1, 2. (a) Ceritaken perbahanen Esekiel si aneh e. (Nen gambar bas awal pasal.) (b) Kai si sangana inubuatkenna?

METER kel seh beritana ku tengah-tengah kalak Jahudi si itaban i Babilon kerna perbahanen Nabi Esekiel si aneh. Sada minggu dekahna kundul ia i tengah-tengah kalak e. Sitik pe la ia ngerana. Nce, rempet ia cinder, masuk ia ku rumahna, jenari kurungna bana. Mamang ate kalak ngidahsa. Dung e, ndarat nabi e rumah nari, buatna sada batu bata, tamana i lebe-lebena, janah ukirna sada gambar i je. Mulai me ibanna pagar kayu si kitik-kitik, tapi tetap ia la ngerana.​—Esek. 3:10, 11, 15, 24-26; 4:1, 2.

² La ateta mamang adi reh teremna kalak si mperdiateken ia. Pasti mamang ate kalak e janah rukur kalak e, ‘Kai maksudna enda?’ Dungna, angkai kalak Jahudi si itaban kai erti perbahanen Nabi Esekiel si aneh e. Ia sangana ernubuat kerna kejadin si nandangi terjadi, ngeri kel pagi kejadin e perban merawa Jahwe man kalak e. Kejadin kai kin e? Kai akibatna man kalak Israel bas jaman si mbarenda? Janah kai pengaruhna man kalak si nembah Jahwe bas jaman si gundari?

3, 4. (a) Kai saja si icontohken Esekiel? (b) Uga ban Esekiel sanga icontohkenna kerna Jerusalem si ikepung?

³ Kira-kira tahun 613 SM, suruh Jahwe gelah icontohken Esekiel kerna telu penghukumen Jahwe si kentisik nari terjadi man Jerusalem. Penghukumen e eme kota e ikepung, pendudukna ndatken kesusahen, janah kota e ikernepken bage pe pendudukna. * Mari sibahas si telu e.

⁴ Kota Jerusalem ikepung. Ikataken Jahwe man Esekiel, “Buatlah sada batu bata, tama i lebe-lebendu. . . . Banlah tempa-tempa ikepungndu kota e.” (Baca Esekiel 4:1-3.) Paksa icontohken Esekiel kerna si e, batu bata e nggambarken kota Jerusalem, janah Esekiel nggambarken pasuken Babilon si igunaken Jahwe. I sekeliling batu bata ndai, isuruh Jahwe me Esekiel erban tembok pengepungen, ntah pe pagar kayu si kitik-kitik, bage pe alat-alat guna ngeruntuhken. Kerina e nggambarken peralaten si ipake musuh pagi sanga ngepung ras nyerang Jerusalem. Kenca si e, guna ncidahken maka musuh-musuh megegeh bagi besi, arus iban Esekiel “belanga besi si rata” antara ia ras kota e. Jenari arus ka ban Esekiel ‘pengala ayona’ ku kota e, tempa-tempa ilawanna kota e. Kerina enda jadi “tanda man kalak Israel” maka lit pagi terjadi kejadin si la isangka-sangka kalak e. Igunaken Jahwe pasuken musuh guna ngepung kota Jerusalem eme kota si penting man umat Dibata, si i je lit rumah pertoton Dibata!

5. Uga ban Esekiel sanga icontohkenna kai pagi si inanami penduduk Jerusalem?

⁵ Kesusahen penduduk Jerusalem. Isuruh Jahwe me Esekiel, nina, “Buatlah gandum, barli, kacang babi, miju, cingkeru, ras gandum spelta” jenari “banlah jadi roti.” “Timbanglah e, panlah roti e kira-kira 230 gram tiap wari.” Kenca si e jelasken Jahwe, “Kubatasi pangan si isediaken i Jerusalem.” (Esek. 4:9-16) Sekalenda, Esekiel lanai nggambarken pasuken Babilon tapi nggambarken penduduk Jerusalem. Sanga icontohken Esekiel kerna si e, cidahkenna maka persedian pangan bas kota e reh kurangna pagi perban kota e ikepung. Ban kalak pagi roti arah bahan-bahan si la biasa. Ertina, terpaksa pan kalak e kai pe si idatna. Uga kin pagi parahna kelihen e? Nina Esekiel kerna penduduk Jerusalem, “Orang tua si lit i tengah-tengah kena, panna pagi anak-anakna, anak-anak panna pagi orang tuana.” Enterem pagi kalak mesera kel akapna perban ‘kelihen e bagi serangen anak-anak panah’ janah dungna “mate kalak e.”​—Esek. 4:17; 5:10, 16.

