1-3. Kai si erbanca berubah perukuren kalak Jahudi si lit bas Babilon? (Nen gambar bas awal pasal.)

KIRA-KIRA lima tahun dekahna enggo cubaken Esekiel kerina cara gelah kalak Jahudi si lit i Babilon tek maka ipediat Jahwe pagi Jerusalem ikernepken. Enggo ka peseh nabi enda berita, ipakena perumpaman, janah enggo ka icontohkenna i lebe-lebe kalak e kai pagi si terjadi. Tapi lalap kalak e la tek, enggo pe begina kota Jerusalem ikepung pasuken Babilon, tek denga kalak e pendudukna banci selamat. Tapi dungna, lanai bage perukuren kalak e.

² Dua tahun kenca kota e mulai ikepung, lit sekalak si kiam arah Jerusalem ku Babilon, nina, “Kota e enggo italuken!” Sengget kel kalak si itaban e megisa janah getem pusuhna. Sebap kota kalak e, rumah pertoton si badia, bage pe kuta kemulihen kalak e enggo ikernepken. Bene me arapen kalak e si lit sedekah enda.​—Esek. 21:7; 33:21.

³ Paksa si e, sanga sedih denga akap kalak e, dat Esekiel sada pengenehenen si luar biasa kerna arapen. Kai arapen  si ibereken man kalak si itaban e? Kai pengaruhna man umat Dibata bas jamanta gundari, janah kai gunana man banta sekalak-sekalak? Mari sibahas pengenehenen si ibereken Jahwe enda.

4. Bas pengenehenen Esekiel lit dua si menarik akapna, kai e?

⁴ Baca Esekiel 37:1-10. Bas pengenehenen enda, Esekiel sangana bas lembah si dem i je tulan-tulan. Gelah reh jelasna akap Esekiel, suruh Jahwe ia “engkelilingi” ingan tulan-tulan e amparen. Lit dua si menarik akap Esekiel, eme jumlah tulan-tulan e ras keadan tulan-tulan e. Nina, ‘Melala kel kuidah tulan-tulan janah kerah kel kerina.’

5. Kai dua perentah si bereken Jahwe man Esekiel? Kai si terjadi kenca lakoken Esekiel perentah e?

⁵ Kenca si e, bereken Jahwe dua perentah man Esekiel gelah tulan-tulan e alu manjar-anjar nggeluh mulihi. Pertama, Esekiel arus ‘ernubuat kerna tulan-tulan e’ gelah tulan-tulan e banci ‘nggeluh mulihi.’ (Esek. 37:4-6) Kenca ia ernubuat, “mis terbegi sora erderak-derak janah tulan-tulan e mulai ersada,” jenari mulai “reh urat-urat ras daging” bas tulan-tulan e janah “mulai itutupi kulit.” (Esek. 37:7, 8) Si peduaken, Esekiel isuruh ‘ernubuat man angin.’ Suruhna angin gelah “rembus” ku tulan-tulan si enggo lit dagingna ndai. Kenca ernubuat Esekiel, “rembus angin ku kalak e, nggeluh kalak e kerina jenari tedis ia kerina. Kalak e bagi pasuken si seh kel teremna.”​—Esek. 37:9, 10.

6. Kai si kataken Jahwe gelah angkai Esekiel pengenehenen e?

⁶ Gelah angkai Esekiel pengenehenen e, nina Jahwe, “Tulan-tulan enda eme kerina kalak Israel.” Kenca begi kalak si itaban e maka Jerusalem enggo ikernepken, latih kel ukur kalak e tempa-tempa mate kapna nanamna. Ngandung kalak e nina, “Tulan-tulan kami enggo kerah, lanai lit arapen kami. Kami enggo ipeserap.” (Esek. 37:11; Jer. 34:20) Emaka, ijelasken Jahwe pengenehenen si ngeri e man Esekiel, sebap situhuna isina mereken arapen man kalak Israel.

7. Kai si kataken Jahwe bas Esekiel 37:12-14? Uga Jahwe nampati umatNa gelah tek man janjiNa?

⁷ Baca Esekiel 37:12-14. Arah pengenehenen enda sampati Jahwe kalak si itaban gelah tek maka nggeluh pagi kalak e mulihi, mulih ku kutana, janah tading i je. Mulihi ka pagi igelari Jahwe kalak e “umatKu.” Kata-kata enda pasti ngapuli kalak e perban sangana latih kel ukur kalak e. Engkai maka janji e terteki? Perban si erjanji eme Jahwe, nina, “Aku Jahwe si ngerana janah si enggo ngelakokenca.”

8. (a) Engkai maka banci ikataken “kerina kalak Israel” mate? (b) Menurut Esekiel 37:9, kai si erbanca kalak Israel tempa-tempa mate? (Nen cataten i teruh.)

