1-3. Kai si cidahken Jahwe ateNa man Esekiel i rumah pertoton i Jerusalem, janah engkai? (Nen gambar ras keterangen bas Bagin 2.)

PERBAN bapak Esekiel e sekalak imam, pasti angkai Nabi Esekiel Undang-Undang Musa. Emaka tehna kel kerna rumah pertoton i Jerusalem bage pe kerna cara si benar guna nembah Jahwe i je. (Esek. 1:3; Mal. 2:7) Tapi pasti sengget kel kerina kalak Jahudi si setia termasuk Esekiel ngidah kai si terjadi i rumah pertoton Jahwe bas tahun 612 SM.

² Cidahken Jahwe ateNa man Esekiel uga parahna keadan bas rumah pertoton. Alu bage banci ceritaken Esekiel man “peminpin-peminpin Juda” eme kalak si itaban bagi ia, si sangana bas rumahna. (Baca Esekiel 8:1-4; Esek. 11:24, 25; 20:1-3) Alu kesah si badia, bereken Jahwe pengenehenen man Esekiel. Bas pengenehenen e, ibaba ia arah rumahna nari si lit i Tel Abib deher Lau Kebar i Babilon. Ibaba ia ku rumah pertoton si lit i Jerusalem, si dauhna ratusen kilometer i sebelah barat. Baba Jahwe nabi e ku halamen si arah bas i deher gerbang utara. I je mulai cidahken Jahwe kai saja si terjadi bas rumah pertoton.

 ³ Idah Esekiel empat keadan si mbuktiken maka cara bangsa e i bas nembah Jahwe tuhu-tuhu enggo salah. Keadanna tuhu-tuhu erban ciga ate. Kai kin si terjadi? Kai si banci sipelajari arah pengenehenen e? Mari siperdiateken empatna keadan e radu ras Esekiel. Tapi, perlu siteh lebe kai si pindo Jahwe arah kalak si nembah Ia.

4. Kai si pindo Jahwe arah kalak si nembah Ia?

⁴ Kira-kira 900 tahun sope jaman Esekiel, enggo jelas kataken Jahwe kai si pindoNa arah kalak si nembah Ia. Perentah si peduaken arah Sepuluh Perentah si bereken Jahwe man kalak Israel ngataken, * “Aku kap Jahwe Dibata kena, Aku saja si arus sembah kena.” (Kel. 20:5) Kata-kata “Aku saja si arus sembah kena” mbuktiken maka la senang Jahwe adi sembah kalak e dibata si deban. Bali bagi si enggo sipelajari bas Pasal 2 buku enda, syarat si pertama i bas nembah Dibata alu cara si benar eme arus Jahwe si ngalokenca. Arus Jahwe si pentingna bas kegeluhen kalak si nembah Ia. (Kel. 20:3) Ate Jahwe sanga sembah kalak e Ia, ula min persada kalak e ras kai si ciga ateNa. Bas tahun 1513 SM, iban me perjanjin Undang-Undang Musa janah setuju kalak Israel guna nembah Jahwe saja. (Kel. 24:3-8) Setia Jahwe janah tepatiNa janjiNa. Emaka arapkenNa gelah umatNa pe setia.​—Ul. 7:9, 10; 2 Sam. 22:26.

5, 6. Engkai maka Jahwe ngenca si patut isembah kalak Israel?

⁵ Wajar kin adi pindo Jahwe man kalak Israel gelah Ia saja si sembah kalak e? Wajar kel. Jahwe e Dibata Si Madakuasa, Penguasa Si Meganjangna, janah Sumber Kegeluhen ras Si Mereken keperlun nggeluh. (Ms. 36:9; Perb. 17:28) Jahwe ka Si Mbebasken kalak Israel. Sanga bereNa Sepuluh Perentah man kalak e, ingetkenNa kalak e nina, “Aku kap Jahwe Dibata kena, si maba kena ndarat arah Mesir nari, arah ingan kena iperbudak.” (Kel. 20:2) Jelas me, Jahwe ngenca si patut isembah kalak Israel.

