1-3. Uga kalak Babilon nokoh-nokohi umat Jahwe, janah engkai?

CUBA bayangken kam kalak Jahudi si erkiniteken i kota Babilon. Bangsandu enggo itaban i je kira-kira 50 tahun dekahna. Bas wari Sabat, bagi si biasa ilakokenndu, lawes kam ras kalak Jahudi si deban guna nembah Jahwe. Lewatindu dalan-dalan si enterem i je jelma, idahndu ka melala ingan ersembah si galang ras mejile. I je enterem kalak mpersembahken korban ras rende muji dewa-dewa bagi Marduk.

² Ndauh arah ingan e, banci saja pulung kam bas ingan si melungen, mungkin i deher salah sada lau si maler. * Pulung kam i je ras piga-piga kalak si nembah Jahwe guna ertoto, rende, ras mbahas Kata Dibata. Sanga kena ertoto, begindu sora perahu kayu si rengkik-engkik si itambat i pinggir lau e. Tenang kel akapndu i je. Atendu ula min reh kalak Babilon ngganggu perpulungen kena, bagi si rusur terjadi. Engkai maka bage perbahanen kalak Babilon?

³ Enggo rusur kel kalak Babilon menang bas perang, akapna banci ia menang perban isampati dewa-dewana. Menurut  kalak e sanga Jerusalem ikernepken, e buktina Dewa Marduk gegehen asangken Jahwe. Emaka, tokohi kalak e Dibata si sembahndu bage pe umatNa. Mon-mon nokoh kalak e nina, “Endekenlah man kami sada lagu kerna Sion!” (Ms. 137:3) Enggo melala iban lagu pujin guna ngerayaken kemenangen Sion ntah Jerusalem perban menang ngelawan musuh-musuh Jahwe. Banci saja lagu si bage me si ipake kalak Babilon guna nokohi kalak Jahudi. Lit ka lagu-lagu si iban kalak Jahudi e si isina kerna kalak Babilon, contoh laguna, “Ban kalak e Jerusalem jadi reruntuhen. . . . Kalak si lit i sekeliling kami nokohi kami janah tawaina kami.”​—Ms. 79:1, 3, 4.

4, 5. (a) Arapen kai si lit bas nubuat Esekiel? (Nen gambar bas awal pasal.) (b) Kai kari sibahas bas pasal enda?

⁴ Kalak Jahudi si murtad pe ikut nokohi kam perban lalap kam erkiniteken man Jahwe ras nabi-nabiNa. Amin pe bage, meriah ukurndu sada keluarga sanga nembah Jahwe. Meriah kapndu ertoto bage pe ras-ras rende. Tenang akapndu sanga mbaca Kata Dibata. (Ms. 94:19; Rom. 15:4) Bas sada wari, sekalak umat Jahwe maba gulungen si istimewa ku perpulungen e. Gulungen e eme nubuat Esekiel. Meriah kel ukurndu megi janji Jahwe maka ibebaskenNa pagi umatNa. La tanggung riahna ukurndu sanga nubuat e ibacaken janah ngarap kam bas sada wari pagi, kam ras keluargandu banci mulih ku kutandu janah ikut ndukung gelah Jahwe saja ngenca si isembah mulihi!

⁵ Bas nubuat Esekiel melala janji kerna lit pagi masana maka Jahwe saja ngenca si isembah. Mari sibahas janji-janji si luar biasa enda. Uga pagi kalak si itaban banci ngidah janji-janji e itepati? Kai hubungen nubuat e ras jamanta? Janji si apai saja si terjadi pagi mulihi bas masa depan?

6. Uga Jahwe mulih-ulih mpersingeti umatNa si mberontak?

⁶ Arah Esekiel enggo jelas kataken Jahwe man umatNa maka adi lalap kalak e mberontak, ihukum pagi kalak e. Nina Jahwe, “Ibaba pagi kalak e lawes jadi tabanen.” (Esek. 12:11) Bagi si enggo sibahas bas Pasal 6 buku enda, enggo icontohken Esekiel kai pagi si terjadi. Tapi persinget Esekiel e, labo persinget si pertama man kalak e. Hampir seribu tahun sope si e, mulai arah jaman Musa, enggo persingeti Jahwe umat e maka itaban pagi kalak e adi lalap kalak e mberontak. (Ul. 28:36, 37) Nabi-nabi si deban pe enggo mereken persinget si bage, contohna Jesaya ras Jeremia.​—Jes. 39:5-7; Jer. 20:3-6.

