1, 2. Kai perang si mbelin si terjadi kentisik nari? Janah penungkunen kai saja si perlu sijawap? (Nen gambar bas awal pasal.)

RIBUN tahun dekahna, doni enda dem alu dareh kalak si mate perban perang. Contohna bas abad pe-20-ken, melala kel kalak mate perban Perang Doni I ras II. Tapi, kentisik nari terjadi me perang si mbelinna bas sejarah manusia. Enda labo perang antara manusia guna kepentingen bangsana, tapi enda perang bas wari si mbelin eme ‘perang bas wari Dibata Si Madakuasa.’ (Ket. 16:14) Perang e terjadi perban lit musuh si sombong si nyerang negri si merga kel akap Dibata. Kai kari si lakoken Jahwe? Merawa kel Jahwe Tuhan Si Meganjangna, janah kernepkenNa kalak e alu kuasaNa si luar biasa. Lenga pernah terjadi kejadin si bage ngerina bas doni enda.

² Ise musuh e? Negri si apai si iserangna? Ndigan iserangna? Engkai maka serangna? Janah uga carana nyerangsa? Perlu siteh jawapenna, perban kerina kejadin e lit pengaruhna man banta. Engkai? Perban kita nembah Jahwe alu cara si benar bas doni enda. Mari sibahas sada nubuat si luar biasa si lit bas Esekiel pasal 38 ras 39.

3. Ceritaken ringkasen nubuat Esekiel kerna Gog arah Magog.

 ³ Baca Esekiel 38:1, 2, 8, 18; 39:4, 11. Enda me ringkasen nubuatna: “Bas akhir tahun-tahun e” musuh si igelari ‘Gog arah Magog’ nyerang “negri” umat Dibata. Serangen e erban ‘gara kel rawa Jahwe,’ emaka talukenNa Gog. * Kenca si e, ban Jahwe musuh-musuhNa e ras kerina si ndukung musuh e “jadi pangan man kerina perik pemangsa ras binatang buas.” Dungna, bereken Dibata sada “ingan jadi kuburen Gog.” Gelah banci siangkai nubuat enda, perlu siteh lebe ise kin Gog e.

4. Kai si banci sisimpulken kerna Gog arah Magog?

⁴ Ise kin Gog arah Magog e? Arah nubuat Esekiel banci siteh maka Gog eme musuh umat Dibata. Payo kin Gog e nggambarken Setan, musuh utama Dibata? Puluhen tahun dekahna bage me nina publikasita. Tapi kenca nubuat Esekiel iriset terdauhen, kepeken pemahamenta perlu isesuaiken. Ijelasken Menara Pengawal maka Gog arah Magog labo mahluk roh tapi manusia. Gog arah Magog eme bangsa-bangsa si ersada ngelawan umat Dibata. * Sope sibahas engkai maka penjelasen e masuk akal, mari sibahas lebe dua alasenna si lit bas nubuat Esekiel si mbuktiken maka Gog labo mahluk roh.

5, 6. Uga nubuat Esekiel mbuktiken maka Gog arah Magog labo mahluk roh?

⁵ “Kuban pagi kam jadi pangan man kerina perik pemangsa.” (Esek. 39:4) Bas Pustaka, perik pemangsa si man bangke rusur nggambarken persinget kerna penghakimen Dibata. Enggo bereken Jahwe persinget si bage man bangsa Israel ras bangsa-bangsa si deban. (Ul. 28:26; Jer. 7:33; Esek. 29:3, 5) Persinget-persinget e labo ibereken man mahluk roh, tapi man manusia. Janah, banci kin mahluk roh ipan perik pemangsa ras binatang buas? Pasti la banci. Jadi, enda ndai mbuktiken maka Gog labo mahluk roh.

⁶ ‘Kubereken pagi ingan jadi kuburen Gog bas Israel.’ (Esek. 39:11) La pernah ikataken Pustaka maka mahluk roh ikuburken bas doni. Tapi Setan ras malekat-malekat jahat ibenterken pagi ku lubang si seh kel bagesna 1.000 tahun dekahna. Kenca si e, ibenterken pagi mahluk roh e ku danau api ntah pe ikernepken seh rasa lalap. (Luk. 8:31; Ket. 20:1-3, 10) Emaka, perban ibereken sada “ingan jadi kuburen” man Gog bas doni, pastilah Gog e labo mahluk roh.