⁶ Jahwe la berubah. (Mal. 3:6) PindokenNa denga man umatNa gelah Ia ngenca si isembah kalak e. Cuba bayangkenndu uga perasan Jahwe sanga idahNa empat keadan si seh kel parahna si cidahkenNa man Esekiel.

7. (a) Kai si ilakoken kalak Jahudi si murtad i gerbang utara rumah pertoton? Uga tanggapen Jahwe? (Nen gambar bas awal pasal.) (b) Engkai maka wajar merawa Jahwe? (Nen cataten i teruh.)

⁷ Baca Esekiel 8:5, 6. Pasti sengget kel Esekiel! Bas gerbang utara rumah pertoton, kalak Jahudi si murtad nembah berhala. Banci saja berhala e tiang si badia si nggambarken Dewi Asera, si isembah kalak Kanaan janah ianggap diberu  Baal. Perban sembah kalak Israel berhala, langgar kalak e perjanjinna ras Jahwe. Sembah kalak e patung, padahal Jahwe ngenca si patut isembah. Wajar kel adi segat ate Jahwe. * (Ul. 32:16; Esek. 5:13) Cuba bayangken, enggo lebih 400 tahun dekahna, rumah pertoton si badia e jadi rumah Jahwe. (1 Raj. 8:10-13) Tapi gundari, perban baba kalak e berhala ku rumah pertoton, ban kalak e Jahwe lawes ‘nadingken inganNa si badia.’

8. Kai hubungenna pengenehenen Esekiel ras jamanta gundari?

⁸ Kai hubungenna pengenehenen Esekiel ras jamanta gundari? Kalak Juda si murtad e ngingetken kita man gereja-gereja si ngaku Kristen. Amin pe kataken kalak e sembahna Dibata, tapi labo aloken Dibata, perban situhuna berhala si sembah kalak e. Tek kita maka merawa Jahwe man kalak e perban Jahwe la berubah. (Jak. 1:17) Pasti ndauh Jahwe arah gereja-gereja si enggo nilah e.

9, 10. Kai si banci sipelajari arah kalak Juda si murtad bas jaman Esekiel?

⁹ Kai si banci sipelajari arah kalak Juda si murtad bas jaman Esekiel? Adi ateta nembah Jahwe saja, arus ‘sipedauh dirita arah nembah berhala nari.’ (1 Kor. 10:14) Banci saja rukur kita, ‘La mungkin kugunaken patung sanga nembah Jahwe.’ Tapi situhuna, labo patung saja ngenca si termasuk berhala. Lit ka bentuk-bentuk si deban si banci saja la kita sadar. Lit sada buku si ngataken, “Kai pe e, adi pentingen siakap ntah pe ergan siakap asangken nembah Dibata, e ertina enggo sisembah berhala.” Emaka la soal e erta, sen, perbahanen seks, ntah pe hiburen, banci ikataken berhala adi e erban nembah Jahwe lanai si nomor sada bas geluhta. (Mat. 6:19-21, 24; Ep. 5:5; Kol. 3:5) Arus kita hati-hati gelah la sisembah berhala alu cara kai pe, perban Jahwe ngenca si patut sisembah janah arus sisembah Ia alu bulat ukurta!​—1 Joh. 5:21.

¹⁰ Keadan si pertama si cidahken Jahwe man Esekiel ‘la mehuli janah erban ciga ate.’ Tapi nina Jahwe man nabiNa si setia e, “Idahndu ka kari kai si erban ciga ate si keleken asangken si e.” Kai kin keadan si keleken asangken keadan e?

