1, 2. (a) Turiken uga perdalanen Rut ras Naomi janah ngkai maka mbages kal ceda ate kalak enda. (b) Engkai maka banci ikataken perdalanen Rut ras Naomi la seri?

ERDALAN Rut i sebelah Naomi i dalan si mentasi kendit Moap si meter anginna. Kitik kal kalak enda duana teridah i tengah-tengah kendit si mbelang e. Iperdiateken Rut maka awih-awih kalak e nggo reh gedangna, tanda maka nandangi ben me wari. Itatapna simetuana, janahna rukur ntah nggo nge banci ndarami ingan erberngi. Keleng kal atena Naomi janah kai pe ilakokenna guna kesangapen Naomi.

² Mbages kal ceda ate diberu e duana. Naomi nggo piga-piga tahun mbalu, tapi mate ka duana anakna, Kilyon ras Mahlon. Rut pe erceda ate erkiteken Mahlon perbulangenna. Gundari paksana ia ras Naomi erdalan nuju ku ingan si seri, kota Betlehem i Israel. Tapi, banci ikataken, perdalanen kalak enda la seri. Naomi mulih ku kuta kemulihenna. Tapi Rut ku negeri si la itandaina, nadingken kade-kade, kuta kemulihen, ras kerina kebiasanna, termasuk dibata-dibatana.—Oge Rut 1:3-6.

3. Penungkunen kai saja si jabapenna nampati kita ngusih kiniteken Rut?

³ Kai si erbanca diberu si nguda denga e nggit erbahan perubahen si bage belinna? Uga maka banci Rut megegeh ndalani kegeluhen si mbaru janah ngurus Naomi? Alu meteh jabapenna, mbue si banci siusih bas kiniteken Rut nari, beru Moap e. (Nehen ka kotak ” Sada Mahakarya si Kitik”.) Si pemena, mari sibahas ngkai maka duana diberu enda ngelakoken perdalanen si ndauh ku Betlehem.

4, 5. (a) Engkai maka keluarga Naomi pindah ku Moap? (b) Tantangen kai saja si ihadapi Naomi i Moap?

⁴ Rut ipebelin i Moap, negeri si kitik i sebelah timur Lawit Mate. Buen daerahna kendit, melala embang, janah i japa pe lit kerangen. Taneh perjuman i ”negeri Moap” terus mehumur, amin  pe Israel sangana kelihen. Malahen, enda me dalanna Rut jumpa ras Mahlon bage pe keluargana.

⁵ Erkiteken kelihen i Israel, Elimelek, perbulangen Naomi, erban keputusen guna maba ndehara ras duana anakna pindah ku Moap janah tading i je jadi kalak pertandang. Enda pasti sada tantangen nandangi kiniteken tep-tep anggota keluarga, sabap kalak Israel arus ratur eribadat bas ingan si badia si itetapken Jahwe. (Ul. 16:16, 17) Berhasil Naomi mpertahanken kinitekenna. Tapi, tetap ceda kal ukurna paksa perbulangenna mate.—Rut 1:1-3.

6, 7. (a) Engkai maka aru ate Naomi paksa iempoi anak-anakna beru Moap? (b) Engkai maka perbahanen Naomi nandangi duana permainna patut ipuji?

⁶ Bas pudi wari, banci saja ceda kal ukur Naomi paksa duana anakna erjabu ras beru Moap. (Rut 1:4) Ietehna maka mbarenda iusahaken Abraham kal, nini bulang bangsana, ndarami ndehara man Isak anakna, bas kade-kadena nari si nembah Jahwe. (Kej. 24:3, 4) Ipersingeti Undang-Undang Musa ka bangsa Israel gelah anak-anakna la erjabu ras kalak pertandang erkiteken banci erbahan umat Dibata nembah berhala.—Ul. 7:3, 4.

