1-3. (a) Penungkunen kai saja kari sibahas? (b) Kai saja empat syarat si arus silakoken gelah banci sisembah Dibata bagi si ngena ateNa? (Nen gambar bas awal pasal.)

ALU manjar-anjar perdiateken Abil biri-birina. Tutus atena ngasuhi biri-birina e mulai kin biri-biri e kitik denga. Gundari pilihna piga-piga biri-birina e, gelehna, ras persembahkenna man Dibata Jahwe. Aloken Jahwe nge persembahen Abil sekalak manusia si la sempurna?

² Sampati kesah si badia Rasul Paulus guna nulis kerna Abil, nina, “Aloken Dibata pemerena.” Tapi pemere Kain la aloken Jahwe. (Baca Heber 11:4.) Engkai maka aloken Dibata pemere Abil, tapi pemere Kain lang? Kai si banci sipelajari arah Kain ras Abil bage pe arah kalak si deban si itulis bas Heber pasal 11? Perlu sibahas jawapenna gelah reh bagesna pengangkanta kerna kai saja kin si termasuk bas nembah Jahwe.

³ Sibahas kari piga-piga kejadin si terjadi mulai jaman Abil seh ngasa jaman Esekiel. Perdiateken empat syarat si arus silakoken gelah banci sisembah Dibata bagi si ngena ateNa. (1) Arus Jahwe si ngalokenca, (2) arus si mejilena, (3) carana arus sesuai ras sura-sura Dibata, janah (4) alasenna arus benar.

4, 5. Ja nari teh Kain maka arus Jahwe si ngaloken persembahenna?

⁴ Baca Kejadin 4:2-5. Teh Kain maka Jahwe me si arus ngaloken persembahenna. Melala waktu Kain ras kesempatenna guna erlajar kerna Jahwe. Mungkin umur Kain ras adekna Abil hampir 100 tahun sanga bereken kalak e persembahen. * Banci saja kitik-kitik nari enggo teh kalak e kerna Taman Eden. Mungkin banci tatap kalak e taman si mejile e dauh-dauh nari. Pasti idah kalak e kerubim-kerubim si ngambati dalan masuk ku taman e. (Kej. 3:24) Pasti kataken orang tua kalak e maka Jahwe si nciptaken kerinana janah situhuna sura-sura Jahwe labo gelah manusia metua dungna mate. (Kej. 1:24-28) Mungkin e me sebapna teh Kain maka Dibata si arus ngaloken persembahenna.

⁵ Kai deba nari si banci saja erban Kain mereken persembahen e? Pernah kataken Jahwe maka lit pagi ‘keturunen’ si merperken takal “nipe” si mbarenda nggoda Hawa. (Kej. 3:4-6, 14, 15) Perban Kain anak sintua, banci saja akapna ia ‘keturunen’ si ijanjiken e. (Kej. 4:1) Sanga si e, Jahwe ngerana denga ras manusia si erdosa. Contohna, kenca Adam erdosa, ngerana denga Dibata ras ia, mungkin arah sada malekat. (Kej. 3:8-10) Selain si e, kenca bereken Kain persembahenna, ngerana ka Jahwe man bana. (Kej. 4:6) Jadi, pasti teh Kain maka Jahwe me si arus isembah.

6, 7. Kurang kin jilena persembahen Kain ntah salah kin carana merekenca? Jelasken.

⁶ Engkai maka la aloken Jahwe persembahen Kain? Perban kurang kin jilena persembahenna e? La lit kataken Pustaka kerna si e. Si lit ikataken Pustaka eme baba Kain “hasil jumana.” Bas pudi wari, arah Undang-Undang Musa, ikataken Jahwe maka hasil juma banci ipersembahken. (Bil. 15:8, 9) Banci ka siukuri keadanna. Paksa si e, sayur ras buah ngenca si jadi pangan manusia. (Kej. 1:29) Perban taneh i darat Taman Eden enggo isumpahi Dibata, pasti latih kel akap Kain ndatken persembahenna e. (Kej. 3:17-19) Keriken Kain kel gegehna gelah lit persembahenna e, janah persembahenna e pangan si iperlukenna ka nge! Amin pe bage, la aloken Jahwe persembahen Kain.

