka pe, hiburen-hiburen man anak-anak melala si dem kekerasen. Guna ngelawan pengaruh e, arus iusahaken orang tua si bijaksana ngajar anak-anakna kerna Dibata kedamen, Jahwe, si sada masa pagi mpengadi kekerasen. (Msm. 11:5; 37:10, 11) Kita banci berhasil! Nuah ras ndeharana pe berhasil. Anak-anakna jadi anak si mehuli, janah erjabu ras diberu si mbelin kemungkinenna mpelebe Dibata si benar, Jahwe, i bas kegeluhenna.

9, 10.(a) Kai perentah Jahwe si erbahan kegeluhen Nuah berubah? (b) Kai si ipeseh Jahwe man Nuah kerna tujun ras bentuk bahtera e?

⁹ Bas sada wari, kegeluhen Nuah berubah rasa lalap. Ngerana Jahwe man juak-juak si ikelengiNa e janah ikatakenNa sura-suraNa guna ngkernepken doni paksa si e. Iperentahken Dibata, ”Bahanlah sada [bahtera] man bandu i bas kayu si nteguh nari.”—Kej. 6:14.

¹⁰ Bahtera enda labo sada kapal, bagi pengakap piga-piga jelma. Tapi, sada peti si galang ngenca, ntah pe kotak si galang janah banci bombang bagi kapal. Ikataken Jahwe asa kai ukuren bahtera e, piga-piga keterangen kerna bentukna, ras petunjuk gelah ilapisi ter arah bas ras darat. Kenca e, ipebetehkenNa ka alasenna, ”Kuban ateKu banjir si mbelin i doni enda . . . Kasa kai si lit enda la banci la mate kerina.” Tapi, ibahan Jahwe perjanjin enda ras Nuah,  ”Bengketlah kam ku bas [bahtera] ras ndeharandu, anak-anakndu, bage pe ras permainndu.” Arus ka ibaba Nuah wakil bas kerina jenis rubia-rubia. Kerina si lit bas bahtera e saja si banci selamat!—Kej. 6:17-20.

11, 12 Tugas si mberat kai si ialoken Nuah, janah uga tanggapenna nandangi tantangen e?.

¹¹ Mberat kal tugas Nuah. Erbahan bahtera si seh kal galangna, gedangna kira-kira 133 meter, belangna 22 meter, ras ganjangna 13 meter, ndauh galangen asangken lapangen sepak bola. Elakken Nuah nge tugas e? Jungut-jungut nge ia erkiteken mbuesa tantangenna, ntah gantina nge perincin e gelah reh nukahna? Ijabap Pustaka, ”Ilakoken Nuah kerina kai si iperentahken Dibata man bana.”—Kej. 6:22.

¹² Erpuluh-puluh tahun dekahna ndungi dahin e, mungkin 40-50 tahun. Mbue batang kayu si arus itabah, man angkaten ka, balok-balokna pe arus itaka, ibentuk, janah ipersada. Bahtera e arus iban pintunna, arus telu tingkat, janah arus ka lit piga-piga kamar. Mbelin kemungkinenna, lit jendela-jendela i bagin datas dingding e, tarumna pe merebe gelah lau udan banci maler.—Kej. 6:14-16.

13. Bagin si deban kai bas tugas Nuah si ndauh beraten asangken mbangun bahtera, janah uga tanggapen jelma si nterem?

¹³ Asum tahun-tahun terus erdalan janah teridah bentuk bahtera e, pasti seh kal riahna ukur Nuah erkiteken idukung keluargana! Tapi, lit bagin si deban bas tugas e si ndauh beraten asangken mbangun bahtera. Nina Pustaka, Nuah sekalak ’si mbarken berita si ngena ate Dibata’. (Oge 2 Petrus 2:5.) Emaka, alu la mbiar ibenaken Nuah mpersingeti kalak jahat si la nggit ertobat kerna pengkernepen si nandangi reh. Uga tanggapen kalak e? Bas pudi wari, ikataken Jesus maka kalak e la ermediate. Ikatakenna maka sibuksa kalak e tep-tep wari, man dingen minem, sereh dingen empo. Dungna la iperdiatekenna persinget si ibereken Nuah. (Mat. 24:37-39) Pasti seh kal teremna si nggombangi Nuah ras keluargana; bage pe si ngancam ras nentang ia alu kekerasen. Banci saja, igagalken kalak e atena proyek e.

