1-3. (a) Engkai maka sengget Esekiel? Janah kai si tehna kerna Jerusalem si nandangi ikernepken? (b) Penungkunen kai saja si nandangi sibahas?

SENGGET kel Esekiel! E denga datna pengenehenen kerna kai si erban ciga ate si ilakoken kalak Jahudi si murtad bas rumah pertoton Jerusalem. * Ingan si pentingna guna nembah Jahwe bas Israel lanai badia ban kalak e. Labo saja rumah pertoton si lanai badia, tapi belang-belang negri Juda pe dem kekerasen janah lanai lit arapen kalak e. Ceda kel ukur Jahwe ngidah perbahanen umat pilihenNa e. Emaka nina man Esekiel, “Merawa kel Aku.”​—Esek. 8:17, 18.

² Cuba bayangken, pasti sedih kel Esekiel sanga begina merawa Jahwe janah kernepkenNa ateNa Jerusalem bage pe rumah pertoton si lit i je. Padahal rumah pertoton e mbarenda badia. Pasti tersungkun-sungkun nabi e, ‘Uga kari kalak si setia si lit bas kota e? Selamat nge kari kalak e? Adi selamat, uga carana?’ Tapi la ndekah kenca begina kerna penghukumen e, begina sora si megang si ngelebuh kalak guna ngelakoken penghukumen Dibata. (Esek. 9:1) Kai si idah Esekiel  kenca si e erban tenang ukurna, perban arah pengenehenen e banci tehna maka labo kerina kalak ikernepken. Kalak si setia pasti selamat!

³ Sope doni si jahat enda ikernepken, banci saja kita pe tersungkun-sungkun, ‘Ise nge pagi si selamat?’ Guna ndatken jawapenna, mari sibahas: (1) Kai nge si idah Esekiel? (2) Uga pengenehenen e terjadi bas jamanna? (3) Kai ertina man banta?

4. Ceritaken kai si idah Esekiel ras si ibegina.

⁴ Kai nge si idah Esekiel ras si ibegina? (Baca Esekiel 9:1-11.) Bas rumah pertoton, idahna lit pitu dilaki reh “arah pintu gerbang si arah datas si pengalana ku utara.” Banci saja ingan e ndeher ku ingan berhala si erban Dibata merawa ntah pe ku ingan diberu-diberu sanga tangisina Dewa Tammus. (Esek. 8:3, 14) Pituna dilaki e masuk ku halamen si arah bas janah tedis kalak e i deher ingan nutung persembahen si iban arah tembaga. Kalak e reh labo guna mpersembahken korban, perban paksa si e lanai aloken Dibata korban-korban si ipersembahken bas rumah pertoton e. Enem kalak arah dilaki-dilaki e, “lit senjatana guna ngancurken.” Tapi la seri ras dilaki si pepituken, ipakena uis linen janah si ibabana labo senjata, tapi “ingan alat tulis sekertaris” ntah pe bas cataten i teruh ikataken “ingan tinta.”

5, 6. Kai si banci sisimpulken kerna kalak si dat tanda? (Nen gambar bas awal pasal.)

⁵ Kai nge si ilakoken dilaki si maba ingan alat tulis e? Datna tugas si penting arah Jahwe. Nina Jahwe, “Laweslah ku kota e, ku belang-belang Jerusalem, banlah tanda bas perdempaken kalak si kesusahen ras si rate mesui perban kerina si erban ciga ate si enggo ilakoken bas kota e.” Megi si e, banci saja inget Esekiel kai si terjadi bas jaman si mbarenda. Iperentahken man kalak Israel gelah ipercikken kalak e dareh ku kusen pintu kalak e. E jadi tanda maka anak sintua bas keluarga e la ikut ibunuh. (Kel. 12:7, 22, 23) Seri nge tujunna tanda bas jaman Israel ras tanda bas pengenehenen Esekiel? Selamat nge kari kalak si dat tanda sanga Jerusalem ikernepken?

⁶ Cuba siperdiateken ise saja si ngaloken tanda e. Tanda e iban bas perdempaken “kalak si kesusahen ras si rate mesui perban kerina si erban ciga ate si enggo ilakoken bas kota e.” Kai si banci sisimpulken kerna kalak si dat tanda e? Latih ukur kalak e labo saja perban bas rumah pertoton Dibata enggo sembah kalak berhala, tapi perban kota e dem alu kekerasen, perbahanen seks si salah, ras kejahaten. (Esek. 22:9-12) Selain si e, labo latih saja ngenca ukur kalak e, tapi jelas  teridah arah ranan ras perbahanenna maka ciga atena ngidah keadan kota e. Janah usahaken kalak e gelah tetap benar carana nembah Jahwe. Perban si e me maka mekuah ate Jahwe, emaka la kernepkenNa kalak e.