⁷ Adi bage, salah kin cara Kain mereken persembahen? Ntah la nge sesuai carana ras sura-sura Dibata? Situhuna labo e masalahna. Sanga la aloken Jahwe persembahen Kain labo lit katakenNa salah cara Kain mereken persembahen. Pustaka pe labo lit nceritaken kerna uga cara Kain ras Abil mereken persembahen. Jadi kai masalahna?

8, 9. (a) Engkai maka la ngena ate Jahwe ngidah Kain bage pe persembahenna? (b) Kai si menarik kapndu arah cerita kerna Kain ras Abil si lit bas Pustaka?

⁸ Surat Paulus man kalak Heber ncidahken maka alasen Kain mereken persembahen la benar. Kain la erkiniteken.  (Heb. 11:4; 1 Joh. 3:11, 12) E me sebapna la ngena ate Jahwe ngidah Kain, bage pe ngidah persembahenna. (Kej. 4:5-8) Jahwe Bapak si perkeleng kap, emaka usahakenNa nampati anakNa. Tapi la aloken Kain penampat Jahwe e. Akibatna Kain ikuasai ukurna si jahat, dungna meriah kapna ‘rubati, simusuhen, ras cemburu.’ (Gal. 5:19, 20) Amin pe bereken Kain persembahenna man Dibata, mejile ka persembahenna e, ras benar carana, tapi la aloken Dibata perban la mehuli ukurna. Emaka arah je nari sipelajari: Adi nembah Dibata ateta alu cara si benar, arus arah ukurta nari.

⁹ Bas Pustaka melala si iceritaken kerna Kain. Siteh maka pernah Jahwe ngerana ras ia, siteh ka kai jawapen Kain, siteh ise gelar anak-anak Kain bage pe perbahanen kalak e. (Kej. 4:17-24) Tapi Abil, kata-katana pe la lit icatat bas Pustaka, lit ntah lang keturunenna pe la lit icatat. Amin pe bage, banci kita erlajar arah perbahanen Abil. Kai contohna?

10. Bas ndalanken empat syarat guna nembah Jahwe, kai si banci sipelajari arah Abil?

¹⁰ Bereken Abil persembahenna man Jahwe perban tehna maka Jahwe ngenca si patut ngaloken persembahenna. Persembahken Abil “piga-piga anak biri-birina si pertama lahir,” pilihna si mejilena. Amin pe la lit iceritaken uga cara Abil mpersembahken korbanna e, i datas ingan nutung persembahen ntah lang, tapi nggit Dibata ngalokenca. Si erban persembahen Abil istimewa eme alasenna. Amin pe enggo lewat kira-kira enem ribu tahun dekahna, banci denga kita erlajar arah ia. Alasen Abil mereken persembahenna eme perban erkiniteken ia man Dibata janah keleng atena patoken Jahwe si benar. Ja nari banci siteh?

11. Engkai kataken Jesus maka Abil e kalak si benar?

¹¹ Si pertama, perdiateken kai nina Jesus kerna Abil. Sanga Abil nggeluh, idah Jesus ia surga nari, tandaina kel Abil janah perdiatekenna anak Adam enda. (Kua. 8:22, 30, 31; Joh. 8:58; Kol. 1:15, 16) Perban idah Jesus uga Abil sanga ia nggeluh, banci kataken Jesus ia kalak si benar. (Mat. 23:35) Kalak si benar akuina maka Jahwe ngenca si lit hakNa nentuken kai si benar ras kai si salah, janah ranan ras perbahanenna sesuai ras patoken Jahwe. (Bandingken Lukas 1:5, 6.) Perlu waktu guna mbuktiken maka sekalak jelma banci ikataken benar. Emaka, lenga pe bereken Abil persembahenna man Jahwe, ia enggo itandai selaku kalak si terus ngikutken patoken Jahwe. Pasti labo menukah ngelakoken si e. Sebap abangna labo contoh si mehuli perban jahat ukurna. (1 Joh. 3:12) Mamakna ngelanggar perentah Dibata, janah bapakna mberontak man  Jahwe perban ia tena si nentuken kai si mehuli ras kai si jahat. (Kej. 2:16, 17; 3:6) Perlu kel Abil sipat si perpang gelah banci beda dalan geluhna ras keluargana.