7. Uga Jahwe ngukum umatNa?

⁷ Sayang kel, sitik pe la diate kalak e persinget ndai. Dungna ceda ukur Jahwe ngidah umatNa mberontak, nembah berhala, la setia, janah jahat kel perbahanen kalak e perban pengaruh  arah permakan-permakan si jahat. Emaka pediat Jahwe kalak e kelihen. Kejadin enda mpermelaken kalak e perban situhuna bas negri e “melala kel i je susu ras madu.” (Esek. 20:6, 7) Emaka, bagi si enggo ndekah inubuatken, ihukum Jahwe me umatNa si murtad e, pediatNa kalak e itaban. Bas tahun 607 SM, Nebukadnesar raja Babilon nyerang kalak e, kernep me Jerusalem ras rumah pertoton si lit i je. Ribun kalak Jahudi si selamat itaban ku Babilon. I je kalak e itokohi ras itentang bagi si enggo sibahas bas awal pasal enda.

8, 9. Uga Dibata mpersingeti kalak Kristen bas runggun kerna kalak murtad?

⁸ Pernah nge runggun Kristen tempa-tempa itaban ku Babilon? Pernah. Bagi kalak Jahudi si mbarenda, pengikut Jesus pe enggo ipersingeti ndauh sope si e terjadi. Mulai tangtangna nari nina Jesus, “Hati-hatilah man nabi-nabi palsu si reh ku kena, si arah darat nari teridah bagi biri-biri, tapi situhuna kalak e srigala si merangap.” (Mat. 7:15) Bas pudi wari, Rasul Paulus pe mereken persinget, nina, “Kuteh maka kenca aku lawes, reh pagi srigala-srigala si merawa ku tengah-tengah kena janah kejam perbahanen kalak e man rarasen e. Selain si e, arah tengah-tengah kena nari lit pagi si mpeseh ajaren sesat. Ate kalak e gelah murid-murid Jesus jadi pengikutna.”​—Perb. 20:29, 30.

⁹ Bas abad si pertama, iajari me kalak Kristen cara nandai kalak si murtad ras cara gelah ula ipengaruhi kalak si murtad. Ibereken petunjuk man pertua-pertua gelah mpedarat kalak si murtad arah runggun. (1 Tim. 1:19; 2 Tim. 2:16-19; 2 Pet. 2:1-3; 2 Joh. 10) Tapi bagi kalak Israel ras kalak Juda bas jaman si mbarenda, enterem kalak Kristen dungna lanai megiken persinget si perkeleng e. Bas pendungi abad pertama, enggo mbelin kel pengaruh kalak si murtad bas runggun Kristen. Johanes, rasul si terakhir si nggeluh denga bas pendungi abad pertama, idahna maka enggo reh teremna kalak si nilah ras mberontak. Johanes nari ngenca rasul si nggeluh guna nampati gelah ula reh teremna kalak Kristen si murtad. (2 Tes. 2:6-8; 1 Joh. 2:18) Kai si terjadi kenca Johanes mate?

10, 11. Uga perumpaman Jesus kerna page ras sesa terjadi mulai bas abad si peduaken?

¹⁰ Kenca mate Johanes, perumpaman Jesus kerna page ras sesa mulai terjadi. (Baca Matius 13:24-30.) Bagi si enggo pernah ikataken Jesus, amburken Setan me benih “sesa” eme kalak Kristen si palsu bas runggun Kristen. Akibatna, reh teremna kalak si murtad. Cuba bayangken uga cedana ukur Jahwe ngidah runggun si iban AnakNa. Gundari, enggo lit i je kalak si nembah berhala bage pe si ngerayaken perayan agama palsu. Lit ka si terpengaruh cara rukur kalak si la tek man  Dibata bage pe si tek man ajaren agama palsu. Kai si ilakoken Jahwe? Bagi si lakokenNa mbarenda man kalak Israel si la setia, pediatNa umatNa itaban. Kira-kira bas abad si peduaken, enggo mesera mbedakenca kalak Kristen situhu-tuhu (page) ras kalak Kristen si palsu (sesa). Mulai paksa si e, kalak Kristen situhu-tuhu itaban Babilon si Mbelin (agama palsu sebelang doni), janah kalak Kristen si palsu ersada ras Babilon si Mbelin e. Kalak Kristen si palsu terus reh teremna janah dungna lit me Gereja.

