Bas Esekiel pasal 23, itulis persinget si tegas arah Dibata man umatNa si la setia. Pasal enda mirip ras pasal 16. Duana pasal enda isina perumpaman kerna pelacur. Jerusalem igambarken jadi adekna janah Samaria jadi kakakna. Adekna e pe jadi pelacur bagi kakakna, tapi parahen perbahanen adekna e. Bas pasal 23, igelari Jahwe kalak e Ohola ras Oholiba. Ohola nggambarken kakakna eme Samaria, ibu kota kerajan Israel sepuluh suku janah Oholiba nggambarken adekna eme Jerusalem, ibu kota kerajan Juda. *—Esek. 23:1-4.

Arah pasal 16 ras pasal 23, lit piga-piga si seri. Banci saja si serina kel eme enda: Pelacur-pelacur e nggambarken ndehara Jahwe si dungna hianatina Jahwe. Selain si e, duana pasal e isina kerna arapen. Memang, labo jelas kel ikataken bas pasal 23 maka umat Dibata ialoken pagi mulihi. Tapi bas pasal enda, lit sada janji si mirip ras kai si itulis bas pasal 16. Erjanji Jahwe, nina, “Kupengadi pagi perbahanenndu si la meteh mela e bage pe pelacurenndu.”​—Esek. 16:16, 20, 21, 37, 38, 41, 42; 23:4, 11, 22, 23, 27, 37.

Mbarenda, ijelasken publikasita maka Ohola ras Oholiba nggambarken Gereja si terbagi jadi Katolik ras Protestan. Tapi, kenca iriset terdauhen, iukuri, janah itotoken, kepeken kesimpulen e erban turah piga-piga penungkunen. Penungkunenna eme: Pernah kin Gereja jadi ndehara Jahwe? Pernah kin Gereja ras Jahwe erban perjanjin? La pernah. Sanga Jesus jadi perantara bas “perjanjin si mbaru” ras Israel rohani (kalak Kristen si ipilih ku surga), Gereja lenga lit. Emaka jelas me, Gereja labo bagin arah Israel rohani. (Jer. 31:31; Luk. 22:20) Gereja mulai lit bas abad peempatken Masehi, ndekah kenca enggo mate rasul-rasul. Janah bas perumpaman Jesus, Gereja igambarken jadi “sesa.”​—Mat. 13:24-30.

Lit bukti si deban si erbanca kita tek maka Ohola ras Oholiba labo nggambarken Gereja. Buktina eme bereken Jahwe arapen man Jerusalem ras Samaria si la setia e maka alokenNa pagi kalak e mulihi. (Esek. 16:41, 42, 53-55) Lit kin bukti arah Pustaka si ncidahken maka bereken Dibata arapen si bage man Gereja? La lit! Gereja lanai lit arapenna bali bagi agama-agama si deban si termasuk bas Babilon si Mbelin.

Jadi kesimpulenna, Ohola ras Oholiba labo nggambarken Gereja. Amin pe bage, cerita kerna kalak e nampati kita ngangkai perasan Jahwe nandangi kalak si ngaku-ngaku jadi umat Dibata tapi la ngergai gelar Dibata si badia, janah la ngikutken patoken i bas nembah Dibata. Emaka enggo salah kel Gereja e perban kerina alirenna ras sekte-sektena ngaku-ngaku jadi wakil Dibata si benar. Kataken kalak e ka maka peminpinna eme Jesus Kristus, Anak Jahwe. Tapi ajarken kalak e maka Jesus e bagin arah Tritunggal (Dibata Si Telu Sada), janah la ka ikutken kalak e perentah Jesus gelah “lanai jadi bagin doni enda.” (Joh. 15:19) Gereja terbukti jadi bagin “pelacur si mbelin” perban lalap sembah kalak e berhala janah ikut kalak e bas urusen politik. (Ket. 17:1) Jelas me, Gereja ras agama palsu sebelang doni radu pagi ikernepken!