11. Kai si idah Esekiel kenca ibaba ia ku halamen si arah bas i deher ingan nutung persembahen?

¹¹ Baca Esekiel 8:7-12. Arah gerbang e, Esekiel ibaba ku halamen si arah bas, ku ingan nutung persembahen. Lubangina sada tembok, jenari idahna ukiren-ukiren bas tembok si erban ia sengget. Ukiren e ukiren ‘binatang si nggawang, binatang si erban ciga ate, ras kerina berhala si erban ciga ate.’ * Kerina ukiren e nggambarken dewa-dewi. Tapi idah Esekiel ka keadan si deban si terkeleken asangken si e. “Lit 70 peminpin  kalak Israel” si tedis “bas kegelapen” janah persembahken kalak e kemenyan man dewa-dewi e. Menurut Undang-Undang Musa, bau kemenyan nggambarken toto si erban Jahwe senang, si ipeseh kalak si nembah Ia. (Ms. 141:2) Tapi kemenyan si ipersembahken man dewa-dewi e, bagi bau macik akap Jahwe. Toto 70 peminpin e ciga ate Jahwe. (Kua. 15:8) Ibuali kalak e bana alu rukur, ‘Labo idah Jahwe kita.’ Situhuna idah Jahwe nge kalak e, janah ban Jahwe gelah idah Esekiel kai si lakoken kalak e bas rumah pertoton e.

12. Engkai maka perlu kita tetap setia amin pe “bas kegelapen”? Ise khususna si perlu jadi usihen?

¹² Kai si banci sipelajari arah cataten Esekiel kerna 70 peminpin Israel, si mpersembahken kemenyan man dewa-dewi? Gelah begi Dibata totota janah benar akapNa carata nembah Ia, arus kita tetap setia amin pe “bas kegelapen.” (Kua. 15:29) Perlu siinget maka kerina si ilakoken kita idah Jahwe. Adi tek kita maka Jahwe e tuhu-tuhu lit, la silakoken kai pe si erban Jahwe la senang amin pe sangana kita sisada. (Heb. 4:13) Pertua-pertua si ngajar arah mimbar janah si minpin anggota runggun bas nembah Jahwe i perpulungen, khususna  arus jadi usihen bas ngikutken patoken Pustaka. (1 Pet. 5:2, 3) Turang senina si lit bas runggun pasti ngarapken kalak e gelah ngikutken patoken Pustaka amin pe kalak e sangana “bas kegelapen” eme sanga la lit si mperdiateken kalak e.​—Ms. 101:2, 3.

13. Bas pengenehenen Esekiel, kai si lakoken diberu-diberu si murtad bas salah sada gerbang rumah pertoton?

¹³ Baca Esekiel 8:13, 14. Kenca cidahken Jahwe dua keadan e man Esekiel, nina Jahwe ka man bana, “Idahndu kari kai si erban ciga ate si keleken asangken si lakoken kalak e.” Kai kin si idah Esekiel kentisik nari? Bas “pintu masuk gerbang sebelah utara rumah Jahwe,” idahna “diberu-diberu si kundul, tangisina Dewa Tammus.” Tammus eme dewa kalak Mesopotami si anggap kalak rondong Istar eme dewi kesuburen. * Kai si ilakoken diberu-diberu e bagin arah acara si lit hubungenna ras kematen Tammus. Dalanken kalak e acara nembah berhala bas ingan nembah Jahwe. Amin pe lakoken kalak e bas rumah pertoton Dibata, tapi e tetap saja najis. Perbahanen diberu-diberu si murtad e “erban ciga ate” Jahwe!

14. Kai si banci sipelajari arah tanggapen Jahwe nandangi perbahanen diberu-diberu e?

¹⁴ Kai si banci sipelajari arah tanggapen Jahwe nandangi perbahanen diberu-diberu e? Gelah carata nembah Jahwe tetap benar, la banci sipersada ras kebiasan kalak si nembah berhala. Emaka sitik pe la banci kita ikut bas perayan-perayan si asalna arah kalak si nembah berhala. Penting kin asal-usulna? Penting. Kebiasan bas perayan-perayan tertentu bagi Natal, Paskah (Easter), ulang tahun, ras Tahun Baru banci saja tempa-tempa la lit bahayana. Tapi perlu siinget maka mbarenda pernah langsung idah Jahwe maka perayan e asalna arah kalak si nembah berhala nari. Emaka, amin pe kebiasan e enggo ndekah lakoken kalak janah persada kalak e ras nembah Jahwe, e tetap saja najis akap Jahwe.​—2 Kor. 6:17; Ket. 18:2, 4.

