1-3. (a) Kai si terjadi sanga ‘gara kel rawa’ Jahwe? (Nen gambar bas awal pasal.) (b) Kai kari sibahas?

CUBA bayangken lit piga-piga anggota runggun si dilaki, diberu, ras anak-anak sangana cinder ngendeken lagu Kerajan. Kenca si e, lit sekalak pertua ertoto alu tutus guna mindo gelah lindungi Jahwe kalak e. Tek kel kalak e maka pasti ijaga Jahwe kalak e, tapi perlu denga kalak e ipegegehi janah isampati gelah ula mbiar. Ngeri kel situasina i darat. Terbegi sora perang si la tanggung gejekna. Harmagedon enggo imulai!​—Ket. 16:14, 16.

² Sanga terjadi perang Harmagedon, ‘gara kel pagi rawa’ Jahwe sanga kernepkenNa kalak si hukumNa. (Baca Esekiel 38:18.) Merawa Jahwe labo saja man sada pasuken ntah pe man sada bangsa, tapi merawa Ia man enterem kalak i belang-belang doni enda. Bas wari e, “amparen pagi kalak si ibunuh Jahwe i belang-belang doni, arah ujung ku ujung.”​—Jer. 25:29, 33.

³ Engkai maka ‘gara kel pagi rawa’ Jahwe? La kin ia Dibata si perkeleng, “si perkuah, si mehuli,” janah “la nukah  merawa”? (Kel. 34:6; 1 Joh. 4:16) Mari sibahas kerna si e, sebap jawapenna banci erban kita terapuli, banci ka erban kita reh pangna, janah semangat i bas erberita.

4, 5. Kai bedana rawa Dibata ras rawa manusia?

⁴ Perlu siteh maka rawa Jahwe e la seri ras rawa manusia. Biasana, adi manusia merawa, la terkendalikenna rawana. Emaka, perbahanenna rusur ngerugiken. Contohna Kain anak Adam sintua, “merawa kel” ia perban la aloken Jahwe persembahenna tapi persembahen Abil alokenNa. Akibatna, bunuh Kain adekna si la ersalah e. (Kej. 4:3-8; Heb. 11:4) Contoh si deban eme Daud. Ia ikataken kalak si erban meriah ukur Jahwe. (Perb. 13:22) Daud kalak si bujur, tapi pernah bunuhna tena Nabal sanga tokohi Nabal ia ras anak buahna. Ngilas kel ate Daud ngidah perbahanen Nabal si la meteh bujur e. Emaka Daud ras prajuritna muat pedangna, serang kalak e tena Nabal ras kerina dilaki si lit bas keluargana. Untungna, Abigail diberu Nabal e banci banna la surung Daud ras anak buahna balas dendam. (1 Sam. 25:9-14, 32, 33) Emaka la teta mamang suruh Jahwe gelah itulis Jakup kata-kata enda, “Rawa manusia labo maba kai si benar i lebe-lebe Dibata.”​—Jak. 1:20.

⁵ La bagi rawa manusia, rawa Jahwe lalap banci kendalikenNa, alasen Jahwe merawa pe lalap jelas. Amin pe merawa kel Ia, tetap Ia adil. La pernah kernepkenNa “kalak si benar radu ras kalak jahat.” (Kej. 18:22-25) Janah adi merawa Jahwe, lalap lit alasenna si benar. Mari siperdiateken dua alasenna janah kai pelajarenna man banta.

6. Uga tanggapen Jahwe sanga gelarNa itokohi?

⁶ Alasen Jahwe merawa: Adi gelarNa itokohi. Adi lit kalak si ngaku nembah Jahwe tapi jahat perbahanenna, e ncedai gelar Jahwe. Emaka wajar adi merawa Jahwe man bana. (Esek. 36:23) Bali bagi si enggo sibahas bas pasal-pasal sebelumna, lagu langkah ras perbahanen kalak Israel erban gelar Jahwe keri kel itokohi. Emaka wajar adi merawa Jahwe man kalak e. Tapi rawa Jahwe e banci kendalikenNa janah berekenNa hukumen si cocok man umatNa. (Jer. 30:11) Kenca seh tujun hukumenNa e, lanai Ia merawa janah lanai segat ateNa.​—Ms. 103:9.

7, 8. Kai saja si banci sipelajari arah tanggapen Jahwe man kalak Israel?

⁷ Pelajarenna: Tanggapen Jahwe man kalak Israel jadi persinget si tegas man banta. Bagi kalak Israel, kita pe ibereken sada kehamaten guna maba gelar Jahwe. Kita kap Saksi-Saksi Jahwe. (Jes. 43:10) Ranan ras perbahanenta lit pengaruhna nandangi tanggapen kalak kerna Jahwe. Ula sempat sengaja  silakoken dosa si erban gelar Jahwe itokohi. Adi bage perbahanenta, berarti kita munapik, emaka pasti merawa Jahwe. I bas waktuna, pasti Ia ertindak guna njaga gelarNa tetap badia.​—Heb. 3:13, 15; 2 Pet. 2:1, 2.

