Nembah ertina “perbahanen si ncidahken pengergan man sada dibata ras engkelengisa.” Bas Pustaka, kata-kata si iterjemahken guna “nembah” banci maksudna sekalak jelma ngergai ntah pe patuh man sada ciptan. (Mat. 28:9) Kata-kata e pe banci ka maksudna nembah Dibata ntah pe nembah dewa. (Joh. 4:23, 24) Banci siteh si apai si imaksud adi sibaca jalan ceritana.

Jahwe ngenca si patut isembah sebap Ia kap Si Nciptaken kerinana ras Si Nguasaisa. (Ket. 4:10, 11) Sisembah Jahwe sebap siakui maka Ia Si Meganjangna janah simuliaken gelarNa. (Ms. 86:9; Mat. 6:9, 10) Bas buku Esekiel, rusur ibahas kerna Jahwe Tuhan Si Meganjangna bage pe kerna gelarNa. Bas buku Esekiel saja pe istilah “Jahwe Tuhan Si Meganjangna” lit itulis 217 kali, janah istilah “teh kena pagi maka Aku kap Jahwe” bage pe istilah si mirip ras istilah e, lit itulis lebih 60 kali.​—Esek. 2:4; 6:7.

Nembah Dibata alu cara si benar, labo bias arah perasan saja, tapi arus teridah arah perbahanen. (Jak. 2:26) Sanga sibereken geluhta man Jahwe, erjanji kita maka i bas kai pe sipatuhi Ia selaku Dibata Si Meganjangna janah siergai kel gelarNa. Perlu siinget sanga Jesus igoda Setan petelu kaliken, ikataken Jesus maka nembah Dibata lit hubungenna ras “pelayanen si badia.” (Mat. 4:10) Perban kita nembah Jahwe, semangat kel kita nembah Ia. * (Ul. 10:12) Sibereken pelayanen si badia man Dibatata, adi silakoken dahin si tujunna guna nembah Ia. Sanga ngelakokenca perlu pengorbanen. Kai saja kin e?

Melala dahin si termasuk pelayanen si badia, contohna erberita, reh ku perpulungen ras mere komentar, mbangun inganta nembah Jahwe ras ngurussa, ngelakoken ibadah keluarga, nampati turang seninata si kena bencana, nampati bas kebaktin, janah ngelayani i Betel. Kerina e merga akap Jahwe. (Heb. 13:16; Jak. 1:27) Adi ngelayani Dibata siakap si pentingna bas geluhta, silakoken “pelayanen si badia man baNa suari ras berngi.” Meriah kel ukurta ngelayani Jahwe, Dibatata!​—Ket. 7:15.