12. Kai si erbanca beda kel Kain ras Abil?

¹² Si peduaken, ijelasken Rasul Paulus kai hubungenna erkiniteken ras ikataken benar. Itulis Paulus, “Perban erkiniteken, persembahken Abil man Dibata korban si ulin asangken korban si persembahken Kain. Perban erkiniteken, idat Abil kesaksin maka ia ikataken benar.” (Heb. 11:4) Beda kel Abil ras Kain. Kata-kata Paulus ncidahken maka segedang geluh Abil, tek ia man Jahwe alu bulat ukur janah tek ia maka patoken Jahwe ras perbahanenNa lalap benar.

13. Kai si banci sipelajari arah Abil?

¹³ Arah Abil sipelajari maka gelah sisembah Dibata bagi si ngena ateNa, arus benar alasenta nembah Ia. Alasenta eme perban erkiniteken man Jahwe janah siikutken ateta patokenNa alu bulat ukur. Selain si e, labo bias sekali saja ngenca kita ikataken Jahwe benar. Ateta min ikataken Jahwe kita benar bas segedang geluhta.

14. Engkai maka aloken Jahwe persembahen Nuah, Abraham, ras Jakup?

¹⁴ Abil kap si tangtangna nembah Jahwe alu cara si benar amin pe la ia sempurna. Tapi labo ia ngenca. Lit ka kalak si deban si ikataken Rasul Paulus nembah Jahwe alu cara si benar, kalak e eme Nuah, Abraham, ras Jakup. (Baca Heber 11:7, 8, 17-21.) Sanga persembahken kalak e korban man Jahwe, nggit Ia ngalokenca. Engkai? Perban kalak e labo mereken persembahen saja. Tapi lakoken kalak e kerina syarat guna nembah Jahwe alu cara si benar. Mari sibahas kerna kalak e.

15, 16. Lakoken Nuah empat syarat bas nembah Jahwe alu cara si benar. Engkai maka banci sikataken bage?

¹⁵ Nuah lahir 126 tahun kenca Adam mate. Tapi paksa si e, belang-belang doni enggo enterem si nembah berhala. * (Kej. 6:11) Sope Banjir si Mbelin, Nuah ras keluargana ngenca si nembah Jahwe alu cara si benar. (2 Pet. 2:5) Kenca selamat arah Banjir si Mbelin, turah ukur Nuah erban ingan nutung persembahen, janah e si pertama icatat bas Pustaka. I je me persembahkenna korban man Jahwe. Arah perbahanen Nuah e, iteh keluargana maka Jahwe ngenca si metunggung ngaloken persembahenna. Kerina keturunenna pe eme kalak si nggeluh kenca Nuah, meteh kerna si e. Arah kerina binatang si lit, pilih Nuah “piga-piga arah binatang si la ipantangken ras piga-piga arah perik-perik si la ipantangken” guna ipersembahken. (Kej. 8:20) Bereken Nuah persembahen si mejilena perban Jahwe si ngatakenca maka binatang si ipersembahken Nuah e labo binatang si ipantangken.​—Kej. 7:2.

 ¹⁶ Persembahken Nuah korban tutungen i datas ingan nutung persembahen si ibanna. Aloken Dibata nge cara Nuah mereken persembahen e? Ue, alokenNa. Ikataken Pustaka sanga anggeh Jahwe bau persembahen e, meriah kel ukurNa, kenca si e pasu-pasuNa Nuah ras anak-anakna. (Kej. 8:21; 9:1) Tapi situhuna, nggit Jahwe ngaloken persembahen Nuah perban alasenna sanga merekenca. Persembahen Nuah e sada bukti ka maka erkiniteken kel ia man Jahwe janah tek ia kai si lakoken Jahwe lalap benar. Perban patuh lalap Nuah man Jahwe janah ikutkenna patokenNa, ikataken Pustaka maka Nuah “erdalan ras Dibata si benar.” Hasilna, Nuah itandai selaku kalak si benar seh asa gundari.​—Kej. 6:9; Esek. 14:14; Heb. 11:7.

17, 18. Lakoken Abraham empat syarat bas nembah Jahwe alu cara si benar. Engkai maka banci sikataken bage?

