1-3. (a) Engkai maka banci saja mbiar Ester njumpai perbulangenna? (b) Penungkunen kai saja si man bahasenta kerna Ester?

IPETENANG Ester bana asum ideherina kesain istana i Susan. Payo la menukah. Kerina kemewahen bas istana e ibahan guna erban kalak jengang. Lit pahaten si bentukna bagi lembu si erkabeng, pemanah, ras singa bas tembok batu bata si erbage curakna janah erndilap; tiang-tiang batu si galang ras patung-patung raksasa; inganna pe i taneh kendit si mbelang deherken Pegunungen Zagros si ersalju tampukna ras Lau Khoaspes si meciho. Tujunna kerina eme guna ngingetken kalak si reh kerna uga belinna kuasa dilaki si nandangi ijumpai Ester, dilaki si ngataken ia ”raja si mbelin”. Dilaki enda perbulangenna.

² Perbulangenna? Seh kal bedana Ahasweros ras perbulangen si banci saja iarapken sekalak singuda-nguda Jahudi si setia! * La iusihna contoh si mehuli bagi Abraham, dilaki si alu meteruk ukur patuh man petunjuk Dibata guna megiken Sara, ndeharana. (Kej. 21:12) La itandai raja enda Jahwe, Dibata si isembah Ester, bage pe HukumNa. Tapi, iangkai Ahasweros hukum Persia, termasuk hukum si ngelarang kai si nandangi ilakoken Ester. Hukum kai e? Menurut hukum e, ise pe si reh ngadap ku raja Persia adi la itenahken raja banci iukum mate. Ester la itenahken, tapi arus ia tetap njumpai raja. Asum reh deherna ku kesain istana si arah bas, i ja banci idah raja ia i kursi kinirajanna nari, banci saja iakap Ester bagi erdalan ku kematen.—Oge Ester 4:11; 5:1.

³ Engkai maka iadapina bahaya e? Janah, kai si banci sipelajari bas kiniteken diberu si luar biasa enda nari? Si  pemena, mari sinehen uga Ester dat keduduken si seh kal mehagana ras la banci idat kerina diberu, eme jadi ratu Persia.

4. Uga latar belakang Ester, janah ngkai maka ia tading ras Mordekai, turangna sembuyak bapa?

⁴ Ester anak melumang. La lit keterangen kerna orang tuana si mereken gelar Hadasa man bana, si bas cakap Heber ertina ”mirtel”, sinuan-sinuan si mentar bungana janah mejile. Paksa mate orang tua Ester, mekuah ate kade-kadena ia, eme dilaki si mehuli si gelarna Mordekai. Ia turang Ester sembuyak bapa, tapi Mordekai ndauh tuan. Ibabana Ester mulih janah ipebelinna bagi anakna jine.—Est. 2:5-7, 15.

5, 6. (a) Uga Mordekai mpebelin Ester? (b) Uga pergeluh Ester ras Mordekai i Susan?

⁵ Mordekai ras Ester nggeluh selaku kalak Jahudi buangen bas ibu kota Persia e. I je, banci saja arus iadapi kalak e melala penghinan perban agama ras Hukum si ipatuhina. Tapi pasti Ester terus rembak ras Mordekai si ngajari ia kerna Jahwe, Dibata si perkuah ate si nai megati nelamatken umatNa bas kesuliten nari, janah pasti ilakokenNa ka mulihi. (Im. 26:44, 45) Jelas me, Ester ras Mordekai terus sikeleng-kelengen dingen setia.

⁶ Banci saja Mordekai erdahin selaku pejabat istana i Susan, biasa ia kundul i gerbang ras juak-juak raja si debanna. (Est. 2:19, 21; 3:3) La banci ipastiken uga masa singuda-nguda Ester. Tapi, banci saja ia ngurus turangna si tuan asangken ia e janah ngurus rumah ka, si mungkin lit bas daerah si lebih sederhana i kepar lau anak ras istana. Banci jadi, meriah akapna lawes ku tiga i kota Susan janah idahna barang-barang si lit bas toko emas, toko pirak, ras si debanna. La pernah iarap Ester maka bas sada wari pagi lit i sekelewetna barang-barang si mewah e; tuhu-tuhu la ietehna uga kegeluhenna pagi.

