1-3. (a) Engkai maka meriah ukur Esekiel sanga datna pengenehenen kerna rumah pertoton si luar biasa e? (Nen gambar bas awal pasal.) (b) Kai saja kari sibahas bas pasal enda?

BAYANGKEN, umur Esekiel enggo 50 tahun janah enggo lit 25 tahun dekahna ia itaban i Babilon. Rumah pertoton i Jerusalem pe enggo ndekah ipediat hancur. Bicara lit pe sura-sura Esekiel jadi imam bas Jerusalem, e tading sura-sura nari ngenca. Engkai? Perban bangsana arus denga itaban 56 tahun nari dekahna. (Jer. 25:11) Emaka, sitik ngenca arapen Esekiel banci ngidah umat Jahwe mulih ku kutana ras ngidah rumah pertoton ibangun mulihi. Sedih nge Esekiel?

² Paksa si e, bereken Jahwe man Esekiel pengenehenen si erban meriah ukurna ras si mereken arapen. Bas pengenehenen e, Esekiel ibaba ku gunung si meganjang kel si lit bas kutana. Kenca si e, idahna “sekalak dilaki si ersinar bagi tembaga.” Dilaki e malekat, babana Esekiel erdalan-dalan bas rumah pertoton si luar biasa. (Baca Esekiel 40:1-4.) Jelas kel akap Esekiel rumah pertoton e, tempa tuhu-tuhu ia lit i je! Pasti luar biasa akap Esekiel janah kinitekenna pe reh paguhna, tapi banci saja mamang ka tena. Engkai? Amin pe rumah pertoton  si idahna e mirip ras rumah pertoton si lit i Jerusalem, tapi melala ka si la seri.

³ Pengenehenen si luar biasa e itulis bas siwah pasal si terakhir arah buku Esekiel. Mari sibahas uga carana gelah siangkai pengenehenen e. Nce sibahas ka kari seri ntah lang rumah pertoton si idah Esekiel e ras rumah pertoton rohani si icakapken Rasul Paulus ratusen tahun kenca si e. Si terakhir, sibahas kari kai ertina pengenehenen e man Esekiel bage pe man kalak si itaban.

4. Kerna pengenehenen rumah pertoton, uga mbarenda cara publikasita njelaskenca, tapi gundari uga?

⁴ Mbarenda, ikataken publikasita maka rumah pertoton bas pengenehenen Esekiel seri ras rumah pertoton rohani si ibahas Rasul Paulus bas suratna man kalak Heber. * Jadi paksa si e, sipake penjelasen Paulus kerna kemah ingan ersembah (tabernakel) guna ngangkai kerna rumah pertoton si idah Esekiel. Penjelasen Paulus e ipake guna meteh kai si igambarken bagin-bagin si lit bas rumah pertoton si idah Esekiel. Tapi kenca reh buena ipelajari, reh rusurna itotoken, janah iukuri alu mbages, kepeken perlu cara si mbaru guna ngangkai rumah pertoton si idah Esekiel e.

5, 6. (a) Kai si tulis Rasul Paulus kenca ibahasna kerna kemah ingan ersembah? Sanga ibahasna kerna si e, kai buktina ia meteruk ukur? (b) Uga carata ngusih Paulus guna ngangkai rumah pertoton si idah Esekiel?

⁵ Kurang cocok adi sidarami erti arah tiap bagin si lit bas rumah pertoton si idah Esekiel. Engkai? Mari siperdiateken contohna. Sanga bahas Paulus kerna rumah pertoton rohani, ikatakenna kerna kai si lit bas kemah ingan ersembah, bagi ingan nutung si iban arah emas, tutup Peti Perjanjin, bage pe kudin si iban arah emas si isina manna. Jelaskenna nge kai erti arah tiap barang-barang e? Adi siidah, la suruh kesah si badia ia njelaskenca. Perban nina Paulus, “Gundari labo waktuna guna ncakapken si e alu jelas.” (Heb. 9:4, 5) Nggit Paulus ngikutken petunjuk kesah si badia, janah alu meteruk ukur timaina penjelasen arah Jahwe.​—Heb. 9:8.

⁶ Bage ka me carata ngangkai rumah pertoton si idah Esekiel. Melala kel bagin-bagin bas rumah pertoton si idah Esekiel e. Emaka adi perlu denga kin penjelasen, padin sitimai Jahwe si njelaskenca. (Baca Miha 7:7.) Jadi, lit kin keterangen si lebih jelas si bereken kesah si badia kerna pengenehenen e? Lit!

7, 8. (a) Pemahamen kai si enggo isesuaiken gundari? (b) Kai bedana rumah pertoton si idah Esekiel ras rumah pertoton rohani si ibahas Paulus?

