1, 2. (a) Pendahin si uga nge si idahiken Rut? (b) Bagin si positif kai si ipelajari Rut bas Hukum Dibata nari bage pe umatNa?

ERJIMPUH Rut deher gun-gunen gandum si nggo ipepulungna bas wari e. Nandangi gelap me wari, janah nterem si erdahin i juma-juma sekelewet Betlehem nggo latih akapna erdalan ku kerabangen kuta si kitik si lit i datas uruk. Pastilah latih akap Rut kerina dagingna erkiteken terus ia erdahin pagi-pagi nari. Tapi, terus paspasina gandum si nggo ipepulungna e guna ngelepasken biji arah tangkena. Amin gia mberat kal dahin e, meriah kal ukurna bas wari e.

² Enggo nge reh ulina keadan diberu si nggo mbalu e? Bagi si nggo siidah bas pasal si nggo lewat, nggo iputusken Rut guna ngikutken Naomi, simetuana, janah erjanji terus ikut ras ia janah erbahan Jahwe, Dibata si isembah Naomi, jadi Dibatana ka. Duana diberu si paksana erceda ate e ras-ras reh Moap nari ku Betlehem, janah minter ieteh Rut beru Moap e maka Hukum Jahwe erbahan pengaturen si erguna ras ngergai kalak si musil i Israel, termasuk kalak pertandang. Janah gundari, malem pusuhna si ceda e erkiteken igejapkenna kiniulin juak-juak Jahwe si setia ndalanken Hukum.

3, 4. (a) Uga Boas mpegegehi Rut? (b) Uga usihen Rut banci nampati kita i bas keadan si sulit secara ekonomi?

³ Salah sada eme Boas, sekalak dilaki si bayak si nggo berumur, si mada juma ingan Rut mumahi sisa ruhi peranin. Bagi sekalak bapa, Boas mperdiateken ia bas sada wari enda. Cirem Rut paksa ingetna kata-kata Boas si mehuli si muji ia erkiteken ngurus Naomi janah milih cilinggem i teruh kabeng Dibata si benar, Jahwe.—Oge Rut 2:11-14.

⁴ Tapi, banci saja tersungkun-sungkun Rut kerna masa depanna. Selaku pertandang si musil janah la lit perbulangen ntah pe anak, uga ia banci ncukupi keperlunna ras Naomi bas masa seterusna? Bias nge alu mumahi sisa ruhi peranin saja?  Janah, ise si ngurus ia adi nggo metua kari? Wajar nge aru atena janah enda jadi tangkelenna. I bas masa si sulit secara ekonomi gundari, nterem kalak gulut ukurna. Mbue si banci siusih bas Rut nari asum sipelajari uga kinitekenna nampati ia ngatasi kesuliten si bage.

5, 6. (a) Kai saja si idatken Rut i bas wari si pemena mumahi sisa ruhi i juma Boas? (b) Uga tanggapen Naomi paksa ngidah Rut?

⁵ Dung kenca Rut maspasi ras mpepulung gandum e, menam datna sada ayan, ntah pe kira-kira 22 liter, si beratna banci saja 14 kilogram! Itimpusna kenca e ijujungna janahna erdalan ku Betlehem bas sundutna matawari.—Rut 2:17.

⁶ Meriah kal ukur Naomi ngidah permain si ikelengina mulih, janah banci saja mamang atena ngidah melala gandum ibaba Rut. Babana ka pangan i bas juma nari si ibereken Boas man kalak si erdahin, janah pan kalak enda me pangan si sederhana e. Isungkun Naomi, ”I ja nari datndu e kerina? I bas juma ise kam ndai erdahin? Dibatalah si masu-masu kalak si enggo nampati kam.” (Rut 2:19) Ipegermeti Naomi maka mbue pangan ibaba Rut erkiteken lit si mperdiateken ras si nampati ia.

7, 8. (a) Menurut Naomi, janari rehna kiniulin Boas, janah ngkai? (b) Uga nari tole icidahken Rut kekelengenna si setia man simetuana?

⁷ Meriah me bual kalak enda duana, janah ituriken Rut man Naomi kerna kiniulin Boas. Megogo kal ate Naomi janah nina, ”[Jahwe] lah si masu-masu ia; [Jahwe] tetap nehken padanNa man kalak si nggeluh ras si enggo mate.” (Rut 2:20) Menurut Naomi kiniulin Boas e rehna bas Jahwe nari. Ia me si ngiahken juak-juakNa gelah melumbar ras si njanjiken pasu-pasu man umatNa si mehuli.—Oge Kuan-kuanen 19:17.

