1, 2. Uga keadanna paksa ngerana Samuel man kalak Israel, janah ngkai maka perlu iiahkenna kalak e gelah ertobat?

ITATAP Samuel ayo kalak sada bangsana. Kerina bangsa e pulung i kota Gilgal, erkiteken idilo dilaki si erkiniteken enda, si nggo ngelayani selaku nabi ras hakim sedekah puluhen tahun. Erpalasken kalender modern, paksa si e eme bulan Mei ntah pe Juni, janah paksana musim perlego. Juma-juma i kuta e nggo megersing tandana nggo banci iperani. Sinik me jelma si nterem e. Uga Samuel banci ngiahken pusuh kalak e?

² La iangkai bangsa e uga seriusna keadanna. Terus ipindo kalak enda gelah lit sekalak raja manusia si erkuasa nandangi ia. La isedari bangsa e maka perbahanenna tuhu-tuhu la ngergai Dibatana, Jahwe, bage pe nabiNa. Situhuna, itulak kalak enda Jahwe selaku Rajana! Uga Samuel banci ngiahken kalak enda guna ertobat?

3, 4. (a) Engkai maka ituriken Samuel kerna masa ngudana? (b) Engkai maka usihen kiniteken Samuel erguna man banta gundari?

³ Mulai me Samuel ngerana man bangsa e nina, ”Aku enggo metua janah ubanen.” Bukna si reh mbentarna erban masin kata-katana. Kenca e ikatakenna ka, ”Aku enggo jadi peminpin mulai kin sanga aku nguda denga seh genduari.” (1 Sam. 11:14, 15; 12:2) Amin gia nggo metua, la ilupaken Samuel masa ia kitik denga. Kenangen e jelas denga iingetna. Keputusen-keputusen si mbarenda ibahanna, paksa kitik denga, maba ia ku kegeluhen si dem kiniteken ras kesetian man Dibatana, Jahwe.

 ⁴ Perlu ipebelin ras ipertahanken Samuel kinitekenna, amin gia megati ikeleweti kalak si la erkiniteken ras la setia. Gundari pe, mesera kal mpebelin kiniteken erkiteken kita nggeluh bas doni si jahat ras la erkiniteken. (Oge Lukas 18:8.) Mari siperdiateken kai si banci sipelajari bas usihen Samuel, mulai kitik-kitikna nari.

5, 6. Engkai maka banci ikataken masa danak-danak Samuel unik, tapi ngkai maka tek orang tuana pasti ia terurus?

⁵ Unik kal masa danak-danak Samuel. La ndekah kenca ngadi minem, mungkin umur telu tahun ntah pe lebih, mulai ibaktikenna kegeluhenna bas dahin i tabernakel Jahwe si badia i Silo, kira-kira 30 kilometer bas rumahna nari i Rama. Orang tuana, Elkana ras Hanna, mbaktiken anakna man Jahwe i bas dahin si istimewa, njadiken ia kalak Nasir segedang geluhna. * Payo kin enda ertina Samuel ibuang, la keleng ate orang tuana?

⁶ Lang! Ieteh kalak enda maka terurus nge anakna i Silo. Pasti nggo iaturken Imam si Mbelin Eli kerna si e, perban Samuel erdahin i deherna. Lit ka piga-piga diberu si nampati bas erbage bagin i tabernakel.—Kel. 38:8; Hak. 11:34-40, Terjemahan Dunia Baru.

7, 8. (a) Uga orang tua Samuel ndukung ia alu kekelengen tahun ku tahun? (b) Kai si banci ipelajari orang tua si gundari bas orang tua Samuel nari?

⁷ Terlebih ka, la pernah ilupaken Hanna ras Elkana anakna sintua e, si tubuh erkiteken jabapen pertoton Hanna. Ipindona man Jahwe sekalak anak dilaki, janah erjanji ia maka ibaktikenna kegeluhen anak e guna dahin si badia man Dibata. Paksa idahi Hanna anak e tep-tep tahun, ibabana jubah si mbaru si ibahanna sendiri guna ipake Samuel bas dahinna i tabernakel. Pasti seh kal riahna ukur Samuel si kitik denga paksa reh orang tuana ndahi ia. Pasti igejapkenna dukungen ras bimbingen si perkeleng bas orang tuana nari erkiteken iajari kalak enda ia maka ngelayani Jahwe bas ingan si unik e sada hak istimewa si mbelin.

⁸ Orang tua si gundari banci mbue erlajar bas Hanna ras Elkana nari. Biasana, si pentingna iakap orang tua eme nikapken keperlun jasmani anak-anakna tapi la iperdiatekenna keperlun rohanina. Tapi, orang tua Samuel ngutamaken keperlun rohani, janah enda mpengaruhi sifat-sifatna asum ia reh belinna.—Oge Kuan-kuanen 22:6.