15, 16. Kai si lakoken 25 dilaki e bas halamen rumah pertoton si arah bas? Engkai maka perbahanen kalak e erban ceda ukur Jahwe?

¹⁵ Baca Esekiel 8:15-18. Sope cidahken Jahwe keadan si terakhir man Esekiel, nina Jahwe man bana, “Idahndu kari kai si erban ciga ate si ndauh keleken asangken si enda.” Banci saja rukur Esekiel, ‘Kai nari kin si banci keleken asangken si enda?’ Kenca si e, arah halamen rumah pertoton si arah bas, idahna 25 dilaki bas pintu masuk rumah pertoton, sangana mungkuk nembah “matawari i sebelah timur.” Perbahanen  kalak e tuhu-tuhu kurang ajar man Jahwe. Engkai maka banci sikataken bage?

¹⁶ Cuba bayangken situasina: Pintu masuk rumah pertoton Dibata pengalana ku timur. Emaka sanga masuk kalak ku rumah pertoton, alakenna ku sebelah barat janah pudikenna ku sebelah timur, ku arah matawari terbit. Tapi 25 dilaki enda, “pudikenna rumah pertoton” janah alakenna ku timur guna nembah matawari. Alu bage, pudiken kalak e Jahwe perban rumah pertoton e eme “rumah Jahwe.” (1 Raj. 8:10-13) Emaka 25 dilaki e enggo murtad perban tadingken kalak e Jahwe, janah langgarna perentah bas Ulangen 4:15-19. Ceda kel ukur Jahwe ban kalak e, padahal Jahwe ngenca si arus isembah!

17, 18. (a) Kai si banci sipelajari arah kesalahen kalak si nembah matawari bas rumah pertoton? (b) Kai saja akibatna perbahanen kalak Juda si murtad e? Jelasken.

¹⁷ Kai si banci sipelajari arah kalak si nembah matawari e? Gelah carata nembah Jahwe tetap benar, perlu sidarami petunjuk arah Jahwe. Ia kap sumber pemeteh ras kepentaren. Perlu siinget maka “Dibata Jahwe bagi matawari,” janah KataNa bagi “lampu” si nerangi dalanta. (Ms. 84:11; 119:105) TerangiNa pusuhta ras perukurenta alu KataNa ras publikasi si dasarna arah Pustaka si iban organisasiNa. CidahkenNa ka carana gelah gundari pe banci kita ermeriah ukur janah nggeluh si rasa lalap bas masa depan. Adi sidarami pemeteh arah doni enda, tempa-tempa sipudiken Jahwe, si e erban ceda ukurNa. Pasti la ateta erban ceda ukur Jahwe. Pengenehenen Esekiel pe jadi persinget man banta gelah ula kita erteman ras kalak si murtad si enggo nadingken kebenaren.​—Kua. 11:9.

¹⁸ Enggo idah Esekiel empat keadan si erban ia sengget. Sembah kalak Juda berhala si mbuktiken maka kalak e enggo murtad janah parah kel perbahanen kalak e. Perban kalak e enggo murtad janah sembah kalak e berhala, ceda ban kalak e hubungenna ras Jahwe. Tapi labo e saja, lakoken kalak e ka perbahanen si erban ciga ate. Emaka labo teta mamang adi kalak Israel si murtad e ngelakoken erbage-bage perbahanen si najis. Akibatna, labo hubungen kalak e ras Jahwe ngenca si ceda, tapi hubungenna ras kalak si deban pe dungna ceda. Gundari mari sibahas kai si itulis Nabi Esekiel kerna perbahanen kalak Juda si murtad si erban ciga ate.

