1, 2. Engkai maka mon-mon bereken Jahwe pengenehenen guna ngajari umatNa i doni?

CUBA sibayangken lit sada keluarga si sangana kundul ras-ras guna erlajar Pustaka. Gelah banci iangkai anak-anakna si kitik denga kerna ajaren Pustaka, tuduhken bapakna gambar-gambar si nukah angkai kalak e. Sanga cirem anak-anak e janah semangat kalak e nceritaken pendapatna, e buktina enggo berhasil bapakna ngajari kalak e. Gambar-gambar e nampati anak-anakna ngangkai kerna Jahwe si banci saja mesera kel iangkai anak si kitik denga.

² Manusia eme anak-anak Jahwe. Bali bagi bapak ndai, ate Jahwe gelah angkai manusia kerna kai si la teridah. Emaka berekenNa man kalak e pengenehenen. Contohna, guna ngajarken kebenaren si mbages kerna Ia, bereken Jahwe pengenehenen si luar biasa man Esekiel. Enggo sibahas sada pengenehenen e bas Pasal 3 buku enda. Gundari, sibahas ka sada bagin arah pengenehenen si luar biasa e. Adi siangkai ertina, banci kita reh rembakna ras Jahwe.

3. (a) Menurut Esekiel 1:4, 5, kai si idah Esekiel bas pengenehenenna? (Nen gambar bas awal pasal.) (b) Kai si banci tehndu arah cara Esekiel njelasken pengenehenenna?

³ Baca Esekiel 1:4, 5. Ikataken Esekiel lit empat mahluk si nggeluh. Janah mahluk e gabungen arah malekat, manusia, ras binatang. Sanga bacandu kerina pengenehenen enda bas buku Esekiel pasal 1, banci idahndu usur pake nabi enda kata “lit si bagi” janah “bagi.” (Esek. 1:13, 24, 26) Jelas me, teh Esekiel maka kai si idahna e gambaren saja ngenca, si mirip ras kai si la teridah si lit i surga.

4. (a) Kai tanggapen Esekiel sanga datna pengenehenen e? (b) Kai si pasti enggo teh Esekiel kerna kerubim?

⁴ Pasti luar biasa akap Esekiel kerna kai si idahna ras si ibegina. Empatna mahluk si nggeluh e teridah bagi “rara api si gara.” Meter ia bali “bagi kilap.” Sora kabengna bali “bagi sora lau si deras.” Sanga ia erdalan, “sorana bagi sora prajurit.” (Esek. 1:13, 14, 24-28; nen kotak “Mahluk si Nggeluh si Idah Esekiel.”) Arah pengenehenen si deban si idat Esekiel, banci siteh maka empatna mahluk si nggeluh e eme “kerubim-kerubim,” ntah pe malekat si megegeh. (Esek. 10:2) Perban Esekiel keturunen imam, pasti tehna maka kerubim-kerubim e eme pelayan Dibata si biasana ngelayani i deher Dibata.​—1 Kro. 28:18; Ms. 18:10.

5. (a) Uga tiap kerubim e ras empatna ayona nggambarken sipat Jahwe si hebat ras mulia? (b) Engkai maka keterangen kerna empat ciptan e ngingetken kita kerna erti gelar Dibata? (Nen cataten i teruh.)

⁵ Baca Esekiel 1:6, 10. Idah Esekiel ka maka tiap kerubim-kerubim e lit empat ayona, eme ayo manusia, ayo singa, ayo lembu jantan, ras ayo kuliki. Sanga idah Esekiel empatna ayo e, pasti takjup ia ngidah kuasa ras kemulian Jahwe si luar biasa. Engkai maka bage? Sebap tiap ayo ncidahken sipat-sipat ciptanNa eme hebat, megegeh, ras kuasa. Singa eme binatang liar si megegeh, lembu jantan eme asuh-asuhen si megegeh, kuliki eme perik si hebat, janah manusia eme ciptan Dibata si istimewa si nguasai kerina ciptan si deban i doni. (Ms. 8:4-6) Empatna ayo tiap kerubim-kerubim e nggambarken empat ciptan Jahwe si luar biasa. Amin pe bage, idah Esekiel kerubim-kerubim e lit i teruh tahta Jahwe. Enda cocok kel perban Jahwe kap Penguasa Si Meganjangna janah banci gunakenNa ciptanNa ngelakoken sura-suraNa! * Bali bagi si ikataken penulis masmur, “KerajanNa erkuasa nandangi kerinana.”​—Ms. 103:19; 148:13.