9, 10. (a) Turiken uga keadan tabernakel ras perasan Samuel kerna ingan si badia e. (Nehen ka cataten i teruh.) (b) Kai saja kira-kira tanggung jabap Samuel, janah uga anak-anak si gundari banci ngusih ia?

 ⁹ Banci sibayangken anak e reh belinna janah niari uruk-uruk i sekelewet Silo. Inehenna ku teruh, ku kota ras baluren si mbelang, pasti meriah kal ukurna janah megah akapna paksa itatapna tabernakel Jahwe. Tuhu-tuhu ingan si badia. * Menam 400 tahun si nggo lewat ipajekken alu pengarahen Musa, enda me ngenca pusat ibadat situhu-tuhu i belang-belang doni paksa si e.

¹⁰ Mulai ngena ate Samuel si nguda denga tabernakel e. I bas kisah si pudi wari itulisna, sioge, ”Asum si e Samuel kitik denga, terus erdahin ndahiken dahin [Jahwe]. Pakenna baju si badia si ibahan i bas linen nari.” (1 Sam. 2:18) Banci saja, jubah si sederhana e ncidahken maka Samuel nampati imam-imam i tabernakel. Amin gia Samuel labo golongen imam, lit nge tugasna termasuk mbuka pintun kesain tabernakel bas erpagi-pagi janah nampati Eli si nggo metua. Tapi, amin gia meriah kal ukurna erdahin bas tabernakel, dungna mulai terganggu pusuh peratenna si polos denga erkiteken lit masalah si mekelek i rumah Jahwe.

11, 12. (a) Kai si la iperdiateken Hopni ras Pinehas? (b) Kejahaten ras kekejamen kai si ilakoken Hopni ras Pinehas i tabernakel? (Nehen ka cataten i teruh.)

¹¹ Paksa Samuel nguda denga, iidahna kejahaten ras kekejamen si mekelek. Lit dua anak Eli, gelarna Hopni ras Pinehas. Ituriken kisah Samuel, ”Anak-anak Eli tuhu-tuhu si kemali. Sitik pe la diatena [Jahwe].” (1 Sam. 2:12) Dua buah pikiren bas ayat enda lit hubungenna. Kata Heber bas ayat enda si iterjemahken ”kemali” situhuna ngertiken ”anak-anak si la erguna”. Hopni ras Pinehas la mperdiateken Jahwe. La iperdiatekenna patoken ras persaraten si mulia i bas Dibata nari. Enda me sabapna kalak e ngelakoken dosa si debanna.

¹² Hukum Dibata jelas i bas ngaturken tugas-tugas kerina imam ras cara mpersembahken korban i tabernakel. Enda la man  kemamangen! Korban-korban e nggambarken persedian Dibata guna ngalemi dosa gelah manusia banci bersih i lebe-lebeNa, janah metunggung ndatken pasu-pasu ras bimbingenNa. Tapi, Hopni ras Pinehas erbahan imam si deban ikut la ngergai persembahen. *

13, 14. (a) Uga kalak si tutus terpengaruh nandangi kejahaten i tabernakel? (b) Uga Eli gagal selaku bapa bage pe imam si mbelin?

¹³ Bayangken Samuel si nguda denga jengang ngidah kejadin si seh kal parahna si terus terjadi e. Uga buena kalak si iidahna, termasuk kalak si musil, meteruk ukur, ras tertindas, reh ku tabernakel si badia e alu arapen ndatken pengapulen janah ipegegehi secara rohani, tapi kepeken mulih alu kecewa, pusuh si ceda, ntah pe terhina? Janah, uga perasan Samuel paksa ietehna maka la iperdiateken Hopni ras Pinehas hukum Jahwe kerna moralitas seksual, erkiteken kalak enda medem ras piga-piga diberu si ngelayani i tabernakel? (1 Sam. 2:22) Banci saja iarapkenna gelah ipesikap Eli keadan e.

¹⁴ Eli me si tepatna kal ndungi masalah si reh belinna e. Erkiteken selaku imam si mbelin, ia si ertanggung jabap nandangi kerina si terjadi i tabernakel. Selaku sekalak bapa, lit kewajipenna guna mpersingeti anak-anakna. Terlebih ka, anak-anakna nakiti dirina sendiri bage pe nterem kalak i kuta e. Tapi, gagal Eli subuk jadi bapa bage pe jadi imam. Persinget si iberekenna la tegas. (Oge 1 Samuel 2:23-25.) Tapi, anak-anakna perlu persinget si lebih keras. Ilakoken kalak e dosa-dosa si cocok iukum mate!