7, 8. Seri pagi si terjadi man “raja utara” bage pe man Gog arah Magog, kai e?

⁷ Gundari, siteh maka Gog arah Magog labo mahluk roh. Jadi, ise dage Gog arah Magog e si nyerang umat Dibata? Mari siperdiateken dua nubuat Pustaka si nampati kita ndatken jawapenna.

⁸ “Raja utara.” (Baca Daniel 11:40-45.) Inubuatken Daniel kerna kuasa-kuasa doni bas jamanna nari seh ngasa jamanta  gundari. Bas nubuat e, lit ikatakenna kerna dua kuasa politik si lalap ersaing, eme “raja selatan” ras “raja utara.” Si igambarken duana raja e lalap ganti-ganti perban erbage bangsa ersaing gelah jadi bangsa si mbelinna kuasana. Kerna serangen si terakhir arah raja utara “bas pendungi jaman,” ikataken Daniel, “Maju pagi ia alu seh kel rawana guna engkernepken ras nasapken enterem kalak.” Ise si khususna iserang raja utara? Kalak si nembah Jahwe. * Tapi serangen raja utara man umat Dibata labo pagi berhasil. Raja utara pasti pagi ikernepken bali bagi Gog arah Magog si “ikernepken pagi.”

9. Bali bagi si terjadi man Gog arah Magog, kai pagi si terjadi man “raja-raja si lit i belang-belang doni”?

⁹ “Raja-raja si lit i belang-belang doni.” (Baca Ketangkasen 16:14, 16; 17:14; 19:19, 20.) Inubuatken buku Ketangkasen maka “raja-raja i doni” nyerang “Raja kerina raja” pagi eme Jesus si merentah i surga. Tapi perban Jesus lit i surga, raja-raja i doni la banci nyerang ia, emaka serangna umat Dibata si lit i doni si ndukung Kerajan Dibata. Tapi bas perang Harmagedon, ikernepken me raja-raja i doni. Bali bagi si terjadi man Gog arah Magog, raja-raja i doni pe ikernepken kenca iserang kalak e umat Dibata. *

10. Kai si enggo siteh kerna Gog arah Magog?

¹⁰ Kai si enggo siteh kerna Gog? (1) Ia labo mahluk roh. (2) Gog eme bangsa-bangsa si lit i doni si ntisik nari nyerang umat Dibata. Perban umat Dibata lit i belang-belang doni, kerina bangsa ersada pagi arihna guna nyerang umat Dibata, ntah uga gia carana. (Mat. 24:9) Tapi situhuna, Setan nge si ngerencanaken serangen e janah ia si ngaturkenca. Mbarenda nari, pengaruhina bangsa-bangsa guna nyerang kalak si nembah Jahwe. (1 Joh. 5:19; Ket. 12:17) Tapi si khusus ibahas nubuat Esekiel kerna Gog arah Magog eme kai pagi si ilakoken bangsa-bangsa si lit i doni si nandangi nyerang umat Jahwe. *

11. Kai si ikataken nubuat Esekiel kerna “negri” si nandangi iserang Gog?

¹¹ Bagi si enggo sibahas bas  paragrap 3, gara pagi rawa Jahwe iban Gog arah Magog perban serangna negri si merga akap Jahwe. Negri si apai kin maksudna e? Mari sibahas mulihi nubuat Esekiel. (Baca Esekiel 38:8-12.) Bas nubuat e ikataken maka ‘iserang Gog pagi negri kalak si enggo malem’ ras “si ipepulung arah erbage bangsa.” Kalak si mulih ku negri e “aman akapna tading i je,” amin pe ‘la ilindungi tembok, la lit palang-palangna, ras la lit gerbang-gerbangna,’ janah ‘ipepulung kalak e erta ras barang-barang’ i je. Si tading bas negri e eme umat Jahwe si lit i belang-belang doni si nembah Jahwe alu cara si benar. Negri si apai kin maksudna e?