6. (a) Lit dua nari si icontohken Esekiel, kai e? (b) Kai ertina perentah guna ‘nimbang buk janah ibagi jadi telu bagin’?

⁶ Jerusalem ras pendudukna ikernepken. Sekalenda, lit dua si icontohken Esekiel. Si pertama, icontohkenna kai pagi  si ilakoken Jahwe. Nina Jahwe man bana, “Buatlah pedang si ntelap, banlah e jadi piso cukur.” (Baca Esekiel 5:1, 2.) Tan Esekiel si njemak pedang e nggambarken tan Jahwe si ngukum Jerusalem arah pasuken Babilon. Si peduaken, icontohken Esekiel kai pagi si inanami kalak Jahudi. Suruh Jahwe me Esekiel, nina, “Cukurlah bukndu ras janggutndu.” E ncidahken maka kalak Jahudi iserang pagi janah ikernepken. Iperentahken Jahwe ka man Esekiel, “Timbanglah bukndu e, ban jadi telu bagin.” E ertina penghukumen Jahwe man Jerusalem labo gelah enggo saja, tapi enggo irencanaken janah serser pagi ilakoken.

7. Engkai maka isuruh Jahwe gelah ibagi-bagi Esekiel bukna jadi telu bagin janah la seri si ilakokenna man teluna bagin e?

 ⁷ Engkai maka isuruh Jahwe gelah ibagi-bagi Esekiel bukna jadi telu bagin, janah la seri si ilakokenna man teluna bagin e? (Baca Esekiel 5:7-12.) Tujunna guna ncidahken maka la pagi seri kesusahen si inanami penduduk Jerusalem. Itutung Esekiel bagin si pertama, perban lit pagi penduduk Jerusalem si mate bas kota. Kenca si e, ipotongna bagin si peduaken arah buk ndai, perban lit pagi penduduk Jerusalem si ibunuh i darat kota. Terakhir, iambekkenna bagin si peteluken ku angin, perban lit pagi penduduk Jerusalem si selamat janah merap ku erbage-bage bangsa. Tapi, lit “pedang si ngayaki kalak e.” Ertina, i ja pe kalak e tading, la banci tenang geluhna.

8. (a) Kai arapen si lit bas nubuat si icontohken Esekiel? (b) Uga nubuat Esekiel e terjadi?

⁸ Amin pe si icontohken Esekiel e nubuat kerna penghukumen man Israel, tapi nubuat e pe mereken arapen. Isuruh Jahwe me Esekiel, nina, “Arus ka buatndu sitik bukndu e, bungkus bas lipaten bajundu.” (Esek. 5:3) Enda ertina, piga-piga kalak Jahudi si merap ku erbage-bage bangsa, tetap pagi nggeluh. Lit si mulih ku Jerusalem kenca itaban 70 tahun dekahna i Babilon. (Esek. 6:8, 9; 11:17) Tuhu kin nubuat e terjadi? Tuhu. Piga-piga tahun kenca tabanen ibebasken arah Babilon, ikataken Nabi Hagai maka kalak Jahudi si merap e lit si enggo mulih ku Jerusalem. Kalak e eme “kalak si enggo metua si enggo pernah ngidah rumah pertoton si ndekah,” eme rumah pertoton si bangun Salomo. (Esa. 3:12; Hag. 2:1-3) Ipastiken Jahwe maka kalak si nembah Ia tetap pagi lit, bali bagi si ijanjikenNa. Kerna si e, sibahas kari terdauhen bas Pasal 9 buku enda.​—Esek. 11:17-20.