⁸ Iahken Naomi me Rut gelah ialokenna tawaren Boas, eme tetap mumahi sisa rani i jumana janah tetap ndeher ras diberu-diberu si ngemo i je gelah la iganggu kalak si rani. Ibegiken Rut kai si ikatakenna e, janah ”Rut tetap tading ras bibina”. (Rut 2:22, 23) I bas kata-kata enda banci siidah sekali nari sifat khusus Rut, eme kekelengen si setia. Usihenna banci ngiahken kita guna ngukuri penting ntah lang siakap iketen keluarga, setia ntah lang kita ndukung kalak si nikelengi, janah sisampati ia ntah lang paksa perlu. Kekelengen si setia si bage la pernah la iperdiateken Jahwe.

9. Kai si banci sipelajari bas Rut ras Naomi nari kerna keluarga?

 ⁹ Sada keluarga si lengkap nge Rut ras Naomi? Bas piga-piga kebudayan, ikataken keluarga e ”lengkap” adi lit perbulangen, ndehara, anak dilaki ras diberu, bulang, nini, ras seterusna. Tapi, usihen Rut ras Naomi ncidahken maka dua kalak saja pe banci jadi sada keluarga adi sikeleng-kelengen ras ncidahken kiniulin. Iergaindu nge keluargandu, la soal uga keadanna? Ipersingeti Jesus kerina pengikutna maka runggun Kristen banci jadi keluarga man kalak si la lit keluargana.—Mrk. 10:29, 30.

10. I bas kai saja ate Naomi nampati Rut?

¹⁰ Mulai rani jelai (barli) bas bulan April ngasa rani gandum bas bulan Juni, terus ipumahi Rut sisa rani i juma Boas. Tande wari tande mingguna, pasti terus iukuri Naomi kai si banci ilakokenna man permainna. Sanga i Moap mbarenda, sempat ikataken Naomi maka lanai bo banci idaramina perbulangen man Rut. (Rut 1:11-13) Tapi gundari, mulai iukurina kerna si e. Ideherina Rut janah nina, ”O anakku, banci kin la kudarami man bandu kecion?” (Rut 3:1, Padan si Ndekah si Nipegendek, J.H. Neumann) Bas masa si e, biasana idarami orang tua teman geluh anakna, janah Rut nggo bagi anak Naomi. Idaramina atena ”kecion” man Rut, si ertina keamanen ras perlindungen si banci ibereken sekalak perbulangen. Tapi, kai si banci ilakoken Naomi?

11, 12. (a) Hukum si perkeleng si apai si imaksudken Naomi paksa ngataken maka Boas e kalak si lit hakna nukur mulihi? (b) Uga tanggapen Rut nandangi kai si ipindoken simetuana?

¹¹ Paksa tangtangna kal ituriken Rut kerna Boas, ikataken Naomi, ”Ndeher denga kal perkade-kadenta ras ia. Ia me sada i bas kalak si ertanggung jawab lako pekena-kena kita [ntah pe, ”kalak si lit hakna nukur kita mulihi”].” (Rut 2:20) Kai ertina e? Hukum si ibereken Dibata man kalak Israel termasuk pemere si perkeleng man keluarga si sangana ngadapi kesuliten erkiteken kemusilen ntah pe kepaten anggota keluarga. Adi lit sekalak diberu si mbalu sope mupus, pasti  ceda kal ukurna erkiteken lanai lit si nerusken gelar perbulangen ras garis keturunenna. Tapi, iijinken Hukum Dibata senina dilaki e ngelakomangani diberu e gelah banci ipupusna kesusuren si nerusken gelar perbulangenna ndube ras ngurus taneh warisen keluargana. *—Ul. 25:5-7.

¹² Ituriken Naomi me rencanana. Banci sibayangken uga riahna ukur Rut janah luar biasa iakapna asum simetuana ngerana. Hukum Israel sada hal si mbaru man Rut, janah melala kebiasanna si asing denga akapna. Amin gia bage, iergaina kal Naomi emaka alu mehuli ibegikenna kata-kata Naomi. Kai si ipindo Naomi banci saja aneh akapna ntah pe sada hal si man kemelanken, janah pe banci ncedai gelar Rut, tapi setuju ia ngelakokenca. Nina, ”Uga nindu, bage kubahan bibi.”—Rut 3:5.

13. Pelajaren kai si banci sidat bas Rut nari kerna ngaloken pedah bas kalak si tuan asangken kita? (Nehen ka Jop 12:12.)

¹³ Maun-maun mesera iakap kaum muda megiken pedah bas kalak si tuan asangken ia ras si lebih erpengalamen. Akapna la iangkai kalak e permasalahen ras perbeben kaum muda. Contoh sifat Rut si meteruk ukur ncidahken maka mbelin kal gunana megiken pedah kalak si ndauh tuan si ngkelengi  kita janah si atena kita ndatken si mehulina. (Oge Masmur 71:17, 18.) Tapi, kai pedah Naomi, janah lit nge gunana man Rut alu matuhisa?

