KOTAK KETERANGEN 19A
Lau Maler si Mereken Pasu-Pasu Jahwe
Adi siperdiateken, rusur ipake Pustaka istilah “lau maler” bage pe “lau” guna nggambarken pasu-pasu si maler arah Jahwe. Pasti terpegegehi kita sanga sibahas uga Jahwe masu-masu kita.
JOEL 3:18 Ikataken nubuat enda maka lit mata lau si maler arah ingan si badia bas rumah pertoton, lau e maler ku “Lembah Akasia” si kerah. Emaka, si idah Joel ras Esekiel e eme lau maler si maler ku ingan si kerah janah lit banna kegeluhen bas ingan e. Bas duana nubuat e, lau si maler e rehna arah rumah pertoton ntah pe rumah Jahwe.
SAKARIA 14:8 Nabi Sakaria ngidah “lau kegeluhen” maler arah kota Jerusalem. Setengah maler ku laut sebelah timur ntah pe Laut Mati, janah setengah nari maler ku laut sebelah barat ntah pe Laut Tengah. Jerusalem eme kota Dibata Jahwe, “Raja si mbelin.” (Mat. 5:35) Pengenehenen e ngingetken kita maka merentah pagi Jahwe nandangi kerina doni. Lau si maler ku sebelah timur ras barat maksudna ipasu-pasu Jahwe pagi dua kelompok kalak si setia bas Pardis. Kelompok si pertama eme kalak si selamat ngelewati kiniseran si mbelin, janah kelompok si peduaken kalak si ipekeke bas Pardis.
KETANGKASEN 22:1, 2 Rasul Johanes ngidah lau maler si mirip ras si idah Esekiel. Tapi lau enda maler arah tahta Jahwe labo arah rumah pertoton. Jadi bagi pengenehenen Sakaria, pengenehenen enda banci saja mbahas kerna pasu-pasu arah pemerentahen Dibata si dekahna seribu tahun.
Pasu-pasu arah pemerentahen Jahwe mirip ras pasu-pasu si bali bagi lau maler bas pengenehenen Esekiel. Kerina pasu-pasu e rehna arah Jahwe nari janah maler man kerina kalak si setia.
MASMUR 46:4 Lit ikataken bas ayat enda kerna lau si maler si mereken keriahen man “kota Dibata” ras man “kemah ingan ersembah si mulia ras si badia jang Dibata Si Meganjangna.” Banci saja “kota Dibata” maksudna pemerentahen Jahwe janah “kemah ingan ersembah si mulia ras si badia jang Dibata Si Meganjangna” maksudna cara si benar i bas nembah Jahwe.
Kerina nubuat enda erban kita tek maka lit dua cara Jahwe masu-masu kalak si setia. Seh rasa lalap sidat pagi pasu-pasu arah (1) pemerentahen Jahwe janah (2) arah pengaturenNa i bas nembah Ia alu cara si benar. Emaka, siusahakenlah gelah tetap siinem “lau kegeluhen” si isikapken Dibata Jahwe ras AnakNa gelah banci kita nggeluh si rasa lalap!—Jer. 2:13; Joh. 4:10.