7, 8. Kai tugas dilaki-dilaki si maba senjata e, janah kai si terjadi kenca si e?

⁷ Uga kerna enem dilaki si maba senjata guna ngancurken e? Kai dahin kalak e? Begi Esekiel maka suruh Jahwe kalak e ngikutken dilaki si maba ingan alat tulis. Kenca si e, bunuh kalak e kerina kalak selain kalak si lit tanda bas perdempakenna. Nina Jahwe, “Arus mulaindu arah inganKu si badia nari.” (Esek. 9:6) Emaka, mulai kalak e arah rumah pertoton eme bagin si pentingna bas kota Jerusalem, sebap rumah pertoton e lanai badia akap Jahwe. Si leben bunuh kalak e eme “dilaki-dilaki si enggo metua si lit i lebe-lebe rumah pertoton.”  Kalak e eme 70 peminpin Israel si sangana mpersembahken kemenyan man dibata-dibata si deban.​—Esek. 8:11, 12; 9:6.

⁸ Kai si terjadi kenca si e? Idah Esekiel lawes dilaki si maba ingan alat tulis e janah begi Esekiel ngelapor ia man Jahwe, nina, “Enggo kulakoken bagi si perentahkenNdu man bangku.” (Esek. 9:11) Emaka, kai si terjadi man penduduk Jerusalem? Lit nge kalak si setia si selamat sanga kota e ikernepken?

9, 10. Ise saja kalak si setia si ikut selamat sanga Jerusalem ikernepken? Janah engkai?

⁹ Baca 2 Kronika 36:17-20. Nubuat Esekiel terjadi bas tahun 607 SM, sanga kota Jerusalem ras rumah pertoton si lit i je ikernepken pasuken Babilon. Bali bagi “calung emas bas tan Jahwe,” igunaken Jahwe pasuken Babilon nehken rawaNa man Jerusalem si la setia e. (Jer. 51:7) Kerina nge penduduk Jerusalem ibunuh? Lang. Inubuatken Esekiel maka lit pagi kalak si selamat arah pasuken Babilon e.​—Kej. 18:22-33; 2 Pet. 2:9.

¹⁰ Kalak si selamat e eme kalak si setia. Si ikut selamat eme keturunen Rehap, Ebedmelek kalak Etiopia, bage pe Nabi Jeremia ras sekertarisna Baruh. (Jer. 35:1-19; 39:15-18; 45:1-5) Arah pengenehenen Esekiel banci sikataken maka kalak e termasuk “kalak si kesusahen ras si rate mesui perban kerina si erban ciga ate” si ilakoken bas Jerusalem. (Esek. 9:4) Sope kota e ikernepken, pasti enggo teridah arah perbahanen kalak e maka ciga kel atena ngidah kejahaten si lit bas kota e janah merhat kel kalak e nembah Dibata alu cara si benar. Perban si e me sebapna kalak e iselamatken.

11. Ise si igambarken enem dilaki si maba senjata guna ngancurken ras dilaki si maba ingan alat tulis sekertaris?

¹¹ Tuhu nge lit tanda bas perdempaken kalak si setia e? La lit ikataken Pustaka maka Esekiel, nabi si debanna, ntah pe kalak si deban lawes engkelilingi kota Jerusalem guna erban tanda bas perdempaken kalak si setia. Emaka, pengenehenen Esekiel e pasti kerna kai si terjadi bas surga, jadi la banci idah manusia. Dilaki si maba ingan alat tulis sekertaris ras enem dilaki si maba senjata guna ngancurken e, nggambarken malekat-malekat si setia si katawari pe enggo ersikap ngelakoken sura-sura Jahwe. (Ms. 103:20, 21) Emaka, pasti gunaken Jahwe malekat-malekatNa guna ngukum kota Jerusalem si la setia. Perban lit tanda bas perdempaken kalak si nandangi iselamatken, kalak si la setia ngenca si ibunuh malekat-malekat e.

12, 13. (a) Engkai merawa Jahwe man Jerusalem, janah engkai maka merawa ka Ia bas jamanta gundari? (b) Payo kin Jerusalem si la setia e nggambarken Gereja? Jelasken. (Nen kotak “Payo kin Jerusalem si Murtad e Nggambarken Gereja?”)