¹¹ Ratusen tahun dekahna, sanga Gereja si erkuasa, kerina kalak enggo ndauh kel arah kebenaren. Kalak e tempa-tempa lit bas kegelapen. Tapi kalak Kristen situhu-tuhu si ikataken “page” bas perumpaman Jesus e tetap lit. Kalak Kristen situhu-tuhu bagi tabanen si iceritaken bas Esekiel 6:9, labo lupakenna Dibata si benar. Lit si pang nentang ajaren palsu arah Gereja. Emaka kalak e itokohi ras isiksa. Lupaken Jahwe nge umatNa? Lang. Bagi kalak Israel bas jaman si mbarenda, rawa Jahwe e lit nge sibarna. (Jer. 46:28) Selain si e, la pediat Jahwe bene arapen umatNa. Mari sipelajari uga Jahwe  mereken arapen man kalak Jahudi si itaban bas Babilon, eme arapen guna ibebasken.

12, 13. Engkai maka lanai merawa Jahwe man umatNa si itaban?

¹² Amin pe merawa Jahwe man umatNa janah hukumNa kalak e, tapi labo lalap Ia merawa. Sebap nina, “Lanai Aku merawa, lanai Aku nembeh, janah enggo puas Kuakap. Kenca Kusehken rawaKu man kalak e, teh kalak e pagi maka Aku kap Jahwe si ngerana man kalak e, sebap Aku ngenca si arus isembah.” (Esek. 5:13) Kai si erbanca Jahwe lanai merawa?

¹³ I tengah-tengah kalak si itaban e, lit ka kalak Jahudi si setia. Janah kataken Dibata arah Esekiel maka lit pagi umatNa si ertobat sanga itaban. Mela pagi akap kalak e kenca ingetna perbahanenna si jahat man Jahwe. Kenca si e, pindo kalak e pagi perkuah ateNa gelah iampuniNa kalak e. (Esek. 6:8-10; 12:16) Kalak si setia e termasuk Esekiel, Daniel, ras telu temanna. Gedang umur Daniel emaka banci idahna sanga kalak Jahudi tangtangna itaban bage pe sanga ibebasken. Pernah ia ertoto alu bulat ukur mindo man Dibata gelah ampuniNa  dosa kalak Israel bagi si itulis bas Daniel pasal 9. Pastilah isi toto Daniel e seri ras isi pusuh ribun kalak si itaban si merhat kel iampuni Jahwe janah mulihi ipasu-pasuNa. Emaka bagi si ikataken Esekiel, kena kel ku pusuh kalak e janji-janji Dibata maka lit pagi masana kalak e ibebasken janah mulihi nembah Jahwe!

14. Engkai maka nggit Jahwe mbebasken umatNa gelah banci kalak e mulih ku kutaNa?

¹⁴ Ibebasken me umat Dibata janah banci kalak e mulihi nembah Jahwe saja. Kalak e ibebasken labo perban metunggung kalak e ibebasken tapi perban enggo seh waktuna ipebadia Jahwe mulihi gelarNa i lebe-lebe kerina bangsa. Enda me si pentingna. (Esek. 36:22) Perlu teh kalak Babilon maka kerina dewa kalak e termasuk Marduk labo gegehen asangken Jahwe Tuhan Si Meganjangna. Mari sipelajari lima janji Jahwe si ipeseh Esekiel man kalak si itaban. Pertama, sipelajari kari kai pengaruh janji e man kalak si itaban si setia. Kenca si e, sipelajari kari uga janji-janji e terjadi ka i belang-belang doni.