6. Kai si banci nampati Esekiel ngangkai erti empatna ayo kerubim e?

⁶ Bas pudi wari, kenca ukuri Esekiel kai si enggo idahna, banci saja ingetna maka bas jaman si mbarenda, umat Dibata pernah nggunaken binatang jadi perbandingen.  Contohna kataken Jakup anakna Juda bagi singa, janah Benyamin bagi srigala. (Kej. 49:9, 27) Engkai maka bage? Perban Juda, Benyamin, bage pe keturunen kalak e, sipat-sipatna rusur ihubungken ras singa bage pe srigala. Emaka, perban ngukuri contoh-contoh si bage si lit bas buku si itulis Musa, banci saja dat Esekiel kesimpulen maka ayo kerubim-kerubim e pe nggambarken sipat-sipat si luar biasa. Sipat-sipat kai kin e?

7, 8. Sipat kai si usur ihubungken ras singa, kuliki, lembu jantan, ras manusia?

⁷ Kalak si nulis Pustaka si nggeluh sope Esekiel, hubungkenna sipat-sipat tertentu ras singa, ras kuliki, bage pe ras lembu jantan. Contohna, bas Pustaka lit kata-kata: “Kalak si perpang si pusuhna bagi singa.” (2 Sam. 17:10, ctt.; Kua. 28:1) “Kuliki kabang ku datas . . . Ndauh-ndauh nari pe idahna.” (Jop 39:27, 29) “Alu gegeh lembu jantan, mbue hasil rani.” (Kua. 14:4) Emaka, bali bagi si enggo rusur ikataken bas publikasita, ayo singa nggambarken sipat si perpang i bas mbela keadilen, ayo kuliki nggambarken kepentaren guna ngenen ndauh ku lebe, janah ayo lembu jantan nggambarken gegeh si luar biasa.

⁸ Uga kerna “ayo manusia”? (Esek. 10:14) Ayo manusia pasti labo nggambarken sipat si lit bas binatang, tapi sipat manusia si iciptaken mirip ras Dibata. (Kej. 1:27) Bas doni enda, manusia ngenca si banci ncidahken sipat enda, janah perentahken Dibata kalak e, “Arus kelengi kena Jahwe Dibata kena alu kerina pusuh kena” janah “arus kelengi kena kalak si deban bagi kena engkelengi diri kena.” (Ul. 6:5; Im. 19:18) Adi kekelengenta e arah ukurta nari bagi si iperentahken Dibata, e ertina siusih kekelengen Dibata Jahwe. Itulis Rasul Johanes, “Kita engkelengi, sebap leben Dibata si engkelengi kita.” (1 Joh. 4:8, 19) Emaka, “ayo manusia” bas pengenehenen Esekiel e nggambarken kekelengen.

9. Bas ise saja lit sipat-sipat si igambarken empatna ayo kerubim e?

⁹ Bas ise saja lit sipat-sipat e? Empatna ayo kerubim-kerubim e, nggambarken sipat-sipat mahluk roh si lit i surga. Emaka banci sikataken, kerina keluarga Jahwe si lit i surga, lit bas ia sipat-sipat ndai. (Ket. 5:11) Perban Jahwe Si Nciptaken kerubim-kerubim e, emaka Ia me si mereken sipat-sipat e. (Ms. 36:9) Jelas me, ayo kerubim-kerubim e nggambarken sipat-sipat Jahwe ka. (Jop 37:23; Ms. 99:4;  Kua. 2:6; Mi. 7:18) Uga Jahwe ncidahken sipat-sipatNa si luar biasa e?

10, 11. Kai saja manpaat si banci sidat arah empatna sipat Jahwe si utama?

¹⁰ Keadilen. Perban “keleng ate Jahwe keadilen,” emaka “adil perbahanenNa man kerina jelma.” (Ms. 37:28; Ul. 10:17) Emaka, ise pe kita janah uga pe keadanta, kerina kita banci nembah Dibata, terus silayani Ia janah sidat me pasu-pasuNa si rasa lalap. Kepentaren. Dibata e “pentar,” emaka berekenNa man banta buku si isina “kepentaren.” (Jop 9:4; Kua. 2:7) Nasehat Pustaka banci nampati kita ndungi masalahta tiap wari janah banci banna geluhta erguna. Kuasa. Dibata e “mbelin kuasaNa,” banci pegegehiNa kita alu kesah si badiaNa. Hasilna, banci lit ‘kengasupenta si luar biasa’ guna ngadapi tentangen kai pe.​—Nah. 1:3; 2 Kor. 4:7; Ms. 46:1.

¹¹ Kekelengen. Jahwe “dem alu kekelengen si setia,” emaka la pernah tadingkenNa umatNa si setia. (Ms. 103:8; 2 Sam. 22:26) Banci saja sedih kita perban la banci silayani Jahwe bagi si gelgel e perban sakit ntah pe perban enggo metua. Tapi terapuli kita perban siteh inget Jahwe kekelengenta ras kerja kerasta si enggo silakoken man baNa. (Heb. 6:10) Emaka enggo sidat melala manpaat arah sipat Jahwe si utama eme keadilen, kepentaren, kuasa, ras kekelengenNa. Janah manpaat e banci terus sigejapken bas masa depan.