14. Kai kin ingan pengeriken e, janah uga e igunaken?

¹⁴ Bas berngi e, erdalan me Rut ku ingan pengeriken, eme ingan si tanehna kendit janah padat, ingan piga-piga perjuma maba biji guna ierik ras ipiari. Buen inganna i bas reben ntah pe i bas uruk erkiteken adi nggo ben bage pe nandangi berngi meter angin i je. Guna nirangken biji bas segal nari bage pe nggala, kalak si erdahin make garpu ntah pe sekop guna ngambekkenca ku datas gelah segalna iembusken angin tapi bijina mulihken ndabuh ku taneh.

15, 16. (a) Turiken uga keadan i bas ingan pengeriken paksa nggo dung Boas erdahin bas berngi e. (b) Uga maka banci Boas sedar maka Rut paksana tayang arah nahena?

¹⁵ Alu erbuni-buni iperdiateken Rut kalak si erdahin si menam dung miari. Iawasi Boas dahin enda ngasa biji-biji e ergun-gun. Kenca elah man, tayang ia deherken salah sada gun-gunen e. Enda biasa ilakoken guna njagai asil peranin si meherga gelah ula itangko kalak. Iperdiateken Rut me Boas si mulai tertunduh. Enda me waktuna ndalanken rencana Naomi.

¹⁶ Alu manjar-anjar ideheri Rut me Boas, erdebet-debet jantungna. Idahna Boas nggo terpedem. Kenca e, bagi rencana Naomi, italangi Rut cabin nahe Boas, jenari tayang ia arah  nahena. Kenca e nimai me ia. Waktu terus erdalan. Ndekah kal akap Rut. Dungna, bas tengah berngi medak me Boas. Nggirgir ia perban bergehna, emaka erkusur ia icabinina mulihi nahena. Tapi, tempa lit akapna jelma i je. Ituriken kisah e, ”Tersengget ia ngidah sekalak diberu medem i deherna.”—Rut 3:8.

17. Uga banci sieteh maka la lit maksud Rut si la mehuli paksa tayang deherken nahe Boas?

¹⁷ ”Ise kam?” sungkun Boas. Ngaloi Rut mungkin alu nggirgir, ”Aku, Rut, kalak si la metunggung dat perkuah atendu. . . . Kam kap kade-kade kami si banci jadi penebus kami [ntah pe, ”si lit hakna nukur kami mulihi”]; e maka mekuah min atendu, ibuatndu min aku jadi ndeharandu.” (Rut 3:9) Jabapen Rut ncidahken maka labo lit maksudna ngelakoken si la mehuli paksa tayang deherken nahe Boas. Rut ngelakoken kai si biasa paksa si e, janah tanggapen Boas alu jelas ncidahken maka perbahanen Rut e murni janah patut ipuji.

18. Kai si ikataken Boas guna erbahan Rut tenang, janah uga Rut ncidahken kesetianna?

¹⁸ Alu manjar-anjar ngerana me Boas, janah pasti tenang Rut megikenca. Ikataken Boas, ”[Jahwe] si masu-masu kam. Belinen denga icidahkenndu kekelengenndu man kade-kadendu arah perbahanenndu si genduari enda asangken si enggo ibahanndu man bibindu. Situhuna banci nge kam tersereh man anak perana si bayak tah musil adi bage atendu.” (Rut 3:10) Sedar Boas maka situhuna menukah nge iakap Rut ndarami perbulangen si nguda denga, ntah ia bayak ntah pe musil. Sebalikna, Rut erbahan mehuli atena labo man Naomi saja, tapi pe man perbulangen Naomi si nggo mate, guna nerusken gelarna i kuta kemulihenna. La ateta mamang maka jadi kal ate Boas diberu si nguda denga e si la mentingken bana.

19, 20. (a) Engkai maka la minter ilakomangani Boas si Rut? (b) Kai buktina Boas mehuli ras mediate man Rut ras gelarna?

¹⁹ Iterusken Boas, ”Janah gundari, ula atendu aru, nakku. Kerina si nikatakenndu banci kusehken, sabap kerina anak kuta enda metehsa maka kam sekalak diberu si seh kal ulina.” (Rut 3:11, Terjemahan Dunia Baru) Meriah ukurna  lit kesempaten ngelakomangani Rut; banci saja labo atena mamang paksa ipindo ia nukur mulihi. Tapi, Boas sekalak dilaki si mbiar man Dibata janah la mentingken bana. Ikatakenna man Rut maka lit denga sekalak si terdeheren perkade-kadenna ras Naomi si lit hakna nukur mulihi. Leben ibereken Boas kesempaten ndai man dilaki e guna jadi perbulangen Rut.