15. Kai si janjiken Jahwe arah Esekiel?

¹⁵ JANJI 1. Lanai pagi lit si nembah berhala ntah pe si ngelakoken perbahanen si erban ciga ate si lit hubungenna ras agama palsu. (Baca Esekiel 11:18; 12:24.) Bagi si enggo sibahas bas Pasal 5 buku enda, kota Jerusalem ras rumah pertoton si lit i je lanai badia. Perban enggo ilakoken i je kai si lit hubungenna ras agama palsu, contohna nembah berhala. Penduduk kota e jadi jahat kel janah ndauh arah Jahwe. Tapi bereken Jahwe arapen man kalak si itaban e maka lit pagi masana mulihi sembah kalak e Jahwe alu cara si benar. Arapen e ipeseh Jahwe arah Esekiel. Enda me si pentingna, sebap adi sembah kalak e mulihi Jahwe alu cara si benar, i je maka banci igejapken kalak e pasu-pasu si debanna.

16. Kai janji Jahwe kerna keadan kuta umatNa?

 ¹⁶ JANJI 2. Mulih pagi kalak si itaban e ku kutana. Nina Jahwe, “Pasti Kubereken pagi negri Israel man kena.” (Esek. 11:17) Luar biasa kel janji enda, perban nokoh kel kalak Babilon man umat Dibata, pasti la pernah bereken kalak Babilon arapen man kalak e guna mulih ku kutana. (Jes. 14:4, 17) Sanga enggo mulih pagi kalak e janah adi setia kalak e, subur pagi mulihi negrina janah melala hasil jumana, emaka meriah akapna erdahin. Lanai pagi kalak e mela perban kelihen.​—Baca Esekiel 36:30.

17. Kai si ijanjiken kerna korban-korban persembahen?

¹⁷ JANJI 3. Mulihi ka pagi ipersembahken korban bas ingan nutung persembahen Jahwe. Bagi si enggo sibahas bas Pasal 2 buku enda, menurut Undang-Undang Musa, korban ras persembahen arus ibereken, janah e bagin si penting bas nembah Jahwe. Persembahen kalak si itaban si enggo mulih e pasti aloken Jahwe adi tetap kalak e setia janah Jahwe saja ngenca si isembahna. Hasilna, dosa kalak e banci iampuni janah tetap kalak e jadi teman Dibatana. Erjanji Jahwe, nina, “Kerina pagi kalak Israel nembah man bangKu. Bas ingan e meriah pagi ukurKu ngidah kalak e, Kupindo gelah bereken kena sumbangen ras persembahen si mehulina eme jang kena si badia.” (Esek. 20:40) Adi Jahwe saja ngenca si isembah kalak e, pasti dat kalak e pasu-pasu.

18. Uga pagi Jahwe mpermakani umatNa?

¹⁸ JANJI 4. Permakan-permakan si jahat lanai ipediat jadi permakan. Salah sada si erban umat Dibata ndauh kel arah Dibata eme pengaruh si jahat arah peminpin-peminpin kalak e. Erjanji Jahwe guna ngubah keadan e, nina, ‘Lanai pagi Kupediat kalak e si ngurus biri-biriKu. Kuselamatken pagi biri-biriKu arah kalak e nari.’ Erjanji Jahwe, “Kuurus pagi biri-biriKu.” (Esek. 34:10, 12) Uga Jahwe  ngelakokenca? PilihNa dilaki-dilaki si erkiniteken ras setia jadi permakan.

19. Kai si ijanjiken Jahwe kerna persadan umatNa?

¹⁹ JANJI 5. Umat Jahwe ersada pagi. Sope lenga kalak e itaban, cuba bayangken seh kel latihna akap umat Dibata si setia ngidah perpecahen i tengah-tengah umat Dibata. Teremen arah kalak e ipengaruhi nabi-nabi palsu ras permakan-permakan si jahat. Akibatna, ilawan kalak e nabi-nabi si setia si isuruh Jahwe. Ban kalak e ka kelompok-kelompok janah simusuhen kalak e. Emaka, pasti mpepalem pusuh kel janji Jahwe si itulis Esekiel enda, “Kupersada pagi kalak e kerina. Kutamaken perukuren si mbaru bas kalak e.” (Esek. 11:19) Adi kerina kalak Jahudi si mulih e tetap ersada janah ersada ka kalak e ras Jahwe, la lit musuh si banci naluken kalak e. Bangsa kalak e banci erban Jahwe mulihi imuliaken janah lanai tokohi kalak Jahwe ntah pe sepele kalak man baNa.

