1, 2. (a) Engkai maka Israel bali bagi biri-biri i tengah-tengah srigala? (Nen gambar bas awal pasal.) (b) Kai si rusur lakoken raja-raja Israel bage pe rakyatna?

RATUSEN tahun dekahna, Israel bali bagi biri-biri si ikelilingi srigala. I sebelah timur Israel lit bangsa Ammon, Moap, ras Edom si ngancam kalak e. I sebelah barat, lit bangsa Pilisti si enggo ndekah tading i je janah bangsa enda nai-nai nari enggo jadi musuh kalak Israel. I sebelah utara, lit kota Tirus, kota e bayak janah erpengaruh kel. Enterem pedagang reh ku kota e arah erbage-bage ingan. Janah i sebelah selatan, lit daerah Mesir si mbelang si ikuasai Paro, raja si ianggap dewa.

² Sanga kalak Israel ngandalken Jahwe, lindungi Jahwe kalak e arah musuh nari. Tapi raja-raja Israel bage pe rakyatna, rusur terpengaruh erban kai si salah bagi bangsa-bangsa si lit i sekeliling kalak e. Salah sadana eme Raja Ahap si nukah kel terpengaruh. Ia merentah nandangi kerajan Israel si sepuluh suku janah ia nggeluh sada jaman ras Josapat raja Juda. Empoi Ahap me Isebel. Isebel e anak raja Sidon eme raja si erkuasa nandangi kota Tirus si makmur. Semangat kel Isebel mpengaruhi kalak Israel gelah sembah kalak e Baal. Pengaruhi  Isebel ka dilakina gelah tadingkenna Jahwe janah pengaruhina ka kalak Israel gelah salah cara kalak e nembah Jahwe. Sanga si e, enggo salah cara kalak i bas nembah Jahwe, janah bas jaman e me si mekelekna.​—1 Raj. 16:30-33; 18:4, 19.

3, 4. (a) Sanga Jerusalem ikepung, kerna ise nge Esekiel mulai ernubuat? (b) Penungkunen kai saja kari sibahas?

³ Enggo kataken Jahwe man umatNa kai akibatna adi la kalak e setia. Dungna keri kesabaren Jahwe. (Jer. 21:7, 10; Esek. 5:7-9) Bas tahun 609 SM, iserang pasuken Babilon Negri si Ijanjiken e petelu kaliken. Janah serangenna si petelu kaliken e, hampir sepuluh tahun dekahna kenca serangenna si pedua kaliken. Sekalenda, iruntuhken kalak e tembok Jerusalem janah bunuhna kerina kalak si mberontak man Nebukadnesar. Sanga Jerusalem mulai ikepung janah kerina nubuat Esekiel terjadi, termasuk nubuat si ngerina pe, mulai nabi enda ernubuat kerna bangsa-bangsa si lit i sekeliling Negri si Ijanjiken e.

⁴ Ikataken Jahwe man Esekiel maka meriah pagi akap musuh-musuh kalak Juda ngidah Jerusalem ikernepken, janah itangkap kalak e pagi penduduk Jerusalem si selamat. Tapi bangsa-bangsa si la ngergai gelar Jahwe, kalak si nindas umatNa, ntah pe si mpengaruhi umatNa guna ngelakoken kai si salah pasti pagi ihukum. Kai si banci sipelajari arah hubungen Israel ras bangsa-bangsa e? Uga nubuat Esekiel kerna bangsa-bangsa e mereken arapen man banta?

5, 6. Uga nge hubungen bangsa Ammon ras Israel?

⁵ Situhuna Ammon, Moap, ras Edom, keluarga denga ras Israel. Nini bulang kalak e seri, tapi nai-nai nari bangsa-bangsa e musuhina umat Dibata janah keri kel kalak Israel ‘tokohi’ kalak e.​—Esek. 25:6.

