1-3. Kai si erban Esekiel sedih? Kai si isuruh Jahwe gelah itulis Esekiel?

PAKSA si e eme tahun peenemken Esekiel itaban. * Ia itaban bas negri si dauhna ratusen kilometer arah kutana eme Juda. Sedih kel akapna ngukuri keadan pemerentahen i Juda. Kitik-kitik nari enggo idahna uga raja-raja si merentah i Juda rusur ganti-ganti.

² Sanga Esekiel lahir, Raja Josia enggo cukup ndekah merentah. Pasti meriah ukur Esekiel perban hancurken Josia berhala-berhala gelah kalak Juda banci mulihi nembah Jahwe alu cara si benar. (2 Kro. 34:1-8) Tapi usaha Josia la ndekah tahan, perban buen raja si merentah kenca ia dungna nembah berhala ka. Akibatna, rakyat nilah arah dalan si benar janah perbahanenna pe erban ciga ate. Lit nge arapen man kalak e? Lit!

³ Suruh Jahwe nabiNa si setia e guna nulis piga-piga nubuat si mereken arapen. Nubuat si pertama eme kerna Mesias si jadi Penguasa ras Permakan, urusna pagi biri-biri Jahwe alu lembut janah banna kerina kalak nembah Jahwe saja seh rasa lalap.  Mari sipelajari empat nubuat kerna Mesias si itulis Esekiel, perban isina lit ka pengaruhna ku masa depanta.

4. Kai si nubuatken Esekiel, tapi sope si e kai si isuruh Jahwe gelah lakokenna?

⁴ Kira-kira tahun 612 SM, ‘ngerana Jahwe’ man Esekiel. Emaka ernubuat me Esekiel kerna pemerentahen Mesias janah uga pentingna ngandalken Kerajanna. Tapi sope si e, suruh Jahwe me Esekiel nceritaken sada teka-teki si isina nubuat kerna penguasa-penguasa Juda si la setia. Teka-teki enda pe ncidahken engkai maka perlu lit Mesias, Penguasa si merentah alu cara si benar.​—Esek. 17:1, 2.

5. Ceritaken teka-teki si kataken Esekiel.

⁵ Baca Esekiel 17:3-10. Teka-tekina eme: Lit “perik kuliki si galang” si menggelken pucuk kayu aras si arah datasna kel janah tamana ku “kota kalak si erdagang.” Kenca si e, buat perik kuliki e piga-piga “benih arah negri e” janah suanna bas juma si subur “si melala launa.” Benih e pe ertunas janah turah jadi “batang anggur si njoler.” Kenca si e, sanga reh “kuliki si galang” si sada nari, batang anggur e pe “semangat njolerken uratna ku arah perik e.” Merhat batang anggur e gelah pindahken perik kuliki e ia ku ingan si deban si melala ka launa. Merawa Jahwe ngidah kai si ilakoken batang anggur e. KatakenNa maka cabutNa pagi batang anggur e seh ku uratna janah “kerah” me ia dungna.

6. Jelasken erti teka-teki e.

⁶ Kai ertina teka-teki e? (Baca Esekiel 17:11-15.) Bas tahun 617 SM, Nebukadnesar raja Babilon (“kuliki si galang” si pertama) kepungna Jerusalem. Penusurna Raja Joyakin (“pucuk si arah datasna kel”) arah tahtana janah babana ku Babilon (“kota kalak si erdagang”). Kenca si e, angkat Nebukadnesar me Sedekia (salah sada “benih arah negri e”) eme keturunen raja guna jadi raja Juda i Jerusalem. Enggo ersumpah Sedekia bas gelar Dibata maka setia ia man Raja Nebukadnesar. (2 Kro. 36:13) Tapi la tepati Sedekia sumpahna. Mberontak ia man Babilon janah pindona penampat man Paro i Mesir (“kuliki si galang” si sada nari). Tapi si lakoken Sedekia e sia-sia. La senang Jahwe perban Sedekia la setia janah langgarna sumpahna. (Esek. 17:16-21) Dungna, Sedekia ipenusur arah tahtana, ipenjaraken i Babilon janah mate ia i je.​—Jer. 52:6-11.