9, 10. Kai hubungenna nubuat si icontohken Esekiel ras kai si terjadi bas masa depan?

⁹ Kai si icontohken Esekiel ngingetken kita nandangi kai si terjadi bas masa depan si enggo inubuatken Kata Dibata. Kai  saja e? Bali bagi si ilakoken Jahwe man Jerusalem, igunakenNa ka pagi kuasa-kuasa politik guna ngelakoken kai si la isangka-sangka, eme iserang kalak e pagi kerina organisasi agama palsu i doni. (Ket. 17:16-18) Bali bagi kehancuren Jerusalem si ikataken “kesusahen si lenga pernah terjadi,” bage ka me pagi “kiniseran si mbelin” ras perang Harmagedon ikataken ka kejadin si “lenga pernah terjadi.”​—Esek. 5:9; 7:5; Mat. 24:21.

¹⁰ Kata Dibata ncidahken maka anggota agama palsu buen pagi selamat sanga organisasi kalak e ikernepken. Mbiar pagi kalak e janah cebuni kalak e radu ras kalak si deban. (Sak. 13:4-6; Ket. 6:15-17) Kejadin e ngingetken kita man penduduk Jerusalem si selamat janah iambekken “ku angin” sanga kota e ihancurken. Bali bagi si enggo sibahas bas  paragrap 7, penduduk Jerusalem e selamat tapi kentisik ngenca, perban pedarat Jahwe ‘pedangNa guna ngayaki kalak e.’ (Esek. 5:2) Bage ka me kalak si selamat sanga agama palsu ihancurken, la banci kalak e selamat arah pedang Jahwe, la soal i japa pe kalak e cebuni. Mate pagi kalak e bas Harmagedon radu ras kalak si deban si ianggap bagi kambing.​—Esek. 7:4; Mat. 25:33, 41, 46; Ket. 19:15, 18.

11, 12. (a) Kenca sipelajari nubuat Esekiel kerna Jerusalem si ikepung, uga perasanta nandangi dahin erberita? (b) Banci saja, kai pagi si berubah arah berita si ipeseh kita?

¹¹ Kenca sipelajari nubuat enda, uga perasanta nandangi dahin erberita janah uga siakap pentingna dahin e gundari? Perlu kel siusahaken asa ngasupta gundari guna nampati kalak gelah sembahna Jahwe. Engkai? Perban waktuna kentisik nari ngenca guna ‘erban kalak arah bangsa-bangsa jadi murid-murid Jesus.’ (Mat. 28:19, 20; Esek. 33:14-16) Sanga “tongkat penghukumen” (kuasa-kuasa politik) mulai nyerang agama, lanai pagi sipeseh berita keselamaten. (Esek. 7:10) Sanga si e, ‘lanai pagi kita banci ngerana’ guna mberitaken berita si meriah bali bagi sanga Esekiel la banci ngerana ntah pe sanga ngadi ipesehna beritana bas waktu-waktu tertentu. (Esek. 3:26, 27; 33:21, 22) Kenca agama palsu ihancurken, kai pe ilakoken kalak guna ‘ndarami pengenehenen arah nabi’ ntah pe ndarami petunjuk guna nelamatken bana. (Esek. 7:26) Tapi kalak e enggo terlambat, perban enggo keri waktuna guna ndarami petunjuk si bage janah enggo terlambat kalak e guna jadi murid Kristus.

¹² Enggo nge pagi dung dahinta erberita paksa si e? Lenga, banci saja mulai siumumken berita penghukumen si bali bagi udan es sedekah kiniseran si mbelin. Berita enda jadi tanda si jelas pagi man kerina manusia maka enggo ndeher kel pendungi doni si jahat enda.​—Ket. 16:21.