7. Engkai maka Wasti ipengadi selaku ratu, janah kenca e kai si ilakoken raja?

⁷ Bas sada wari, gejek me kota Susan perban berita kerna masalah bas rumah tangga raja. Bas sada pesta man-man, isikapken Ahasweros man bangsawan-bangsawanna pangan si mewah ras anggur. Itenahken raja me Wasti, kemberahenna si mejile, si paksana ka erban pesta ras piga-piga diberu. Tapi, la nggit Wasti reh. Erkiteken terhina kal iakap raja bana janah merawa ia, isungkunna me penasehatna ukumen kai si patut ibereken man Wasti. Hasilna? Ipengadi me ia bas kedudukenna nari selaku ratu. Mulai me isiari suruh-suruhen raja kerina negeri guna ndarami singuda-nguda si mejile, janah ipilih raja me salah sada pagi guna jadi ratu si mbaru.—Est. 1:1–2:4.

8. (a) Engkai maka banci saja aru ate Mordekai asum Ester reh belinna? (b) Uga kita banci makeken pedah Pustaka kerna rupa si mejile? (Nehen ka Kuan-kuanen 31:30.)

⁸ Banci sibayangken uga Mordekai natap Ester alu kekelengen si bagi sekalak bapa, megah akapna janah maun-maun aru ka atena perban turangna e nggo jadi singuda-nguda si mejile rupana. Sioge, ”Ia sekalak singuda-nguda si mejile rupana, janah potongenna pe sikap.” (Est. 2:7) Menurut Pustaka si Badia, kalak si mejile pe perlu bijaksana dingen meteruk ukur. Adi lang, enda banci mpeturah kesombongen ras sifat-sifat si la mehuli si deban. (Oge Kuan-kuanen 11:22.) Setuju nge kam kerna si e? Adi Ester uga? Reh ulina nge ia ntah reh sombongna erkiteken rupana si mejile? Mari sinehen.

9. (a) Kai si terjadi paksa suruh-suruhen raja ngidah Ester, janah ngkai maka mberat kal iakapna sirang ras Mordekai? (b) Engkai maka ipediat Mordekai erjabu Ester ras kalak si la nembah Jahwe? (Nehen ka kotak.)

⁹ Idah suruh-suruhen raja me kinijilen Ester. Ibuatna me ia bas Mordekai nari janah ibaba ku istana si seh kal galangna i kepar lau anak ikut ras singuda-nguda si deban. (Est. 2:8) Pasti mberat kal akap kalak enda duana sirang perban nggo bagi bapa ras anak. Pastilah labo ate Mordekai anak angkatna enda erjabu ras kalak si la sada kiniteken, amin pe sekalak raja; tapi, la banci kai pe ilakokenna. * Pasti ibegiken Ester kal pedah Mordekai sope ia ibaba lawes! I bas perdalanen ku istana i Susan, nungkun-nungkun bas pusuh Ester. Uga nge ndia kegeluhenna pagi?

10, 11. (a) Lingkungen si mbaru banci mere pengaruh kai man Ester? (b) Uga Mordekai ncidahken maka terus iperdiatekenna Ester?

¹⁰ Kegeluhen Ester tuhu-tuhu nggo berubah. Tading me ia ras ”nterem singuda-nguda” si ipepulung bas kerina kuta i bas Kerajan Persia nari. Pasti la seri kerina kebiasan, cakap, ras perbahanen kalak enda. Kerina kalak enda iawasi sekalak pejabat si gelarna Hagai, janah ibahan me perawaten kinijilen si lengkap setahun dekahna, termasuk perawaten make minak si merim-merim. (Est. 2:8, 12) Keadan ras kegeluhen si bage menukah erbahan singuda-nguda e ngutamaken penampilen, janah jadi sombong ras senang ersaing. Adi Ester uga?

 ¹¹ Pasti lalap iukuri Mordekai si Ester. Sioge maka tep-tep wari, lawes ia ndeheri rumah diberu-diberu e janah iusahakenna meteh uga berita Ester. (Est. 2:11) Banci saja datna piga-piga keterangen bas pelayan si mehuli nari, enda erbahan ia tenang janah megah akapna. Engkai?

