1, 2. Pelacur si uga nge si erban ciga kel ateta?

UGA nge perasanta adi siidah sekalak pelacur? Banci saja mekuah ateta janah tersungkun-sungkun kita engkai maka sempat ia jadi pelacur. Perban mesera nge pergeluhna maka ia jadi pelacur? Ntah perban jahat nge keluargana man bana sanga ia kitik denga? Ntah perban kejam nge dilakina man bana? Memang, bas doni si jahat enda melala kel pengalamen si bage si erbanca sedih kel siakap. Emaka wajar nge engkai maka mehuli perbahanen Jesus Kristus mbarenda man piga-piga pelacur. Ikataken Jesus maka kalak si ertobat banci lit arapenna eme kegeluhen si terulin.​—Mat. 21:28-32; Luk. 7:36-50.

² Gundari, cuba bayangken lit ka pelacur si deban. Diberu enda sengaja ia jadi pelacur. Menurutna dahin e labo pemela-melaken tapi nguntungken ia. Jadi pelacur ia gelah datna sen ras kekuasan. Si parahna ka, situhuna lit nge dilakina si mehuli ras setia. Tapi seh kel ukurna, hianatina dilakina e.  Pasti ciga kel ateta ngenen kalak si bage. Bage me perasan Jahwe ngidah agama palsu. Emaka, mulih-ulih igambarkenNa agama palsu e bagi pelacur.

3. Cerita kai kari sibahas bas pasal enda?

³ Bas buku Esekiel, lit dua cerita si menarik si isina perumpaman. Perumpaman e kerna pelacur si nggambarken umat Dibata si la setia bas Israel ras Juda (Esekiel pasal 16 ras 23). Sope sibahas kerna si e, mari siperdiateken pelacur si deban si ikataken bas buku Ketangkasen eme buku si terakhir bas Pustaka. Enggo ilakokenna perbahanen si la rorat e ndauh sope jaman Esekiel, lenga pe lit bangsa Israel enggo lakokenna perbahanen e. Seh ngasa gundari tetap denga ia jadi pelacur.

4, 5. Ise “Babilon si Mbelin” e, janah kai buktina? (Nen gambar bas awal pasal.)

⁴ Bas akhir abad pertama, bereken Jesus man Rasul Johanes sada pengenehenen si luar biasa. Idah Johanes sekalak diberu si ikataken “pelacur si mbelin” bage pe “Babilon si Mbelin, nande kerina pelacur.” (Ket. 17:1, 5) Ratusen tahun dekahna, peminpin-peminpin agama ras pakar Pustaka la tehna ise kin pelacur e. Lit si ngataken maka pelacur e Babilon, Roma, ntah pe Gereja Katolik Roma. Tapi Saksi-Saksi Jahwe enggo puluhen tahun tehna ise kin “pelacur si mbelin” e. Ia kap agama palsu sebelang doni. Kai buktina?

⁵ Pelacur e ersalah perban lakokenna perbahanen seks si salah ras “raja-raja i doni” eme kuasa-kuasa politik. Emaka, pelacur enda labo kuasa politik. Buku Ketangkasen pe ngataken maka “kalak si erbinaga i doni” ntah pe sistem perdagangen, tangis ia sanga Babilon si Mbelin ndabuh. Jadi, Babilon si Mbelin labo sistem perdagangen. Adi bage, ise ia? Menurut Johanes, ia ersalah perban lakokenna perbahanen si lit hubungenna ras ‘ilmu sihir,’ sembahna berhala, janah tipuna kalak. La kin bage nge si ilakoken organisasi-organisasi agama bas doni si jahat enda? Pelacur e pe ikataken kundul i datas kuasa politik ntah pe ikendalikenna kuasa politik. Itindasna ka umat Jahwe si setia. (Ket. 17:2, 3; 18:11, 23, 24) La kin bage ka nge si ilakoken agama palsu seh ngasa gundari?