⁶ Bangsa Ammon eme keturunen Lut arah anakna si nguda. Lut e anak senina Abraham. (Kej. 19:38) Mirip kel bahasa kalak Ammon e ras bahasa Heber. Emaka, banci saja umat Dibata pe angkaina bahasa e. Bangsa Israel ras bangsa Ammon keluarga denga, emaka larang Jahwe Israel erperang ngelawan Ammon. (Ul. 2:19) Amin pe bage, bas jaman Hakim-Hakim, kalak Ammon ikut nindas kalak Israel radu ras Eglon raja Moap. (Hak. 3:12-15, 27-30) Kenca si e, sanga Saul jadi raja, iserang kalak Ammon me Israel. (1 Sam. 11:1-4) Bas jaman Raja Josapat, kerja sama kalak e ras Moap guna nyerang Negri si Ijanjiken.​—2 Kro. 20:1, 2.

7. Uga perbahanen kalak Moap man kalak Israel amin pe kalak e keluarga denga?

⁷ Bangsa Moap pe anak Lut ka, tapi arah anakna sintua. (Kej. 19:36, 37) Larang Jahwe kalak Israel erperang ngelawan  Moap. (Ul. 2:9) Tapi la ibalas kalak Moap kiniulin kalak Israel, padahal kalak e keluarga denga. La isampati kalak Moap sanga kalak Israel mbaru ndarat arah perbudaken i Mesir. Tapi halangi kalak Moap perdalanen kalak Israel sanga masuk ate kalak e ku Negri si Ijanjiken. Balak raja Moap, upahina Bileam gelah sumpahina kalak Israel. Kataken Bileam ka man Balak uga carana gelah kalak Israel si dilaki ngelakoken perbahanen seks si salah bage pe gelah sembahna berhala. (Bil. 22:1-8; 25:1-9; Ket. 2:14) Itindas Moap kalak Israel ratusen tahun dekahna, seh ngasa jaman Esekiel.​—2 Raj. 24:1, 2.

8. Engkai kataken Jahwe maka Edom e senina Israel? Tapi uga perbahanen kalak e man Israel?

⁸ Bangsa Edom eme keturunen Esau. Esau e kembar ras Jakup (Israel). Perban si e, Jahwe pe katakenNa Edom e senina Israel. (Ul. 2:1-5; 23:7, 8) Tapi kalak Edom lalap musuhina kalak Israel, mulai kin kalak Israel ndarat arah Mesir seh ngasa Jerusalem ikernepken tahun 607 SM. (Bil. 20:14, 18; Esek. 25:12) Paksa si e, meriah akap kalak Edom ngidah kalak Israel susah janah semangat kalak e ndukung kalak Babilon engkernepken Jerusalem. Kalak Israel si kiam guna nelamatken bana, tangkap kalak Edom, nce serahkenna man musuh-musuh.​—Ms. 137:7; Oba. 11, 14.

9, 10. (a) Kai si terjadi man Ammon, Moap, ras Edom? (b) Kai buktina maka labo kerina kalak arah bangsa-bangsa e musuhina kalak Israel?

⁹ La pediat Jahwe keluarga Israel e bebas arah hukumen, perban enggo jahat perbahanen kalak e man umatNa. Nina Jahwe, ‘Kuserahken pagi kalak Ammon man kalak Timur, alu bage Ammon lanai iinget i tengah bangsa-bangsa. Kuhukum pagi kalak Moap, teh kalak e pagi maka Aku kap Jahwe.’ (Esek. 25:10, 11) Nubuat-nubuat e mulai terjadi kira-kira lima tahun kenca Jerusalem ikernepken eme sanga kalak Babilon naluken Ammon ras Moap. Uga kerna Edom? Nina Jahwe kerna Edom, “Kubunuh pagi manusia ras asuh-asuhen si lit i je. Janah Kuban pagi Edom lanai iingani.” (Esek. 25:13) Bali bagi si enggo inubuatken, Ammon, Moap, bage pe Edom dungna kernep.​—Jer. 9:25, 26; 48:42; 49:17, 18.

¹⁰ Tapi labo kerina kalak arah bangsa-bangsa e musuhina umat Dibata. Selek kalak Ammon ras Itma kalak Moap eme pejuang si megegeh si ndukung Raja Daud. (1 Kro. 11:26, 39, 46; 12:1) Selain si e, Rut kalak Moap pe dungna nembah Jahwe alu setia.​—Rut 1:4, 16, 17.