12, 13. (a) Uga perasan kalak i sekelewet Ester nandangi ia? (b) Engkai maka meriah ukur Mordekai paksa ietehna la ipebetehken Ester ia kalak Jahudi?

¹² Meriah ukur Hagai ngenen Ester, emaka mehuli kal perbahanenna, iberena pitu pelayan ras ingan si mehulina kal i rumah diberu-diberu e. Janah nina kisah e, ”Kerina si enggo ngidah Ester, erngena ate man bana.” (Est. 2:9, 15) Rupana si mejile saja nge si erbanca kalak erngena ate? Lang, perban Ester labo terjeng mejile saja.

 ¹³ Misalna, sioge, ”Kidekah si e, sue ras ajar Mordekai, la lit man ise pe ituriken Ester maka ia kalak Jahudi.” (Est. 2:10) Enggo ipebetehken Mordekai man Ester gelah la iturikenna latar belakangna selaku kalak Jahudi; pasti nggo ietehna maka pembesar-pembesar Persia curiga nandangi bangsana. Meriah kal ukurna perban Ester tetap bijaksana janah patuh, amin pe lanai ia ras!

14. Uga singuda-nguda ras anak perana si gundari banci ngusih Ester?

¹⁴ Gundari, singuda-nguda ras anak perana pe banci erbahan meriah ukur orang tuana bage pe kalak si deban si mpebelin ia. Paksa ndauh bas orang tuana nari, amin pe ikeleweti kalak si la gedang rukur, si la mehuli perbahanenna, ntah pe jahat, banci itulakna pengaruh si la mehuli janah iikutkenna patoken si itekina maka e benar. Alu bage, meriah ukur Bapana si ni surga ibahanna, bali bagi Ester.—Oge Kuan-kuanen 27:11.

15, 16. (a) Engkai maka Ester si ipilih raja? (b) Engkai maka mesera iakap Ester lit perubahen bas geluhna?

¹⁵ Paksa seh waktuna ngadap raja, iijinken me Ester milih kai pe si iperlukenna, banci saja gelah reh jilena ia. Tapi, alu meteruk ukur la ipindona lebihen asangken kai si ikataken Hagai. (Est. 2:15) Banci saja isedarina maka labo rupa si mejile saja si banci erban ngena ate raja; kesederhanan ras meteruk rukur eme ”perhiasen” si jarang lit bas istana e. Payo nge bage?

¹⁶ Ijabap kisah e, ”Lebih asangken singuda-nguda si deban, senang dingen malem kal ate raja ibahan Ester. Erkiteken si e ia ngenca ate raja si kelengna dingen si ngenana. Itamaken raja mahkota ku takal Ester janah iangkatna ia jadi kemberahen nggantiken Wasti.” (Est. 2:17) Pasti mesera iakap singuda-nguda kalak Jahudi si meteruk rukur enda nesuaiken diri ras perubahen i bas kegeluhenna, gundari ia nggo jadi ratu si mbaru, ndehara raja si mbelinna kal kuasana i doni paksa si e! Sombong nge ia erkiteken kedudukenna si mbaru e? Sitik pe lang!

17. (a) Alu cara kai saja Ester tetap patuh man bapa angkatna? (b) Engkai maka usihen Ester penting man banta gundari?

¹⁷ Tetap patuh Ester man bapa angkatna, Mordekai. Tetap irahasiakenna hubungenna ras kalak Jahudi. Selain e, paksa ieteh Mordekai maka lit pertakin guna munuh Ahasweros, alu patuh ipebetehken Ester persinget Mordekai man raja, emaka gagal me rencana si jahat e. (Est. 2:20-23) Tetap icidahken Ester kinitekenna nandangi Dibata alu terus meteruk rukur janah  patuh. Perlu kal siusih Ester gundari erkiteken nterem kalak lanai iergaina kepatuhen, padin iakapna mberontak. Tapi, kalak si tuhu-tuhu erkiniteken iergaina kepatuhen, bali bagi Ester.

18. (a) Kai si erbanca Mordekai la nggit erjimpuh man Haman? (Nehen ka cataten i teruh.) (b) Gundari, uga dilaki ras diberu si erkiniteken ngusih Mordekai?