 ⁸ Engkai maka bangsa Israel bas jaman si mbarenda bali bagi tulan-tulan si kerah e? Bas tahun 740 SM, bangsa Israel menam mate secara rohani. Paksa si e, kerajan sepuluh suku ihancurken janah pendudukna itaban. Kira-kira 130 tahun kenca si e, kalak Juda pe itaban. Emaka, “kerina kalak Israel” dungna itaban. (Esek. 37:11) Banci sikataken kerina kalak si itaban e mate bali bagi tulan-tulan si lit bas pengenehenen Esekiel. * Bali bagi si enggo sibahas ndai, tulan-tulan e “kerah kel,” enda ertina enggo ndekah kalak e mate secara rohani. Memang payo, enggo lit 200 tahun lebih kalak Israel ras kalak Juda mate secara rohani, mulai tahun 740 SM seh ku tahun 537 SM.​—Jer. 50:33.

9. Kai si seri arah kalak Israel jaman si mbarenda ras “Israel si jadi jang Dibata”?

⁹ Nubuat kerna kalak Israel si ibebasken bagi si ipeseh Esekiel dungna terjadi ka sekali nari. (Perb. 3:21) Bali bagi kalak Israel si “ibunuh” mbarenda si tempa-tempa enggo ndekah mate, “Israel si jadi jang Dibata” ntah pe kerina kalak si ipilih ku surga pe ibunuh ka secara rohani. (Gal. 6:16) Kalak e pe itaban secara rohani, tempa-tempa enggo ndekah mate. Emaka secara rohani, kalak e bali bagi tulan-tulan “si kerah kel.” (Esek. 37:2) Bali bagi si enggo sibahas bas pasal sebelumna, kalak Kristen si ipilih ku surga, mulai itaban bas abad si peduaken. Kalak e itaban ratusen tahun dekahna bali bagi perumpaman Jesus kerna page ras sesa.​—Mat. 13:24-30.

10. (a) Nubuat kai si itulis bas Esekiel 37:7, 8? (b) Kai saja si erban kalak si itaban erkiniteken mulihi?

¹⁰ Enggo nubuatken Jahwe maka alu manjar-anjar nggeluh pagi mulihi umatNa. (Esek. 37:7, 8) Kalak si itaban si setia, mulai ka tek maka mulih pagi kalak e ku Israel. Engkai maka kalak e tek? Salah sada alasenna pasti perban nubuat-nubuat si pernah ipeseh nabi-nabi. Contohna, nubuatken Jesaya maka lit denga pagi kalak Israel si mulih ku negri e, kalak e ikataken “benih si badia.” (Jes. 6:13; Jop 14:7-9) Nubuat-nubuat Esekiel pe erban reh jelasna arapen kalak e. Terpegegehi ka kalak e ngidah kalak si deban si setia bagi Nabi Daniel. Selain si e, sanga kota Babilon italuken bas tahun 539 SM, e erban kalak e reh tekna maka banci pagi kalak e mulih.

11, 12. (a) Uga “Israel si jadi jang Dibata” alu manjar-anjar nggeluh mulihi? (Nen ka kotak “Alu Manjar-anjar Mulai Sembah Kalak Dibata alu Cara si Benar.”) (b) Penungkunen kai si turah arah Esekiel 37:10?

¹¹ “Israel si jadi jang Dibata” ntah pe kalak Kristen si ipilih ku surga, alu manjar-anjar nggeluh ka mulihi. Uga carana? Ratusen tahun dekahna kalak e itaban janah tempa-tempa mate kalak e. Tapi sanga lit kalak si erkiniteken man Dibata janah mulai belana kebenaren, mulai me “terbegi sora erderak-derak.” Contohna bas abad 16, terjemahken William Tyndale Pustaka ku bahasa Inggris. Tapi merawa peminpin-peminpin Gereja Katolik Roma perban Pustaka banci ibaca jelma si enterem. Dungna Tyndale pe ibunuh. Amin pe bage, lalap lit kalak si perpang guna nerjemahken Pustaka ku  bahasa-bahasa si deban. Emaka, terang kebenaren alu manjar-anjar nerangi kerina doni si gelap enda.

¹² Bas pudi wari, semangat kel Charles T. Russell ras teman-temanna ndarami kebenaren Pustaka si enggo bene. Sanga si e me ikataken “urat-urat ras daging” reh bas tulan-tulan e. Dungna kalak si meteruk ukur banci dat kebenaren arah majalah “Sora Ermomo Sion” (Zion’s Watch Tower) bage pe arah publikasi si debanna. Hasilna, ersada kalak e ras umat Dibata si ipilih ku surga. Bas awal tahun 1900, lit “Drama-Foto Penciptaan” ras buku “Rahasia si Enggo Terjadi” (The Finished Mystery). Si e kerina erban kiniteken umat Dibata si ipilih ku surga reh paguhna. La ndekah kenca si e, seh me waktuna man Dibata guna erban umatNa “tedis.” (Esek. 37:10) Ndigan e terjadi? Janah uga carana? Jawapenna banci sidat sanga sipelajari kari kai si terjadi mbarenda bas Babilon.