⁸ Perban enggo ikataken man banta maka banci ‘gara kel rawa’ Jahwe, perlu nge kita mbiar ndeher ras Ia? Lang. Siteh maka Jahwe e sabar janah nggit ngampuni. (Jes. 55:7; Rom. 2:4) Tapi siteh ka maka bereken Jahwe disiplin adi e iperluken. Adi lit sekalak jelma si lalap ngelakoken dosa, merawa me Jahwe janah la pediatNa ia tetap lit i tengah-tengah umatNa. (1 Kor. 5:11-13) Enda pasti erban reh belinna pengerganta man Jahwe. Janah, enggo ka jelas ikatakenNa kai si banci erban Ia merawa. Perban siteh kai si erban Jahwe merawa, emaka la silakoken perbahanen si bage.​—Joh. 3:36; Rom. 1:26-32; Jak. 4:8.

9, 10. Kai si lakoken Jahwe sanga umatNa si setia lit bas ancamen? Ban contohna.

⁹ Alasen Jahwe merawa: Adi umatNa si setia lit bas ancamen. Merawa Jahwe sanga iserang musuh umatNa si setia, si erlindung man baNa. Contohna, sanga kalak Israel ndarat arah Mesir, Paro ras pasukenna si megegeh maju ngelawan umat Dibata si lit i pinggir Laut Merah. Paksa si e, kalak Israel lanai tehna ku japa pe, tempa-tempa la lit si banci nampati kalak e. Tapi sanga ayaki pasuken Paro kalak Israel ku tengah Laut Merah si kerah, iban Jahwe lepasen roda-roda gereta perang kalak e janah gedapkenNa kalak e. “La lit sekalak pe ipediat selamat.” (Kel. 14:25-28) Gara kel rawa Jahwe man kalak Mesir perban ‘kekelengenNa si setia’ man umatNa.​—Baca Keluaren 15:9-13.

¹⁰ Perban kekelengen Jahwe, ertindak ka Ia bas jaman Raja Hiskia. Paksa si e, pasuken Assur terkenal kejam ras megegeh. Ancam kalak e penduduk Jerusalem maka kepungna atena kota Jerusalem. Adi kota e ikepung, pasti susah akap umat Jahwe si setia janah dungna banci kalak e mate. (2 Raj. 18:27) Emaka, suruh Jahwe sada malekat guna munuh 185.000 prajurit musuh i bas sada berngi! (2 Raj. 19:34, 35) Cuba bayangken keadan perkemahen kalak Assur paginna. I japa pe amparen mayat-mayat bas perkemahen e janah la lit sora kai pe terbegi. La lit sora trompet si ngingeti prajurit-prajurit e, la lit si njemak tombak, perisai, ras pedang kalak e.

11. Engkai maka contoh-contoh kerna perbahanen Jahwe man umatNa si lit bas ancamen erban kita terapuli janah reh pangna?

¹¹ Pelajarenna: Contoh-contoh e ndai jadi persinget man musuh-musuhta kerna kai si lakoken Jahwe adi umatNa lit bas ancamen. “Seh kel ngerina adi ndabuh ku bas tan Dibata si nggeluh” sanga gara kel rawaNa. (Heb. 10:31) Tapi man banta,  contoh-contoh e erban kita terapuli janah reh pangna kita. Terapuli kita perban musuhta si utama eme Setan, pasti gagal. Lanai ndekah, waktuna guna merentah si “ntisik nari ngenca,” keri me! (Ket. 12:12) Sope si e terjadi, banci kita pang ngelayani Jahwe, perban tek kita maka manusia, organisasi, ntah pe pemerentah la banci ngelarang kita ngelakoken peraten Dibata. (Baca Masmur 118:6-9.) Pasti seri perasanta ras Rasul Paulus si ngataken, “Adi Dibata ras kita, ise kin si banci ngelawan kita?”​—Rom. 8:31.

12. Sanga kiniseran si mbelin terjadi, kai si erban Jahwe merawa?

¹² Bas kiniseran si mbelin pagi, lindungi Jahwe kita bali bagi si lakokenNa man umatNa sanga iserang pasuken Mesir ras Assur. Sanga usahaken musuh engkernepken kita, merawa pagi Jahwe perban keleng kel ateNa kita. Musuh-musuh si nyerang kita e tempa-tempa ngkuit anak mata Jahwe, emaka mis Ia ertindak. (Sak. 2:8, 9) Kernepken Dibata pagi kerina musuh-musuhNa, lenga pernah bage buena kalak si  mate. Tapi musuh-musuh e arusna la sengget sanga merawa Jahwe man kalak e. Engkai?