12. Kai si perlu siinget kerna kengasupenta guna ngangkai sipat-sipat Jahwe?

¹² Perban kita manusia, arus siinget maka sitik ngenca si banci siteh kerna sipat-sipat Jahwe. (Jop 26:14) “La kita ngasup ngangkai kerna Si Madakuasa” perban “kemulianNa la terselidiki.” (Jop 37:23; Ms. 145:3) Emaka sipat-sipat Jahwe la banci ikira janah kerina lit hubungenna. (Baca Roma 11:33, 34.) Pengenehenen Esekiel enda pe ncidahken maka sipat-sipat Dibata la terkira asa buena ntah pe uga belinna. (Ms. 139:17, 18) Gambaren si apai si ncidahken kerna si e?

13, 14. Kai si igambarken empatna ayo kerubim e, janah engkai maka banci sisimpulken bage?

¹³ Idah Esekiel maka tiap kerubim e la sada ngenca ayona, tapi empat. Kai ertina e? Perlu siinget, Kata Dibata rusur make angka empat guna nggambarken kai si lengkap ntah pe si ngertiken kerinana. (Jes. 11:12; Mat. 24:31; Ket. 7:1) Bas pengenehenen enda, lit piga-piga kali kataken Esekiel angka empat! (Esek. 1:5-18) Bali bagi empat kerubim si  nggambarken kerina mahluk roh si setia, bage ka me, adi inen sekali kerina empatna ayo kerubim e, e nggambarken kerina sipat Jahwe. *

¹⁴ Engkai maka banci sisimpulken maka empat ayo kerubim e labo saja nggambarken empat sipat? Mari sibandingken ras empat roda bas pengenehenen enda. Memang tiap roda e luar biasa. Tapi adi kerina inen, roda-roda e labo saja empat roda si terpisah. Tapi kerina roda e mbentuk pondasi gereta Jahwe. Bage ka pe empatna ayo kerubim e, kerina jadi dasar sipat-sipat Jahwe si luar biasa.

15. Arah pengenehenen Esekiel si pertama, pelajaren kai si mpegegehi ia?

¹⁵ Arah pengenehenen si pertama enda, dat Esekiel sada pelajaren si penting kerna hubungenna ras Jahwe. Perdiateken kata-kata si pertama si itulis nabi enda. Itulisna maka ia lit “i negri kalak Kaldea,” kenca si e nina, “I je kugejapken kuasa Jahwe.” (Esek. 1:3) Kataken Esekiel maka alokenna pengenehenen e i je, i Babilon, labo bas  Jerusalem. * Perban pegegehi Jahwe ia bas Babilon, erlajar Esekiel maka amin pe ia tabanen si la ergai kalak janah ndauh arah Jerusalem bage pe rumah pertoton, si e labo ertina ia ndauh arah Jahwe janah la banci sembahna Jahwe. Adi tuhu-tuhu ate Esekiel nembah Jahwe janah arah ukurna nari, ugapa pe keadanna janah i ja pe ia, banci tetap sembahna Jahwe alu cara si benar.

16. (a) Engkai maka pengenehenen Esekiel banci ka mpepalem pusuhta? (b) Kai si erban kam merhat ngelayani Jahwe alu bulat ukur?

¹⁶ Engkai maka pelajaren si dat Esekiel e banci ka mpepalem pusuhta? Perban e banci erban kita tek maka adi silayani Jahwe alu bulat ukurta, Jahwe lalap ndeher ras kita, la soal i ja pe kita tading, asa kai pe beratna masalahta, janah uga pe keadanta. (Ms. 25:14; Perb. 17:27) Jahwe “dem alu kekelengen si setia” man kerina umatNa. Jahwe la mis bosan i bas nampati kita. (Kel. 34:6) La lit si banci nirangken kita arah kekelengen Jahwe si setia. (Ms. 100:5; Rom. 8:35-39) Selain si e, pengenehenen kerna Jahwe si ncidahken maka Ia badia ras megegeh ngingetken kita maka Ia patut isembah. (Ket. 4:9-11) Ngata bujur kel kita perban bereken Jahwe pengenehenen si bage guna ngajarken kebenaren si penting kerna Ia ras sipat-sipatNa. Adi reh jelasna siangkai sipat-sipat Jahwe si menarik enda, kita pe banci reh deherna ras Ia. Tersuruh ukurta guna muji Ia ras ngelayani Ia alu bulat ukurta ras asa ngasupta.​—Luk. 10:27.

17. Penungkunen kai saja kari sibahas bas pasal-pasal seterusna?

¹⁷ Sayang kel, bas jaman Esekiel enterem kalak lanai benar carana nembah Jahwe. Uga maka banci e terjadi? Uga tanggapen Jahwe? Janah kai hubungenna ras kita gundari? Jawapenna sibahas kari bas pasal-pasal seterusna.