13. Engkai maka Esekiel isuruh Jahwe tayang janah seding ku sebelah kiri kenca si e ku sebelah kanan?

¹³ Selain inubuatken Esekiel uga Jerusalem ikernepken, kai si icontohken Esekiel pe ncidahken ndigan e terjadi. Isuruh Jahwe me Esekiel tayang janah seding ku sebelah kiri 390 wari dekahna, kenca si e seding ku sebelah kanan 40 wari dekahna. Banci saja piga-piga jam saja ngenca ilakokenna e i bas sada wari. Sada wari ertina sada tahun. (Baca Esekiel 4:4-6; Bil. 14:34) Kai si icontohken Esekiel e, ncidahken ndigan pagi Jerusalem ikernepken. Kesalahen Israel si 390 tahun dekahna, mungkin imulai bas tahun 997 SM, sanga kerajan 12 suku ibagi jadi dua. (1 Raj. 12:12-20) Dosa Juda si dekahna 40 tahun, mungkin imulai bas tahun 647 SM. Bas tahun e, Jeremia itugasken jadi nabi guna mpersingeti kerajan Juda maka ikernepken me pagi kalak e. (Jer. 1:1, 2, 17-19; 19:3, 4) Duana jangka waktu e dung bas tahun 607 SM,  janah bas tahun e me Jerusalem ikernepken, pas bagi si inubuatken Jahwe. *

14. (a) Uga Esekiel mbuktiken maka tek ia ilakoken Jahwe pagi nubuat e bas waktu si enggo itetapkenNa? (b) Kai pagi si terjadi sanga Jerusalem nandangi ikernepken?

¹⁴ Sanga dat Esekiel nubuat kerna 390 wari ras 40 wari e, banci saja la tehna ndigan Jerusalem ikernepken. Tapi, piga-piga tahun sope Jerusalem ikernepken, enggo piga-piga kali persingetina kalak Jahudi maka kentisik nari ihukum Jahwe me kalak e. Nina, “Seh me kedungenndu.” (Baca Esekiel 7:3, 5-10.) Enda mbuktiken tek kel Esekiel maka ilakoken Jahwe pagi nubuat e bas waktu si enggo itetapkenNa. (Jes. 46:10) Ikataken nabi enda ka kai saja pagi si terjadi sanga Jerusalem nandangi ikernepken. Nina, “La erngadi-ngadi terjadi bencana.” Akibatna, keadan kalak si nggeluh paksa si e reh susahna, janah peminpin-peminpin agama lanai dalankenna tugasna, pemerentahen pe hancur pagi.​—Esek. 7:11-13, 25-27.

15. Nubuat Esekiel si apai saja si mulai terjadi bas tahun 609 SM?

¹⁵ Piga-piga tahun kenca umumken Esekiel maka kernep me Jerusalem, mulai me nubuatna e terjadi. Bas tahun 609 SM, ibegina maka kota Jerusalem enggo mulai iserang. Paksa si e, iembus me trompet gelah penduduk Jerusalem pulung guna mbela kota kalak e. Tapi bagi si inubuatken Esekiel “la lit si lawes erperang.” (Esek. 7:14) La lit usaha penduduk Jerusalem guna mpertahanken kota e arah serangen pasuken Babilon. Banci saja lit kalak Jahudi si erpengakap maka selamatken Jahwe nge kalak e. Mbarenda, sanga Jerusalem iancam pasuken Assur, memang isuruh Jahwe malekatNa guna engkernepken pasuken e. Hampir kerina pasuken e ikernepkenNa. (2 Raj. 19:32) Tapi sekalenda, la lit malekat si nampati. La ndekah kenca si e, kota Jerusalem ikepung bali bagi “panci i datas api” janah pendudukna bali bagi “potongen-potongen daging” bas panci e. (Esek. 24:1-10) Kenca inanami kalak e kesusahen perban ikepung 18 bulan dekahna, dungna Jerusalem ikernepken.

