Man Turang Senina si Ikelengi Kami,

I bas terbiten si pemena edisi umum Menara Pengawal 1 Januari 2008, ipetandaken man banta bagin si mbaru si seh kal jilena, judulna eme ”Tirulah Iman Mereka”. Janah, meriah kal ukurta sabap mulai paksa si e, sidat pembahasen si mbaru i bas bagin e nari tiap telu bulan sekali!

Uga tanggapen si ngoge kerna bagin enda? Kenca dung ngoge cerita kerna Marta, isuratken sekalak diberu, ”Tawa kal aku sanga ngogesa perban aku pe bage, lalap ateku jadi tuan rumah si mehuli, emaka lalap aku sibuk, tapi maun-maun lupa ka aku maka aku pe perlu istirahat janah ngerana-ngerana ras teman-teman.” Sekalak singuda-nguda erban kesimpulen enda kenca iogena kisah Ester, ”Payo tuhu, banci merhat kal kita ngikuti cara ras gaya peruis si mbaruna. Arus ka siperdiateken penampilenta; tapi, ula lebihsa.” Nina ka, ”Si iperdiateken Jahwe eme kinijilen pusuhta.” Kerna artikel rasul Petrus, alu ergiah-giah ikataken sekalak turang seninanta si diberu, ”Kisahna erban aku tempa-tempa ikut i je. Tuhu-tuhu nggeluh kal ceritana! Kubayangken asa ngasupku gelah banci kugejapken kejadin-kejadin si la langsung ituriken i bas kisahna.”

Kalak enda ndai, bage pe kalak si la terbeligai jumlahna si nggo ngogesa, nggo ngirimken surat guna ncidahken pengerganna kerna bagin e, janah enda mbuktiken kai si nggo isuratken rasul Paulus, ”Kerina si tersurat i bas Pustaka si Badia isuratken ngajari kita.” (Rom. 15:4) Payo, Jahwe nuratken kisah-kisah enda i bas Pustaka guna mereken pelajaren si meherga man banta. Kerina kita, la soal uga dekahna kita i bas kebenaren, banci erlajar i bas kisah-kisah enda nari.

Iahken kami kam gelah mis iogendu buku enda. Gunaken buku enda i bas Kebaktin Jabundu, pasti meriah kal iakap anak-anakndu! Sanga ipelajari runggun buku enda i bas Pelajaren Pustaka si Badia Runggun, ula sempat kam la ikut sekali pe! Ula merudu-rudu; ogelah manjar-anjar. Bayangken kisahna. Cuba gejapken kai si igejapken kalak e, nen kai si inenna. Bandingken tanggapen kalak e nandangi sada keadan ras tanggapenndu sendiri.

Meriah kal iakap kami mereken buku enda man bandu. Mbera buku enda jadi pasu-pasu man bandu bage pe man keluargandu. Teklah maka keleng ate kami kam, janah iarapken kami si mehulina man bandu,

Badan Pinpinen Saksi-Saksi Jahwe