7. Kai si banci sipelajari arah teka-teki e?

⁷ Kai si banci sipelajari arah teka-teki e? Pelajaren si pertama, perban kita nembah Jahwe, perbahanenta arus sesuai ras rananta. Nina Jesus, “Adi kataken kena ‘Ue,’ arus ertina ue, janah adi ‘Lang,’ ertina lang.” (Mat. 5:37) Adi perlu kita ersumpah i lebe-lebe Dibata guna ngataken kai si tuhu, contohna  sanga ersaksi kita i pengadilen, arus serius siakap sumpah e. Pelajaren si peduaken, arus kita hati-hati man ise kita tek. Persingeti Pustaka kita, nina, “Ula tek man peminpin-peminpin ntah man manusia, si la banci nelamatken.”​—Ms. 146:3.

8-10. Uga Jahwe nggambarken Mesias si jadi Raja pagi? Uga nubuat e terjadi? (Nen ka kotak “Nubuat kerna Mesias—Batang Kayu Aras si Galang si Seh Kel Jilena.”)

⁸ Situhuna, lit sada penguasa situhu-tuhu banci siteki ras siandalken. Kenca bereken Jahwe teka-teki kerna pucuk si ipindahken ndai, teruskenNa ka teka-teki e guna nggambarken Mesias si nandangi merentah.

⁹ Kai isina nubuat e? (Baca Esekiel 17:22-24.) Sekalenda, si menggelken pucuk kayu e labo kuliki si galang, tapi Jahwe. PenggelkenNa pagi ‘pucuk batang kayu aras si meganjang e, jenari suanNa i datas gunung si meganjang kel.’ Pucuk e jadi “batang kayu aras si galang si seh kel jilena” janah “erbage-bage perik” tading i je guna erlindung bas dahan-dahanna. Kenca si e, “kerina batang kayu si erbuah” meteh maka Jahwe si erban pucuk e jadi batang kayu aras si galang si seh kel jilena.

¹⁰ Uga nubuat e terjadi? Tempa-tempa penggelken Jahwe me Jesus Kristus, AnakNa, arah garis keturunen Raja Daud (“batang kayu aras si meganjang”) janah suanNa i Gunung Sion i surga (“gunung si meganjang kel”). (Ms. 2:6; Jer. 23:5; Ket. 14:1) Emaka peganjang Jahwe me Jesus si ianggap musuhna “kalak si rendahna kel,” janah bere Jahwe man bana “tahta Daud bapakna.” (Dan. 4:17; Luk. 1:32, 33) Bali bagi batang kayu aras si galang janah seh kel jilena, Jesus Kristus selaku Raja Mesias merentah pagi arah surga nari nandangi kerina doni, janah pasu-pasuna kerina rakyatna. Ia me Penguasa si banci siandalken. Bas pemerentahen Kerajan Mesias, kalak si nggit patuh “aman pagi akapna nggeluh janah la ia mbiar bencana.”​—Kua. 1:33.

11. Pelajaren penting kai si banci sidat arah nubuat kerna ‘pucuk si nguda denga’ bage pe arah “batang kayu aras si galang si seh kel jilena”?

¹¹ Kai si banci sipelajari arah nubuat e? Kenca sibahas nubuat kerna “pucuk si nguda denga” si jadi “batang kayu aras si galang si seh kel jilena” enda, pasti banci sijawap penungkunen si penting enda: Ise si banci siandalken? Bodoh kel kita adi siandalken pemerentahen manusia ntah pe gegeh tenterana. Tapi pentar kel kita adi tuhu-tuhu siandalken Jesus Kristus, Raja Mesias e. Sada ngenca arapen situhu-tuhu man manusia eme pemerentahenna si lit i surga.​—Ket. 11:15.