⁷ Bagi si enggo ikataken ndai, mbarenda siakap si idah Esekiel e rumah pertoton rohani si ibahas Paulus bas suratna man kalak Heber. Tapi kenca iriset terdauhen, siteh maka labo rumah  pertoton rohani si idah Esekiel e. Engkai maka banci sikataken bage?

⁸ Alasen si pertama: Rumah pertoton si idah Esekiel la cocok ras penjelasen Paulus. Nina Rasul Paulus kemah ingan ersembah bas jaman Musa nggambarken kai si terbelinen. Lit si seri arah kemah ingan ersembah ras rumah pertoton bas jaman Salomo bage pe bas jaman Serubabel, eme lit “Ingan Sibadiana” i je. Nina Paulus ingan e “ingan si badia si iban alu tan,” eme “bayangen arah ingan si badia situhu-tuhu.” Kai kin ingan si badia situhu-tuhu e? Nina Paulus, “Surga.” (Heb. 9:3, 24) Jadi, surga kin si idah Esekiel e? Lang. Bas pengenehenen Esekiel, la lit buktina maka si idahna e lit bas surga.​—Bandingken Daniel 7:9, 10, 13, 14.

9, 10. Kai bedana korban si lit bas rumah pertoton si idah Esekiel ras korban si lit bas rumah pertoton rohani si ibahas Paulus?

⁹ Bukti si deban eme korban si ipersembahken bas rumah pertoton si idah Esekiel la seri ras si lit bas penjelasen Paulus. Begi Esekiel petunjuk si jelas si ibereken Jahwe kerna korban persembahen man imam-imam, peminpin-peminpin, bage pe man rakyat. Arus bereken kalak e korban guna dosa kalak e. Arus ka bereken kalak e korban persadan, si mungkin banci pan kalak e ras-ras bas ruangen ingan man si lit bas rumah pertoton. (Esek. 43:18, 19; 44:11, 15, 27; 45:15-20, 22-25) Korban e mulih-ulih ipersembahken. Bage ka nge korban si ipersembahken bas rumah pertoton rohani?

¹⁰ Lang. Nina Paulus, “Sanga reh Kristus jadi imam si mbelin guna maba kai si mehuli si gundari sinanami, lewatina kemah si lebih penting ras lebih sempurna si labo iban alu tan ntah pe iciptaken bas doni. Masuk ia ku ingan si badia, labo alu dareh kambing ntah pe dareh lembu jantan si nguda denga, tapi alu darehna, sekali seh rasa lalap janah selamatkenna kita seh rasa lalap.” (Heb. 9:11, 12) Emaka bas rumah pertoton rohani, sekali ngenca korban ipersembahken seh rasa lalap. Korban e eme korban tebusen si ipersembahken Imam si Mbelin si Mulia, eme Jesus Kristus. Tapi bas rumah pertoton si idah Esekiel, melala i je ipersembahken korban, korban e eme kambing ras lembu jantan. Jelas me, rumah pertoton e labo rumah pertoton rohani.

11. Bas jaman Esekiel, engkai maka lenga cocok akap Dibata njelasken kerna rumah pertoton rohani?

¹¹ Alasen si peduaken: Paksa si e lenga seh waktuna akap Dibata njelasken kebenaren kerna rumah pertoton rohani e. Perlu siinget, pengenehenen Esekiel e tangtangna ipeseh man kalak Jahudi si itaban. Arus denga ipatuhi kalak e Undang-Undang Musa. Kenca kalak e ibebasken, mulih kalak e ku Jerusalem janah sembahna Jahwe sesuai ras Undang-Undang Musa. Ertina, rumah pertoton ras ingan nutung persembahen arus ibangun  mulihi, arus ka persembahken kalak e korban i je. E me si ilakoken kalak e kira-kira 600 tahun dekahna. Tapi, cuba bayangken kai pengaruhna man kalak Jahudi adi rumah pertoton si idah Esekiel e maksudna rumah pertoton rohani, janah teh kalak e ka maka imam si mbelin enggo mpersembahken dirina jadi korban si erban korban si deban lanai iperluken, banci saja lanai perlu akap kalak e matuhi Undang-Undang Musa. Je nari siteh maka rumah pertoton si idah Esekiel la mungkin rumah pertoton rohani. Bagi biasana, Jahwe lalap njelasken kebenaren man umatNa bas waktu si tepat janah sanga umatNa enggo siap ngalokenca.

12-14. Kai hubungenna rumah pertoton si idah Esekiel ras rumah pertoton rohani si bahas Paulus? (Nen kotak “Dua Rumah Pertoton si La Seri Ertina.”)