¹² Kentisik nari, siadapi me penghukumen Dibata si lenga pernah idah manusia, eme “kiniseran si mbelin si lenga  pernah terjadi mulai kin doni lit seh ngasa gundari, janah ndigan pe lanai pagi terjadi.” (Mat. 24:21) Tapi turah piga-piga penungkunen: Sanga terjadi pagi penghukumen e, lit nge kalak si selamat? Lit nge ibereken tanda man kalak si nandangi iselamatken? Lit nge hubungenna pengenehenen Esekiel e ras jamanta gundari? Kerina jawapenna, lit. Ja nari banci siteh? Mari sipelajari mulihi pengenehenen Esekiel.

¹³ Ingetndu nge engkai maka merawa Jahwe man Jerusalem? Cuba siperdiateken mulihi Esekiel 9:8, 9. (Baca.) Sanga mbiar Esekiel maka “kerina kalak Israel si tading denga” ikut kernep sanga Jerusalem ihukum, kataken Jahwe empat alasenna engkai maka kota e ihukum. Si pertama, ‘kesalahen kalak e seh kel belinna.’ * Si peduaken, negri Juda “dem alu dareh si mambur.” Si peteluken, Jerusalem ibu kota kerajan Juda “dem alu kejahaten.” Si peempatken, lalap jahat perbahanen kalak e janah nina “labo idah” Jahwe perbahanenna si jahat e. La kin bage ka nge gundari keadan bas doni enda? La kalak erkiniteken, i japa pe lit kejahaten, bage pe kekerasen. Perban Jahwe ‘la pernah berubah’ pasti merawa ka nge pagi Ia man kalak jahat bas jamanta gundari. (Jak. 1:17; Mal. 3:6) Pastilah dilaki si maba ingan alat tulis ras enem dilaki si maba senjata guna ngancurken e, seri denga tugasna bas jamanta gundari.

14, 15. Kai saja buktina maka persingeti Jahwe lebe kalak sope kernepkenNa?

¹⁴ Uga pengenehenen Esekiel e terjadi bas jamanta gundari? Adi sipelajari uga pengenehenen e terjadi bas jaman si mbarenda, banci siteh kai si sangana terjadi gundari, bage pe kai si nandangi terjadi. Mari sipelajari nubuat Esekiel si enggo terjadi ntah pe si nandangi terjadi.

¹⁵ Persingeti Jahwe lebe manusia sope ikernepkenNa. Bali bagi si enggo sipelajari bas Pasal 11 buku enda, iban Jahwe me Esekiel “jadi penjaga man kalak Israel.” (Esek. 3:17-19) Mulai tahun 613 SM, jelas kel bereken Esekiel persinget man kalak Israel maka ikernepken pagi kalak e. Nabi-nabi si deban pe bagi Jesaya ras Jeremia mereken persinget maka kota Jerusalem nandangi ikernepken. (Jes. 39:6, 7; Jer. 25:8, 9, 11) Bas jamanta gundari, suruh Jahwe gelah ilantik Jesus sada kelompok si kitik arah umatNa si ipilih ku surga. Arus bereken kalak e pangan rohani man umat Dibata. Selain si e, arus ka persingeti kalak e kerina kalak maka kentisik nari reh me kiniseran si mbelin.​—Mat. 24:45.

16. Ikut nge umat Jahwe mereken tanda man kalak si nandangi iselamatken? Jelasken.

¹⁶ Umat Jahwe labo ikut mereken tanda man kalak si nandangi iselamatken. Perlu siinget maka Esekiel labo isuruh mereken  tanda man penduduk Jerusalem si nandangi iselamatken. Bage ka pe kita gundari, umat Jahwe labo isuruh mereken tanda man kalak si nandangi iselamatken. Tapi tanggung jawapta eme mberitaken berita si meriah janah mpersingeti kalak maka doni si jahat enda nandangi ikernepken. Emaka, arus penting siakap tugas enda janah tutus ateta ngelakokenca. (Mat. 24:14; 28:18-20) Alu bage, ikut kita nampati kalak si meteruk ukur nembah Dibata alu cara si benar.​—1 Tim. 4:16.