12. Uga Jahwe mbuktiken maka ingetNa denga perjanjinNa ras Daud?

¹² Arah penjelasen Dibata kerna teka-teki e, angkai Esekiel maka Sedekia me raja si ipenusur pagi arah tahtana janah itaban ku Babilon. Sedekia si la setia e keturunen Daud. Banci saja rukur nabi e, ‘La kin enggo erjanji Dibata man Daud maka  lit pagi keturunenna si jadi raja seh rasa lalap?’ (2 Sam. 7:12, 16) Bicara bage pe Esekiel rukur, la ndekah kenca si e datna jawapenna, eme sanga ‘reh ka kata Jahwe man bana’ kira-kira tahun 611 SM. (Esek. 20:2) Paksa si e, Esekiel enggo itaban hampir pitu tahun dekahna, janah Sedekia merentah denga i Juda. Suruh Jahwe ka Esekiel mpeseh nubuat si deban kerna Mesias si mbuktiken maka inget Dibata denga perjanjinNa ras Daud. Nubuat e ncidahken maka Mesias me si lit hakna si sah guna merentah, sebap ia keturunen Daud.

13, 14. (a) Ceritaken nubuat si lit bas Esekiel 21:25-27. (b) Uga nubuat e terjadi?

¹³ Kai isina nubuat e? (Baca Esekiel 21:25-27.) Arah Esekiel, terus terang Jahwe ngerana man ‘peminpin Israel si jahat’ si kentisik nari ihukum. Ikataken Jahwe maka ‘penutup takal’ ras ‘mahkota’ peminpin e (maksudna kerajanna) ibuat pagi arah ia. Kenca si e, penguasa-penguasa “si meteruk” ipeganjang pagi, tapi “si meganjang” ipeteruk pagi. Penguasa-penguasa si ipeganjang e terus pagi merentah, tapi merentah ia seh ngasa “reh kalak si lit hakna si sah.” Dung e, bereken Jahwe Kerajan e man bana.

 ¹⁴ Uga nubuat e terjadi? Sanga Jerusalem ikernepken tahun 607 SM, kerajan Juda “si meganjang” si lit i Jerusalem ipeteruk. Hancurken Babilon kota e, Raja Sedekia ipenusur arah tahtana janah itaban ia. Mulai je nari, lanai lit keturunen Daud si jadi raja bas Jerusalem. Emaka, penguasa “si meteruk” arah bangsa-bangsa si deban ipeganjang ntah pe erkuasa bas doni, tapi kentisik ngenca. “Waktu si itetapken man bangsa-bangsa” e dung bas tahun 1914, sanga Jesus Kristus ilantik Jahwe jadi Raja. (Luk. 21:24) Perban Jesus keturunen Raja Daud, “lit hakna si sah” guna merentah bas Kerajan Mesias. * (Kej. 49:10) Sanga Jahwe ngelantik Jesus, tepati Jahwe janjiNa man Daud maka lit pagi keturunenna jadi raja seh rasa lalap.​—Luk. 1:32, 33.

15. Engkai maka banci kita tek kel man Raja Jesus Kristus?

¹⁵ Kai si banci sipelajari arah nubuat e? Banci kita tek kel man Raja Jesus Kristus. Engkai? Penguasa bas doni enda banci erkuasa perban ipilih manusia ntah pe perban geserna keduduken penguasa si sebelumna. Tapi Jesus ipilih Jahwe janah ‘ibereken man bana kerajan’ si memang enggo  jadi hakna. (Dan. 7:13, 14) Pastilah Raja si ipilih Jahwe banci iteki!

16. Uga perasan Jahwe ngidah biri-biriNa? Tapi bas jaman Esekiel, uga perbahanen “permakan-permakan Israel” man biri-biriNa?

¹⁶ Jahwe kap Permakan Si Mulia, ermediate kel Ia man biri-biriNa, eme kalak si nembah Ia si lit i doni. (Ms. 100:3) BerekenNa tanggung jawap man permakan-permakan si lit i doni guna ngurus biri-biriNa e. Tapi, tetap perdiatekenNa uga perbahanen permakan e man biri-biriNa. Emaka, cuba bayangken uga perasan Jahwe ngidah “permakan-permakan Israel” bas jaman Esekiel. Kalak e la meteh mela, sanga kalak e merentah, “kejam ras kasar” perbahanenna. Perban si e, susah akap biri-biri e, janah dungna melala si lanai nembah Jahwe.​—Esek. 34:1-6.