¹⁸ Lit me sekalak dilaki si jadi kalak penting bas istana Ahasweros eme Haman. Itangkuhken raja me Haman jadi perdana menteri janah ia me jadi penasehat utama ras kalak si nomor dua bas kerajan e. Itetapken raja ka maka kerina kalak si jumpa ras pejabat e arus erjimpuh man bana. (Est. 3:1-4) Pasti enda jadi tantangen man Mordekai. Ietehna maka arus ipatuhina raja, tapi lebih iergaina ka Dibata. Haman e kalak Agag. Ertina, ia kesusuren Agag, raja Amalek si ibunuh nabi Dibata, Samuel. (1 Sam. 15:33) Perban seh kal jahatna kalak Amalek e, dungna ia jadi musuh Jahwe ras kalak Israel. Isumpahi Dibata me bangsa Amalek. * (Ul. 25:19) Banci kin sekalak Jahudi si setia erjimpuh man sekalak bangsawan Amalek? Lang, enda la banci ilakoken Mordekai. Paguh icikepna kesetianna. Asa gundari, dilaki ras diberu si erkiniteken nggit ngadapi bahaya guna ndalanken kai nina ayat enda, ”Kami arus ngikutken Dibata, labo manusia.”—Perb. 5:29.

19. Kai si ate Haman ilakokenna, janah uga ia mpengaruhi raja?

¹⁹ Merawa kal Haman. Tapi, la bias akapna terjeng ndarami cara guna munuh Mordekai saja. Ikernepkenna atena Mordekai ras kerina bangsana! Iusahaken Haman gelah segat ate raja man kalak Jahudi. Alu la ngataken gelar bangsa e, ibahanna bangsa e tempa-tempa bangsa si la penting, si ’nggeluh serap-serap i tengah-tengah rayat’. Si mekelekna ka, ikatakenna maka kalak enda la patuh man hukum raja; kalak enda pemberontak. Ikatakenna maka nggit ia mere sumbangen sen ku perbendaharan raja guna nutupi biaya pemunuhen kerina kalak Jahudi i bas kerajan e. * Ibereken Ahasweros me man Haman cincin setempel bas jari-jarina nari guna ngesahken perentah kai pe si iperluken.—Est. 3:5-10.

20, 21. (a) Kai pengaruhna momo si ibereken Haman nandangi kalak Jahudi i sebelang Kerajan Persia, termasuk Mordekai? (b) Kai si ipindo Mordekai gelah ilakoken Ester?

 ²⁰ Berkat me utusen-utusen si erkuda ku sebelang daerah kerajan e, imomokenna kerna ukumen mate man kalak Jahudi. Bayangken kai pengaruhna paksa momo e seh ku Jerusalem si ndauh, ingan sisa kalak Jahudi si mulih bas pembuangen i Babilon nari si paksana erjuang majekken mulihi kota si lenga lit tembok perlindungenna. Paksa ibegi Mordekai berita e, banci saja iingetna kalak enda, bage pe teman ras kade-kadena i Susan. Erkiteken gulut ukurna, irigatkenna bajuna, ipakena uis guni, icaburkenna abu ku takalna, janah ngandung me ia nderkuh-nderkuh i tengah kota. Paksa si e, Haman sangana kundul janahna minem-minem ras raja, sitik pe la erdejep bas pusuh Haman kerna ceda ate si ibahanna nandangi kalak Jahudi ras teman-temanna i Susan.—Oge Ester 3:12–4:1.

²¹ Ieteh Mordekai maka arus ia ertindak. Tapi, uga carana? Ibegi Ester kerna gulut ukurna e janah ikirimkenna uis, tapi la nggit Mordekai iapuli. Banci saja, nggo ndekah Mordekai tersungkun-sungkun ngkai maka ipediat Jahwe, Dibatana, si Ester ibuat bas ia nari janah jadi ratu sekalak penguasa si la nembah  Jahwe. Gundari, nggo mulai jelas teridah alasenna. Ikirim Mordekai me tenah man Ratu Ester, ikatakenna gelah ipindo Ester perkuah ate raja, guna mbela ”bangsana”.—Est. 4:4-8.