12. Perubahen kai si terjadi mbarenda bas Israel?

 ¹² Si pertama, perlu siperdiateken kai si terjadi man kalak Israel ras negri kalak e. Mbarenda bas negri e kalak e tading, i je kalak e erdahin, ras nembah Jahwe ratusen tahun dekahna. Sanga kalak e la setia, inubuatken Esekiel maka negri kalak e gersang pagi janah la iingani. (Esek. 33:27-29) Tapi lit pagi kalak si itaban si setia si ibebasken arah Babilon, kenca si e mulihi sembah kalak e Jahwe alu cara si benar bas negri e. Paksa si e, pasu-pasu Jahwe kalak e bage pe negrina, mulihi subur negri kalak e bali “bagi Taman Eden.” (Esek. 36:34-36) Si e terjadi mulai tahun 537 SM, sanga kalak Jahudi si itaban mulih ku Jerusalem gelah cara si benar i bas nembah Jahwe mulihi idalanken.

13, 14. (a) Kai maksudna negri rohani e? (b) Engkai maka merga akap Jahwe negri rohani e?

¹³ Gundari, umat Dibata pe igejapkenna bagi si igejapken kalak Israel mbarenda. Bagi si enggo sibahas bas Pasal 9 buku enda, umat Dibata ibebasken arah Babilon si Mbelin bas tahun 1919. Bas tahun e, ibaba Jahwe umatNa ku sada negri rohani. Negri enda eme pardis rohani. I je aman siakap janah makmur kita secara rohani perban ras-ras kita nembah Dibata si benar. Bas pardis rohani e, la kita mbiar, tenang pusuhta, janah dame ukurta. (Kua. 1:33) Sialoken ka pangan rohani si la tanggung buena bage pe pendahin si erban meriah ukurta eme mberitaken kerna Kerajan Dibata. Pasti setuju kita nandangi kata-kata enda, “Pasu-pasu Jahwe  kap si erban kalak jadi bayak. Janah labo tambahkenNa kesusahen bas pasu-pasu e.” (Kua. 10:22) I japa pe kita tading, situhuna kita lit bas pardis rohani adi tetap sidukung cara si benar i bas nembah Dibata arah ranan ras perbahanenta.

¹⁴ Merga kel akap Jahwe negri rohani e. Engkai? Perban pendudukna bali bagi “erta si merga arah kerina bangsa” eme kalak si itarikNa guna nembah Ia alu cara si benar. (Hag. 2:7; Joh. 6:44) Usahaken kalak e kel ngubah sipat-sipatna alu ngusih sipat-sipat Dibata si mejile. (Ep. 4:23, 24; 5:1, 2) Tutus ate kalak e ngelayani Dibata perban keleng ate kalak e Dibata janah muliaken kalak e atena Ia. (Rom. 12:1, 2; 1 Joh. 5:3) Cuba bayangken, seh kel riahna ukur Jahwe ngidah umatNa si kerja keras guna erban negri rohani e reh jilena. Perlu siinget, adi sipelebe cara si benar i bas nembah Jahwe, labo saja pardis rohani siban reh jilena, tapi meriah ka siban ukur Jahwe!​—Kua. 27:11.

15, 16. Ndigan Gog nyerang negri rohani e?

¹⁵ Siteh maka ntisik nari ersada bangsa-bangsa guna nyerang negri rohanita si seh kel ergana. Perban sisembah Jahwe alu cara si benar, iserang pagi kita bagi si enggo inubuatken.  Emaka, perlu siteh terbuen kerna si enda. Mari siperdiateken telu penungkunen enda.

¹⁶ Ndigan Gog arah Magog nyerang negri rohani e? Nina nubuat Esekiel, “Bas akhir tahun-tahun e.” (Esek. 38:8) Ertina, iserang me kita sanga doni enda nandangi ikernepken. Perlu siinget, kiniseran si mbelin imulai sanga Babilon si Mbelin eme agama palsu sebelang doni ikernepken. Kenca agama palsu ikernepken janah sope reh Harmagedon, iserang Gog me umat Jahwe. Enda me serangen Gog si terakhir, emaka pekerina kel gegehna nyerang umat Jahwe.

