Pasti pernah idah Esekiel patung-patung si galang si njaga pintu masuk istana bage pe ingan ersembah. Bentuk patung-patung e bagi lembu jantan ras singa si takalna bagi takal manusia janah lit kabengna. Patung si bage, enggo biasa idah kalak bas kota Assur ras Babilon bas jaman si mbarenda. Pasti jengang kalak si ngidah patung e, termasuk Esekiel, perban patung e ganjangna hampir 6 meter. Amin pe mahluk si bage teridah megegeh, tapi ia labo nggeluh, ia iban arah pahaten batu ngenca.

Tapi, empatna kerubim si lit bas pengenehenen Esekiel eme “mahluk si nggeluh.” Luar biasa kel akap Esekiel ngidah mahluk e, emaka piga-piga kali pakena kata “mahluk si nggeluh” bas awal nubuatna. (Esek. 1:5-22) Idahna empatna mahluk si nggeluh e kompak perdalanna i teruh tahta Dibata Jahwe. Enda pasti nampati Esekiel ngangkai maka Jahwe erkuasa nandangi kerina ciptanNa. Gundari, pengenehenen si luar biasa e ncidahken man banta maka Jahwe e erkuasa, hebat, mulia, janah patut kel merentah kerinana.​—1 Kro. 29:11.