20, 21. Uga janji Dibata terjadi man kalak si itaban si mulih ku kutana?

²⁰ Tuhu kin limana janji e terjadi man kalak Jahudi si mulih ku kutana e? Ingetlah kai si pernah ikataken Josua, “Kerina  si mehuli si janjiken Jahwe Dibata kena enggo tepatiNa. Kerina enggo terjadi. La lit sada pe si la tepatiNa.” (Jos. 23:14) Bagi bas jaman Josua, janji Jahwe pe itepati sanga kalak Jahudi si itaban e mulih ku negrina.

²¹ Lanai sembah kalak Jahudi berhala ntah pe ngelakoken kai si erban ciga ate si rehna arah agama palsu, si mbarenda erban kalak e ndauh arah Jahwe. Dungna seh me sura-sura kalak e. Banci kalak e tading bas kutana, mulihi perjumaina tanehna, janah sikap pergeluhna. La ndekah kenca kalak e mulih ku kutana, ibangunna ka mulihi ingan nutung persembahen Jahwe i Jerusalem janah persembahkenna korban si erban meriah ukur Jahwe. (Esa. 3:2-6) Pasu-pasu Jahwe ka kalak e. BerekenNa permakan-permakan si mehuli ras setia, contohna Imam Esra sekalak juru tulis, Gubernur Nehemia, Gubernur Serubabel, Imam si Mbelin Josua, ras nabi-nabi si perpang bagi Hagai, Sakaria, ras Maleaki. Adi tetap kalak e patuh man petunjuk si ibereken, gejapkenna me persadan  si enggo ndekah kel arapkenna.​—Jes. 61:1-4; baca Jeremia 3:15.

22. Ja nari banci siteh maka janji Jahwe e terjadi ka pagi mulihi janah pengaruhna ndauh belinen?

²² Kalak Jahudi pasti terpegegehi ngidah janji-janji Jahwe si terjadi. Tapi, terjadi ka pagi janji e janah pengaruhna ndauh belinen. Engkai maka banci sikataken bage? Janji-janji e banci terjadi adi umat Jahwe tetap setia. Tapi dungna, kalak Jahudi lanai setia janah mberontak. Emaka janji Jahwe lenga kerina terjadi. Situhuna bagi si ikataken Josua, kerina janji Jahwe pasti terjadi. Banci sisimpulken maka janji-janji Jahwe man kalak Jahudi terjadi ka pagi mulihi janah pengaruhna ndauh belinen ras tahan rasa lalap. Mari sipelajari uga e banci terjadi.

23, 24. Ndigan nge imulai masa sanga “kerina iban mulihi bagi si mbarenda”? Jelasken.

²³ Enggo sipelajari arah Pustaka maka doni si jahat enda enggo seh ku wari-wari pendungi bas tahun 1914. Tapi si e labo erban umat Jahwe mbiar. Pustaka ngataken maka mulai tahun 1914, imulai me sada masa si mbaru eme “kerina iban mulihi bagi si mbarenda.” (Perb. 3:21) Ja nari banci siteh? Kai kin si terjadi i surga bas tahun 1914? Jesus Kristus eme Mesias ilantik jadi Raja! Engkai maka pelantiken e jadi tanda maka masa si mbaru enggo imulai? Perlu siinget, Jahwe enggo erjanji man Raja Daud maka keturunenna pagi lalap jadi raja. (1 Kro. 17:11-14) Tapi, kenca ihancurken kalak Babilon kota Jerusalem bas tahun 607 SM, lanai lit keturunen Daud si merentah jadi raja.