17. Uga cara Jahwe nelamatken biri-biriNa?

¹⁷ Kai pagi si ilakoken Jahwe? Kerna peminpin-peminpin Israel si kejam e katakenNa, “Kupindo pertanggung jawapen kalak e, ” kenca si e erjanji Ia, nina, “Kuselamatken pagi biri-biriKu.” (Esek. 34:10, ctt.) Jahwe lalap tepatiNa janjiNa. (Jos. 21:45) Bas tahun 607 SM, selamatkenNa biri-biriNa alu nggunaken pasuken Babilon gelah permakan-permakan si mentingken bana e lanai merentah. Janah 70 tahun kenca si e, selamatkenNa umatNa arah Babilon, jenari babaNa kalak e mulih ku kutana gelah banci kalak e mulihi nembah Jahwe i je. Tapi umatNa e tetap denga lit i bas bahaya. Ratusen tahun dekahna, lalap kalak e ikuasai pemerentah doni enda seh “ngayak dung waktu si itetapken man bangsa-bangsa.”​—Luk. 21:24.

18, 19. Nubuat kai si ikataken Esekiel bas tahun 606 SM? (Nen gambar bas awal pasal.)

¹⁸ Bas tahun 606 SM, kira-kira sada tahun kenca Jerusalem ikernepken, janah puluhen tahun sope Israel ibebasken arah Babilon, Esekiel enggo isuruh Jahwe ernubuat kerna uga pagi Mesias si erkuasa e mpermakani biri-biri Jahwe. Nubuat enda mbuktiken maka Jahwe selaku Permakan Si Mulia ermediate kel man biri-biriNa janah ateNa gelah sikap pergeluh biri-biriNa e seh rasa lalap.

¹⁹ Kai isina nubuat e? (Baca Esekiel 34:22-24.) Pilih Dibata pagi “sekalak permakan” si ikatakenNa “pelayanKu Daud.” Istilah si ipake eme “sekalak permakan” ras “pelayan” labo ‘pelayan-pelayan.’ E maksudna Penguasa si ijanjiken enda labo pajekkenna mulihi kerajan raja-raja keturunen Daud, tapi ia ngenca si jadi ahli waris tahta Daud si la tergantiken. Perban ia Permakan ras Penguasa, berekenna pagi pangan man biri-biri Dibata janah ia jadi “peminpin kalak e.” Jahwe pe banNa “perjanjin dame” ras biri-biriNa. Janah “reh pagi pasu-pasu [man kalak e] bali bagi udan.” Tenang pagi akap kalak e nggeluh,  makmur, ras ermeriah ukur. Labo ras manusia saja ngenca kalak e erdame, tapi ras binatang pe kalak e erdame.​—Esek. 34:25-28.

20, 21. (a) Uga nubuat kerna “pelayanKu Daud” terjadi? (b) Uga kata-kata Esekiel kerna “perjanjin dame” terjadi bas masa depan?

²⁰ Uga nubuat e terjadi? Ikataken Dibata maka Penguasa e “pelayanKu Daud,” situhuna Ia sangana ernubuat kerna Jesus, keturunen Daud si lit hakna si sah guna merentah. (Ms. 89:35, 36) Sanga i doni, Jesus terbukti jadi “permakan si mehuli” si ‘mereken geluhna man biri-birina.’ (Joh. 10:14, 15) Janah gundari, kenca ia i surga pe, tetap ia jadi Permakan kalak e. (Heb. 13:20) Bas tahun 1914, Dibata ngelantik Jesus jadi Raja janah suruhNa ia guna mpermakani ras mere pangan man biri-biri Dibata si lit i doni. La ndekah kenca si e, bas tahun 1919, Raja si mbaru denga ipilih enda ngelantik “budak si setia ras pentar” guna mere pangan man “pelayan-pelayan rumahna.” Pelayan-pelayan rumah eme kerina umat Dibata si setia si arapenna nggeluh i surga ntah pe i doni. (Mat. 24:45-47) Budak si setia enda ngikutken petunjuk Kristus janah terus sikapkenna pangan rohani si simpar man biri-biri Dibata. Hasilna, pangan rohani e nampati biri-biri Dibata gelah banci tetap erdame sada ras si debanna bage pe ras Dibata. Enda me si ikataken pardis rohani janah pardis rohani e lalap reh jilena.

