Rumah pertoton bas pengenehenen enda lit bas “sada gunung si seh kel ganjangna” (nen nomor 1). Bukti sipeganjang cara si benar i bas nembah Jahwe, adi siban e si pentingna bas geluhta. Enggo nge siban bage?

Tembok si lit i sekeliling rumah pertoton (nen nomor 2) ngelindungi bangunen rumah pertoton si lit i tengah-tengah daerah si mbelang (nen nomor 3). Tembok enda ngingetken kita maka kai pe la banci sipediat ncedai cara si benar i bas nembah Jahwe. Menurut Esekiel 42:20, “ingan enterem jelma” (urusen kai pe si la lit hubungenna ras nembah Jahwe) arus ipisahken arah “ingan si badia.” Adi e saja pe la banci sipersada ras nembah Jahwe, apai ka perbahanen si najis ntah pe perbahanen seks si salah!

Deras lau si maler arah ingan si badia si lit bas rumah pertoton janah ku ja pe lau e maler lit banna i je kegeluhen, subur ka banna negri e (nen nomor 4). Pasu-pasu enda ibahas kari bas Pasal 19 buku enda.

Gerbang-gerbang si arah darat (nen nomor 5) ras gerbang-gerbang si arah bas (nen nomor 9) seh kel ganjangna. Enda mbuktiken maka meganjang kel patoken kerna lagu langkah si iban Jahwe man umatNa. Adi siperdiateken, seri ukuren gerbang si arah darat ras si arah bas. Enda cocok, perban seri pemindon Jahwe man kerina umatNa, la soal kai pe tugasna ntah pe tanggung jawapna.

Ruangen-ruangen ingan man (nen nomor 8) ngingetken kita maka mbarenda, banci pan kalak e deba korban persembahen si baba kalak e ku rumah pertoton. Tempa-tempa man kalak e ras Jahwe i je. Gundari, la bage si ilakoken kalak Kristen si nembah Jahwe bas rumah pertoton rohani, perban enggo lit “sada korban” si ipersembahken. (Heb. 10:12) Amin pe bage, tetap denga sipersembahken “korban pujin.”​—Heb. 13:15.

Banci saja bingung kam perban ukuren-ukuren si lit bas pengenehenen e. Tapi lit sada jaminen si penting si banci sipelajari: Cara si benar i bas nembah Jahwe pasti pagi ilakoken mulihi bagi sura-sura Jahwe. E enggo itentuken janah la banci iubah, bali bagi ukuren-ukuren e. Amin pe la lit ikataken Esekiel maka lit idahna jelma bas pengenehenen e, itulisna persinget si tegas arah Jahwe man imam-imam, man peminpin-peminpin, bage pe man rakyat. Kerina umat Jahwe arus ngikutken patokenNa si benar.