19. Kai si tulis Esekiel kerna perbahanen umat Jahwe si la meteh mela bas jaman e?

¹⁹ Baca Esekiel 22:3-12. Kerina bangsa e enggo ceda perbahanenna. Mulai arah penguasa nari seh ku rakyatna.  Imanpaatken “peminpin-peminpin” kekuasanna guna munuh kalak si la ersalah. Rakyat pe ikut ngelanggar Undang-Undang Dibata. Anak-anak “hinana” orang tuana. Erhubungen seks kalak e ras anggota keluargana (inses). Meriah akap penduduk Israel mberontak bage pe nipu penduduk asing janah tindas kalak e anak si la erbapa ras diberu si enggo janda. Penduduk Israel si dilaki erhubungen seks ras diberu kalak. Merangap kel kalak e, alokenna sogok, kompasna kalak, janah sanga pinjamkenna sen, galang pindona bungana. Jadi, umat Jahwe ka si ngelanggar Undang-Undang Jahwe. La angkai kalak e situhuna perban keleng nge ate Jahwe man kalak e emaka bereNa Undang-Undang e. Cuba sibayangken, pasti getem kel pusuh Jahwe ngidah perbahanen kalak e. Emaka katakenNa man kalak e arah Esekiel, “Tuhu-tuhu kel Aku lupakenndu.”

20. Kai hubungenna kejadin bas jaman Esekiel ras kita gundari?

²⁰ Kai hubungenna kejadin bas jaman Esekiel ras kita gundari? Perbahanen kalak Juda si murtad e, ngingetken kita nandangi perbahanen kalak si nggeluh bas jamanta gundari. Peminpin-peminpin politik ate-atena nggunaken kuasana janah tindasna rakyat. Peminpin-peminpin agama, khususna  peminpin gereja, ertoto kalak e gelah pasu-pasu Dibata perang si erban jutan kalak mate. Selain si e, la ikutken kalak e patoken Pustaka si jelas kerna perbahanen seks, akibatna reh dekahna reh pangna kalak ngelakoken kai si salah akap Dibata. Bali bagi si ikataken Jahwe man kalak Juda si murtad e, bage ka me ikataken Jahwe man gereja-gereja e. Nina, “Tuhu-tuhu kel Aku lupakenndu.”

21. Kai si banci sipelajari arah perbahanen kalak Juda si la meteh mela e?

²¹ Kai si banci sipelajari arah perbahanen kalak Juda si la meteh mela e? Gelah meriah ukur Dibata sanga sisembah Ia, arus bersih perbahanenta i bas kai pe. Memang ngelakoken si e labo nukah, perban perbahanen kalak bas doni enda lanai rorat. (2 Tim. 3:1-5) Tapi siteh segat ate Dibata kerina perbahanen si bage. (1 Kor. 6:9, 10) Emaka perban keleng ateta Jahwe janah keleng ateta undang-undangNa, nggit kita ngikutken patokenNa. (Ms. 119:97; 1 Joh. 5:3) Adi najis perbahanenta, e ertina la ateta keleng Dibatata si bersih ras badia. Pasti la kita nggit adi kataken Jahwe man banta, “Tuhu-tuhu kel Aku lupakenndu.”

22. (a) Kenca sipelajari uga perbahanen kalak Juda si la meteh mela e, kai atendu si lakokenndu? (b) Kai kari sipelajari bas pasal seterusna?

²² Enggo sipelajari uga Jahwe ncidahken perbahanen kalak Juda si murtad ras si la meteh mela. Enggo ka sipelajari kai pelajaren si penting arah je nari. Pasti reh tutusna teta nembah Jahwe saja, perban Ia ngenca si patut isembah. Emaka arus kita hati-hati gelah ula sisembah berhala alu cara kai pe, janah sijaga perbahanenta tetap bersih. Emaka, kai pagi si lakoken Jahwe man umatNa si la setia? Kenca Esekiel ibaba Jahwe ku piga-piga ingan bas rumah pertoton, katakenNa man nabiNa e, “Merawa kel Aku.” (Esek. 8:17, 18) Perlu siteh maka hukumen kai pe si bere Jahwe man kalak Juda, bage ka nge pagi si ban Jahwe man doni si jahat enda. Bas pasal seterusna sibahas kari hukumen Jahwe man kalak Juda.