¹⁷ Abraham tading bas kota Ur, i je melala kalak si nembah berhala. Bas kota e lit ingan ersembah si galang kel guna nembah dewa bulan eme Nanna. * Mbarenda, bapak Abraham pe nembah dewa-dewa. (Jos. 24:2) Tapi pilih Abraham nembah Jahwe. Banci saja erlajar ia kerna Dibata si benar arah nini bulangna eme Sem. Sem e salah sada anak Nuah si nggeluh denga ngasa umur Abraham 150 tahun.

¹⁸ Segedang geluhna, enggo melala persembahken Abraham korban. Kerina e berekenna man Jahwe, sebap Ia ngenca Dibata si metunggung ngalokenca. (Kej. 12:8; 13:18; 15:8-10) Persembahen si mejilena nge si bereken Abraham man Jahwe? Jawapenna jelas teridah sanga nggit Abraham ngorbanken anakna si keleng kel atena eme Isak. Paksa si e, kataken Jahwe man Abraham uga carana mereken korban man baNa. (Kej. 22:1, 2) Nggit Abraham ngikutken kerina perentah Jahwe. Adi la min ndai larang Jahwe, enggo bunuhna anakna e. (Kej. 22:9-12) Aloken Jahwe persembahen Abraham perban benar alasenna nembah Ia. Tulis Paulus, “Erkiniteken Abraham man Jahwe, emaka perban kinitekenna e, ia ianggap kalak si benar.”​—Rom. 4:3.

19, 20. Lakoken Jakup empat syarat bas nembah Jahwe alu cara si benar. Engkai maka banci sikataken bage?

¹⁹ Jakup dekahen nggeluh bas Kanaan, negeri si janjiken Jahwe man Abraham ras keturunenna. (Kej. 17:1, 8) Penduduk Kanaan nembah berhala-berhala, emaka ciga kel ate Jahwe, nina, “Ipelawes pagi penduduk negri e arah negrina nari.” (Im. 18:24, 25) Sanga umur Jakup 77 tahun, lawes ia arah Kanaan, erjabu ia, janah mulihi ia ku Kanaan ras keluargana si enterem. (Kej. 28:1, 2; 33:18) Piga-piga anggota keluargana terpengaruh guna nembah berhala. Tapi sanga Jakup isuruh Jahwe ku Betel guna erban ingan nutung persembahen,  mis ia nggit. Sope ia lawes katakenna man keluargana, “Ambekkenlah kerina dibata-dibata asing si lit bas kena. Bersihkenlah diri kena.” Kenca si e, ikutkenna kerina petunjuk Jahwe.​—Kej. 35:1-7.

²⁰ Ban Jakup piga-piga ingan nutung persembahen bas Negri si Ijanjiken, janah pastikenna si ngaloken persembahen e eme Jahwe. (Kej. 35:14; 46:1) Aloken Dibata persembahen Jakup perban persembahenna e si mejilena janah benar carana nembah Dibata bage pe alasenna. Perban si e, kataken Pustaka Jakup e “bujur kalakna.” Kata-kata e mbuktiken maka jadi ate Dibata ngidah Jakup. (Kej. 25:27) Kai si ilakoken Jakup segedang geluhna jadi contoh si luar biasa man keturunenna eme bangsa Israel.​—Kej. 35:9-12.

21. Kai si banci sipelajari arah dilaki-dilaki si erkiniteken bas jaman si mbarenda?

²¹ Kai si banci sipelajari arah dilaki-dilaki si erkiniteken e bas nembah Jahwe alu cara si benar? Bali bagi kalak e, kalak si lit i sekelilingta, banci saja keluargata mpengaruhi kita gelah lanai sisembah Jahwe alu bulat ukur. Gelah ula kita terpengaruh, perlu sipepaguh kinitekenta man Jahwe janah tek kita maka patokenNa me si mehulina. Bukti tek kita man Jahwe adi sigunaken waktuta, gegehta, ras ertata guna ngelayani Ia. (Mat. 22:37-40; 1 Kor. 10:31) Adi sisembah Jahwe asa ngasupta janah sesuai bagi si ngena ateNa, bage pe benar alasenna, pasti kataken Jahwe kita kalak si benar. Enda tuhu-tuhu mpepalem pusuhta.​—Baca Jakup 2:18-24.

22-24. Uga Undang-Undang Musa njelasken (a) ise si arusna ngaloken persembahen kalak Israel? (b) persembahen si uga arusna bereken kalak e? (c) uga carana mpersembahken korban?