17, 18. Kai pagi si lakoken Jahwe kenca Babilon si Mbelin ikernepken?

¹⁷ Engkai maka serang Gog negri rohani e? Menurut nubuat Esekiel lit dua alasenna. Pertama, perban Jahwe si ngaturkenca, janah si peduaken, perban sura-sura Gog e jahat.

¹⁸ Jahwe si ngaturkenca. (Baca Esekiel 38:4, 16.) Nina Jahwe man Gog, “Kupasang pagi kawit bas rahangndu” janah “Kuban gelah serangndu negriKu.” Kai maksudna kata-kata e? Jahwe kin si erban bangsa-bangsa nyerang umatNa? Pasti lang. La mungkin iban Dibata umatNa rate mesui.  (Jop 34:12) Tapi teh Jahwe sura-sura musuhNa. Segat ate kalak e ngidah umat Jahwe, janah pasti usahaken kalak e engkernepken umat Jahwe adi lit kesempaten. (1 Joh. 3:13) Emaka, ipasang Jahwe kawit bas rahang Gog, janah aturkenNa situasina gelah kai pagi si terjadi sesuai ras sura-suraNa janah sesuai ras waktu si enggo itetapkenNa. Kenca Babilon si Mbelin ikernepken, banci saja ipake Jahwe cara-cara tertentu guna erban bangsa-bangsa ngelakoken sura-sura kalak e. Emaka, iserang Gog pagi umat Dibata. Serangen e me si mbenai Harmagedon, perang si mbelinna si terjadi pagi i doni. Kenca si e, selamatken Jahwe umatNa, buktikenNa hakNa guna merentah, janah muliakenNa gelarNa si badia.​—Esek. 38:23.

19. Engkai maka irampas Gog atena ertata si mergana?

¹⁹ Sura-sura Gog si jahat. Bangsa-bangsa “erban rencana si jahat.” Sedekah enda, segat kel ate kalak e ngidah umat Jahwe, janah sehkenna atena rawana man umat Jahwe. Sanga si e pagi, umat Dibata teridah la ergegeh bagi kalak si tading bas “kuta-kuta si la ilindungi tembok, si la lit palang-palangna,  ras la lit gerbang-gerbangna.” Usahaken bangsa-bangsa ka ‘ngerampok melala barang janah rampasna’ arah “kalak si mpepulung erta ras barang-barang.” (Esek. 38:10-12) “Erta” kai e? Erta e eme erta rohani umat Jahwe. Ertata si mergana eme banci nembah Jahwe alu cara si benar. Irampas bangsa-bangsa erta e labo perban merga akapna tapi perban segat atena, janah atena gelah ula nai min lit kalak si nembah Jahwe.

20. Uga pagi cara Gog nyerang negri rohani e?

²⁰ Uga cara Gog nyerang negri rohani e ntah pe pardis rohani e? Ilarang bangsa-bangsa pagi kita nembah Jahwe ntah pe ngelakoken kegiaten rohani. Contohna, ban kalak e cara gelah pangan rohani la tersedia. Ilarang kalak e kita pulung ntah pe erberita janah icedai kalak e persadanta. Alu bage, iserang kalak e me pardis rohanita. Perban bangsa-bangsa enggo ipengaruhi Setan, usahakenna kel engkernepken umat Jahwe gelah lanai lit kalak si nembah Jahwe bas doni enda.

21. Engkai maka ngata bujur kita perban enggo persingeti Jahwe kita gundari kerna kai si nandangi terjadi?

²¹ Sanga reh pagi serangen Gog arah Magog, kerina umat Jahwe si lit bas negri rohani e ikut maba beratna. Pasti ngata bujur kel kita perban enggo persingeti Jahwe kita sope e terjadi! Gundari, sope terjadi kiniseran si mbelin, mbera-mbera reh belinna tekadta nembah Jahwe alu cara si benar, janah e siakap si pentingna bas geluhta. Alu bage, ikut kita erban negri rohani e reh jilena janah ikut pagi kita ngidah Jahwe mbela umatNa ras gelarNa si badia bas Harmagedon. Kejadin si luar biasa enda ibahas kari bas pasal seterusna.