²⁴ Jesus si ikataken “Anak manusia” eme keturunen Daud, emaka lit hakna si sah jadi ahli waris Raja Daud. (Mat. 1:1; 16:13-16; Luk. 1:32, 33) Bas tahun 1914 sanga Jesus ilantik Jahwe i surga, imulai me masa si mbaru, eme sanga “kerina  iban mulih bagi si mbarenda.” Mulai je nari, isuruh Jahwe me Raja si sempurna e guna nerusken masa si mbaru si enggo ijanjiken e.

25, 26. (a) Ndigan kalak Kristen situhu-tuhu lanai itaban bas Babilon si Mbelin? Jelasken. (Nen ka kotak “Tahun 1919.”) (b) Nubuat kai si mulai terjadi bas tahun 1919?

²⁵ Salah sada si tangtangna ilakoken Kristus kenca ia jadi Raja eme mereksa pengaturen kerna cara umat Dibata bas nembah Dibata. Pereksana e radu ras Bapakna. (Mal. 3:1-5) Bagi si ikataken bas perumpaman Jesus, la terbedaken page ras sesa, bage ka me kalak si ipilih ku surga enggo ndekah la terbedaken ras kalak Kristen si palsu. * Tapi kenca paksa peranin imulai bas tahun 1914, jelas kel teridah bedana. Puluhen tahun dekahna sope tahun 1914, Ajar-Ajar Pustaka si Badia si setia enggo ncidahken kesalahen-kesalahen Gereja. Kalak e pe lanai nggit ersada ras organisasi Gereja si enggo nilah e. Enda me waktuna man Jahwe nampati umatNa gelah mulihi kalak e nembah Jahwe alu cara si benar. Emaka bas awal tahun 1919, piga-piga tahun ngenca kenca “paksa peranin” imulai, umat Dibata ibebasken arah Babilon si Mbelin. (Mat. 13:30) Lanai kalak e itaban!

²⁶ Mulai je nari, terjadi me nubuat Esekiel kerna lit pagi masana mulihi sembah kalak Jahwe alu cara si benar, janah pengaruhna belinen asangken si igejapken umatNa bas jaman si mbarenda. Mari sipelajari uga limana janji e enggo terjadi janah pengaruhna ndauh belinen.

27. Kai si ilakoken Dibata gelah umatNa lanai nembah berhala?

²⁷ JANJI 1. Lanai lit kalak si nembah berhala ntah pe si ngelakoken perbahanen si erban ciga ate si rehna arah agama palsu. Bas akhir tahun 1800 bage pe bas awal tahun 1900, pulung me kalak Kristen situhu-tuhu guna nembah Dibata janah lanai lakoken kalak e perbahanen si lit bas agama palsu. Teh kalak e maka ajaren Dibata Si Telu Sada (Tritunggal), tendi  si la banci mate, ras api neraka rehna arah agama palsu, labo arah Pustaka. Teh kalak e ka adi nggunaken patung sanga nembah Dibata, e seri ras nembah berhala. Bas pudi wari, teh umat Dibata ka maka nggunaken salib pe termasuk nembah berhala.​—Esek. 14:6.

28. Kai si mulihi inanami umat Dibata?

²⁸ JANJI 2. Umat Dibata mulihi dat pangan rohani si la tanggung buena. Kenca itadingken kalak Kristen si setia Babilon si Mbelin, mulai dat kalak e pangan rohani si seh kel buena. Ipasu-pasu me kalak e janah lanai lit si kelihen secara rohani. (Baca Esekiel 34:13, 14.) Bagi si ibahas kari bas Pasal 19 buku enda, enggo pasu-pasu Jahwe kalak e alu pangan rohani si la tanggung buena lebihen asangken si enggo-enggona.​—Esek. 11:17.

29. Engkai maka dahin erberita reh belinna mulai tahun 1919?

 ²⁹ JANJI 3. Mulihi ipersembahken korban bas ingan nutung persembahen Jahwe. Bas abad pertama, kalak Kristen iajari guna mpersembahken korban pujin si ndauh ergan asangken korban binatang. Puji kalak e Jahwe janah erberita kalak e kerna Ia. (Heb. 13:15) Amin pe bage, sanga umat Dibata itaban ratusen tahun dekahna, la lit pengaturen guna mpersembahken korban pujin si bage. Tapi kenca umat Dibata nandangi ibebasken arah Babilon si Mbelin, mulai persembahken kalak e korban pujin. Sibuk kalak e erberita janah meriah ukurna muji Jahwe bas perpulungen. Mulai tahun 1919, “budak si setia ras pentar” njelasken uga pentingna erberita janah aturkenna dahin e gelah reh ulina. (Mat. 24:45-47) Emaka dem me korban bas ingan nutung persembahen Jahwe, perban reh teremna kalak si muji gelarNa si badia!