⁷ Tapi, tetap iempoi Mahlon ras Kilyon beru Moap. Amin gia banci saja aru ate Naomi ntah pe kecewa, iusahakenna kepe ngkelengi janah mehuli man duana permainna, Rut ras Orpa. Banci saja iarapkenna gelah kalak enda pe banci nembah Jahwe. Si pasti, Rut ras Orpa pe keleng atena Naomi. Hubungen si mehuli e nampati kalak enda megenggeng paksa ngadapi mara. Duana diberu si nguda denga enda nggo mbalu sope lit pupusna.—Rut 1:5.

8. Kai si banci saja erbahan Rut tertarik man Jahwe?

⁸ Banci nge agama Rut nampati ia ngadapi mara e? Mungkin lang. Kalak Moap nembah melala dibata, janah dewa utama kalak e, eme Kemos. (Bil. 21:29) Paksa si e, kebiasan mbue agama eme kekerasen janah erban kalak mbiar, termasuk ngkorbanken anak-anak. Banci saja agama kalak Moap pe bage. Pemeteh si idat Rut bas Mahlon ntah pe Naomi nari kerna Jahwe, Dibata Israel si perkeleng dingen perkuah ate, erbahan ia sedar maka ndauh kal bedana Jahwe ras dibatana. Kekuasan Jahwe dem kekelengen, labo erban mbiar. (Oge Ulangen 6:5.) Ceda ate erkiteken itadingken perbulangenna erban Rut reh rembakna ras Naomi janah Rut pe nggit megiken simetuana ngerana kerna Dibata Jahwe Si Mada Kuasa, tinepaNa si luar biasa, bage pe perbahanenNa si perkeleng janah nggit ngalemi umatNa.

9-11. (a) Keputusen kai si ibahan Naomi, Rut, ras Orpa? (b) Kai si banci sipelajari i bas mara si ihadapi Naomi, Rut, ras Orpa?

⁹ Naomi pe tertima-tima nandangi berita bas kuta kemulihenna nari. Sada wari ibegina me berita banci saja bas sekalak  pedagang keliling maka kelihen i Israel nggo ngadi. Mulai iperdiateken Jahwe ka umatNa. Sekali nari keadan kota Betlehem cocok ras erti gelarna, eme ”Rumah Roti”. Iputusken Naomi me mulih.—Rut 1:6.

¹⁰ Kai si ilakoken Rut ras Orpa? (Rut 1:7) Kenca ras-ras ndalani kiniseran, hubungen kalak e ras Naomi reh deherna, khususna Rut, si banci saja tertarik nandangi kiniulin Naomi ras kinitekenna si paguh man Jahwe. Teluna diberu si mbalu e ras-ras berkat ku Juda.

¹¹ Kisah Rut ngingetken kita maka kalak si mehuli, kalak si tutus, ras kalak jahat pe banci kena mara ras ngenanami ceda ate. (Peng. 9:2, 11) Kisah enda pe ncidahken maka paksa mbages kal ceda ateta, mehuli kal adi sidarami pengapul ras dukungen bas kalak si deban nari, khususna kalak si ernalem man Jahwe, Dibata si isembah Naomi.—Kua. 17:17.

12, 13. Engkai maka isuruh Naomi gelah Rut ras Orpa mulih ku rumahna labo nemani ia, janah tangtangna uga tanggapen diberu enda duana?

¹² Asum reh dauhna teluna diberu si mbalu enda nadingken Moap, lit ka kearun ate si deban si jadi ukuren Naomi. Iukurina duana diberu si nguda denga si lit i sampingna ras kekelengen si nggo icidahken kalak e man bana ras anak-anakna. La ia tega nambahi kiniseran kalak e. Adi itadingken kalak e kuta kemulihenna janah ikut ras ia, kai si banci ilakokenna man kalak e i Betlehem?

¹³ Dungna, ikataken Naomi, ”Mulihkenlah kam ku jabu orang tuandu sekalak-sekalak. [Jahwe] lah si erbahan mehuli man bandu bagi kiniulinndu man bangku bage pe man perbulangenndu ndube.” Iarapkenna ka gelah ibere Jahwe kalak e perbulangen ras kegeluhen si mbaru. Nina kisah e ka, ”Iema Naomi permainna tanda persirang-sirangenna, tapi minter nderkuh ia duana.” Banci siangkai ngkai maka mberat akap Rut ras Orpa sirang ras  diberu si mehuli dingen la mentingken bana e. Duana kalak e tetap ertahan, nina, ”Lang bibi! Ate kami ikut ras kam ndahi bangsandu.”—Rut 1:7-10.

