1, 2. (a) Kai si banci saja erban kalak si itaban e kuatir? (b) Kai si terjadi si la isangka kalak e? (c) Penungkunen kai saja kari sibahas?

ENGGO icontohken Esekiel piga-piga nubuat man kalak si itaban si lit i Babilon. Nubuatna si pertama isina penghukumen, bage ka pe si peduaken, si peteluken, ras si seterusna. (Esek. 3:24-26; 4:1-7; 5:1; 12:3-6) Situhuna, kerina nubuat si icontohkenna isina berita penghukumen man kalak Jahudi.

² Sekalenda, cinder ka mulihi Esekiel i lebe-lebe kalak e gelah banci icontohkenna nubuat si deban. Cuba sibayangken perasan kalak si itaban e, banci saja kuatir kel kalak e, mungkin rukur kalak e, ‘Berita penghukumen kai ka nge kari si ipesehna?’ Tapi la isangka kalak e nubuat Esekiel sekalenda beda kel. Isina labo penghukumen si mberat tapi arapen si luar biasa. (Esek. 37:23) Kai kin beritana e? Kai ertina? Kai pengaruhna man umat Dibata bas jamanta gundari? Mari sipelajari.

3. (a) Kai si igambarken tongkat “man Juda”? (b) Ja nari banci siteh “tongkat Eperaim” nggambarken kerajan sepuluh suku?

³ Suruh Jahwe me Esekiel muat dua tongkat janah itulisna bas tongkat si pertama “man Juda” tapi bas tongkat si peduaken “man Jusup eme tongkat Eperaim.” (Baca Esekiel 37:15, 16.) Kai maksudna? Tongkat “man Juda” nggambarken kerajan dua suku eme Juda ras Benyamin. Duana suku e iperentah raja-raja arah keturunen Juda. Imam-imam pe tading bas daerah kerajan si dua suku e janah ngelayani kalak e bas rumah pertoton i Jerusalem. (2 Kro. 11:13, 14; 34:30) Emaka, si termasuk bas kerajan Juda eme raja-raja arah keturunen Daud bage pe imam-imam Lewi. “Tongkat Eperaim” nggambarken kerajan Israel si sepuluh suku. Ja nari banci siteh? Raja si pertama arah kerajan Israel si sepuluh suku eme Jerobeam arah suku Eperaim. Bas pudi wari, suku Eperaim jadi suku si mbelin kel pengaruhna bas Israel. (Ul. 33:17; 1 Raj. 11:26) Emaka, kerajan Israel si sepuluh suku la termasuk i je raja-raja arah keturunen Daud ntah pe imam-imam Lewi.

4. Sanga pedeher Esekiel duana tongkat e, si e ncidahken kai? (Nen gambar bas awal pasal.)

⁴ Kenca si e, Esekiel isuruh gelah pedeherna duana tongkat e “gelah jadi sada tongkat.” Kalak si itaban e lanai tenang, lalap perdiateken kalak e Esekiel janah ning kalak e, “Jelasken min man kami kai maksudna e.” Ikataken Esekiel maka si icontohkenna e ncidahken kai si nandangi ilakoken Jahwe. Nina Jahwe kerna duana tongkat e, “Kuban pagi kalak e jadi sada tongkat, jadi sada pagi kalak e bas tanKu.”​—Esek. 37:17-19.

5. Kai ertina si icontohken Esekiel e? (Nen ka kotak “Dua Tongkat si Ipersada.”)

⁵ Jelasken Jahwe kai ertina duana tongkat si ipersada e. (Baca Esekiel 37:21, 22.) Kalak si itaban arah kerajan Juda si dua suku bage pe arah kerajan Israel si sepuluh suku (Eperaim), ibaba pagi mulih ku negri Israel janah kalak e jadi “sada bangsa.”​—Jer. 30:1-3; 31:2-9; 33:7.

6. Kai hubungenna dua nubuat si lit bas Esekiel pasal 37?

⁶ Duana nubuat si itulis bas Esekiel pasal 37 lit hubungenna. Dibata labo saja ngasup mpegeluh mulihi (ayat 1-14) tapi ngasup ka Ia mpersada mulihi (ayat 15-28). Duana nubuat enda isina mereken pengapul eme: Si mate banci ipegeluh mulihi janah si merap banci ipersada mulihi.