¹² Kai hubungenna rumah pertoton si idah Esekiel ras rumah pertoton rohani si ibahas Paulus? Perlu siinget maka si ibahas Paulus labo kerna rumah pertoton si idah Esekiel tapi kerna kemah ingan ersembah si lit bas jaman Musa. Memang, piga-piga bagin si ikataken Paulus lit ka bas rumah pertoton i jaman Salomo, jaman Serubabel, ras bas rumah pertoton si idah Esekiel. Tapi inti si ibahas Esekiel ras Paulus labo seri. * Amin pe bage, kai si itulis kalak e duana lit hubungenna janah  e nampati kita gelah reh jelasna pemahamenta. Kai buktina?

¹³ Kai hubungenna si itulis Paulus ras si itulis Esekiel? Arah kai si itulis Paulus banci sipelajari kerna pengaturen Jahwe i bas nembah Ia. Arah kai si itulis Esekiel banci sipelajari kerna patoken Jahwe i bas nembah Ia. Guna ngajari kita kerna pengaturen Jahwe i bas nembah Ia, jelasken Paulus erti arah kai si lit bas rumah pertoton rohani, bagi imam si mbelin, persembahen, ingan nutung persembahen, bage pe Ingan Sibadiana. Tapi guna njelasken maka meganjang kel patoken Jahwe i bas nembah Ia, bereken Esekiel man banta gambaren si lengkap kerna rumah pertoton si idahna. Emaka, melala si banci sipelajari kerna patoken Jahwe janah e banci kena ku pusuh ras perukurenta.

¹⁴ Kenca pemahamenta isesuaiken, lit denga nge gunana pengenehenen Esekiel e bas jamanta? Pasti lit. Gelah banci siteh kai gunana pengenehenen e banta, mari sipelajari lebe kai gunana pengenehenen e man kalak Jahudi si setia bas jaman Esekiel.

15. (a) Nubuat kai si lit bas pengenehenen Esekiel? (b) Jelasken kai bedana Esekiel pasal 8 ras Esekiel pasal 40 seh 48.

¹⁵ Gelah siteh jawapen Pustaka kerna erti pengenehenen e man kalak si itaban, mari sibahas piga-piga penungkunen enda. Pertama, kai kin nubuat si lit bas pengenehenen e? Intina eme lit pagi masana sembah kalak mulihi Jahwe alu cara si benar. Pasti bage me si iangkai Esekiel arah pengenehenen e. Sope pengenehenen e, enggo cidahken Jahwe man Esekiel keadan rumah pertoton si erban ciga ate (Esekiel pasal 8). Emaka la tanggung riahna ukur Esekiel sanga tulisna kerna rumah pertoton si mulia e (Esekiel pasal 40 seh pasal 48). Si igambarken bas pasal-pasal e labo cara si salah i bas nembah Jahwe, tapi cara si benar bagi si arusna si sesuai ras Undang-Undang Musa.

16. Uga pengenehenen Esekiel kerna rumah pertoton mbuktiken kai si inubuatken Jesaya?

¹⁶ Gelah mulihi benar cara umat Jahwe i bas nembah Ia, arus penting kel akap kalak e ntah pe arus ipeganjang kalak e cara nembah Jahwe. Lebih seratus tahun sope jaman Esekiel, enggo itulis Nabi Jesaya, “Bas wari-wari pendungi, gunung ingan rumah Jahwe, pajek pagi alu paguh ganjangen asangken gunung-gunung, janah ganjangen asangken bukit-bukit.” (Jes. 2:2) Jelas me idah Jesaya maka mulihi pagi benar cara umat Jahwe i bas nembah Ia janah ipeganjang kalak e, tempa-tempa itamaken bas gunung si meganjangna. Jadi, bas pengenehenen Esekiel e, i ja ingan rumah Jahwe e? “Bas sada gunung si seh kel ganjangna.” (Esek. 40:2) Emaka pengenehenen Esekiel e mbuktiken maka kai si nubuatken Jesaya e tuhu, mulihi pagi Jahwe isembah alu cara si benar.

17. Ringkasken pengenehenen si itulis bas Esekiel pasal 40 seh 48.

¹⁷ Adi iringkasken, bagenda me pengenehenen si itulis bas Esekiel pasal 40 seh 48. Idah Esekiel iukur malekat e gerbang, tembok, halamen, ras ingan si badia si lit bas rumah pertoton. (Esek. 40-42) Kenca si e, terjadi sada peristiwa si luar biasa: Reh Jahwe bas kemulianNa ku rumah pertoton! Bereken Jahwe nasehat man umatNa si rusur mberontak, man imam-imam, ras man peminpin-peminpin. (Esek. 43:1-12; 44:10-31; 45:9-12) Selain si e, idah Esekiel ka lau si maler arah ingan si badia e ku Laut Mati, janah ku ja pe lau e maler lit i je kegeluhen ras pasu-pasu. (Esek. 47:1-12) Idahna ka negri e ibagi jadi piga-piga bagin si ukurenna enggo itentuken, janah ingan nembah Jahwe alu cara si benar pe lit bas bagin tengah negri e. (Esek. 45:1-8; 47:13–48:35) Arah pengenehenen e, kai ate Jahwe si ipesehNa? AteNa gelah tek umatNa maka lit pagi masana mulihi Ia isembah alu cara si benar janah e penting kel akap umatNa e. Pasu-pasu Jahwe rumah pertotonNa janah e buktikenNa arah kerehenNa. Maler banNa pasu-pasuNa arah rumah pertoton e guna mereken kesehaten, kegeluhen, ras kedamen bas negri e.