14, 15. (a) Ku ja saja Orpa mulihken? (b) Uga Naomi nami-nami Rut gelah nadingken ia?

¹⁴ Tapi, Naomi la nerah. Tetap ikatakenna maka la melala si banci ilakokenna man kalak e i Israel, erkiteken lanai lit perbulangenna guna mereken keperlunna, lanai lit anak-anakna si banci erjabu ras kalak e, janah lanai mungkin ia erjabu ntah pe mupus. Ikatakenna uga getemna pusuhna erkiteken lanai ngasup mereken keperlun kalak e. Sedar Orpa maka kata-kata Naomi e payo tuhu. I Moap, lit keluargana, nande, ras rumah si nimai ia. Banci saja, madin akapna tetap tading i Moap. Emaka, alu ukur mberat, iemana Naomi janah lawes me ia.—Rut 1:11-14.

¹⁵ Adi Rut uga? Kata-kata Naomi ndai pe berlaku man bana. Tapi, sioge, ’Rut ngikutken bibina.’ Banci saja kenca iterusken Naomi perdalanenna, isedarina maka iikutken Rut kepeken ia pudi nari. Ngerana Naomi, nina, ”O Rut, cimbangndu Orpa enggo mulih ku bangsana ras ku dibata-dibatana. Mulihlah kam ras ia.” (Rut 1:15) Kata-kata Naomi ncidahken keterangen si penting man banta. Orpa labo mulih ku bangsana saja tapi pe ku ”dibata-dibatana”. Puas akapna nembah Kemos ras dibata palsu si debanna. Bage ka nge si igejapken Rut?

16-18. (a) Uga Rut ncidahken kekelengen si setia? (b) Kai si banci sipelajari i bas Rut nari kerna kekelengen si setia? (Nehen ka gambar kalak e duana i teruh enda.)

¹⁶ Paksa Rut natap Naomi bas dalan si mesuni e, tek ia nandangi kai si igejapkenna. Keleng kal atena Naomi bage pe Dibata si  ilayani Naomi. Emaka, ikataken Rut, ”Ola suruhndu aku nadingken kam bibi! Raslah kita berkat. Ku ja kam lawes, ku je aku, i ja kam ringan i je aku ringan. Bangsandu jadi bangsangku, janah Dibatandu jadi Dibatangku. I ja gia kam mate, i je pe aku mate, janah i je me aku ikuburken. Ersumpah aku maka [Jahwe] si ngukum aku alu kiniseran si mberatna adi kusirangken kam; pala kematen kin si nirangken kita duana.”—Rut 1:16, 17.

¹⁷ Seh kal luar biasana kata-kata e, asa gundari pe iinget kalak denga, amin gia nggo kira-kira 3.000 tahun Rut mate. Alu tepat kata-kata e ncidahken sifat si meherga, eme kekelengen si setia. Seh kal mbagesna ras setiana kekelengen Rut si erbanca iikutkenna Naomi ku japa pe ia lawes. Kematen ngenca si banci nirangken kalak e. Bangsa Naomi jadi bangsana, erkiteken nggo itadingken Rut kerina si itandaina i Moap, bage pe dibata-dibata kalak Moap. La bagi Orpa, alu bulat ukur ikataken Rut maka atena gelah Jahwe, Dibata si isembah Naomi, jadi Dibatana ka. *

¹⁸ Gundari, kalak enda ngenca duana si nerusken perdalanen si ndauh ku Betlehem, si iperkiraken sada minggu dekahna. Tapi, amin gia kalak enda erceda ate denga, terapuli ia duana erkiteken lit temanna sendalanen.