7. Uga kata-kata si lit bas 1 Kronika 9:2, 3 mbuktiken maka “bas Dibata kai pe banci terjadi”?

⁷ Menurut manusia, kalak si itaban e la mungkin bebas ras ipersada. * “Tapi bas Dibata kai pe banci terjadi.” (Mat. 19:26) Tepati Jahwe janjiNa. Bas tahun 537 SM, bebas me kalak si itaban bas Babilon. Kenca si e, kalak arah kerajan  Juda bage pe arah Israel mulih ku Jerusalem guna ikut nampati gelah Jahwe mulihi isembah alu cara si benar i je. Nina Pustaka, “Piga-piga keturunen Juda, Benyamin, Eperaim, ras keturunen Manase tading i Jerusalem.” (1 Kro. 9:2, 3; Esa. 6:17) Bagi si enggo inubuatken Jahwe, kalak arah kerajan Israel ipersada ras kalak arah kerajan Juda si dua suku.

8. (a) Kai si nubuatken Jesaya? (b) Kai dua hal si penting si banci siteh arah Esekiel 37:21?

⁸ Kira-kira 200 tahun sope si e, enggo inubuatken Nabi Jesaya kai pagi si terjadi man kalak Israel ras kalak Juda si ibebasken. Ernubuat ia maka mulai ipepulung Jahwe “kalak Israel si enggo merap” bage pe “kalak Juda si enggo merap arah empat ujung doni nari” termasuk “arah Assur.” (Jes. 11:12, 13, 16) Bagi si enggo inubuatken Jahwe, ibuatNa “kalak Israel arah tengah bangsa-bangsa.” (Esek. 37:21) Mari siperdiateken dua hal si penting enda: Si pertama, lanai ikataken Jahwe kalak si itaban e “kalak Juda” bage pe “kalak Eperaim,” tapi ikatakenNa kalak e sada bangsa eme “kalak Israel.” Si peduaken, ikataken Jahwe maka kalak e reh labo arah Babilon saja ngenca, tapi arah erbage-bage bangsa eme “arah kerina arah.”

9. Kenca mulih kalak si itaban e, uga Jahwe nampati kalak e gelah ersada?

⁹ Kenca kalak si itaban e mulih ku Israel, uga Jahwe nampati kalak e gelah ersada? BereNa man kalak e permakan-permakan si mehuli bagi Serubabel, Imam si Mbelin Josua, Esra, ras Nehemia. Janah pilihNa ka nabi-nabi bagi Hagai, Sakaria,  ras Maleaki. Dilaki-dilaki si erkiniteken enda, usahakenna kel gelah bangsa e ndalanken petunjuk Dibata. (Neh. 8:2, 3) Jahwe pe lindungiNa umatNa. Uga carana? GagalkenNa rencana jahat musuh kalak e.​—Est. 9:24, 25; Sak. 4:6.

10. Kai si berhasil ilakoken Setan?

¹⁰ Perban keleng ate Jahwe man kalak Israel, enggo melala si lakokenNa guna nampati kalak e. Tapi teremen arah kalak e lanai nembah Jahwe alu cara si benar. Perbahanen kalak e itulis bas Pustaka si Badia, si itulis kenca kalak e ibebasken. (Esa. 9:1-3; Neh. 13:1, 2, 15) Lenga seh seratus tahun pe kenca kalak e mulih, enggo ndauh kel kalak e nilah arah Jahwe, emaka mindo kel Jahwe man kalak e, nina, “Mulihlah man bangKu.” (Mal. 3:7) Bas jaman Jesus, agama Jahudi enggo terbagi jadi piga-piga sekte si ipinpin permakan-permakan si la setia. (Mat. 16:6; Mrk. 7:5-8) Berhasil Setan erban umat Jahwe lanai ersada. Amin pe bage, nubuat Jahwe kerna persadan pasti terjadi. Uga carana?

11. (a) Kai si kataken Jahwe kerna persadan umatNa? (b) Kai si lalap usahaken Setan kenca ia ipelawes arah surga?