14. Gundari, kai si banci ipelajari keluarga Kristen bas Nuah ras keluargana nari?

¹⁴ Tapi, Nuah ras keluargana la pernah nerah. Terus kalak enda mbangun bahtera amin gia iakap kalak dahin e sepele, papak, ntah pe motu. Melala si banci ipelajari kalak Kristen si gundari bas kiniteken Nuah ras keluargana. Janah, kita nggeluh bas masa si ikataken Pustaka ”wari-wari pendungi” doni enda. (2 Tim. 3:1) Ikataken Jesus maka jamanta bali bagi jaman Nuah mbangun bahtera. Adi berita kerna Kinirajan Dibata la iperdiateken kalak, itokohina,  janah ianiayana kita, aruslah siinget Nuah. Kalak Kristen labo si pemenana ngadapi tantangen si bage.

15. Engkai maka Nuah erceda ate paksa umurna deher ku 600 tahun?

¹⁵ Puluhen tahun nggo lewat, bahtera e nandangi dung. Paksa umur Nuah deher 600 tahun, erceda ate ia. Lameh, bapana, mate. * Lima tahun kenca e, mate me bapa Lameh eme bulang Nuah, Metusalah, si umurna 969 tahun, umur manusia si gedangna si itulis bas Pustaka. (Kej. 5:27) Metusalah ras Lameh pernah nggeluh sejaman ras manusia si pemena, Adam.

16, 17.(a) Perentah si mbaru kai si ialoken Nuah paksa umurna 600 tahun? (b) Turiken pemandangen si la terlupaken si iidah Nuah ras keluargana.

¹⁶ Paksa umur Nuah 600 tahun, ialokenna perentah si mbaru bas Dibata Jahwe nari, nina, ”Bengketlah kam ras kerina keluargandu ku bas [bahtera] e.” Paksa si e pe, iperentahken Dibata ka Nuah gelah kerina jenis rubia-rubia ibaba ku bahtera, pitu pasang si la ipantangken, si cocok ipersembahken, janah si debanna sepasang-sepasang saja.—Kej. 7:1-3.

¹⁷ Pasti enda jadi sada pemandangen si la terlupaken. Bas ujung-ujung doni nari rehen me ribun rubia-rubia, lit si meter kal  perdalanna, lit si melet, si kabang, si nggarang, janah erbage-bage galangna, bentuk, ras sifatna. La perlu sibayangken uga serana Nuah ngarak-ngarak, ngiahken, ntah pe nami-nami rubia-rubia si meliar e guna masuk ku inganna bas bahtera. Ituriken kisah e, ”Kerina bengket ras Nuah ku bas [bahtera].”—Kej. 7:9.

18, 19.(a) Uga banci sijabap penungkunen-penungkunen kalak si sangsi kerna kisah Nuah? (b) Uga kepentaren Jahwe teridah i bas cara Ia milih nelamatken rubia-rubia tinepaNa?

¹⁸ Banci saja kalak si sangsi nungkun, ’Uga nge banci si e terjadi? Janah, uga maka banci rubia-rubia e tetap dame bas sada ingan?’ Cuba ukuri: La kin ngasup Dibata Si Nepa alam semesta ngaturken rubia-rubia si itepaNa, erbahan gelah ia melemuk ras tenang adi iperluken? Ingetlah, Jahwe me Si Nepa rubia-rubia. Bas pudi wari, ibelah duakenNa Lawit Merah, janah ipengadiNa matawari gelah la sundut. La kin banci ilakokenNa kerina si ijelasken bas kisah Nuah? Pasti banci, janah e me si ilakokenNa!