19. Menurutndu, uga carana banci siusih kekelengen Rut si setia i bas keluarga, sapih-sapih teman, bage pe bas runggun?

¹⁹ Doni enda dem ceda ate. I bas masa geluhta gundari, si ikataken Pustaka wari si ”mbue reh kiniseran”, sihadapi erbage kiniseran ras ceda ate. (2 Tim. 3:1) Emaka seh kal pentingna sifat Rut e, eme kekelengen si setia. Kekelengen si bage, si ngiahken sekalak jelma ngiketken dirina kempak kai ntah pe ise si ikelengina janah la nggit ngelepaskenca, eme gegeh si erguna i bas doni si reh kelekna enda. Siperluken enda i bas perjabun, hubungen keluarga, pertemanen, bage pe bas runggun Kristen. (Oge 1 Johanes 4:7, 8, 20.) Alu mpebelin kekelengen enda, siusih usihen Rut si seh kal ulina.

20-22. (a) Perubahen kai si nialami Naomi erkiteken kegeluhenna i Moap? (b) Pendapat si salah kai si lit bas Naomi kerna kiniseranna? (Nehen ka Jakup 1:13.)

²⁰ Labo bias ncidahken kekelengen si setia alu kata-kata saja,  arus ibuktiken arah perbahanen. Gundari, lit kesempaten Rut ncidahken kekelengen si setia man Naomi, terlebih ka man Dibata si ilayanina atena, eme Jahwe.

²¹ Seh me duana kalak enda i Betlehem, kuta si jarakna kira-kira sepuluh kilometer i sebelah selatan Jerusalem. Banci saja mbarenda Naomi ras keluargana cukup terberita i kota si kitik e, perban berita kerna kemulihen Naomi jadi ranan i japa pe. Iperdiateken diberu-diberu si lit i je Naomi janah ikatakenna, ”Payo kin enda si Naomi?” Kepeken, lanai banci itandai kalak e Naomi; erkiteken teridah bas ayona maka seh kal beratna perbebenna paksa ertahun-tahun tading i Moap.—Rut 1:19.

²² Ituriken Naomi uga pagitna kegeluhenna man kade-kadena ras tetanggana si nggo ndekah la jumpa ras ia. Janah perlu iakapna igantina gelarna Naomi, si ertina ”Keriahenku”, jadi Mara, si ertina ”Pagit”. Mekuah kal ate ngidah Naomi! Bali bagi Jop si nggeluh sope ia, iakapna Dibata Jahwe si erbahan ia mesera.—Rut 1:20, 21; Jop 2:10; 13:24-26.

23. Kai si mulai iukuri Rut, janah pengaturen kai si lit bas Undang-Undang Musa man kalak musil? (Nehen ka cataten i teruh.)

²³ Asum isesuaiken kalak e duana kegeluhenna i Betlehem, mulai iukuri Rut cara si mehuli guna ncukupi keperlunna ras Naomi. Ietehna maka i bas Hukum si ibereken Jahwe man umatNa i Israel, lit pengaturen si perkeleng man kalak musil. Paksa musim rani, banci ia masuk ku juma-juma kalak janah iikut-ikutna kalak si rani, ipumahina ruhi gandum si tading ibahan kalak e bage pe asil rani si lit i tepi ntah pe i suki juma. *—Im. 19:9, 10; Ul. 24:19-21.

24, 25. Paksa rembang Rut masuk ku juma Boas, kai si ilakokenna? Janah, uga kin dahin mumahi ruhi peranin e?

²⁴ Gundari paksana rani gandum, si banci saja ndabuh bas bulan April i kalender  modern, berkat me Rut ku juma guna ndarami ise si ngijinken ia mumahi ruhi peranin. Rembang ia masuk ku juma sekalak dilaki si gelarna Boas, kalak bayak si mpuna taneh janah erkade-kade denga ras perbulangen Naomi, Elimelek. Amin gia menurut Hukum lit hak Rut mumahi ruhi, labo ate-atena saja mumahisa; mindo ijin ia lebe man dilaki si nguda denga si ngawasi kalak si rani. Kenca iijinken, minter Rut erdahin.—Rut 1:22–2:3, 7.