15. Kai persinget si keras si ibereken Jahwe man Eli, janah uga tanggapen Eli?

¹⁵ Permasalahen e reh parahna janah dungna iutus Jahwe me ”sekalak nabi” si la ituriken gelarna, kempak Eli alu maba berita pengukumen si keras. Ikataken Jahwe man Eli, ”Ipehagandu anakndu lebih asa Aku.” Emaka, inubuatken Dibata maka anak-anak Eli si jahat e mate pagi i bas sada wari janah seh kal serana keluarga Eli, termasuk bene me hak istimewana selaku imam. Lit nge perubahen bas keluarga e kenca ipersingeti? Kisahna la nuriken maka lit perubahen.—1 Sam. 2:27–3:1.

16. (a) Kai si nggo sioge kerna kemajun Samuel si nguda denga? (b) Engkai maka enda erban meriah ukurndu?

¹⁶ Terpengaruh nge Samuel si nguda denga perban kejahaten e?  I bas cerita si gulut enda, sekali-sekali lit ka berita si mehuli kerna pertumbuhen ras kemajun Samuel. Ingetlah, bagi si ikataken 1 Samuel 2:18, alu dem kiniteken ’Samuel si kitik denga, terus erdahin ndahiken dahin Jahwe’. Amin gia kitik denga kal Samuel, tapi iutamakenna pelayanen man Dibata bas kegeluhenna. Bas ayat 21 i pasal e, sipelajari maka asum ia reh belinna, reh deherna ia ras Jahwe. Hubungen enda me si jadi perlindungen si tuhu-tuhuna kal bas erbage kejahaten nari.

17, 18. (a) Uga kaum muda Kristen banci ngusih Samuel paksa ngadapi kejahaten? (b) Kai buktina Samuel milih dalan si benar?

¹⁷ Banci saja rukur Samuel maka adi imam si mbelin ras anak-anakna pe nerah bas ngelakoken dosa, ia pe banci ngelakoken kai saja si ngena atena. Tapi kejahaten kalak si deban, termasuk kalak si lit kedudukenna ntah pe wewenangna, labo alasen guna ngelakoken dosa. Gundari, nterem kaum muda Kristen ngusih Samuel janah asum kalak e reh belinna, reh deherna ia ras Jahwe, amin pe paksa kalak i sekelewetna gagal mereken usihen si mehuli.

¹⁸ Kai ulihna man Samuel erkiteken patuh man Jahwe? Sioge, ”Samuel terus erbelinna janah erngenana ate [Jahwe] ras manusia man bana.” (1 Sam. 2:26) Emaka ngena ate kalak ia, silang-langna kalak si pendapatna penting iakap Samuel. Jahwe pe keleng ateNa anak enda erkiteken kinitekenna. Janah, pasti ieteh Samuel maka ikernepken Dibatana me kari kerina kejahaten si terjadi i Silo, tapi banci saja tersungkun-sungkun ia ndigan e terjadi. Bas sada berngi, terjabap me penungkunen e.

19, 20. (a) Turiken kai si terjadi man Samuel bas sada berngi i tabernakel. (b) Uga carana maka ieteh Samuel janari rehna sora e, janah uga perbahanenna man Eli?

¹⁹ Paksa si e nandangi erpagi-pagi tapi gelap denga; lampu si galang i tenda gara denga. I bas kelungunen, ibegi Samuel sora ngelebuh gelarna. Akapna e sora Eli, si gundari nggo seh kal tuana janah menam lanai erpengidah. Medak me Samuel janah ”kiam” ia ndahi dilaki si nggo metua e. Banci nge bayangkenndu anak enda, alu la erselop minter reh njumpai Eli guna meteh kai si iperlukenna? Tuhu-tuhu kena kal ku pusuhta perbahanen Samuel si ngergai janah mehuli man Eli. Amin gia melala dosa Eli, ia imam si mbelin Jahwe denga.—1 Sam. 3:2-5.

²⁰ Iingeti Samuel me Eli, alu ngataken, ”Idilondu aku ndai Bapa? Enda aku.” Tapi, ikataken Eli maka labo lit ilebuhna ia janah isuruhna ka anak e tunduh mulihi. Kepeken, si enda piga-piga kali terjadi! Dungna, isedari Eli kai situhuna si terjadi. Enggo jarang ibereken Jahwe pengenehenen ntah pe berita nubuat man bangsaNa, janah pasti sieteh alasenna. Tapi, isedari Eli maka gundari Jahwe ngerana man anak enda! Isuruh Eli me Samuel tunduh mulihi janah iajarina gelah ijabap Samuel alu mehuli adi lit ka kari si ngelebuh ia. Patuh me Samuel. La ndekah kenca e, ibegina ka sora ngelebuh ia, ”Samuel! Samuel!” Ijabap anak e, ”Ngeranalah, aku suruh-suruhenNdu enggo sikap megikenca.”—1 Sam. 3:1, 5-10.