22. Engkai maka mbiar Ester njumpai perbulangenna, si sekalak raja? (Nehen ka cataten i teruh.)

²² Pasti aru kal ate Ester paksa ibegina berita e. Enda me ujin kiniteken si mbelinna man bana. Mbiar ia, janah terus terang ikatakenna i bas jabapenna man Mordekai. Iingetkenna Mordekai kerna hukum raja. Ngadap man raja alu la itenahken ertina ukumen mate. Kalak si ngelanggar banci selamat adi idudurken raja ciken emasna. Janah, lit kin alasen Ester ngarapken perkuah ate raja, ngidah kai si terjadi nandangi Wasti paksa itulakna perentah raja guna reh? Ipebetehkenna man Mordekai maka nggo 30 wari la itenahken raja ia! Emaka, tersungkun-sungkun Ester ntah kin nggo sambar ukur raja nandangi ia ras lanai atena ngena. *—Est. 4:9-11.

23. (a) Kai si ikataken Mordekai guna mpegegehi kiniteken Ester? (b) Engkai maka Mordekai patut siusih?

²³ Ibereken Mordekai jabapen si tegas guna mpegegehi kiniteken Ester. Ikataken Mordekai man Ester maka adi la ia ertindak, kalak Jahudi banci selamat alu cara si deban. Ester sendiri pe banci mate adi nggo reh penganiayan e. I jenda icidahken Mordekai kiniteken si paguh nandangi Jahwe, si la pernah mpediat umatNa ikernepken ntah pe mpediat janjiNa la terjadi. (Jos. 23:14) Kenca e, ikataken Mordekai man Ester, ”Banci jadi guna nampati bangsandu nge maka kam enggo iangkat jadi kemberahen.” (Est. 4:12-14) La kin patut siusih Mordekai?  Tek ia alu bulat ukur man Dibatana, Jahwe. Adi kita uga?—Kua. 3:5, 6.

24. Uga Ester ncidahken kiniteken ras kinipangen?

²⁴ Arus meter ibahan Ester keputusen. Ipindona man Mordekai gelah iiahkenna bangsana ras-ras erpuasa telu wari dekahna, janah idungina tenahna alu kata-kata si ncidahken kiniteken ras kinipangenna si terus terbegi ngasa gundari, ”Adi terpaksa kin aku mate guna si e; mate pe labo dalih.” (Est. 4:15-17) Bas telu wari e, pasti ertoto ia alu tutus, lebih asa biasana. Dungna, seh me waktuna. Ipakena paken ras perhiasen si mejilena, ipejilena bana gelah jadi ate raja. Kenca e, berkat me ia.

25. Turiken uga keadanna paksa ijumpai Ester perbulangenna.

²⁵ Bagi si ituriken bas pemena pasal enda, berkat me Ester njumpai raja. Banci sibayangken uga gulutna ukurna janah uga tutusna atena ertoto. Masuk me ia ku kesain istana si arah bas, janah banci idahna jenari Ahasweros kundul bas kursi kinirajanna. Banci saja icubaken Ester mperdiateken ayo raja guna meteh uga keadan pusuhna. Bicara arus ia nimai, pasti bagi ratusen tahun dekahna. Tapi dungna, iidah perbulangenna me ia. Pasti sengget kal raja, tapi la ia merawa. Idudurkenna ciken emasna!—Est. 5:1, 2.

26. Engkai maka kalak Kristen situhu-tuhu perlu kinipangen bagi Ester, janah ngkai tindaken Ester enda permulanna denga?

²⁶ Ialo-alo raja me Ester janah ibegikenna ia. Enggo iban Ester sada tindaken guna Dibatana ras bangsana, enda jadi usihen kiniteken si mehuli man kerina umat Dibata. Gundari, terus iinget kalak Kristen situhu-tuhu usihen si mehuli e. Bagi si ikataken Jesus, lit kekelengen si nggit erkorban bas pengikutna. (Oge Johanes 13:34, 35.) Guna ncidahken kekelengen si bage, megati iperluken kinipangen bagi si nggo icidahken Ester. Tapi, amin gia nggo ibela Ester umat Dibata paksa si e, enda permulanna denga. Uga carana maka banci tek banna raja maka nggo ibahan Haman, penasehat kepercayanna, sada rencana jahat? Uga banci iselamatkenna bangsana? Penungkunen-penungkunen enda sibahas kari bas pasal seterusna.