²⁵ Bayangken iikut-ikuti Rut kalak si rani si sangana nabi tangke-tangke gandum. Mungkuk-mungkuk Rut i pudi kalak enda guna mumahi kai si tading ntah pe si ndabuh, irakutina me gandum e, janah ibabana ku ingan si banci ipakena guna ngerik. Ndekah kal ndahikenca janah latih, reh beratna ka asum matawari reh lasna. Tapi, terus Rut erdahin, janah ngadi paksa ngelap panasna saja ras man ciger si sederhana ”i sapo”, sada ingan si linggem guna ngadi-ngadi.

26, 27. Dilaki si uga nge Boas e, janah uga ia mperlakoken Rut?

²⁶ Banci saja la pernah iarapken ntah pe isangka Rut maka lit si mperdiateken ia, tapi lit kepeken. Inehen Boas ia janah isungkunna man mandur kerna ise kin Rut e. Selaku dilaki si mehuli, iperkuankenna si erdahinna alu ngataken ”Jahwe ras kam!” (Padan si Ndekah si Nipegendek, J.H. Neumann), amin gia piga-piga kalak e mungkin kalak si ngemo ngenca ntah pe pertandang. Janah, ialoi kalak e alu ngataken si bage ka. Dilaki si ndauh tuan asangken Rut ras si ngkelengi Jahwe e mperdiateken Rut bagi sekalak bapa.—Rut 2:4-7.

 ²⁷ Ikataken Boas man Rut gelah terus ia reh ku jumana guna mumahi ruhi peranin ras tetap ndeher ras diberu-diberu si nguda denga i bas rumah tanggana gelah ula iganggu dilaki-dilaki si erdahin i je. Ipastiken Boas gelah lit pangan Rut paksa man ciger. (Oge Rut 2:8, 9, 14.) Tapi si pentingna, ipujina janah ipebelinna pusuh Rut. Uga carana?

28, 29. (a) Uga nge kalakna Rut e? (b) Uga kam banci ernalem man Jahwe bagi Rut?

²⁸ Paksa isungkun Rut man Boas ngkai maka mekuah atena ia selaku pertandang, ijabap Boas maka nggo ibegina kerna kerina si ilakoken Rut man simetuana, Naomi. Mbelin kemungkinenna, ituriken Naomi kerna kiniulin Rut si ikelengina man diberu-diberu i Betlehem, janah dungna ibegi Boas. Ietehna ka maka Rut nggo nembah Jahwe, sabap ikatakenna, ”[Jahwe] lah si ersimulih man bandu erkiteken perbahanenndu si mehuli e. [Jahwe], Dibata nu Israellah si mereken upahndu sabap enggo ibahanndu Ia jadi sikawalndu.”—Rut 2:12.

²⁹ Pasti mbelin kal ukur Rut megisa! Situhuna, nggo iputuskenna guna cilinggem i teruh kabeng Dibata Jahwe, bagi anak perik si cilinggem i teruh kabeng indungna. Ngata bujur kal Rut man Boas nandangi kata-katana si mpepalem pusuh. Janah, terus ia erdahin asa ben.—Rut 2:13, 17.

30, 31. Kai si banci sipelajari bas Rut nari kerna aturen erdahin, pengergan, ras kekelengen si setia?

³⁰ Kiniteken Rut si icidahkenna arah perbahanen sada usihen si mehuli man banta gundari si erjuang ngadapi kesuliten ekonomi. Labo akapna arus isampati kalak ia, emaka iergaina kai pe si ibereken kalak man bana. La ia mela erbintuas erdahin segedang wari guna kalak si ikelengina, amin pe enda dahin si rendah. Meriah ukurna ngaloken ras ndalanken petunjuk si bijaksana guna erdahin alu cara si aman i bas lingkungen si mehuli. Si pentingna, la pernah ia lupa ise sumbul perlindungen situhu-tuhu, eme Bapana, Dibata Jahwe.

³¹ Adi sicidahken kekelengen si setia bagi Rut janah ngusih sifatna si meteruk ukur, kerajinenna, ras pengerganna, kinitekenta pe banci jadi usihen si erguna man kalak si deban. Tapi, uga Jahwe mereken keperlun Rut ras Naomi? Sibahas kari i bas pasal seterusna.