13. Persinget kai saja si enggo bereken Jahwe?

¹³ Jahwe “la nukah merawa.” Enggo mulih-ulih persingetiNa maka kernepkenNa pagi kalak si ngelawan Ia ras si ngancam umatNa. (Kel. 34:6, 7) Suruh Jahwe nabi-nabiNa bagi Jeremia, Esekiel, Daniel, Jesus Kristus, bage pe Rasul Petrus, Paulus, ras Johanes guna mpersingeti maka terjadi pagi perang si mbelin.​—Nen kotak “Persinget Jahwe kerna Sada Perang si Mbelin.”

14, 15. Kai saja si enggo lakoken Jahwe, janah engkai?

¹⁴ Aturken Jahwe gelah persinget-persingetNa e itulis bas Pustaka. IpastikenNa ka maka Pustaka si Badia eme buku si mbuena iterjemahken ras isebarken. I belang-belang doni, banNa gelah tersuruh ukur umatNa guna nampati kalak jadi temanNa janah guna mpersingeti kalak maka “wari Jahwe si  mbelin enggo ndeher.” Umat Dibata e bali bagi pasuken si mbelin. (Sep. 1:14; Ms. 2:10-12; 110:3) Ban Jahwe ka tersuruh ukur umatNa nerjemahken publikasi si dasarna arah Pustaka ku ratusen bahasa. Igunaken kalak e ka miliaren jam tiap tahun guna mpeseh berita si meriah bage pe persinget arah Pustaka.

¹⁵ Aturken Jahwe gelah kerina dahin e ndai ilakoken “perban labo teNa sekalak pe ikernepken tapi gelah kerina min ertobat.” (2 Pet. 3:9) Tuhu-tuhu sada kehamaten banci kita jadi wakil Dibata, Dibata si sabar ras perkeleng, janah ikut ka kita mpeseh berita arah Ia nari. Tapi ntisik nari, keri me waktuna man kalak si la megiken persinget Dibata.

16, 17. Ja nari teh Jahwe ndigan musuh-musuh nyerang umatNa? Jelasken.

¹⁶ Enggo tetapken Jahwe ndigan perang si terakhir e terjadi. Enggo tehNa ndigan musuh-musuh e nyerang umatNa. (Mat. 24:36) Ja nari teh Jahwe?

 ¹⁷ Bali bagi si enggo sibahas bas pasal sebelumna, kataken Jahwe man Gog, “Kupasang pagi kawit bas rahangndu.” Iban Jahwe pagi tersuruh ukur bangsa-bangsa guna nyerang umatNa janah e me si mbenai perang si terakhir e terjadi. (Esek. 38:4) Enda labo ertina Jahwe si mbenai perang e ntah pe si maksa musuhNa guna ngelakoken sura-suraNa. Tapi enda ncidahken maka banci teh Jahwe isi pusuh musuh-musuhNa, janah tehNa kai si lakoken kalak e bas situasi tertentu.​—Ms. 94:11; Jes. 46:9, 10; Jer. 17:10.

18. Engkai maka pang manusia ngelawan Dibata Si Madakuasa?

¹⁸ Adi labo Jahwe si mbenai perang e ntah pe si maksa musuhNa guna erperang, engkai maka pang manusia erperang ngelawan Dibata Si Madakuasa? Perban paksa si e, enggo berhasil kalak e engkernepken agama palsu si lit i doni. Emaka banci saja kalak e erpengakap labo lit Dibata ntah pe labo Ia ikut campur bas urusen manusia. Janah akap kalak e ka, adi lit kin Dibata, pasti enggo lindungiNa agama-agama si ngaku jadi wakil Dibata. La kalak e sadar maka Jahwe nge si  erban sura-sura bas pusuh kalak e guna engkernepken agama-agama si enggo ncedai gelar Jahwe.​—Ket. 17:16, 17.

19. Banci saja kai pagi si terjadi kenca agama palsu ikernepken?

¹⁹ Kenca agama palsu ikernepken, banci saja suruh Jahwe umatNa mpeseh berita penghakimen. Ipeseri buku Ketangkasen berita e ras udan batu es, berat tiap batu es e kira-kira 20 kilo. (Ket. 16:21) Mungkin isi berita e: Ntisik nari ikernepken me kuasa-kuasa politik ras perdagangen. Banci saja kalak si megi berita e tersiksa kel kapna emaka hinana Dibata. Banci saja berita e me si erban bangsa-bangsa nyerang umat Dibata. Pengadi kalak e atena dahin erberita e seh rasa lalap. Akap kalak e la lit si nampati kita janah nukah engkernepkenca. Tapi enggo salah sangka kalak e!