¹⁹ Payo, banci igunaken Dibata cara si deban guna nelamatken rubia-rubia si itepaNa. Tapi, alu bijaksana ipilihNa cara si banci ngingetken kita nandangi tanggung jabap si tangtangna nari iberekenNa man manusia, guna ngurus kerina mahluk si nggeluh i doni. (Kej. 1:28) Emaka, nterem orang tua gundari nggunaken kisah Nuah guna ngajarken anak-anakna maka iergai Jahwe rubia-rubia ras manusia si itepaNa.

20. Engkai maka seh kal sibukna Nuah ras keluargana i bas minggu terakhir sope Banjir si Mbelin?

²⁰ Ipebetehken Jahwe man Nuah maka seminggu nari reh me  Banjir si Mbelin. Pasti seh kal sibukna keluarga Nuah paksa si e. Bayangken, arus sikap iaturkenna kerina rubia-rubia ras panganna bage pe pangan kalak e janah ngangkat barang-barangna. Banci saja, ndehara Nuah ras ndehara Sem, Ham, ras Japet sibuk mpesikap bahtera e gelah sikap iiani.

21, 22.(a) Engkai maka la mamang ateta ngidah perbahanen kalak si sangsi bas jaman Nuah? (b) Ndigan nge Nuah ras keluargana ngadi igombangi?

²¹ Uga kalak si deban? Lalap la iperdiatekenna, amin pe iidahna bukti-bukti maka Jahwe masu-masu Nuah ras pendahinna. Pasti idah kalak e rubia-rubia erduyun-duyun masuk ku bahtera. Tapi, labo ateta mamang adi kalak e la ermediate. Gundari pe, nterem kalak la mperdiateken bage buena bukti si ncidahken maka kita paksana nggeluh bas wari-wari pendungi. Janah, bagi si inubuatken rasul Petrus, reh me kalak si megombang guna nggombangi janah nokohi kerina si ndalanken persinget Dibata. (Oge 2 Petrus 3:3-6.) Bage ka pe, Nuah ras keluargana pasti igombangi kalak.

²² Ndigan nge kalak e ngadi nggombangi? Ituriken kisah e maka paksa Nuah nggo dung maba keluargana ras rubia-rubia ku bahtera, ”ipintu [Jahwe] pintun [bahtera] ndai”. Adi iidah kalak si nggombangi e perbahanen Dibata ndai, pasti minter ia sinik. Adi e pe lang, udan meder si reh pasti erban ia sinik! Udan e terus reh la erngadi-ngadi erban sebelang doni banjir, bagi si ikataken Jahwe.—Kej. 7:16-21.

23. (a) Uga banci sieteh maka Jahwe la senang nandangi kematen kalak si jahat bas jaman Nuah? (b) Gundari, ngkai maka bijaksana adi siusih kiniteken Nuah?

²³ Meriah nge ukur Jahwe ngidah kematen kalak si jahat e? Lang! (Esek. 33:11) Sebalikna, nggo ibereNa kesempaten man kalak e guna ertobat ras ngelakoken kai si benar. Situhuna, banci nge ilakoken kalak e? Kegeluhen Nuah njabap penungkunen e. Alu erdalan ras Jahwe, patuh man baNa i bas kerinana, icidahken Nuah maka keselamaten banci idat. Banci ikataken, kiniteken Nuah ngukum doni masa si e; kinitekenna ncidahken alu tangkas kejahaten kalak paksa si e. Kinitekenna erbahan ia ras keluargana selamat. Adi usihndu kiniteken Nuah, kam ras kalak si ikelengindu pe banci selamat. Bali bagi Nuah, kam pe banci erdalan ras Dibata Jahwe selaku Temanndu. Janah, pertemanenndu e banci tahan rasa lalap!