11. Kai si banci sipelajari arah hubungen kalak Israel ras kalak Ammon, Moap, bage pe Edom?

¹¹ Kai si banci sipelajari arah hubungen kalak Israel ras bangsa-bangsa e? Perban la ikutken kalak Israel undang-undang Dibata, mulai kalak e terpengaruh ngikutken kebiasan agama palsu arah keluarga kalak e. Contohna, sembah kalak e Baal Peor eme dewa kalak Moap janah sembah kalak e ka Molekh  eme dewa kalak Ammon. (Bil. 25:1-3; 1 Raj. 11:7) Kita pe gundari bage ka, banci saja keluargata si la sada kiniteken ras kita maksa kita gelah la ngikutken undang-undang Dibata. Mungkin la teh kalak e kai alasenna engkai maka la sirayaken Kerja Tahun, Lebaran, Paskah (Easter), Natal, ntah pe kebiasan si debanna si lit hubungenna ras agama palsu. Perban mehuli ukurna, mungkin paksana kita ngelakoken kai si sepele tapi situhuna ngelanggar undang-undang Dibata. Ula kita nggit terpengaruh! Pengalamen bangsa Israel ncidahken maka amin pe sitik ngenca kita terpengaruh nandangi kai si salah, e banci ncedai hubungenta ras Jahwe.

12, 13. Tentangen kai si banci saja siadapi bas keluarga? Tapi kai hasilna adi tetap kita setia?

¹² Lit ka si banci sipelajari arah perbahanen Ammon, Moap, ras Edom nandangi kalak Israel. Persingeti Jahwe kalak Israel gelah ula ndarami perubaten ras bangsa-bangsa e, sebap kalak e kerina keluarga denga. Emaka, kita pe la sidarami perubaten ras keluargata si la sada kiniteken. Amin pe bage, banci saja tetap kalak e la senang ngidah kita. Labo teta mamang kerna si e, perban enggo ingetken Jesus maka beritata banci “erban perpecahen, anak si dilaki ngelawan bapakna, anak si diberu ngelawan mamakna.”​—Mat. 10:35, 36; 2 Tim. 3:12.

¹³ Banci saja labo kita langsung ilarang keluargata nembah Jahwe. Tapi, ula sempat pentingen siakap ngikutken sura-sura kalak e asangken patuh man Jahwe. Engkai? Perban Jahwe arusna si pentingna siakap janah arus belinen kekelengenta man baNa asangken man ise pe. (Baca Matius 10:37.) Selain si e, adi tetap kita setia man Jahwe, banci saja keluargata pe ikut pagi nembah Jahwe, bali bagi Selek, Itma, ras Rut. (1 Tim. 4:16) Banci ka pagi meriah ukur kalak e perban sembahna Dibata si benar, janah gejapken kalak e maka ia ikelengi ras ilindungi Dibata.

14, 15. Uga perbahanen kalak Pilisti man kalak Israel?

¹⁴ Bangsa Pilisti pindah arah Pulau Kreta nari ku Kanaan. Dungna negri e ijanjiken Jahwe man Abraham bage pe man keturunenna. Abraham ras Isak pe sempat erurusen ras bangsa e. (Kej. 21:29-32; 26:1) Sanga masuk kalak Israel ku Negri si Ijanjiken e, Pilisti enggo jadi bangsa si hebat janah lit pasukenna si megegeh. Sembah kalak e dewa-dewa bagi Baalsebub ras Dagon. (1 Sam. 5:1-4; 2 Raj. 1:2, 3) Israel pe mulih-ulih terpengaruh nembah dewa-dewa e.​—Hak. 10:6.