20, 21. Ise kin Gog e, janah kai pagi si terjadi man bana?

²⁰ Bali bagi si enggo sibahas bas Pasal 17 bas buku enda, inubuatken Esekiel kerna “Gog arah negri Magog” eme bangsa-bangsa si ersada guna nyerang kita. (Esek. 38:2) Amin pe bangsa-bangsa e teridah ersada, si mpersada kalak e bagi sada benang ngenca. Memang kalak e teridah kerja sama, tapi situhuna kalak e ersaing, bangsana kapna si jagona, janah bangsana kapna si pentingna. Nukah kel akap Jahwe erban kalak e “siserang-serangen.” (Esek. 38:21) Tapi sanga kernep pagi bangsa-bangsa e, labo manusia si erbanca.

²¹ Sope musuh-musuh e ikernepken, idah kalak e pagi “tanda Anak manusia.” (Mat. 24:30) Banci saja kai si terjadi paksa si e luar biasa kel ntah pe ajaib si ncidahken kuasa Jahwe ras Jesus. Idah musuh-musuh pagi kejadin-kejadin si erban kalak e nggirgir. Bagi si nubuatken Jesus, “Pingsan pagi kalak perban biarna bage pe perban ngukuri kai si nandangi terjadi i doni.” (Luk. 21:25-27) Nggirgir pagi kalak e sanga sadar kalak e maka arusna la serangna umat Jahwe. La banci lang, idah kalak e me uga Jahwe selaku Pencipta ras penguasa malekat ertindak jadi Komandan Perang. (Ms. 46:6-11; Esek. 38:23) Pasti aturken Jahwe pagi pasukenNa si lit i surga ras gegeh alam guna ngelindungi umatNa si setia ras guna engkernepken musuh-musuhNa.​—Baca 2 Petrus 2:9.

22, 23. Ise pagi si ngelindungi umat Dibata? Uga perasan pasuken Dibata e nandangi tugasna?

²² Cuba bayangken, pasti semangat kel Jesus sanga ipinpinna pasukenna guna nyerang musuh Dibata ras guna ngelindungi kalak si engkelengi bage pe si ngelayani Bapakna. Bayangken ka uga perasan kalak si ipilih ku surga. Sope Harmagedon, kalak si ipilih ku surga si nggeluh denga i doni nangkih pagi ku surga gelah kerina si 144.000 e banci erperang radu ras Jesus. (Ket. 17:12-14) Sanga kalak si ipilih ku surga e nggeluh  denga i doni, pasti lit teman-teman kompakna arah biri-biri si deban. Banci sibayangken uga perasan kalak e sanga erperang guna teman-temanna e. Alu kuasa si ibereken Jahwe, kalak si ipilih ku surga e ndukung teman-temanna si setia si enggo nampati kalak e bas masa-masa si sulit.​—Mat. 25:31-40.

²³ Pasuken Jesus si lit i surga pe termasuk ka nge malekat-malekat. (2 Tes. 1:7; Ket. 19:14) Mbarenda, sampati malekat-malekat e Jesus mpelawes Setan ras pengikutna surga nari. (Ket. 12:7-9) Ikut ka malekat-malekat e mpepulung kalak si nggit nembah Jahwe. (Ket. 14:6, 7) Emaka cocok kel adi ikut pagi malekat-malekat e iban Jahwe guna ngelindungi umatNa si setia. Tapi situhuna, si pentingna man anggota pasuken Jahwe e eme gelah gelar Jahwe ipebadia. Emaka sada kehamaten man malekat-malekat e banci erban gelar Jahwe badia alu ikut engkernepken musuh-musuhNa.​—Mat. 6:9, 10.

24. Sanga terjadi pagi perang Harmagedon, kai si ilakoken umat Dibata?

²⁴ Perlu nge mbiar umat Dibata sanga perang Harmagedon e? Lang. Sebap, megegeh kel pasuken Jahwe e janah semangat pasuken e ngelindungi umat Dibata. Sanga si e, umat Dibata ‘tedis janah jurgak kalak e sebap pembebasen kalak e enggo ndeher.’ (Luk. 21:28) Sope reh wari Jahwe, penting kel siusahaken asa ngasupta gelah reh teremna kalak nembah Jahwe ras engkelengi Ia, sebap Ia Bapak si perkuah si lalap ngelindungi kita!​—Baca Sepanya 2:2, 3.

25. Kai kari sipelajari bas pasal seterusna?

²⁵ Biasana, adi perang manusia kacau hasilna janah erban kalak rate mesui. Tapi perang Harmagedon maba kedamen ras keriahen ukur. Kai pagi si terjadi kenca ngadi rawa Jahwe, kenca pejuang-pejuangNa lanai erperang, janah kenca lanai lit terbegi sora perang? Sibahas kari masa depan si luar biasa e bas pasal seterusna.