²¹ Uga kata-kata Esekiel kerna “perjanjin dame” bage pe pasu-pasu si simpar terjadi bas masa depan? Bas doni si mbaru pagi, umat Jahwe si lit i doni si nembah Ia saja, tuhu-tuhu nggejapken manpaat arah “perjanjin dame” e. Sanga kerina doni jadi pardis, umat Dibata si setia lanai pagi mbiar perban perang, kejahaten, kelihen, penakit, ntah pe perban binatang buas. (Jes. 11:6-9; 35:5, 6; 65:21-23) Bas doni si mbaru, “aman pagi” akap biri-biri Dibata tading i je, “la lit si erban kalak e mbiar.” La kin meriah ukurndu perban lit arapenndu guna nggeluh rasa lalap bas doni si bage?​—Esek. 34:28.

22. Uga perasan Jesus man biri-biri Dibata? Uga permakan-permakan si lit i doni banci ngusih Jesus?

²² Kai si banci sipelajari arah nubuat e? Bali bagi Bapakna, Jesus pe ermediate kel man biri-biri Dibata. Perban Jesus Raja bage pe Permakan, pastikenna gelah biri-biri e la kurang pangan rohani janah gejapken kalak e kedamen bage pe keamanen bas pardis rohani. Pasti tenang siakap lit Penguasata si bage! Permakan-permakan si lit i doni pe eme pertua-pertua, perlu usihna sipat Jesus si ermediate e. Arus permakani kalak e rarasen “alu ukur meriah” janah “alu semangat,” kalak e pe arus jadi usihen. (1 Pet. 5:2, 3) Pasti la nggit pertua-pertua kasar man biri-biri Jahwe. Ingetlah kata-kata Jahwe kerna permakan-permakan si kejam bas jaman Esekiel, nina, “Kupindo pertanggung jawapen kalak e.” (Esek. 34:10, ctt.) Permakanta  Si Muliana bage pe AnakNa mperdiateken uga perbahanen pertua-pertua man biri-biriNa.

23. Kai si janjiken Jahwe kerna bangsa Israel? Uga Ia nepati janjiNa e?

²³ Ate Jahwe gelah umatNa ersada nembah Ia. Bas salah sada nubuat Esekiel, erjanji Dibata guna mpepulung umatNa. Lit si ipepulungNa arah kerajan dua suku i Juda janah lit ka arah kerajan sepuluh suku i Israel guna jadi “sada bangsa,” tempa-tempa ibuat Dibata ‘dua tongkat’ janah ipersadaNa “jadi sada” bas tanNa. (Esek. 37:15-23) Nubuat e terjadi bas tahun 537 SM, sanga bangsa Israel si enggo ipersada isuruh mulih ku Negri si Ijanjiken. * Tapi persadan e jadi contoh saja ngenca, sebap bas masa depan terjadi ka pagi persadan si terbelinen janah ertahan seh rasa lalap. Kenca erjanji Jahwe guna mpersada Israel, bereNa ka nubuat man Esekiel kerna uga Penguasa si ijanjiken e erban kalak si nembah Dibata i belang-belang doni ersada seh rasa lalap.

24. (a) Kai saja gelar si bereken Jahwe man Mesias? (b) Uga pagi pemerentahen Raja e?