¹⁵ Perban kalak Israel la setia, pediat Jahwe kalak e ijajah kalak Pilisti ertahun-tahun dekahna. (Hak. 10:7, 8; Esek. 25:15)  Ban kalak Pilisti melala peraturen guna nindas kalak Israel * janah bunuhina kalak e. (1 Sam. 4:10) Tapi sanga kalak Israel ertobat janah mulih ku Jahwe, selamatken Jahwe umatNa. LantikNa dilaki-dilaki guna nampati kalak e, bagi Simson, Saul, ras Daud. (Hak. 13:5, 24; 1 Sam. 9:15-17; 18:6, 7) Bali bagi si inubuatken Esekiel, kalak Pilisti ngaloken “hukumen si seh kel beratna” sanga negri kalak e iserang kalak Babilon janah dungna iserang kalak Junani.​—Esek. 25:15-17.

16, 17. Pelajaren kai si banci sidat arah perbahanen kalak Pilisti man kalak Israel?

¹⁶ Kai si banci sipelajari arah perbahanen kalak Pilisti man kalak Israel? Gundari pe perban kita umat Jahwe, pernah kang kita itentang bangsa-bangsa si mbelin kel kuasana. Tapi la seri ras kalak Israel, kita tetap setia man Jahwe. Mon-mon musuh-musuh Dibata tempa-tempa menang. Contohna, bas awal tahun 1900, usahaken pemerentah Amerika Serikat mpengadi dahin umat Jahwe. Turang seninata si minpin bas organisasi dat hukumen penjara puluhen tahun dekahna. Bas Perang Doni II, partai Nazi bas Jerman kernepkenna tena umat Dibata. Penjaraken kalak e ribun Saksi Jahwe janah lebih seribu Saksi si mate. Kenca perang e, pemerentahen Uni Soviet mulai nindas kita. Lit turang seninata si itamaken ku ingan (kamp) kerja paksa, janah lit ka si ibuang ku ingan-ingan si terpencil.

¹⁷ Banci saja larang pemerentah dahin erberita, penjarakenna umat Dibata, janah lit ka si ibunuhna. Tapi perlu nge kita mbiar janah bene kinitekenta? Lang. Pasti lindungi Jahwe umatNa si setia. (Baca Matius 10:28-31.) Enggo siidah maka melala pemerentah si nindas kita, tapi gundari kalak e lanai lit, padahal kalak e megegeh. Tapi, umat Dibata lalap reh teremna. Kentisik nari, la banci lang kerina pemerentahen bas  doni enda, tehna me ise kin Jahwe e. Bali bagi bangsa Pilisti, kalak e pe kernep me pagi!

18. Uga nge keadan kota Tirus si nai?

¹⁸ Kota Tirus * si nai eme salah sada kota utama bas perdagangen paksa si e. I sebelah barat kota e, lit kapal-kapal Tirus si ngelewati melala ingan perdagangen i Laut Tengah. I sebelah timur, lit ka dalan-dalan si ilewati pedagang gelah banci seh ku negri si ndauh. Ratusen tahun dekahna, terus ipepulung Tirus ertana arah ingan-ingan e. La tanggung bayakna pedagang Tirus e, emaka akapna ia peminpin.​—Jes. 23:8.

19, 20. Kai bedana penduduk Tirus ras penduduk Gibeon?

¹⁹ Bas jaman Raja Daud ras Raja Salomo, kerja sama kalak Israel ras kalak Tirus. Sediaken kalak Tirus bahan-bahan bangunen ras tukang-tukang si ahli guna mbangun istana Daud bage pe rumah pertoton. (2 Kro. 2:1, 3, 7-16) Paksa si e, idah kalak Tirus maka setia kel kalak Israel man Jahwe janah dat kalak e pasu-pasu. (1 Raj. 3:10-12; 10:4-9) Cuba bayangken, situhuna lit kesempaten man ribun kalak Tirus guna erlajar kerna Jahwe bage pe kerna uga cara si benar i bas nembah Ia. Selain si e, banci ka idah kalak e langsung kai gunana nembah Dibata si benar!

²⁰ Amin pe bage, pentingen akap kalak Tirus erta kalak e. La usih kalak e penduduk kota Gibeon si lit i Kanaan, si nggit nembah Jahwe amin pe mukjizat Jahwe ngenca si begina. (Jos. 9:2, 3, 22–10:2) Dungna, lawan penduduk Tirus ka umat Dibata janah dayakenna piga-piga kalak Israel jadi budak.​—Ms. 83:2, 7; Joel 3:4, 6; Amos 1:9.