²² Bereken Jahwe Undang-Undang Musa man keturunen Jakup gelah teh kalak e kai si iarapken Jahwe arah kalak e. Adi patuh kalak e man Jahwe, kalak e jadi ‘umatNa si istimewa’ ras ‘bangsaNa si badia.’ (Kel. 19:5, 6) Perdiateken uga Undang-Undang Musa njelasken empat syarat i bas nembah Jahwe alu cara si benar.

²³ Jelas kel ikataken Jahwe man bangsa Israel maka Ia ngenca si arus ngaloken persembahen kalak e. Nina, “Aku saja ngenca si arus sembah kena. Ula sembah kena dibata-dibata si deban.” (Kel. 20:3-5) Korban si persembahken kalak e pe arus si mejilena. Contohna, binatang si persembahken kalak e arus sehat janah la lit cacatna. (Im. 1:3; Ul. 15:21; bandingken Maleaki 1:6-8.) Paksa si e, kalak Lewi dat bagin arah persembahen si ibereken kalak Israel man Jahwe, tapi kalak Lewi pe arus mereken persembahen man Jahwe. Arus bereken kalak e persembahen ‘si mehulina arah kerina sumbangen si ibereken man kalak e.’ (Bil. 18:29) Selain si e, kataken Jahwe  ka uga carana nembah Ia. Bereken Jahwe petunjuk si jelas kerna kai si arus persembahken kalak e, i ja ipersembahken, ras uga cara mpersembahkenca. Lit 600 lebih undang-undang si ibereken guna ngatur kegeluhen kalak e. Ikataken man kalak e, “Pastikenlah maka kerina e arus dalanken kena bagi si perentahken Jahwe Dibata kena man kena. Arus patuhi kena perentah-perentah e.”​—Ul. 5:32.

²⁴ Banci nge i japa pe kalak Israel mpersembahken korban? Lang. Bereken Jahwe petunjuk man umatNa guna erban kemah ingan ersembah, janah i je me ingan nembah Jahwe alu cara si benar. (Kel. 40:1-3, 29, 34) Paksa si e, adi aloken Dibata ate kalak Israel persembahen kalak e arus babana ku kemah ingan ersembah. *​—Ul. 12:17, 18.

25. Kai si pentingna bas mereken persembahen? Jelasken.

²⁵ Tapi sanga kalak Israel mereken persembahen, si pentingna eme alasenna. Alasenna arusna perban keleng atena Jahwe alu kerina pusuhna janah tuhu-tuhu keleng atena patoken Jahwe. (Baca Ulangen 6:4-6.) Sanga sembah kalak Israel Jahwe la arah ukurna nari tapi gelah enggo saja, la aloken  Jahwe persembahen kalak e. (Jes. 1:10-13) Tempa-tempa sembahna Jahwe, tapi Jahwe la tertipu. Ngerana Jahwe arah Nabi Jesaya, nina, “Kataken kalak e maka hamatina Aku, tapi pusuhna ndauh arah Aku nari.”​—Jes. 29:13.

26. Tangtangna, engkai maka rumah pertoton si bangun ­Salomo jadi ingan nembah Jahwe?

²⁶ Ratusen tahun kenca kalak Israel tading bas Negri si Ijanjiken, bangun Raja Salomo ingan nembah Jahwe si ndauh belinen asangken kemah ingan ersembah, ingan e eme rumah pertoton. (1 Raj. 7:51; 2 Kro. 3:1, 6, 7) Tangtangna persembahken kalak Israel korban i je, janah Jahwe si ngalokenca. Melala kel korban si persembahken Salomo ras rakyatna, janah kerina si persembahken kalak e korban si mejilena. Cara kalak e mpersembahken korban e pe sesuai ras Undang-Undang Dibata. (1 Raj. 8:63) Aloken Jahwe persembahen kalak e, labo perban mewah rumah pertoton e ntah pe perban mbue korban si persembahken kalak e. Tapi si pentingna man Jahwe eme alasen kalak e mereken persembahen. E me si jelas kel ikataken Salomo sanga rumah pertoton e iresmiken. Nina, “Bulatlah ukur kena ngelayani Jahwe Dibatata alu matuhi peraturenNa ras perentahNa bagi si lakoken kena bas wari enda.”​—1 Raj. 8:57-61.