6. Engkai maka Babilon si Mbelin igelari “nande kerina pelacur”?

⁶ Babilon si Mbelin igelari “pelacur si mbelin,” janah igelari ka ia “nande kerina pelacur.” Engkai maka bage? Agama palsu la ersada, terbagi-bagi jadi melala aliren bage pe sekte. Mulai kenca bahasa manusia ikacauken bas kota Babil ntah pe Babilon, erbage-bage ajaren agama palsu seh ku  belang-belang doni. Janah agama pe terus reh buena. Emaka cocok istilah “Babilon si Mbelin” ibuat arah gelar kota e, perban je nari me asalna agama palsu. (Kej. 11:1-9) Jadi, kerina agama palsu banci ikataken bagi anak arah sada pelacur si mbelin ntah pe sada organisasi. Rusur ipake Setan agama-agama e gelah tertarik kalak nandangi kai si lit hubungenna ras ilmu sihir ras nembah berhala, bage pe man ajaren ntah pe perbahanen si la ngergai Dibata. Perban si e, ipersingeti Dibata umatNa nina, “Ndaratlah, o umatKu! Ndaratlah je nari, adi la ate kena ikut bas dosa-dosana.”​—Baca Ketangkasen 18:4, 5.

7. Engkai maka kita nggit “ndarat” arah Babilon si Mbelin?

⁷ Enggo nge patuhindu persinget e? Engkai maka nggit kita matuhisa? Perlu siinget, manusia lit ‘keperlun rohanina,’ sebap bage kita iciptaken Jahwe. Keperlun e banci sidat adi sisembah Jahwe alu cara si benar. (Mat. 5:3, ctt.) Umat Dibata la nggit ipengaruhi perbahanen pelacur rohani e, ntah pe agama palsu. Tapi, Setan si Iblis lit ka tujunna si deban. Lalap usahakenna gelah umat Dibata terpengaruh nandangi perbahanen pelacur e. Si sedihna, rusur ia berhasil. Bas jaman Esekiel, umat Dibata mulih-ulih jadi pelacur secara rohani. Emaka arah kesalahen kalak e, melala sidat pelajaren kerna patoken Jahwe, keadilenNa, ras perkuah ateNa.

8-10. (a) Kai sada syarat si penting i bas nembah Jahwe? (b) Uga perasan Jahwe adi sembah umatNa dibata-dibata si deban? Ban contohna.

⁸ Bas buku Esekiel, igunaken Jahwe dua cerita kerna pelacur guna nggambarken perasanNa. Duana cerita e ncidahken maka ceda kel ukur Jahwe perban umatNa la setia, hianati kalak e Ia arah perbahanen kalak e. Engkai maka ipeseri Jahwe umatNa ras pelacur?

⁹ Gelah siteh jawapenna, perlu siinget syarat si penting i bas nembah Jahwe bagi si enggo sipelajari bas Pasal 5 buku enda. Bas Undang-Undang Musa man kalak Israel nina Jahwe, “Aku saja ngenca si arus sembah kena. Ula sembah kena dibata-dibata si deban. . . . Aku kap Jahwe Dibata kena, Aku saja si arus sembah kena.” (Kel. 20:3, 5) UlihiNa ka sekali nari perentah e nina, “Ula sembah kena dibata-dibata si deban, Aku sajalah sembah kena. Aku kap Jahwe, Aku ngenca Dibata si banci sembah kena.” (Kel. 34:14) Jelas kel ikataken Jahwe kai sura-suraNa. Gelah benar carata nembah Jahwe janah nggit Ia ngalokenca, arus Ia saja ngenca sisembah.

¹⁰ Hubungen Jahwe ras umatNa banci iumpamaken bagi perjabun. Perbulangen ras ndehara lit hakna ngarapken teman  geluhna tetap setia. Adi salah sada arah kalak e lebihsa perbahanenna man kalak si deban si labo teman geluhna, wajar teman geluhna e cemburu, janah ihianati kapna ia. (Baca Heber 13:4.) Bage ka me perasan Jahwe. Ihianati kapNa Ia perban umatNa enggo erjanji guna nembah Ia saja. Tapi dungna, sembah kalak e ka dibata-dibata si deban. Emaka, jelas kel ituriken Jahwe perasanNa bas Esekiel pasal 16.