21, 22. Kai si terjadi man Tirus janah engkai?

²¹ Arah Esekiel, ipeseh Jahwe kata-kata enda man kalak si nentang e, “O Tirus, Kulawan pagi kam, Kuban melala bangsa  ngelawan kam bagi gelombang laut. Hancurken kalak e pagi tembok-tembokndu bage pe menara-menarandu, keri pagi Kukiskis tanehndu janah Kuban pagi kam jadi batu si kerah.” (Esek. 26:1-5) Tek penduduk Tirus maka ertana banci ngelindungi kalak e bali bagi tembok. Sebap kota kalak e ilindungi tembok si ganjangna 46 meter. Arusna perdiateken kalak e kata-kata Salomo enda, “Erta kalak bayak bali bagi kota si erbenteng man bana. Ertana e bali bagi tembok perlindungen bas bayangenna.”​—Kua. 18:11.

²² Sanga Tirus iserang Babilon janah iserang Junani ka, paksa si e terjadi me nubuat Esekiel. I je me sadar penduduk Tirus maka erta ras tembok kota kalak e ngelindungi bas bayangen ngenca. Kenca kernepken Babilon kota Jerusalem, ikepungna ka kota Tirus 13 tahun dekahna. Janah dungna talukenna kota Tirus si lit i daraten. (Esek. 29:17, 18) Kenca si e, bas tahun 332 SM, terjadi me salah sada nubuat Esekiel. * Pasuken Aleksander Agung mpepulung batu, kayu, bage pe taneh arah reruntuhen kota Tirus si lit i daraten. Kenca si e, tamaina ku lau guna erban dalan ku kota Tirus si lit bas pulau. (Esek. 26:4, 12) Runtuhken Aleksander tembok kota e, jarah kalak e ertana, bunuh kalak e ribun prajurit ras pendudukna, janah dayakenna ka puluhen ribu kalak jadi budak. Dungna, angkai penduduk Tirus maka ‘erta si melala’ labo jadi jaminen. La banci lang, dungna teh kalak e me ise kin Jahwe e.​—Esek. 27:33, 34.

23. Kai pelajaren si banci sidat arah penduduk Tirus?

²³ Kai si banci sipelajari arah penduduk Tirus? Ula sempat kita “itipu kebayaken” janah siandalken ertata ntah pe sianggap e bagi tembok perlindungen. (Mat. 13:22) Kita la banci jadi “budak man Dibata ras man Kebayaken.” (Baca Matius 6:24.) Banci kita tuhu-tuhu aman adi silayani Jahwe alu bulat ukurta. (Mat. 6:31-33; Joh. 10:27-29) Bali bagi nubuat kerna Tirus, kerina nubuat kerna kedungen doni enda pasti terjadi. Kernepken Jahwe pagi kerina perdagangen si merangap ras mentingken bana bas doni enda. Paksa si e, la banci lang, kalak si ngandalken kebayaken tehna me ise kin Jahwe e.

24-26. (a) Engkai kataken Jahwe maka Mesir e bagi sada batang “nggala” ngenca? (b) Ja nari siteh maka lanai ikutken Raja Sedekia petunjuk Jahwe? Janah kai akibatna?

²⁴ Sope jaman Jusup seh ngasa Jerusalem ikepung kalak Babilon, Mesir eme kuasa politik si mbelin kel pengaruhna bas daerah Negri si Ijanjiken. Perban bangsa Mesir enggo ndekah lit, ia bali bagi batang kayu si enggo ndekah turah janah megegeh kel. Tapi adi bandingken ras Jahwe, Mesir bali bagi sada batang “nggala” ngenca janah la lit gegehna.​—Esek. 29:6.