13. (a) Uga kata-kata si lit bas Esekiel 37:10, 14 mulai terjadi bas tahun 537 SM? (b) Arah kerajan sepuluh suku lit ka si mulih ku Israel, ayat si apai saja si mbuktiken kerna si e?

¹³ Mulai tahun 537 SM, kalak Jahudi si itaban i Babilon banci idahna pengenehenen Esekiel terjadi. Uga carana? Sanga  bebasken Jahwe kalak e janah pediatNa kalak e mulih ku Israel, nggeluh kalak e kerina jenari “tedis” ia kerina. Lit 42.360 kalak Israel ras kira-kira 7.000 kalak arah bangsa si deban si nadingken Babilon janah lawes ku Israel guna mulihi mbangun Israel ras rumah pertoton janah tading kalak e i je. (Esa. 1:1-4; 2:64, 65; Esek. 37:14) Kira-kira 70 tahun kenca si e, lit kira-kira 1.750 kalak si ikut ras Esra mulih ku Jerusalem. (Esa. 8:1-20) Emaka, lit lebih 44.000 kalak Jahudi si mulih ku kutana. Cocok adi kalak e ikataken “pasuken si seh kel teremna.” (Esek. 37:10) Kata Dibata pe ngataken maka kalak arah kerajan sepuluh suku ikut mulih ku Israel guna mbangun rumah pertoton. Kerajan sepuluh suku Israel enda eme si nini bulangna itaban kalak Assur bas tahun 740 SM.​—1 Kro. 9:3; Esa. 6:17; Jer. 33:7; Esek. 36:10.

14. (a) Uga kata-kata Esekiel 37:24 nampati kita meteh ndigan nubuat e terjadi ka mulihi? (b) Kai si terjadi bas tahun 1919? (Nen ka kotak “Kai Hubungenna ‘Tulan-Tulan si Kerah’ ras ‘Dua Saksi’?”)

¹⁴ Uga nubuat Esekiel e terjadi ka sekali nari? Bali bagi nubuat Esekiel si debanna, nubuat enda terjadi ka kenca Jesus eme Daud si Terbelinen mulai merentah jadi Raja. * (Esek. 37:24) Bas tahun 1919, bereken Jahwe kesah si badia man umatNa. Hasilna, kalak e “nggeluh” mulihi janah  ibebasken arah Babilon si Mbelin. (Jes. 66:8) Kenca si e, iban Jahwe kalak e tading bas “negri” kalak e eme pardis rohani. Tapi, uga umat Jahwe banci jadi “pasuken si seh kel teremna”?

15, 16. (a) Uga umat Jahwe bas jaman gundari banci jadi “pasuken si seh kel teremna”? (b) Uga nubuat Esekiel enda mpegegehi kita sanga ngadapi tentangen? (Nen kotak “Penampat gelah Megegeh Mulihi.”)

¹⁵ La ndekah kenca ipilih Kristus budak si setia bas tahun 1919, mulai idah umat Dibata nubuat Sakaria terjadi. Ernubuat Sakaria man tabanen si mulih ku Israel, nina, “Enterem kalak bage pe bangsa si megegeh reh pagi guna . . . ndarami Jahwe.” Kalak si ndarami Jahwe e, ikatakenna bagi “sepuluh dilaki arah kerina bangsa ras bahasa.” Nteguh itagangi kalak e jubah “sekalak Jahudi” eme Israel rohani janah nina kalak e, “Ikut ate kami ras kena, sebap begi kami Dibata kap ras kena.”​—Sak. 8:20-23.

¹⁶ Gundari, lit jutan kalak jadi anggota “pasuken si seh kel teremna” enda. (Esek. 37:10) Pasuken enda anggotana lit arah Israel rohani (kalak si ipilih ku surga) si nggeluh denga i doni bage ka pe “sepuluh dilaki” (biri-biri si deban). Perban kita ikut jadi pasuken Kristus, siikutken ateta Rajata eme Jesus si minpin kita ku doni si mbaru si dem pasu-pasu.​—Ms. 37:29; Esek. 37:24; Pil. 2:25; 1 Tes. 4:16, 17.

17. Kai kari sibahas bas pasal seterusna?

¹⁷ Perban enggo banci sisembah Jahwe alu cara si benar, emaka lit tugasta si seh kel pentingna. Kai e? Gelah banci siteh jawapenna, perlu sipelajari kai tugas si aloken Esekiel arah Dibata sope Jerusalem ikernepken. Sibahas kari kerna si e bas pasal seterusna.