16. Bali bagi Esekiel, uga carata mbuktiken maka ilakoken Jahwe pagi janjiNa bas waktu si enggo itetapkenNa?

¹⁶ Kai si banci sipelajari arah nubuat e? Kai hubungenna nubuat e ras berita si ipeseh kita janah kai ka hubungenna ras tanggapen kalak? Situhuna, enggo itetapken Jahwe ndigan agama palsu ikernepken janah pasti ilakokenNa bas waktu si enggo itetapkenNa, labo Ia terlambat. (2 Pet. 3:9, 10; Ket. 7:1-3) Memang, la siteh tanggal piga e terjadi. Tapi bagi Esekiel, terus ateta sipatuhi Jahwe. Carana, mulih-ulih sipersingeti kalak maka kedungen doni enda enggo ndeher. Engkai maka perlu sipersingeti kalak e? Alasenta seri ras alasen  Esekiel. * Sanga pesehna berita arah Dibata kerna Jerusalem si nandangi ikernepken, buen kalak la tek. (Esek. 12:27, 28) Tapi dungna, piga-piga kalak Jahudi si itaban bas Babilon turah ukurna ngelakoken kai si benar, janah mulih kalak e ku negrina. (Jes. 49:8) Bage ka pe gundari, enterem kalak si nggeluh bas jamanta, la kalak e tek maka kedungen doni enda enggo ndeher. (2 Pet. 3:3, 4) Amin pe bage, sanga lit denga waktu man manusia guna ngaloken berita arah Dibata, sisampati ateta kalak si nggit ndatken dalan kegeluhen si rasa lalap.​—Mat. 7:13, 14; 2 Kor. 6:2.

17. Kai pagi si banci siidah sanga kiniseran si mbelin terjadi?

¹⁷ Nubuat Esekiel pe ngingetken kita maka bas waktu si nandangi reh, sanga organisasi agama iserang, anggotana la lit si “lawes erperang.” “Lemas kerina tan kalak e” janah “nggirgir kalak e perban biarna.” Serko kalak e mindo penampat, nina, “O Tuan, Tuan,” tapi la lit si njawapsa. (Esek. 7:3, 14, 17, 18;  Mat. 7:21-23) Kai deba nari si ilakoken kalak e? (Baca Esekiel 7:19-21.) Nina Jahwe kerna penduduk Jerusalem si mbarenda, “Benterken kalak e pagi pirakna ku dalan-dalan.” Bage ka me si terjadi sanga reh pagi kiniseran si mbelin. Sadar pagi kalak maka sen la banci nelamatken kalak e arah bencana.

18. Kai si banci sipelajari arah nubuat Esekiel kerna kai si arusna sipelebe?

¹⁸ Kai pelajaren si datndu arah nubuat Esekiel enda? Perlu sipelebe kai situhu-tuhu penting. Cuba ukurindu: Kenca idah penduduk Jerusalem maka kota kalak e ras kesahna enggo terancam janah ertana la banci nelamatken, i je maka sadar kalak e kai si arusna ipelebena. Iambekken kalak e ertana janah mulai ‘daramina pengenehenen arah nabi,’ tapi e enggo terlambat. (Esek. 7:26) Kita la seri ras kalak e, lenga pe seh kedungen doni si jahat enda, kita enggo sadar maka e nandangi terjadi. Perban tek kita man janji-janji Dibata, sipelebe kai situhu-tuhu penting. Sibuk ka kita mpepulung erta i surga si tahan rasa lalap janah ndigan pe la pernah iambekken “ku dalan-dalan.”​—Baca Matius 6:19-21, 24.

19. Kai si banci sipelajari arah nubuat si ipeseh Esekiel?

¹⁹ Emaka, kai saja si banci sipelajari arah nubuat Esekiel kerna Jerusalem si enggo ikernepken? Nubuat e ngingetken kita maka lit batas waktuna guna nampati kalak jadi umat Jahwe. Emaka sanga lit denga waktu, perlu siusahaken kel asa ngasupta nampati kalak jadi murid Jesus. Meriah kel ukurta sanga lit kalak si mulai nggit nembah Bapakta Jahwe. Tapi, bicara la pe tanggapi kalak beritata, siusihlah Esekiel janah terus sipersingeti kalak e, “Seh me kedungenndu.” (Esek. 3:19, 21; 7:3) Selain si e, siusahaken gelah tetap siandalken Jahwe janah sisembah Ia alu cara si benar, janah e siakap si pentingna bas geluhta.​—Ms. 52:7, 8; Kua. 11:28; Mat. 6:33.