27. Bas pudi wari, uga perbahanen raja-raja Israel ras rakyatna? Kai si lakoken Jahwe?

²⁷ Sayang kel, dungna lanai ikutken kalak Israel nasehat Raja Salomo. Lanai lakoken kalak e syarat bas nembah Jahwe. Pusuh raja-raja Israel ras rakyatna enggo jahat. Lanai kalak e tek man Jahwe janah lanai dalankenna patoken Jahwe. Tapi perban keleng ate Jahwe man kalak e, mulih-ulih suruhNa nabi-nabiNa mpersingeti kalak e janah kataken nabi-nabi e kai akibat perbahanen kalak e. (Jer. 7:13-15, 23-26) Salah sada nabi e eme Esekiel. Ia nggeluh paksa buen kalak la nembah Jahwe.

28, 29. Kai si enggo siteh kerna Esekiel? (Nen kotak “Esekiel​—Kegeluhenna ras Kai si Terjadi bas Jamanna.”)

²⁸ Teh Esekiel kel uga cara nembah Jahwe bas rumah pertoton si bangun Salomo. Bapakna imam, emaka pasti dat giliren bapakna e guna ngelayani bas rumah pertoton. (Esek. 1:3) Banci saja meriah akap Esekiel sanga ia kitik denga. Pasti ajari bapakna ia kerna Jahwe bage pe kerna Undang-Undang Musa. Umur Esekiel kira-kira sada tahun sanga “buku Undang-Undang Musa” idat bas rumah pertoton. * Paksa si e, si merentah bangsa Israel eme Raja Josia si mehuli. Sanga buku e ibacaken, kena kel ku pusuh raja, emaka reh tutusna atena nampati rakyatna nembah Jahwe alu cara si benar.​—2 Raj. 22:8-13.

 ²⁹ Lakoken Esekiel empat syarat nembah Jahwe alu cara si benar, bali bagi kalak si erkiniteken si nggeluh sope ia. Sanga sibahas kari buku Esekiel, banci siidah uga Esekiel nembah Jahwe saja, tutus kel tena ngelayani Ia, janah patuh ia ngelakoken perentah Jahwe sesuai ras cara si ngena ate Jahwe. Kerina e ilakoken Esekiel perban ia erkiniteken. Tapi buen kalak si nggeluh bas jamanna la bagi ia. Kitik-kitik nari pasti enggo begi Esekiel nubuat-nubuat Nabi Jeremia. Nabi e mulai ernubuat tahun 647 SM janah semangat kel ia mpersingeti kalak kerna penghakimen Jahwe si nandangi reh.

30. (a) Kai saja si banci siteh arah nubuat Esekiel? (b) Kai kin nubuat e? Uga arusna kita ngangkai nubuat Esekiel? (Nen kotak “Ngangkai Nubuat Esekiel.”)

³⁰ Kai si tulis Esekiel ncidahken uga dauhna umat Dibata enggo nadingken Dibata. (Baca Esekiel 8:6.) Sanga Juda ihukum Jahwe, Esekiel pe ikut itaban ku Babilon. (2 Raj. 24:11-17) Esekiel ikut itaban labo ertina ia pe ikut ihukum. Suruh Jahwe ia ernubuat man umatNa si itaban. Pengenehenen ras nubuat Esekiel si luar biasa ncidahken maka lit pagi masana umat Jahwe nembah Jahwe saja i Jerusalem. Tapi labo e saja. Pengenehenen ras nubuatna pe ncidahken maka lit pagi masana kerina kalak si keleng atena Jahwe nembah Jahwe saja.

31. Kai kari si banci sipelajari bas buku enda?

³¹ Bas buku enda sipelajari kari pengenehenen kerna surga, sibahas ka kari uga dauhna umat Dibata nadingken Ia, sipelajari ka kari kai si lakoken Jahwe gelah umatNa mulihi nembah Ia janah uga Ia mbela umatNa. Selain si e, siidah kari kerna uga pagi sanga kerina kalak nembah Jahwe saja. Bas pasal selanjutna sibahas kari pengenehenen si pertama si itulis Esekiel. Banci kari sibayangken kerna Jahwe ras bagin organisasiNa si lit i surga. Kerina e mbuktiken maka Jahwe ngenca si metunggung isembah.