11. Kai si ceritaken Jahwe kerna Jerusalem ras asal-usulna?

¹¹ Bas Esekiel pasal 16 me itulis kata-kata Jahwe si gedangna. Kata-kata enda pe salah sada nubuat si gedangna bas Kitap-Kitap Heber. Igunaken Jahwe kota Jerusalem nggambarken kalak Juda si la setia. Kenca si e, ceritakenNa asal-usul kota e bage pe sanga hianati kalak e Ia. Tangtangna, Jerusalem bali bagi anak diberu si mbaru lahir, kotor denga, lenga ergegeh, janah la lit si ngurussa. Bapakna ras mamakna eme kalak Kanaan si la nembah Jahwe. Situhuna, sope italuken Daud kota Jerusalem, kota e enggo ndekah ikuasai kalak Jebusi (salah sada suku kalak Kanaan). Mekuah ate Jahwe ngidah anak diberu si mbaru lahir e. Emaka ibuatNa anak e, bersihkenNa, janah urusNa seh ngasa galang. Dungna diberu e tempa-tempa jadi ndehara Jahwe. Kalak Israel si tading bas kota e enggo erban perjanjin ras Jahwe, si mbarenda iban kalak e bas jaman Musa. (Kel. 24:7, 8) Kenca Jerusalem jadi ibu kota negri e, ipasu-pasu Jahwe me Jerusalem, iban ia jadi bayak ras mejile, bagi sekalak ndehara si dat perhiasen si mejile arah perbulangenna si bayak ras erkuasa.​—Esek. 16:1-14.

12. Engkai maka dungna Jerusalem lanai setia? Jelasken.

¹² Kenca si e, kai si terjadi? Nina Jahwe, “Mulai andalkenndu jilendu e, jadi pelacur kam perban kam terkenal. Ise pe si lewat, berekenndu dirindu man bana janah jilendu e jadi jangna.” (Esek. 16:15) Bas jaman Salomo, pasu-pasu Jahwe umatNa janah banNa kalak e jadi bayak. Luar biasa kel kota Jerusalem paksa si e janah terkenal kel. (1 Raj. 10:23, 27) Tapi dungna lanai kalak e setia, melala diberu Salomo arah bangsa asing. Janah gelah meriah ukur diberuna e, sembahna ka dibata-dibata si deban. Dungna, Jerusalem lanai badia. (1 Raj. 11:1-8) Piga-piga raja si merentah kenca Salomo, jahaten ka asangken ia. Emaka i belang-belang negri e, lanai benar cara kalak nembah Jahwe. Dungna, kalak e jadi pelacur secara rohani janah hianatina Dibata Jahwe. Uga nge perasan Jahwe? Nina, “Aturna la lakokenndu si bage, si e arusna la pernah terjadi.” (Esek. 16:16) Tapi umatNa reh dekahna reh dauhna nilah, janah perbahanen kalak e reh jahatna!

13. Kejahaten kai si ilakoken umat Dibata bas Jerusalem?

 ¹³ Cuba bayangken uga cigana ate Jahwe janah uga getemna pusuhNa ngidah perbahanen bangsa si enggo ipilihNa. Nina, “Buatndu ka anak-anakndu si dilaki ras si diberu si lahirkenndu man bangKu, jenari korbankenndu kalak e jadi persembahen man berhala-berhala. Lenga kin kam puas jadi pelacur? Bunuhndu anak-anakKu si dilaki, persembahkenndu jadi korban alu nutung kalak e.” (Esek. 16:20, 21) Kejam kel perbahanen kalak e. Janah situhuna, e ncidahken uga kejamna Setan e. Lalap iusahakenna mpengaruhi umat Jahwe ngelakoken perbahanen si jahat. Tapi Dibata Jahwe perdiatekenNa kerinana, tegakkenNa pagi keadilen. Janah uga pe parahna akibat perbahanen Setan e, banci pagi imasapkenNa.​—Baca Jop 34:24.

14. Ise kakak ras adek Jerusalem bas perumpaman Jahwe? Janah ise si jahatna perbahanenna antara kalak e teluna?

¹⁴ Jerusalem la sadar maka perbahanenna e seh kel jahatna. Tetap ia jadi pelacur, ikataken Jahwe maka sitik pe la tehna mela. Parahen perbahanenna asangken pelacur si deban perban galarina kalak gelah banci lakokenna perbahanen seks si salah. (Esek. 16:34) Nina Dibata, Jerusalem e seri ras “mamakna” eme suku-suku si la nembah Dibata si mbarenda nguasai negri e. (Esek. 16:44, 45) Bas perumpaman enda, ikataken Jahwe maka lit kakak Jerusalem eme Samaria si enggo leben jadi pelacur secara rohani. Ikataken Dibata ka adekna eme Sodom, kota si sombong ras jahat kel si dungna ikernepken. Arah je nari, buktiken Jahwe maka Jerusalem e jahaten asangken Samaria bage pe Sodom. (Esek. 16:46-50) Engkai? Perban lalap la begiken umat Dibata persinget Dibata, janah lakoken kalak e perbahanen si erban ciga ate.

