Mon-mon, lanai kita ngasup ngadapi masalahta ras tentangenta tiap wari. Dungna, latih siakap janah mesera siakap terus ngelayani Jahwe. Sanga bage situasita, banci kita terpegegehi adi siukuri alu mbages pengenehenen Esekiel e. Engkai? Arah nubuat e banci sipelajari maka ngasup Dibata mpegeluh tulan-tulan si enggo mate. Emaka, pasti ngasup ka Ia mpegegehi kita sanga ngadapi masalahta, termasuk masalah si tempa-tempa la lit jalan keluarna.​—Baca Masmur 18:29; Pil. 4:13.

Banci ka siinget kata-kata Nabi Musa si nggeluh ratusen tahun sope jaman Esekiel, nina, “Mulai mbarenda nari Dibata kap ingan erlindung. Rasa lalap pagi tanNa natang kam.” (Ul. 33:27) Payo, labo ngenca lit kuasa Jahwe, tapi merhat ka Ia nggunaken kuasaNa e nampati umatNa. Emaka sanga latih kel siakap, tempa-tempa lanai lit gegehta, banci siandalken Jahwe. Pasti sampatiNa kita alu manjar-anjar, tatangNa kita, janah banNa kita gelah megegeh mulihi.​—Esek. 37:10.