30. Kai si lakoken Jesus gelah biri-birina iurus permakan-permakan si mehuli?

³⁰ JANJI 4. Permakan-permakan si jahat lanai ipediat jadi permakan. Enggo bebasken Kristus umat Dibata arah peminpin Gereja si jahat ras mentingken bana. Bas runggun Kristen pe permakan si bage lanai ipediat jadi permakan. (Esek. 20:38) Jesus Permakan si Mehuli, pastikenna gelah biri-birina sikap iurus. Bas tahun 1919, ipilihna budak si setia ras pentar. Budak si setia ras pentar eme kelompok si kitik arah kalak si ipilih ku surga si tugasna mereken pangan rohani man umat Dibata. Bas pudi wari, pertua pe iajari guna mpermakani “rarasen biri-biri Dibata.” (1 Pet. 5:1, 2) Kata-kata Jahwe bas Esekiel 34:15-16, rusur ipake guna ngingetken pertua-pertua Kristen kerna patoken si enggo itetapken Dibata Jahwe bage pe Jesus Kristus guna idalanken kalak e.

31. Uga Jahwe nepati janjiNa si itulis bas Esekiel 11:19?

³¹ JANJI 5. Umat Jahwe si ersada. Ratusen tahun dekahna, Gereja terbagi jadi puluhen ribu aliren ras sekte janah la kalak e ersada. Tapi umat Jahwe nggejapken persadan si luar biasa. Tepati Jahwe janji si ipesehNa arah Esekiel, nina, “Kupersada pagi kalak e kerina.” (Esek. 11:19) I belang-belang doni, lit jutan pengikut Kristus si reh arah erbage-bage suku, agama, bage pe pendahin. Tapi kerinana erlajar kebenaren si seri ras ersada ngelakoken tugas si seri. Bas berngi si terakhir Jesus i doni, tutus kel atena ertoto gelah pengikutna ersada. (Baca Johanes 17:11, 20-23.) Bas jamanta gundari, toto Jesus e tuhu-tuhu enggo ijawap Jahwe.

32. Uga nge perasanndu ngidah nubuat Esekiel si enggo terjadi bas umat Dibata? (Nen ka kotak “Nubuat kerna Umat Dibata si Itaban ras Ibebasken.”)

³² Pasti meriah siakap perban gundari banci mulihi sisembah Jahwe alu cara si benar. Sanga sisembah Jahwe, banci sigejapken maka piga-piga nubuat Esekiel enggo terjadi. Pasti meriah ukur Jahwe ngidah umatNa bagi si nubuatkenNa  arah Esekiel, nina, “Meriah pagi ukurKu ngidah kena.” (Esek. 20:41) Kenca itaban ratusen tahun dekahna, dungna umat Dibata ibebasken janah nanamina pangan rohani si la tanggung buena. Pasti bangga kel kita banci ikut jadi bagin umat Dibata si ersada e janah ikut muji Dibata i belang-belang doni. Situhuna, piga-piga nubuat Esekiel e terjadi denga pagi janah pengaruhna ndauh belinen.

33-35. (a) Kai nge si bayangken kalak si itaban sanga begina janji si lit bas Esekiel 36:35? (b) Uga nubuat e terjadi man umat Jahwe bas jamanta gundari? (Nen ka kotak “Kerina Iban Mulihi Bagi si Mbarenda.”)

³³ Bagi si enggo sibahas, masa sanga “kerina iban mulihi bagi si mbarenda” imulai sanga Jesus ilantik jadi raja bas tahun 1914. I je me keturunen Daud mulai jadi raja mulihi. (Esek. 37:24) Kenca si e, bereken Jahwe kuasa man Kristus guna nampati umatNa mulihi nembah Jahwe alu cara si benar, sebap ratusen tahun dekahna umatNa e itaban secara rohani. Tapi tugas Kristus lenga dung, arus denga ilakokenna tugasna e seh ku masa depan. Janah erbage-bage keterangen kerna tugasna e si erban meriah ukurta, lit bas nubuat Esekiel.