²⁰ Isuruh Boas me Rut tunduh mulihi ngasa erpagi-pagi; kenca e banci ia lawes alu la lit si metehsa. Ijaga Boas atena gelar Rut ras gelarna, perban banci saja iakap kalak nggo terjadi si la mehuli. Medem ka Rut mulihi deherken nahe dilaki e, banci saja reh tenangna ia erkiteken iperdiateken Boas pemindonna alu mehuli. Kenca e, sope terang wari, medak me Rut. Ikuseken Boas gandum ku uis Rut, mulih me ia ku Betlehem.—Oge Rut 3:13-15.

21. Kai saja si erbanca Rut itandai selaku ”diberu si seh kal ulina”, janah uga banci siusih ia?

²¹ Seh kal riahna ukur Rut paksa ngukuri ranan Boas, erkiteken itandai kalak kepeken ia selaku ”diberu si seh kal ulina”! Gelarna si mehuli e pasti lit hubungenna ras sura-surana si mbelin guna nandai ras ngelayani Jahwe. Rut pe mehuli ras mediate man Naomi bage pe bangsana, janah nggit nesuaiken diri ras kebiasan si pasti asing iakapna. Adi siusih kiniteken Rut, pasti siusahaken ngergai kalak si deban ras kebiasanna. Adi bage, banci sidat gelar si seh kal ulina.

22, 23. (a) Banci saja kai erti pemere Boas man Rut? (Nehen ka cataten i teruh.) (b) Naomi ngiahken Rut guna ngelakoken kai?

²² ”Uga nina, anakku?” isungkun Naomi seh kenca Rut i rumah. Banci saja ieteh Naomi atena kerna mbalu denga nge Rut bagi si mbarenda ntah nggo lit kemungkinenna ia erjabu. Minter ituriken Rut man simetuana kerina si terjadi antara ia ras Boas. Icidahken Rut gandum si ibereken Boas alu melumbar man Naomi. *—Rut 3:16, 17.

²³ Alu bijaksana isuruh Naomi me Rut gelah i rumah saja bas wari si e janah la mumahi sisa ruhi i juma. Ipetetapna ukur  Rut, ”Ugapa pe sendah labo ia ngadi seh idungina persoalen enda.”—Rut 3:18.

24, 25. (a) Uga Boas ncidahken maka ia dilaki si bujur ras la mentingken bana? (b) Kai saja pasu-pasu si idatken Rut?

²⁴ Payo tuhu, lawes Boas ku kerabangen kuta, ingan si biasana ipake pertua-pertua guna runggu, janah itimaina biak senina Elimelek si ndube. I lebe-lebe saksi, itawarken Boas kesempaten man dilaki e guna nukur mulihi juma Naomi alu ngelakomangani Rut. Tapi, la ia nggit, erkiteken banci ncedai warisenna. Kenca si e, i lebe-lebe saksi i kerabangen kuta e, ikataken Boas maka ia me si nukur mulihi taneh Elimelek, perbulangen Naomi si nggo mate, janah ngempoi Rut, balu-balu Mahlon, anak Elimelek. Ikataken Boas maka ngarap ia gelah ”erta kalak si enggo mate ndube, bage pe gelarna ola masap”. (Rut 4:1-10) Boas tuhu-tuhu dilaki si bujur ras la mentingken bana.

²⁵ Erjabu me Boas ras Rut. Seterusna, sioge, ”Erkite-kiteken pemasu-masun [Jahwe] mehuli kula si Rut, jenari ipupusna sekalak anak dilaki.” Ipebelin diberu-diberu i Betlehem me ukur Naomi janah ipujina Rut erkiteken ndauh ia ulin asangken pitu anak dilaki Naomi. Pudi wari, sieteh maka anak Rut jadi nini-bulang Raja Daud si mulia. (Rut 4:11-22) Janah, Daud jadi nini bulang Jesus Kristus.—Mat. 1:1. *

26. Usihen Rut ras Naomi ngingetken kita nandangi kai?

²⁶ Rut tuhu-tuhu ipasu-pasu, bage pe Naomi, si nampati mpebelin anak Rut bagi anakna jine. Kegeluhen duana diberu enda sada penginget si jelas maka iperdiateken Dibata Jahwe kerina kalak si nggit ndahiken kai pe guna ncukupi keperlun keluargana bage pe kalak si ngelayani Ia alu setia radu ras umat pilihenNa. La Ia pernah lupa masu-masu kalak si erkiniteken, bagi Boas, Naomi, ras Rut.