15. Engkai maka hukum Jahwe Jerusalem, janah kai arapen si bereken Jahwe?

¹⁵ Kai pagi si ilakoken Jahwe? Nina Jahwe man Jerusalem, “Kupepulung kerina rondong-rondongndu si enggo meriah banndu ukurna” janah “Kubereken pagi kam ku tan kalak e.” Kalak si la nembah Dibata si mbarenda erteman ras umat Dibata, ikernepkenna pagi umat Dibata janah rampas kalak e perhiasenna bage pe ertana. Nina Jahwe man umatNa, “Benteri kalak e pagi kam alu batu jenari bunuhna kam alu pedang.” Engkai maka hukum Jahwe umatNa? Tujunna labo guna engkernepken kalak e tapi gelah ‘lanai kalak e jadi pelacur.’ Nina Jahwe ka, “Kusehken pagi rawaKu man bandu, kenca si e lanai Aku merawa man bandu. Dung e enggo tenang Aku, lanai Aku sakit hati.” Bali bagi si enggo sibahas bas Pasal 9 buku enda, ate Jahwe gelah bas sada wari pagi, umatNa si itaban e banci mulihi bagi si mbarenda. Engkai?  Perban nina, “Lalap pagi Kuinget perjanjin si enggo Kuban ras kam sanga kam nguda denga.” (Esek. 16:37-42, 60) Jahwe tetap setia, la bagi umatNa!​—Baca Ketangkasen 15:4.

16, 17. (a) Engkai maka lanai sikataken maka Ohola ras Oholiba nggambarken Gereja? (Nen kotak “Kakak ras Adekna si Jadi Pelacur.”) (b) Pelajaren kai si banci sidat arah Esekiel pasal 16 ras 23?

¹⁶ Arah kata-kata Jahwe si gedang janah mbages ertina si itulis bas Esekiel pasal 16, erlajar kita kerna patoken Jahwe si benar, keadilenNa, bage pe perkuah ateNa si mbelin. Sipelajari ka mulihi kerna si e bas Esekiel pasal 23. Gundari, kalak Kristen situhu-tuhu usahakenna kel nginget kata-kata Jahwe si jelas e, eme kerna umatNa si jadi pelacur secara rohani. Pasti la kita nggit erban ceda ukur Jahwe bagi Juda ras Jerusalem. Emaka la kita nggit nembah berhala alu cara kai pe, contohna la kita nggit jadi kalak si merangap ntah pe mata duiten. (Mat. 6:24; Kol. 3:5) Tapi tetap ateta ngata bujur man Jahwe, perban bas wari-wari pendungi enda enggo cidahkenNa perkuah ateNa, banNa gelah benar mulihi carata i bas nembah Ia, janah cara e la ipediatNa icedai mulihi. Selain si e, enggo ibanNa “perjanjin si tahan rasa lalap” ras Israel secara rohani. (Esek. 16:60) Perjanjin e ndigan pe la banci batal, perban bangsa e tetap setia janah ndigan pe la kalak e nggit jadi pelacur secara rohani. Emaka, ngata bujur kel kita banci jadi bagin umat Jahwe si bersih gundari.

¹⁷ Arah kata-kata Jahwe man pelacur-pelacur si iceritaken bas buku Esekiel, kai si banci siteh kerna “pelacur si mbelin,” ntah pe Babilon si Mbelin? Mari sipelajari.

18, 19. Kai nge si mirip arah pelacur si iceritaken bas buku Esekiel ras bas buku Ketangkasen?

¹⁸ Jahwe la berubah. (Jak. 1:17) Mbarenda nari seh ngasa gundari, seri denga perasanNa nandangi agama palsu ntah pe pelacur si mbelin e. Emaka hukumen si bereken Jahwe man “pelacur si mbelin” si iceritaken buku Ketangkasen mirip ras hukumen si berekenNa man pelacur-pelacur si iceritaken bas buku Esekiel.