 ²⁵ Raja Sedekia si murtad erpengakap maka megegeh kel Mesir e. Arah Nabi Jeremia bereken Jahwe petunjuk man Sedekia gelah patuh ia man raja Babilon. (Jer. 27:12) Ersumpah ka Sedekia bas gelar Jahwe maka la pagi ia mberontak man Nebukadnesar raja Babilon. Tapi dungna, lanai nggit Sedekia ngikutken petunjuk Jahwe. Langgarna ka sumpahna man Nebukadnesar janah pindona penampat man Mesir guna ngelawan Babilon. (2 Kro. 36:13; Esek. 17:12-20) Situhuna si ilakoken Israel e ngerugiken ia, perban andalkenna gegeh Mesir. (Esek. 29:7) Memang Mesir tempa-tempa teridah megegeh bali bagi ‘raksasa si lit bas aliren-aliren Lau Nil.’ (Esek. 29:3, 4) Tapi kataken Jahwe maka tangkapNa pagi ia bagi nangkap buaya bas Lau Nil. Pasang Jahwe pagi pengkawit bas isangna jenari babaiNa ia gelah ibunuh. Nubuat enda terjadi sanga gunaken Jahwe pasuken Babilon naluken Mesir si nai.​—Esek. 29:9-12, 19.

²⁶ Kai si terjadi man Sedekia kalak si la setia e? Perban mberontak ia man Jahwe, kataken Esekiel maka mahkota ‘peminpin si jahat’ enda iagui pagi janah pemerentahenna ikernepken pagi. Tapi, lit ka kataken Esekiel sada arapen. (Esek. 21:25-27) Suruh Jahwe gelah Esekiel ernubuat maka pemerentahen e ibereken pagi man salah sada keturunen Daud “si lit hakna si sah” guna jadi raja. Bas pasal seterusna siteh kari ise kin raja e.

27. Pelajaren kai si banci sidat arah hubungen Israel ras Mesir?

 ²⁷ Kai si banci sipelajari arah hubungen Israel ras Mesir? Umat Jahwe la banci ngandalken kuasa politik ntah pe erpengakap maka kuasa si bage banci ngelindungi kalak e. Bas pusuh saja pe arusna kita “lanai jadi bagin doni enda.” (Joh. 15:19; Jak. 4:4) Banci saja pemerentahen manusia teridah megegeh, tapi situhuna labo lit gegehna bali bagi sada batang nggala. Bodoh kel adi siarapken manusia si banci mate. Emaka, marilah kita erpengarapen man Jahwe eme Penguasa alam semesta enda!​—Baca Masmur 146:3-6.

28-30. Uga pagi bangsa-bangsa meteh ise kin Jahwe e? Janah kai bedana ras kita?

²⁸ Bas buku Esekiel, mulih-ulih kataken Jahwe, ‘Teh bangsa-bangsa pagi maka aku kap Jahwe.’ (Esek. 25:17) Bas jaman si mbarenda, kata-kata e terjadi sanga hukum Jahwe musuh-musuh umatNa. Kata-kata e pe terjadi ka bas jamanta, tapi paksa si e kerina pagi bangsa-bangsa meteh ise kin Jahwe e.

²⁹ Seri ras umat Dibata bas jaman si nai, kita pe bagi biri-biri si la ergegeh akap bangsa-bangsa si lit i sekelilingta. (Esek. 38:10-13) Bas Pasal 17 ras 18 buku enda, sibahas kari maka kentisik nari serang bangsa-bangsa si kejam umat Dibata la erngadi-ngadi. Tapi sanga terjadi pagi si e, teh bangsa-bangsa me ise kin situhuna si megegeh. La banci lang, teh kalak e me ise kin Jahwe e. Janah akui kalak e pagi maka Jahwe ngenca si lit hakNa guna merentah sanga kernepkenNa kalak e bas perang Harmagedon.​—Ket. 16:16; 19:17-21.

³⁰ Adi kita uga? Lindungi Jahwe pagi kita janah pasu-pasuNa kita perban siandalken Ia, sipatuhi Ia, janah sisembah Ia alu cara si benar. Sebap Ia ngenca Dibata si patut isembah. Kerina e mbuktiken maka siteh ise kin situhuna Jahwe e.​—Baca Esekiel 28:26.