³⁴ Salah sada nubuat e isina, “Ning kalak pagi, ‘Negri si la iingani e bagi Taman Eden.’” (Esek. 36:35) Kai nge si bayangken Esekiel ras kalak si itaban si debanna sanga begina janji e? La mungkin bayangken kalak e maka negrina seri pagi ras Taman Eden ntah pe Pardis si mbarenda iban Jahwe. (Kej. 2:8) Pasti teh kalak e maka si imaksud Jahwe eme negri e pasti subur ras mejile.

³⁵ Enggo nge terjadi janji e gundari? Adi doni enda ikuasai Setan si Iblis denga, siteh maka Pardis e la mungkin terjadi. Tapi siteh janji e maksudna pardis rohani si gundari inanami umat Jahwe. Bas pardis rohani enda, geluhta banci erguna janah banci sipelebe pelayanenta man Jahwe. Emaka tambah warina, tambah jilena pardis rohani e. Tapi lit denga pagi si terjadi bas masa depan. Kai e?

36, 37. Janji kai saja si terjadi pagi bas Pardis?

³⁶ Kenca Harmagedon, terus denga lakoken Jesus tugasna. Ibanna pagi kerina doni mulihi bagi si mbarenda. Bas Pemerentahen Seribu Tahun, sampatina manusia mpekena kerina doni gelah jadi Taman Eden ntah pe Pardis, bagi sura-sura Jahwe si tangtangna. (Luk. 23:43) Paksa si e, kerina kalak nggeluh i bas dame. Ku ja pe kalak e lawes la lit bahaya janah la kalak e mbiar. Cuba bayangken keadanna sanga janji enda terjadi pagi, “Kuban pagi perjanjin dame ras kalak e, Kupelawes pagi binatang buas arah negri e. Emaka aman pagi akap kalak e tading bas taneh mesawang bage pe medem bas kerangen.”​—Esek. 34:25.

 ³⁷ Banci nge bayangkenndu enda? Ku japa pe kam lawes, la kam perlu mbiar. La lit binatang si banci erban kam cilaka. La lit si ngganggu kam janah tenang akapndu. Banci kam erdalan-dalan sisada ku tengah kerangen, meriah kapndu ngenen pemandangen si mejile, banci ka ntabeh kapndu medem i je janah la lit si mbahayaken kam. Emaka sanga kam medak, segar kel akapndu!

38. Uga nge perasanndu sanga bayangkenndu janji si lit bas Esekiel 28:26 terjadi?

³⁸ Banci ka pagi siidah janji enda terjadi, “Aman pagi akap kalak e tading i je. Bangun kalak e rumah janah iban kalak e kebun anggur. Aman pagi akap kalak e sanga Kuhukum kalak si lit i sekelilingna eme kalak si nokohi kalak e. Teh kalak e pagi maka Aku kap Jahwe, Dibata kalak e.” (Esek. 28:26) Kenca kerina musuh Jahwe ikernepken, doni enda dame ras aman. Selain ngurus doni, banci ka sidat keperlunta ras keperlun keluargata. Contohna, banci siban rumah si mejile, sisuan anggur, janah kita ka si ngurussa.

39. Engkai maka banci kam tek maka kerina nubuat Esekiel kerna Pardis pasti pagi terjadi?

³⁹ Sangsi nge kam janji e terjadi pagi? Adi bage perasanndu, ingetlah kai saja si enggo sipelajari sanga “kerina iban mulihi bagi si mbarenda.” Usahaken Setan kel gelah janji e la terjadi. Tapi alu penampat Jahwe, berhasil Jesus erban umat Dibata mulihi nembah Ia alu cara si benar amin pe doni enda lit bas kegelapen secara rohani. Bukti enda erban kita reh tekna, maka kerina janji Jahwe si katakenNa arah Esekiel pasti pagi terjadi!