¹¹ Baca Esekiel 37:24. Ikataken Jahwe maka nubuat kerna umatNa si ersada banci tuhu-tuhu terjadi kenca Jesus si ikatakenNa “pelayanKu Daud” jadi Raja bas tahun 1914. * (2 Sam. 7:16; Luk. 1:32) Sanga si e, Israel jasmani enggo igantiken Israel rohani, eme kalak si ipilih ku surga. (Jer. 31:33; Gal. 3:29) Lalap usahaken Setan erban umat Dibata lanai ersada, khususna kenca ia ipelawes arah surga nari. (Ket. 12:7-10) Contohna, kenca mate Russell bas tahun 1916, gunaken Setan kalak murtad erban kalak si ipilih ku surga e lanai ersada. Tapi la ndekah kenca si e, kalak si murtad e dungna ndarat arah organisasi. Sanga si e, sempat berhasil Setan erban kalak si minpin organisasi ipenjaraken, tapi e la erban ceda persadan umat Dibata. Kalak si ipilih ku surga si tetap setia man Jahwe lalap ersada.

12. Engkai maka Setan la berhasil ncedai persadan Israel rohani?

¹² La bagi Israel jasmani, Israel rohani tetap ersada amin pe usahaken Setan ncedai persadan kalak e. Engkai maka Setan la berhasil? Perban kalak si ipilih ku surga e iusahakenna kel ngikutken patoken Jahwe. Hasilna, kalak e ilindungi Raja kalak e eme Jesus Kristus si terus naluken Setan.​—Ket. 6:2.

13. Kai pelajaren si penting si banci sidat arah nubuat kerna dua tongkat si ipersada?

¹³ Kai pengaruh nubuat kerna dua tongkat si ipersada e man umat Dibata bas jamanta? Perlu siinget, nubuat e ibereken guna nggambarken uga dua kelompok si dungna ipersada. Si  mpersadasa eme Jahwe. Emaka, kai pelajaren penting si banci sidat arah nubuat e? Intina, Jahwe me si erban umatNa “jadi sada.”​—Esek. 37:19.

14. Mulai tahun 1919, uga nubuat kerna tongkat si ipersada e terjadi ka sekali nari janah pengaruhna ndauh belinen?

¹⁴ Bas tahun 1919, umat Dibata imurniken janah masuk kalak e ku pardis rohani. Mulai paksa si e, nubuat kerna tongkat si ipersada, terjadi ka sekali nari janah belinen pengaruhna. Paksa si e, teremen kalak si ipersada e eme kalak si arapenna ku surga, si arapenna jadi raja ras imam bas surga. (Ket. 20:6) Kalak e bali bagi tongkat “man Juda” eme bangsa si i je raja-raja arah keturunen Daud ras imam-imam Lewi. Tapi bas pudi wari, reh teremna kalak si arapenna nggeluh i doni ersada ras kalak e. Kalak e bali bagi “tongkat Eperaim,” eme bangsa si la lit i je raja-raja ras imam-imam. Duana kelompok e ersada jadi umat Jahwe janah ikutken kalak e Rajana eme Jesus Kristus, ia ngenca Raja kalak e.​—Esek. 37:24.

15. Uga nubuat si lit bas Esekiel 37:26, 27 terjadi bas jamanta?

¹⁵ Nubuat Esekiel pe ncidahken maka enterem kalak tersuruh ukurna nembah Jahwe alu cara si benar radu ras kalak si ipilih ku surga. Nina Jahwe kerna umatNa, “Kuban pagi kalak e reh teremna” janah “KemahKu lit i tengah-tengah kalak e.” (Esek. 37:26, 27) Kata-kata e mirip ras kai si kataken Rasul Johanes kira-kira 700 tahun kenca jaman Esekiel. Nina Johanes, “Ia si kundul i tahta e kimbangkenNa kemahNa” guna ngelindungi “sada kelompok jelma si enterem.” (Ket. 7:9, 15) Bas jamanta gundari, umat Dibata eme kalak si ipilih ku surga bage pe kelompok jelma si enterem jadi sada bangsa si erlindung i teruh kemah Dibata.

16. Kai si inubuatken Sakaria kerna persadan kalak si ipilih ku surga ras kalak si arapenna nggeluh i doni?

¹⁶ Persadan enda pe inubuatken Sakaria. Ia salah sada tabanen si ikut mulih. Inubuatkenna maka “sepuluh dilaki arah kerina bangsa, nteguh pagi tagangina jubah sekalak Jahudi” janah nina, “Ikut ate kami ras kena, sebap begi kami Dibata kap ras kena.” (Sak. 8:23) “Sekalak Jahudi” bas ayat enda ikataken ka “kena,” emaka si imaksud labo sekalak Jahudi jasmani tapi sada kelompok kalak Jahudi rohani eme kalak si ipilih ku surga si nggeluh denga i doni. (Rom. 2:28, 29) “Sepuluh dilaki” e nggambarken kalak si arapenna nggeluh i doni. Kalak enda me si ‘nteguh tagangina’ kalak si ipilih ku surga janah ‘ikut ate kalak e ras.’ (Jes. 2:2, 3; Mat. 25:40) Enda ncidahken maka duana kelompok e tuhu-tuhu ersada.