²⁴ Kai isina nubuat e? (Baca Esekiel 37:24-28.) Mulihi ka gelari Jahwe Mesias e “pelayanKu Daud,” ‘sada permakan,’ ras  “peminpin.” Kenca si e, ban Jahwe ka gelar si deban man bana eme “raja.” (Esek. 37:22) Uga kin pemerentahen Raja e? Merentah pagi ia seh rasa lalap. Kata “seh rasa lalap” mbuktiken maka pasu-pasu arah pemerentahenna e lalap pagi lit. * Pemerentahenna erban persadan. I teruh pemerentahen “sada raja” e, rakyatna si setia matuhi ‘undang-undang’ si seri janah tading kalak e ras-ras. Reh rembakna pagi rakyatna e ras Dibata Jahwe. Ban Jahwe pagi “perjanjin dame” ras kalak e. Jahwe jadi Dibata kalak e janah kalak e jadi umatNa. Selain si e, ingan si badia Dibata pe lit pagi “i tengah-tengah kalak e seh rasa lalap.”

25. Uga nubuat kerna Raja Mesias terjadi?

²⁵ Uga nubuat e terjadi? Bas tahun 1919, kalak si ipilih ku surga ipersada. Si mpersada kalak e ‘sada permakan’ eme Jesus Kristus, Mesias si jadi Raja. Bas pudi wari, “kelompok jelma si enterem” arah “kerina bangsa, suku, umat, ras bahasa,” ersada ras kalak si ipilih ku surga ndai. (Ket. 7:9) Kerina kalak e jadi “sada rarasen” janah “sada permakanna.” (Joh. 10:16) La soal arapen kalak e guna nggeluh i surga ntah pe i doni, kerinana matuhi undang-undang Jahwe. Hasilna, tading kalak e ras-ras bas pardis rohani janah gejapken kalak e perkade-kaden  sebelang doni. Bereken Jahwe kedamen man kalak e. InganNa si badia lit i tengah-tengah kalak e. Ingan e maksudna cara si benar i bas nembah Jahwe. Jahwe jadi Dibata kalak e, janah kalak e bangga jadi umatNa, gundari nari seh rasa lalap!

26. Kai si banci lakokenndu gelah ikut kam mpepaguh persadan bas pardis rohani?

²⁶ Kai si banci sipelajari arah nubuat e? Sada kehamaten siakap perban banci ikut ipersada bas perkade-kaden sebelang doni guna nembah Jahwe. Tapi, lit ka tanggung jawapta guna mpepaguh persadan enda. Kerina kita arus tetap tek man ajaren si seri janah arus kita kompak. (1 Kor. 1:10) Perban si e, meriah siakap man pangan rohani si seri, ngikutken patoken si seri kerna lagu langkah si lit bas Pustaka, bage pe ndalanken tugas si seri eme mberitaken Kerajan Dibata janah erban murid, tugas e penting kel siakap. Amin pe bage, kunci persadanta eme kekelengen. Adi terus sipebelin kekelengenta, contohna sepenggejapen kita, perkuah ate, janah nggit ngampuni, banci sipepaguh persadanta. Nina Pustaka, “Kekelengen kap si mpersadaken kerina alu sempurna.”​—Kol. 3:12-14; 1 Kor. 13:4-7.

27. (a) Uga perasanndu nandangi nubuat-nubuat kerna Mesias si lit bas buku Esekiel? (b) Kai kari sibahas bas pasal-pasal seterusna?

²⁷ Pasti ngata bujur kel kita perban siteh nubuat-nubuat kerna Mesias arah buku Esekiel! Adi sibaca ras siukuri alu mbages kerna si e, sadar kita maka Raja si keleng ateta eme Jesus Kristus, banci siandalken, lit hakna guna merentah, permakanina kita alu lembut, janah banna kita ersada seh rasa lalap. Tuhu-tuhu sada kehamaten jadi rakyatna. Perlu siinget, nubuat-nubuat kerna Mesias enda eme bagin si penting kerna janji Dibata maka lit pagi masana kerina kalak nembah Dibata saja. Arah Jesus, pepulung Jahwe umatNa janah banNa kalak e kerina mulihi nembah Ia saja. (Esek. 20:41) Bas pasal-pasal seterusna, sipelajari kari uga bagin si penting enda ibahas bas buku Esekiel.