17. Kai si arus ilakoken tiap kalak gundari gelah banci iselamatken?

¹⁷ Kalak si atena iselamatken arus buktikenna kinitekenna gundari. Bas jaman Esekiel, kalak si iselamatken e enggo buktikenna maka segat atena kejahaten, janah sembahna Dibata alu cara si benar sope kota Jerusalem ikernepken bas tahun 607 SM. Bage ka pe gundari, kalak si atena iselamatken arus buktikenna maka segat atena kejahaten si lit bas doni enda sope doni enda ikernepken. Labo saja ‘susah akap kalak e ras rate mesui’ kalak e ngidah kejahaten si terjadi, tapi arus ka teridah arah ranan ras perbahanen kalak e maka merhat kel kalak e nembah Dibata alu cara si benar. Uga cara kalak e ngelakokenca? Arus kalak e nggit megiken berita si meriah, usihna sipat-sipat Kristus, berekenna dirina man Jahwe ras iperidiken,  janah setia ia ndukung senina-senina Kristus. (Esek. 9:4; Mat. 25:34-40; Ep. 4:22-24; 1 Pet. 3:21) Arus ilakoken kalak e kerina si e ndai janah tetap sembah kalak e Dibata alu cara si benar ngasa reh kiniseran si mbelin, sebap kalak si bage ngenca si dat tanda guna iselamatken.

18. (a) Ndigan nge ibereken Jesus Kristus tanda man kalak si nandangi iselamatken? Janah uga carana? (b) Ibereken nge tanda man kalak si ipilih ku surga? Jelasken.

¹⁸ Bereken Jesus tanda man kalak si nandangi iselamatken. Bas jaman Esekiel, tugas malekat-malekat eme mereken tanda man kalak si setia. Bas jamanta gundari, dilaki si maba ingan alat tulis sekertaris nggambarken Jesus Kristus sanga ‘reh ia bas kemulianna’ selaku Hakim kerina bangsa. (Mat. 25:31-33) Reh pagi Jesus bas kiniseran si mbelin kenca agama palsu ikernepken. * Kenca si e, sope terjadi Harmagedon, ihakimi Jesus pagi manusia ntah pe berekenna tanda guna nentuken si apai biri-biri ntah pe kambing. Kalak si ngaloken tanda maka ia biri-biri eme “kelompok jelma si enterem” si banci pagi datna “kegeluhen rasa lalap.” (Ket. 7:9-14; Mat. 25:34-40, 46) Adi kalak si ipilih ku surga uga? Ibereken nge tanda man kalak e? La perlu iban tanda man kalak e gelah selamat ngelewati Harmagedon, sebap enggo aloken kalak e meterai si terakhir sope kalak e mate ntah pe sope terjadi kiniseran  si mbelin. Kenca si e, iangkat kalak e ku surga sope terjadi Harmagedon.​—Ket. 7:1-3.

19. Ise teman Jesus ngukum doni enda? (Nen kotak “Kesusahen ras Rate Mesui, Mereken Tanda, Ngancurken—Ndigan janah Uga Carana?”)

¹⁹ Jesus Kristus Raja si merentah bas surga radu ras pasukenna ngukum doni si jahat enda pagi. Bas pengenehenen Esekiel, enem dilaki si maba senjata e mulai engkernepken kalak jahat kenca dilaki si make uis linen e enggo dung ndahiken tugasna, eme mereken tanda. (Esek. 9:4-7) Bage ka pe bas jamanta, ikernepken pagi kalak jahat adi enggo dung ihakimi Jesus kerina kalak, janah enggo dung berekenna tanda man biri-birina guna iselamatken. Kenca si e, bas Harmagedon, ipinpin Jesus pagi pasukenna si lit i surga eme malekat-malekat ras 144.000 temanna merentah. Ipinpinna pasuken e guna engkernepken doni si jahat enda. Kalak si nembah Dibata alu cara si benar iselamatken pagi janah masuk kalak e ku doni si mbaru.​—Ket. 16:14-16; 19:11-21.

20. Arah pengenehenen Esekiel enda, kai saja pelajaren si banci sidat?

²⁰ Ngata bujur kel kita perban banci melala sidat pelajaren arah pengenehenen Esekiel enda. Banci kita tek maka labo pagi kernepken Jahwe kalak si benar radu ras kalak jahat. (Ms. 97:10) Gundari, siteh kai si banci silakoken gelah banci kari sidat tanda guna iselamatken. Selaku umat Jahwe, arus siberitaken maka enggo ndeher kel pendungi doni enda. Selain si e, siusahaken kel asa ngasupta mpeseh berita si meriah man kalak si kesusahen ras rate mesui perban kejahaten si lit bas doni enda. Alu bage, sisampati kalak si pusuh ras perbahanenna “ngaloken kebenaren guna kegeluhen si rasa lalap.” (Perb. 13:48) Hasilna, ikut kalak e nembah Dibata alu cara si benar, banci alokenna tanda guna iselamatken, janah ikut kalak e masuk ku doni si mbaru si lanai lit i je kejahaten.