18. Tuhu-tuhu nge lit rumah pertoton si lit bas pengenehenen Esekiel e? Jelasken.

 ¹⁸ Si peduaken, tuhu-tuhu nge lit bangunen rumah pertoton si idah Esekiel e? Lang. Esekiel ras kalak si itaban e tehna maka rumah pertoton si lit bas pengenehenen Esekiel e labo tuhu-tuhu lit. Engkai? Perlu siinget maka rumah pertoton e lit bas “sada gunung si seh kel ganjangna.” E seri ras Nubuat Jesaya, tapi rumah pertoton e la seri inganna ras rumah pertoton si enggo lit. Rumah pertoton bas jaman Salomo inganna bas Gunung Moria si lit bas Jerusalem. Janah i je ka me rumah pertoton ibangun mulihi. Banci kin Gunung Moria e ikataken “gunung si seh kel ganjangna”? Lang, perban i sekeliling Gunung Moria lit gunung si deban si seri ganjangna ntah pe si terganjangen. Daerah rumah pertoton si idah Esekiel e mbelang kel janah ikelilingi tembok, emaka la mungkin siat inganna bas puncak Gunung Moria, bicara bas kota Jerusalem sanga jaman Salomo pe labo siat. Janah kalak si itaban e pe la mungkin arapkenna lit pagi lau si maler arah ingan si badia si lit bas rumah pertoton e ku Laut Mati, janah launa erban laut jadi segar ras lit i je kegeluhen. Selain si e, perban daerah Negri si Ijanjiken e lit bukit-bukitna, la mungkin batas daerah man tiap suku itentuken alu garis si sejajar bagi si igambarken bas pengenehenen e. Emaka, rumah  pertoton si lit bas pengenehenen e labo rumah pertoton situhu-tuhu lit.

19-21. Kai tujun Jahwe mereken pengenehenen e man umatNa, janah engkai maka wajar bage perasan kalak e?

¹⁹ Si peteluken, kai tujunna pengenehenen e man kalak si itaban? Pengenehenen e ibereken gelah mela akap kalak e sanga ukurina patoken Jahwe si meganjang i bas nembah Ia. Suruh Jahwe gelah ‘jelasken Esekiel man kalak Israel uga kin rumah pertoton e.’ Arus jelas kel keterangen si ibereken Esekiel gelah banci “pelajari kalak e rancangen rumah pertoton e.” Kai tujunna? Bagi si enggo sibahas, tujunna labo gelah bangun kalak e rumah pertoton. Tapi bagi si ikataken Jahwe, “gelah mela akapna perban kesalahenna.”​—Baca Esekiel 43:10-12.

²⁰ Engkai maka pengenehenen e banci kena ku pusuh kalak si itaban si bujur ukurna janah erban kalak e mela? Nina Jahwe man Esekiel, “O anak manusia, nenlah, perdiateken, janah begikenlah alu tutus kerina si Kukataken man bandu kerna peraturen-peraturen ras undang-undang rumah pertoton Jahwe.” (Esek. 44:5) Bas pengenehenen e, mulih-ulih begi Esekiel kerna peraturen ras undang-undang. (Esek. 43:11, 12; 44:24; 46:14) Selain si e, rusur ka ia iingetken kerna patoken Jahwe termasuk patokenNa kerna ukuren ras timbangen si pas. (Esek. 40:5; 45:10-12; bandingken Kuan-kuanen 16:11.) Bas bahasa aslina, lebih 50 kali ipake Esekiel kata-kata bagi ‘iukur’ ntah pe ‘ukuren’ bas pengenehenen e.

²¹ Engkai maka lit ikataken Jahwe kerna ukuren, timbangen, peraturen, ras undang-undang? Banci saja jelasken Jahwe ateNa mulihi kebenaren si penting man umatNa, eme Ia ngenca si lit hakNa erban patoken i bas nembah Ia alu cara si benar. Wajar kel adi mela akap kalak si la ngikutken patoken e. Jadi, kai si ipelajari kalak Jahudi arah pengenehenen e? Piga-piga pelajarenna sibahas kari bas pasal seterusna. Alu bage, banci reh jelasna siangkai kai gunana pengenehenen si luar biasa e man banta.