¹⁹ Adi siperdiateken, hukumen si ibereken man pelacur-pelacur si iceritaken bas nubuat Esekiel labo langsung arah Jahwe, tapi arah bangsa-bangsa si ngelakoken perbahanen seks si salah secara rohani ras umat Dibata. Bage ka me agama palsu sebelang doni, ilakokenna perbahanen seks si salah ras “raja-raja i doni.” Emaka ihukum pagi ia. Tapi ja nari rehna hukumen e? Ikataken Pustaka maka kuasa politik “rate segat pagi man pelacur e, janah rampasna kerina si lit bas ia, tilanjangina, paganina dagingna, janah tutungna ia alu api seh ngasa keri.” Engkai maka banci rempet bage ilakoken pemerentahen  doni enda? “Perban enggo tamaken Dibata bas pusuh kalak e sura-sura guna ndalanken peraten Dibata.”​—Ket. 17:1-3, 15-17.

20. Ja nari siteh maka ikernepken pagi Babilon si Mbelin e?

²⁰ Igunaken Jahwe pagi bangsa-bangsa si lit bas doni enda ngukum kerina agama palsu. Termasuk agama Kristen si palsu si seh kel buena. Ikernepken pagi Babilon si Mbelin e, lanai lit ampunen janah lanai lit kesempatenna guna ertobat. Ikataken buku Ketangkasen maka Babilon “asa ndigan pe ia lanai lit.” (Ket. 18:21) Malekat-malekat Dibata ermeriah ukur perban idahna Babilon ikernepken, nina, “Pujilah Jahwe! Asap api si nutung pelacur e terus nangkih seh rasa lalap.” (Ket. 19:3) Babilon e tempa-tempa itutung janah asapna la erngadi-ngadi nangkih ku datas, kernep pagi Babilon e seh rasa lalap. La ipediat Jahwe agama palsu lit mulihi, janah la pediatNa cara si benar i bas nembah Ia icedai.

21. Sanga Babilon si Mbelin ikernepken, e jadi tanda kai? Janah ndigan e ngadi?

 ²¹ Guna ngukum Babilon si Mbelin, iban Dibata pagi pemerentahen doni enda nyerang Babilon si Mbelin. Enda bagin si penting gelah sura-sura Jahwe terjadi. Serangen e jadi tanda maka kiniseran si mbelin enggo imulai. E me masa kesusahen si seh kel parahna si lenga pernah terjadi. (Mat. 24:21) Kiniseran si mbelin e ngadi pagi adi enggo reh Harmagedon, eme sanga erperang Dibata ngelawan doni si jahat enda. (Ket. 16:14, 16) Bali bagi si ibahas bas pasal-pasal seterusna, melala kari si iceritaken bas buku Esekiel kerna kiniseran si mbelin. Emaka, arah buku Esekiel pasal 16 ras 23, kai pelajaren si banci siinget ras si banci sidalanken?

22, 23. Kenca sibahas kerna pelacur-pelacur si iceritaken bas buku Esekiel ras Ketangkasen, kai pengaruhna man banta selaku umat Jahwe?

²² Merhat kel Setan gelah cara umat Dibata lanai benar i bas nembah Dibata. Daramina cara gelah lanai kalak e setia man Dibata. Pengaruhina ka kita gelah perbahanenta bali bagi pelacur si iceritaken bas buku Esekiel. Gelah la kita terpengaruh, arus siinget maka segat ate Jahwe kalak si la setia ntah pe kalak si nembah dibata si deban. (Bil. 25:11) Arus kita tuhu-tuhu ndauh arah agama palsu janah ‘la sikuit kai pe si najis’ akap Dibata. (Jes. 52:11) Selain si e, tetap kita setia janah netral bas urusen politik ntah pe bas urusen doni si terbagi-bagi enda. (Joh. 15:19) Kita pe la nggit terpengaruh cara rukur doni enda si pentingen kapna bangsana asangken bangsa si deban (nasionalisme). Sebap perukuren si bage bali ras agama palsu si rehna arah Setan nari.

²³ Si pentingna, perlu siinget maka sada kehamaten kap nembah Jahwe bas rumah pertoton rohaniNa si bersih ras murni. Ngata bujur kita perban ipasu-pasu Jahwe pengaturen enda. Mbera-mbera reh belinna tekadta guna tetap ndauh arah agama palsu bage pe perbahanenna si bali bagi pelacur!