21. Gundari, uga carana banci sibegiken Jahwe, janah ngkai maka e penting?

²¹ Dungna, lit juak-juak Jahwe i Silo si megiken Ia. Segedang geluhna, Samuel terus megiken Jahwe. Adi kam uga? Terus nge ibegikenndu Jahwe? La perlu sitimai sora bas surga nari ngerana man banta bas berngi wari. Gundari, banci ikataken maka sora Dibata lalap lit bas kita. Enda lit bas Pustaka si Badia si nggo lengkap. Reh rusurna sibegiken Dibata janah sidalanken kai si ipindoNa, reh belinna kinitekenta. Enda ka me si terjadi man Samuel.

22, 23. (a) Uga persinget si tangtangna la pang Samuel mpesehsa dungna terjadi? (b) Uga gelar Samuel si mehuli terus reh ulina?

²² Berngi bas Silo e berngi si ersejarah bas kegeluhen Samuel erkiteken i je me hubungenna si istimewa ras Jahwe ibenai, jadi nabi ras juru bicara Dibata. Tangtangna, mbiar anak enda mpeseh persinget Jahwe man Eli, erkiteken enda persinget si pendungi maka nubuat kerna keluarga Eli nandangi terjadi. Tapi, alu la mbiar ipebetehken Samuel me janah ialoken Eli alu meteruk ukur pengukumen Dibata e. La ndekah kenca e, kerina si ikataken Jahwe terjadi: perang me Israel ras Pilisti. Bas sada wari e mate me Hopni  ras Pinehas, janah Eli pe mate paksa ietehna maka Peti Perpadanen Jahwe si badia nggo itaban.—1 Sam. 3:10-18; 4:1-18.

²³ Tapi, gelar Samuel si mehuli selaku nabi si erkiniteken terus reh ulina. Ijelasken kisah e, ”[Jahwe] tetap ras ia,” janah isehken Jahwe kerina si ikataken Samuel.—Oge 1 Samuel 3:19.

24. Dungna, keputusen kai si ibahan kalak Israel, janah ngkai maka enda dosa si mekelek?

²⁴ Tapi, iusih bangsa Israel nge Samuel janah reh deherna nge kalak e ras Jahwe bage pe erkiniteken? Lang. Dungna, iputusken kalak enda maka la ia nggit ihakimi sekalak nabi. Ate kalak enda gelah iperentah sada raja manusia bali bagi bangsa si deban. Bagi petunjuk Jahwe, iikutken Samuel me pemindon kalak e. Tapi, arus icidahkenna uga kelekna dosa si nggo ibahan kalak e. Si itulak kalak enda labo sekedar manusia, tapi Jahwe! Emaka, ilebuhna bangsa e ku Gilgal.

25, 26. Paksa i Gilgal, uga Samuel si nggo metua dungna nampati bangsana ngangkai uga kelekna dosana man Jahwe?

²⁵ Mari siikuti ka cerita paksa Samuel ngerana i lebe-lebe kalak Israel i Gilgal. I je, iingetken Samuel si nggo metua me kalak Israel nandangi sejarah kesetianna si dem alu kiniteken. Kenca si e, sioge, ”Ertoto Samuel.” Ipindona man Jahwe lenggur ras udan.—1 Sam. 12:17, 18.

²⁶ Lenggur ras udan? Bas musim perlego? Lenga pernah terjadi si bage! Adi lit bas bangsa e si la tek ntah pe si megombang, enda la ndekah. Rempet me gelap langit itutupi embun. Angin si meter nderpa gandum i juma. Sora lenggur ergeruhguh si erban cuping erdeping. Janah, reh me udan. Uga tanggapen bangsa e? ”Kerina bangsa e mbiar man [Jahwe] ras man Samuel.” Dungna, isedari kalak enda me uga kelekna dosana.—1 Sam. 12:18, 19.

27. Uga perasan Jahwe nandangi kalak si ngusih kiniteken Samuel?

²⁷ Labo Samuel, tapi Dibatana, Jahwe, si nggo ngiahken pusuh bangsa si lalap mberontak e. Bas masa ngudana nari ngasa metua, Samuel erkiniteken man Dibatana. Janah, ipasu-pasu Jahwe me ia. Ngasa gundari Jahwe la pernah mobah. IdukungNa denga kalak si ngusih kiniteken Samuel.