17. Uga Jesus nggambarken persadanta?

¹⁷ Sanga kataken Jesus maka ia sekalak permakan, banci saja sangana ukurina nubuat Esekiel kerna persadan enda. Tegu-tegu Jesus biri-birina (kalak si ipilih ku surga) bage pe  ‘biri-birina si deban’ (kalak si arapenna nggeluh i doni) gelah jadi “sada rarasen.” (Joh. 10:16; Esek. 34:23; 37:24, 25) Kata-kata Jesus ras nabi-nabi cocok kel nggambarken persadanta si luar biasa, la soal arapenta nggeluh i surga ntah pe i doni. Tapi agama palsu la ersada, terbagi-bagi kalak e jadi melala kelompok, la terkira buena, tapi kita tetap ersada. Enda tuhu-tuhu sada mukjizat!

18. Bagi si itulis bas Esekiel 37:28, engkai maka umat Dibata la banci “jadi bagin doni enda”?

¹⁸ Kata-kata si terakhir arah nubuat Esekiel enda mbuktiken maka persadanta tetap pagi ertahan rasa lalap. (Baca Esekiel 37:28.) Umat Jahwe ersada perban inganNa si badia lit “i tengah-tengah kalak e” ntah pe perban sembah kalak e Dibata alu cara si benar. Ingan e banci tetap lit i tengah-tengah kalak e, adi tetap kalak e badia ntah pe terpisah arah doni si ikuasai Setan enda nari. (1 Kor. 6:11; Ket. 7:14) Jesus pe jelaskenna uga pentingna gelah ula jadi bagin doni enda. Bas berngi terakhir sope ia ibunuh, ertoto ia, nina, “O Bapak si badia, jagalah kalak e . . . gelah ersada kalak e . . . Kalak e labo bagin doni enda . . . Pebadialah kalak e alu kebenaren.” (Joh. 17:11, 16, 17) Jadi, hubungken Jesus kata “ersada” ras uga pentingna tetap ‘la jadi bagin doni enda.’

19. (a) Uga carata ‘ngusih Dibata’? (b) Bas berngi terakhir sope Jesus mate, kai si katakenna kerna persadan?

 ¹⁹ Bas Pustaka, bas toto e ngenca Jesus ngelebuh Dibata “Bapak si badia.” Jahwe tuhu-tuhu badia ras bersih. Perentahken Jahwe bangsa Israel nina, “Kena arus badia sebap Aku pe badia.” (Im. 11:45) Perban ‘siusih ateta Dibata,’ siusahaken matuhi perentah e i bas kerina perbahanenta. (Ep. 5:1; 1 Pet. 1:14, 15) Adi kata “badia” ipake man manusia, ertina “ikhususken” ntah pe “ipisahken.” Perban si e me bas berngi terakhir sope Jesus mate, ikatakenna maka murid-muridna banci tetap ersada adi tetap kalak e terpisah arah doni enda, janah la ikutken kalak e sipat-sipat si lit bas doni enda si la nggit ersada.

20, 21. (a) Kai si erbanca kita reh tekna maka lindungi Jahwe kita? (b) Kai tekadndu?

²⁰ Persadan Saksi-Saksi Jahwe i belang-belang doni, mbuktiken maka begiken Jahwe toto Jesus guna ‘njaga kalak e arah si jahat nari.’ (Baca Johanes 17:14, 15.) Jelas me, Setan la berhasil ncedai persadan umat Dibata. Enda erban kita reh tekna maka kita ilindungi Dibata. Bas nubuat Esekiel, ikataken Jahwe maka duana tongkat e jadi sada bas tanNa. Jadi, si erban umat Jahwe ersada ras si ngelindungi kalak e arah serangen Setan eme tan Jahwe.

²¹ Kai arusna tekadta? Terus ateta ikut erban umat Dibata tetap ersada. Kai si arus silakoken? Terus sisembah Jahwe alu cara si benar bas rumah pertoton rohaniNa. Kai maksudna e? Sibahas kari kerna si e bas pasal-pasal seterusna.